Гъуазэхэр 20
20
ЯтӀокӀэнэрэ шъхьэр
Израилхэм биняминхэр зэрэзыхафыгъэхэр
1Дан итемыр лъэныкъо щегъэжьагъэу къыблэм щыӀэ БэрщэбаӀ нэс, ГъылыӀад чӀыналъэри хэтыжьэу ащыпсэурэ израилхэр зэкӀэ, зы нэбгырэ фэдэу къакӀохи, Зиусхьаным ыпашъхьэ Мыцпэ къыщызэрэугъоигъэх. 2Лъэпкъ псэум, зэкӀэ израил лӀакъохэм япащэхэр Тхьэм илъэпкъ зэхахьэ къэкӀуагъэх. Ахэр уӀэшыгъэ лъэс зэолӀ мин шъиплӀ хъущтыгъэх. 3А уахътэм бинямин лӀакъом къэбаркӀэ зэхихыгъ, израилхэр Мыцпэ зэрэщызэрэугъоигъэхэр. Арыти, израилхэм лэуим раӀуагъ:
– КъытфэӀуатэба, мы бзэджэшӀэгъэшхор сыдэущтэу хъугъа?
4Арыти, бзылъфыгъэу аукӀыгъэм ишъхьэгъусэ лэуим къафиӀотагъ:
– Сэрырэ сишъуз гуадзэрэ тызэгъусэу Бинямин чӀыналъэм ит ГъыбӀэ тыкъызэсым, чэщыр щитхынэу ащ тыкъыщыуцугъ. 5СаукӀын яхьисапэу чэщым ГъыбӀэ дэсхэр къэзэрэугъойхи, сызэрыс унэр къаухъурэигъ. Ахэр сишъуз гуадзэ ебэнхи, ар лӀагъэ. 6Ахэм Израилым щашӀагъэр емыкӀушхоти, хьакӀэ-къокӀагъэти, сэ бзылъфыгъэр пкъырыпкъэу зэпкъырысхи, Израилым ичӀыналъэхэм зэкӀэм афязгъэхьыгъ. 7Арышъ, джы шъо, израилхэм зэкӀэми, мы Ӏофым шъухаплъи, еплъыкӀэу фышъуиӀэр къашъуӀо.
8Джащыгъум лъэпкъыр зэрэпсэоу, зы нэбгырэ фэдэу къызэкъоуцуи, къыӀуагъ:
– Тащыщ горэми ищагу ыгъэзэжьыщтэп, иуни кӀожьыщтэп. 9Непэ ГъыбӀэ мары етшӀэщтыр: пхъэдз итыдзэни, ащ къызэригъэлъагъорэм тетэу, текӀуни, тытеощт. 10Дзэм ышхыщтыр къаугъоинэу Израилым илӀакъохэм ащыщ нэбгыришъэ пэпчъ лӀипшӀ, мин пэпчъ лӀишъэ, минипшӀ пэпчъ лӀы мин къахэтхыщт. ЕтӀанэ дзэр Бинямин чӀыналъэм ит ГъыбӀэ кӀони, Израилым щызэрэхьагъэ хьакӀэ-къокӀагъэм ипэгъокӀ аригъэгъотыжьынэу амал иӀэу хъущт.
11ЗэкӀэ Израилым изэолӀхэр къэзэрэугъоихи, зэкъоуцохи, зы нэбгырэ фэдэу а къалэм пэуцугъэх.
12Израил лӀакъохэм зэкӀэ Бинямин лӀакъом цӀыфхэр фагъакӀохи:
– Сыд фэдэ Ӏоф бзэджэшӀэгъэшхуа шъо шъуадэжь щызэрахьагъэр? – АӀуи, арагъэупчӀыгъэх. 13– Ащыгъум, а цӀыф нэпэнчъэу ГъыбӀэ дэсхэр къытэшъутхи, тэ ахэр тыукӀынхэшъ, Израилым ер идгъэкӀодыкӀыщт.
Ау биняминхэр ялъэпкъэгъу израилхэм аӀорэр зэхахынэу фэягъэхэп. 14Якъалэхэм къарыкӀхи, израилхэм къязэонхэ ямурадэу ахэр ГъыбӀэ къыщызэрэугъоигъэх. 15А мафэм къалэхэм къарыкӀыгъэхэу Бинямин лӀакъом щыщэу, уӀэшыгъэ зэолӀ нэбгырэ мин тӀокӀрэ хырэ къалъытагъ. Ащ нэмыкӀэу ГъыбӀэ къалэм щыпсэухэрэм лӀыблэнэ нэбгырэ шъибл къахашыпыкӀыгъ. 16Ащ фэдиз дзэм ухигъэплъыхьанэу Ӏэсэмэгу зэолӀ нэбгырэ шъибл хэтыгъ, хэти мыохъоу мыжъодзымкӀэ шъхьац налъэм тыригъафэщтыгъэ.
