Ехъошуа 14
14
ЯпшӀыкӀуплӀэнэрэ шъхьэр
Иорданым итыгъэкъохьапӀэкӀэ щыӀэ чӀыгур зэрагощыгъэр
1Унэе Ӏахьэу израилхэм къэнаӀан чӀыгум щаратыгъэр, ар къурмэнышӀэу ЕлыӀазар, Ныун ыкъо Ехъошуа, израил лӀакъохэм янахьыжъ упчӀэжьэгъухэм мары зэрагощыгъэр: 2Зиусхьаным Мосэ ижэдэкӀэу израилхэм унашъо къызэрафишӀыгъэм фэдэу лӀэкъуибгъурэ ныкъорэм (Мынасэ илӀакъо ызыныкъо ахэтэу) пхъэдзкӀэ ар атырагощагъ. 3Адрэ лӀэкъуитӀурэ ныкъорэм Мосэ Иорданым итыгъэкъокӀыпӀэкӀэ унэе Ӏахьэр ыпэкӀэ щаритыгъагъ, ау лэуйхэм унэе Ӏахьэ аритыгъэп. 4Юсыф къытекӀыгъэхэр зы лӀакъоп тӀу зэрэхъугъэхэр. Ахэр Мынасэрэ Ефраимрэ ялӀакъохэр арых. Лэуйхэм унэе Ӏахьэ аратыгъэп, ахэр адэсынхэу къалэхэмрэ ябылымхэр ащаӀыгъынхэу хъупӀэхэмрэ арых ныӀэп аратыгъэхэр. 5Зиусхьаным Мосэ унашъо къызэрэфишӀыгъэм фэдэу израилхэм чӀыгур агощыгъ.
Хъэурэн къалэр Къалэб зэрэратыгъэр
6Ехъудэ лӀакъом щыщхэр Ехъошуа дэжь Гъылгъал къэкӀуагъэх. Купым хэтыгъэ къынэзылӀэу Епунэх ыкъо Къалэб Ехъошуа риӀуагъ:
– О къэошӀэжьыба, Тхьэм ицӀыфэу Мосэ орырэ сэрырэ къытфэгъэхьыгъэу Къадэщ-Барнэ Зиусхьаным къыщыриӀуагъэр. 7Зиусхьаным иӀумэтэу Мосэ Къадэщ-Барнэ сыригъэкӀи, чӀыгур къэсплъыхьанэу сызегъакӀом илъэс тӀокӀитӀу сыныбжьыгъ. Ащыгъум сэ зи сымыушъэфэу къэбар шъыпкъэр къыфэсхьи, сыкъэкӀожьыгъэми, 8сшыхэу, сигъусэу къыздэкӀуагъэхэм, лъэпкъым ыгу агъэкӀодыгъ. Ауми, сэ Зиусхьанэу си Тхьэ сыфэшъыпкъагъ. 9А мафэм Мосэ тхьэлъанэ къысфишӀыгъагъ: «Зиусхьанэу уи Тхьэ о уфэшъыпкъагъэшъ, чӀыгоу плъэкъуитӀу зынэсыгъэр, ори уикӀалэхэми егъашӀэми шъуиунэе Ӏахьэщт».
10Джы, мары, Зиусхьаным гущыӀэ пытэ къызэритыгъагъэу, непэ къызнэсыгъэми сэпсэу. Зиусхьаным Мосэ а гущыӀэхэр къызыриӀуагъэхэм ыуж илъэс тӀокӀитӀурэ тфырэ тешӀэжьыгъ, ащыгъум израилхэр шъофнэкӀым итыгъэх. Мары, сэ илъэс тӀокӀиплӀырэ тфырэ сыныбжьыми, 11Мосэ чӀыгур къэсплъыхьанэу сызигъэкӀогъэгъэ мафэм фэдэ къабзэу джыри скӀуачӀэ сыкъегъэгугъэ. Ащыгъум кӀуачӀэу сиӀагъэр джыри зэрэсиӀ, утыгум сихьани, сызэони сыкъикӀыжьын слъэкӀыщт. 12Мы къушъхьалъэхэм афэгъэхьыгъэу Зиусхьаным а мафэм гущыӀэ пытэ къышӀыгъагъэшъ, ахэр къысэтых. Ӏэнэкъхэр ащ зэрэщыпсэущтыгъэхэр, къэлэшхохэр, къэлэ зэтегъэпытыхьагъэхэр ахэм зэряӀагъэхэр ащыгъум ори зэхэпхыгъагъ. ПшӀэхэнэп, Зиусхьаныр гъусэ къысфэхъумэ, Ащ зэриӀуагъэу, ахэр исфыщтых.
13Арыти, Ехъошуа Епунэх ыкъоу Къалэб ынэшӀу щифи, унэе Ӏахьэу Хъэурэн къалэр зэрэритырэр риӀуагъ. 14Зиусхьанэу Израилым и Тхьэ ар фэшъыпкъагъэти, джащ щегъэжьагъэу къынэзылӀэу Епунэх ыкъоу Къалэб Хъэурэн иунэе Ӏахьэ хъугъэ. 15ЫпэкӀэ Хъэурэн Къыриат-АрбаӀкӀэ#14:15 АрбаӀ икъал зыфэпӀощт мэхьанэр къекӀы. еджэщтыгъэх. (А АрбаӀыр Ӏэнэкъхэм анахь цӀыф инэу ахэтыгъэр ары).
Заор аухи, чӀыгуми мамыр ыгъотыжьыгъ.
Currently Selected:
Ехъошуа 14: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
