Ехъошуа 18
18
ЯпшӀыкӀуенэрэ шъхьэр
Къэнэгъэ чӀыгу Ӏахьэр зэрагощыгъэр
1Израилхэр зэкӀэ Щылэу къалэ щызэӀукӀэхи, чэтэнгъэӀэгъэ лъапӀэр#18:1 Джурт лъэпкъым итарихъ иублэгъум кощын зэпымыужьхэм ахэт зэхъум, къыздырихьакӀынэу чэтэнгъэӀагъэр тхьэлъэӀупӀэ-къурмэншӀыпӀэу ыгъэпсыгъагъ. Еплъ: Тхылъэу «МысырикӀыжь» ия 40-рэ шъхьэ. ащ щагъэуцугъ. ЧӀыгур ахэм аубытыгъэхагъ, 2ау израил лӀэкъуиблым джыри яунэе Ӏахьэ аратыгъагъэп.
3Арыти, Ехъошуа израилхэм ариӀуагъ:
– Зиусхьанэу шъуятэхэм я Тхьэ унаеу къышъуитыгъэ чӀыгур шъукӀонышъ, шъуубытыным пае зыпари шъумышӀэу бэрэ джыри шъущысыщта? 4ЛӀакъо пэпчъ нэбгырэ щырыщ къызыхэжъугъэкӀых. ЧӀыгум рыкӀонхэшъ, къатхыхьанышъ, ар зэрэбгощын плъэкӀыщтыр къагъэнэфэнышъ, къысфагъэзэжьынэу ахэр сэ згъэкӀощтых. 5ЧӀыгур Ӏахьиблэу жъугощы. Ехъудэ къыблэмкӀэ щыӀэ ичӀыгу къерэнэжь, Юсыф къыхэкӀыгъэхэри темырымкӀэ щыӀэ ячӀыгу щэрэпсэух. 6ЧӀыгу Ӏахьиблэу къэнагъэр къэшъутхыхьи къысфэшъухьыжьи, сэ Зиусхьанэу ти Тхьэ ыпашъхьэ шъощ пае пхъэдзыр щисыдзэщт. 7Ау лэуйхэм шъуичӀыгу Ӏахьэ щыряӀэщтэп, ахэм яӀахьэр – Зиусхьаным ыпашъхьэ къурмэнышӀ Ӏофхэр щызэрахьанхэр ары. ЕтӀани Гъадрэ Рубэнрэ ялӀакъохэмрэ Мынасэ лӀакъом ызыныкъорэ ячӀыгу Ӏахьэхэр Иордан псыхъом итыгъэкъокӀыпӀэкӀэ Зиусхьаным иӀумэтэу Мосэ щаритыгъэх.
8Къыхахыгъэ цӀыфхэр тэджхи, чӀыгур къатхыхьанэу гъогум зыщытехьащтхэм Ехъошуа ахэм унашъо афишӀыгъ:
– ШъукӀуи, чӀыгур къэшъукӀухьи, къэшъутхыхь. ЕтӀанэ къэжъугъэзэжьи, Щылэу къалэм, садэжь, шъукъэкӀожьи, Зиусхьаным ыпашъхьэ пхъэдзыр сэ шъощ пай щисыдзэщт.
9Арыти, а цӀыфхэр кӀохи, чӀыгур къаплъыхьи, ит къалэхэр зэкӀэ къатхыхьэхи, Ӏахьиблэу гощыгъэу зэрытхэгъэ тхылъыпӀэр къахьи, Щылэу уцупӀэм дэс Ехъошуа дэжь къэкӀожьыгъэх. 10Джащыгъум Ехъошуа Зиусхьаным ыпашъхьэ Щылэу пхъэдзыр щыридзи, израил лӀакъоу къэнагъэхэм чӀыгу Ӏахьэхэр афигощыгъэх.
Бинямин лӀакъом ичӀыгу Ӏахь
11Бинямин лӀакъом хэхьэрэ унагъохэм пхъэдзым къафикӀыгъэ чӀыгур Ехъудэрэ Юсыфрэ ялӀакъохэм атефагъэм азыфагу илъыгъ:
12ТемырымкӀэ гъунапкъэр Иордан псыхъом къыщежьэти, Ерыхъэу итемыр лъэныкъокӀэ къушъхьэ чапэм тетэу лъыкӀуатэщтыгъэ, етӀанэ къушъхьалъэм дэкӀуаети, Бэтаон шъофнэкӀым нэсыщтыгъэ. 13Ащ икӀыти, Луз (Бэтэл) къалэм икъыблэкӀэ щыӀэ къушъхьэм рекӀокӀыти, етӀанэ Ӏэтэрот-АдаркӀэ ехыти, КӀахэ Бэтхъорэн икъыблэкӀэ щыӀэ къушъхьэм екӀущтыгъэ.
