Ехъошуа 13
13
ЯпшӀыкӀущэнэрэ шъхьэр
Амыубытыгъэ чӀыгухэр
1Ехъошуа жъы хъуи, ыныбжь зыхэкӀуатэм, Зиусхьаным ащ къыриӀуагъ:
– О жъы ухъугъ, уныбжьи хэкӀотагъ, ау заокӀэ къызӀэкӀэмыгъэхьэгъэ чӀыгоу джыри бэдэдэ къэнагъ:
2зэкӀэ фылистхэмрэ гъышыурхэмрэ ячӀыналъэхэр, ахэр – 3Мысырым итыгъэкъокӀыпӀэкӀэ щыӀэ Шихъор псыхъом щегъэжьагъэу темырымкӀэ Ӏэкърэн игъунапкъэ нэс, къэнаӀанхэм ячӀыгухэу алъытэх. Ахэм ахэхьэх фылист пачъыхьитфым якъалэхэу Ӏазэ, Ащдэд, Ащкъэлэн, Гъат, Ӏэкърэн, Ӏаохэм ячӀыгоу къыблэмкӀэ щыӀэри къыхеубытэ.
4ЕтӀани зэкӀэ къэнаӀан чӀыгур Цыдон ит МэӀарэ щегъэжьагъэу Афэкъ къалэм нэс, амэрхэм ягъунапкъэ еолӀэжьырэр.
5Джащ фэдэу темырымкӀэ гъэбалмэ ячӀыгурэ Ливан зэрэпсэоу итыгъэкъокӀыпӀэ гъунапкъэ нэсэу: Хъэрмон къушъхьэм кӀэрыт БэӀал-Гъад щегъэжьагъэу Лэу-Хъамат#13:5 Е: «Хъамат къушъхьэ дэкӀыпӀэр». нэс къэнагъ.
6Цыдонхэр пӀомэ, Ливан щегъэжьагъэу Мысрэфот-Маим нэсыфэ къушъхьалъэхэм ащыпсэухэрэр, ахэр зэкӀэ Сэ Сэр-Сэрэу израилхэм апашъхьэ исфыщтых. Мы чӀыгур Сэ унашъо къызэрэпфэсшӀыгъэм фэдэу, Израилым о фэгощи, 7лӀэкъуибгъумрэ мынасэ лӀакъом ызыныкъорэ ар яунэе Ӏахьэу ят.
Иордан итыгъэкъокӀыпӀэкӀэ щыӀэ чӀыгур зэрагощыгъэр
8Мынасэ лӀакъом адрэ ызыныкъуи, рубэнхэми гъадхэми яунэе Ӏахьэу Иордан псыхъом икъокӀыпӀэ лъэныкъо Мосэ, Зиусхьаным иӀумэт, щафигъэнэфэгъагъэр аритыгъэхагъ.
9А лӀакъохэм яунэе Ӏахьэ къыблэмкӀэ Арнон псыхъо нэпкъым тет ӀароӀэр къалэмрэ кӀэим ыгузэгу ит къалэмрэ къащежьэщтыгъэ, бгы тешъор зэрэпсаоу Мэдэбэ щегъэжьагъэу Дыбэн нэсэу къыхиубытэщтыгъэ. 10Джащ фэдэу амэр пачъыхьэу Хъэщбэн дэсыгъэ Сыхъон зэкӀэ икъалэхэри, Ӏамонхэм ячӀыгу гъунапкъэ нэс хахьэщтыгъэ. 11ГъылыӀад чӀыгур, Гъышыуррэ МаӀахрэ къатекӀыгъэхэр зыщыпсэухэрэ чӀыгухэр, къушъхьэу Хъэрмон, зэкӀэ Бащан чӀыналъэр Сэлкъах нэсэу – 12Бащан пачъыхьэу Ӏогъ, аужырэ рэф цӀыфэу къэнагъэхэм ащыщэу Ӏащтарэтрэ ЕдрэӀрэ ащыпсэущтыгъэхэм зэкӀэ ипачъыхьэгъу. Мосэ а пачъыхьэм текӀуагъ, ичӀыгухэри ыштагъэх. 13Ау израилхэм Гъышыуррэ МаӀахрэ ащыпсэухэрэр рафыгъэхэп. Непэ къызынэсыгъэми ахэр израилхэм ахэсхэу адэпсэух.
14Мосэ лэуй лӀэкъо закъом унэе Ӏахьэ ритыгъэп: Зиусхьанэу Израилым и Тхьэ Мосэ къызэрэриӀуагъэу машӀокӀэ гъэстыгъэ къурмэнхэу Ащ фашӀыхэрэр лэуйхэм яунэе Ӏахь.
15Мосэ Рубэн лӀакъом хэхьэрэ унагъохэм мары аритыгъэр:
16Арнон псыхъо нэпкъым тет ӀароӀэр къалэмрэ кӀэим ыгузэгу ит къалэмрэ къащегъэжьагъэу Мэдэбэ бгы тешъор зэкӀэ, 17Хъэщбэн зэрыт бгы тешъом ит къалэхэр зэкӀэ игъусэу: Дыбэн, Бамот-БэӀал, Бэт-БэӀал-МэӀон, 18Ехэц, Къэдэмэт, МефэӀат, 19Къыриатаим, Сыбмэ, кӀэй гузэгум ит Ӏуашъхьэм тет Цэрэт-Шахъар, 20Бэт-ПэӀор, Пысгъахърэ Бэт-Ешимэтрэ якъушъхьэ чапэхэмрэ 21– бгы тешъом тет къалэхэр зэкӀэ, Хъэщбэн тетыгъор щызыӀыгъыгъэ амэр пачъыхьэу Сыхъон ипачъыхьэгъу зэрэпсаоу. Мосэ ащи, мыдиан пащэхэу Еуыи, Рэкъэми, Цыури, Хъури, РэбаӀи атекӀуагъ. Ахэр Сыхъон икъотэгъугъэх, ипачъыхьэгъу щыпсэущтыгъэх. 22Заом щаукӀыгъэхэм анэмыкӀэу израилхэм чатэкӀэ аукӀыгъ БэӀор ыкъоу БэлыӀам усэрэжъыри. 23Рубэнхэм ячӀыгу тыгъэкъохьапӀэмкӀэ игъунэпкъагъэр Иордан псыхъом инэпкъ арыгъэ. А къалэхэри ахэм яӀэгъо-блэгъо псэупӀэхэри Рубэн лӀакъом хэхьэрэ унагъохэм яунэе Ӏахьэу щытыгъ.
24Мосэ Гъад лӀакъом хэхьэрэ унагъохэм мары аритыгъэр:
25ЯӀызэр чӀыгур, ГъылыӀад хэхьэрэ къалэхэр зэкӀэ, Ӏамонхэм ячӀыгу ызыныкъо Раббэ пэблагъэу щыт ӀароӀэр нэс; 26Хъэщбэн щегъэжьагъэу Рамат-Мыцпэрэ Бытэнимрэ анэс, Махъанаим щегъэжьагъэу Дэбир чӀыгухэм анэс; 27кӀэим ит Бэтхъарам, Бэтнымыр, Сукъот, Цафэн къалэхэр, Хъэщбэн пачъыхьэу Сыхъон ипачъыхьэгъу щыщэу къэнэжьыгъэр (ар – Иордан псыхъом итыгъэкъокӀыпӀэкӀэ щыӀэ чӀыгухэу Къынэрэт псыхъураим нэсыхэрэр арых). 28А къалэхэри ахэм яӀэгъо-блэгъо псэупӀэхэри Гъад лӀакъом хэхьэрэ унагъохэм яунэе Ӏахьэу щытыгъ.
29Мосэ Мынасэ лӀакъом ызыныкъом хэхьэрэ унагъохэм мары чӀыгоу аритыгъэр:
30Махъанаим щегъэжьагъэу зызыубгъугъэ чӀыгур, Бащан зэрэпсаоу – Ӏогъ пачъыхьэм ипачыхьэгъу хэхьэрэ чӀыгур, Бащан итыгъэхэ Яир псэупӀэ тӀокӀищыр зэкӀэ, 31ГъылыӀад чӀыналъэм ызыныкъуи, Ӏогъ тетыгъор зыщиӀыгъыгъэхэ къалэхэу Ӏащтарэти ЕдрэӀи. Джар Мынасэ ыкъо Махыр лӀакъом ызыныкъом хэхьэрэ унагъохэм яунэе Ӏахьэу щытыгъ.
32Иордан псыхъом итыгъэкъокӀыпӀэкӀэ Ерыхъэу пэчӀынатӀэу Моаб шъофым итыхэзэ, джары чӀыгур Мосэ унэе Ӏахьэу зэрэщигощыгъэр. 33Ау Мосэ Лэуй лӀакъом унэе Ӏахьэ ритыгъэп: Ежь, Зиусхьанэу Израилым и Тхьэ, Ащ къызэрариӀуагъэу, Ежь Ар ахэм яунэе Ӏахьэу щыт.
Currently Selected:
Ехъошуа 13: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