14А чӀыпӀэм къыблэмкӀэ щигъазэти, къохьэпӀэ лъэныкъомкӀэ щыӀэ гъунапкъэр къыгъэнафэщтыгъэ – Бэтхъорэн къыблэмкӀэ пэчӀынэтӀэ Ӏуашъхьэм ар къыщежьэти, Ехъудэ къытекӀыгъэхэм якъалэу Къыриат-БэӀал (Къыриат-ЕӀэрим) дэжь щиухыщтыгъэ. Джары къохьэпӀэ гъунапкъэщтыгъэр.
15Къыблэ гъунапкъэр Къыриат-ЕӀэрим итыгъэкъохьэпӀэ хэгъуашъхьэ щегъэжьагъэу Нэфтэуахъ псынэкӀэчъым нэсыщтыгъэ. 16Ащ ыуж гъунапкъэр Хъынэм ыкъо икӀэй пэчӀынатӀэу Рэф кӀэим итемыр лъэныкъокӀэ къушъхьэ лъапэм ехыщтыгъэ. Хъынэм кӀэим икӀыти, еусхэм якъалэ икъыблэ чапэ тетэу Рэугъэл псынэкӀэчъымкӀэ гъунапкъэм ригъэзыхыщтыгъэ. 17ЕтӀанэ темырымкӀэ ыгъазэти, Ӏэн-Щэмэщ екӀути, Адумым лъэгапӀэм пэчӀынэтӀэ Гъэлылот нэсыти, Рубэн ыкъо Бохъан имыжъокӀэ ехыщтыгъэ. 18Бэт-Ӏараб#18:18 Ижъырэ урымыбзэкӀэ тхыгъэ Ӏэпэрытхыхэм ащыщ джаущтэу хэт. Ижъырэ джуртыбзэкӀэ тхыгъэ Ӏэпэрытхым зэрэхэтыр «АрбаӀ пэчӀынатӀэу чапэм». итемыр къушъхьэ чапэ нэсыти, Иордан кӀэим ихьэщтыгъэ. 19Ащ ыуж гъунапкъэр Бэтхъогъэл итемыр къушъхьэ чапэ рыкӀоти, Иордан псыхъом дэжь хы Щыугъэм итемыр хытӀуалэ нэсыщтыгъэ. Джары къыблэ гъунапкъэщтыгъэр.
20ТыгъэкъокӀыпӀэмкӀэ гъунэпкъагъэр Иордан псыхъор арыгъэ.
Бинямин лӀакъом хэхьэрэ унагъохэм ячӀыгу джары гъунапкъэу иӀагъэхэр.
21Бинямин лӀакъом хэхьэрэ унагъохэм афэгъэзэгъэгъэ къалэхэр:
Ерыхъэу, Бэтхъогъэл, Ӏэмэкъ-Кэцыц, 22Бэт-Ӏараб, Цэмарим, Бэтэл, 23Ӏао, Парэ, Ӏофрэ, 24Къэфар-Ӏамоный, Ӏофный, ГъыбӀэ – къэлэ пшӀыкӀутӀу, яӀэгъо-блэгъу псэупӀэхэр ягъусэу.
25ГъыбӀон, Рамэ, БэӀэрот, 26Мыцпэ, Къэфирэ, Моц, 27Рэкъэм, Ирпыел, Тэралэ, 28ЦэлаӀ, Елэф, еусхэм якъал (Ерусэлэм), ГъыбӀэ, Къыриат-ЕӀэрим#18:28 Ижъырэ урымыбзэкӀэ тхыгъэ Ӏэпэрытхыхэм ащыщ джаущтэу хэт. Ижъырэ джуртыбзэкӀэ тхыгъэ Ӏэпэрытхым зэрэхэтыр «Къыриат». – къэлэ пшӀыкӀуплӀ, яӀэгъо-блэгъу псэупӀэхэр ягъусэу.
Джащ фэдагъ Бинямин лӀакъом хэхьэрэ унагъохэм къатефэгъэ чӀыгур.
Currently Selected:
Ехъошуа 18: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