17Биняминхэр хэмытхэу Израилым уӀэшыгъэ зэолӀ нэбгырэ мин шъиплӀ къыгъэуцугъ, ахэр зэкӀэ заом фэгъэсэгъагъэх.
18Израилхэр Бэтэл къакӀохи, Тхьэм зыфагъази:
– Хэта тащыщэу биняминхэм апэ заокӀэ якӀун фаер? – АӀуи, еупчӀыгъэх.
– Апэ Ехъудэр орэкӀо, – Зиусхьаным джэуап къалъигъэӀэсыжьыгъ.
19Ыужырэ пчэдыжьым израилхэр кӀохи, дзэ уцупӀэ ГъыбӀэ дэжь щагъэпсыгъ. 20Израилхэр бинямин лӀакъом заокӀэ пежьэхи, зэоным фэхьазырхэу ГъыбӀэ пэчӀынатӀэу уцугъэх. 21Биняминхэр ГъыбӀэ къыдэкӀхи, а мафэм израилхэм янэбгырэ мин тӀокӀрэ тӀурэ хагъэфагъ. 22Ау израилхэм гу къызӀэпашӀыхьажьи, апэрэ мафэм зыдэщытыгъэхэ чӀыпӀэм джыри зэоным фэхьазырхэу уцужьыгъэх. 23Ыпэрэ мафэм ахэр кӀохи, пчыхьэ охъуфэ Зиусхьаным ыпашъхьэ щыгъыгъэх, яупчӀэхэри Зиусхьаным фагъэзагъэх:
– Ткъош биняминхэм тязэонэу джыри тыкӀощта? – АӀуи, еупчӀыгъэх.
Арыти:
– ШъукӀуи, шъуапэуцу. – Зиусхьаным иджэуап къалъигъэӀэсыжьыгъ.
24Джащыгъум, ятӀонэрэ мафэм, израилхэр лъыкӀуатэхи, биняминхэм благъэу акӀэрыуцуагъэх. 25Ау ахэм япэгъокӀэу биняминхэр ГъыбӀэ къыдэкӀхи, къязаохи, мызэгъогум израил нэбгырэ мин пшӀыкӀуй хагъэфагъ, ахэр зэкӀэ уӀэшыгъэ зэолӀыгъэх.
26Арыти израилхэр, зэкӀэ лъэпкъыр зэрэпсэоу, Бэтэл кӀожьхи, Зиусхьаным ыпашъхьэ исхэу гъыгъэх. А мафэм пчыхьашъхьэ нэс анэкӀыгъ, къурмэнгъэстхэри мамыр къурмэнхэри Зиусхьаным фашӀыгъэх. 27ЕтӀанэ израилхэм яупчӀэ Зиусхьаным фагъэзагъ. А уахътэм Тхьэм дашӀыгъэ зэзэгъыныгъэр зытет мыжъобгъуитӀур зыдэлъ пхъонтэ лъапӀэр#20:27 Пкъыгъо лъапӀэхэр зыдэлъыщт пхъуантэ ышӀынэу Тхьэм Мосэ зэгорэм унашъо къыфишӀыгъагъ. Тхьэм иунэшъуипшӀ зытетхэгъэ мыжъобгъуитӀур ащ дэлъхэм ащыщыгъэх. Еплъ: тхылъэу «МысырикӀыжь» 25:10-22. Бэтэл щыӀагъ, 28къурмэнышӀ шъхьаӀащтыгъэр Хьарунэ ыкъо ЕлыӀазар къыхэкӀыгъэ Пинхъас арыти, Зиусхьаным еупчӀыгъ:
– Ткъош биняминхэм тязэонэу джыри тыкӀощта, хьауми тымыкӀощта?
Зиусхьаным иджэуап къылъигъэӀэсыжьыгъ:
– ШӀукӀу. Неущ ахэр Сэ шъо шъуӀэ къислъхьащтых.
29Джащыгъум Израил щыщхэм тӀысыпӀэ шъэфхэр ГъыбӀэ пэмычыжьэу тыдэкӀи щашӀыгъэх. 30Израилхэр ящэнэрэ мафэм биняминхэм язэонхэу, ыпэрэхэм афэдэу, зыдэщытыгъэхэ чӀыпӀэм джыри зэоным фэхьазырхэу, ГъыбӀэ пэчӀынатӀэу, уцужьыгъэх. 31Биняминхэр илъыгъокӀэ пыим къыпэгъокӀхи, къалэм Ӏуащыгъ. Ыпэрэ мафэхэм афэдэу израилхэм къязаозэхэ, нэбгырэ щэкӀ фэдиз чӀарагъэнагъ. Ахэр укӀыгъэхэу шъофым къинагъэх, гъогоу Бэтэлрэ ГъыбӀэрэ якӀухэрэм къатенагъэх. 32Биняминхэм гушхоу:
– Ыпэрэм фэдэу тэ ахэр тыукӀыщтых, – аӀофэ, израилхэм рахъухьагъ:
– ТызэкӀакӀозэ, къалэм кӀэрытщынхэшъ, гъогухэм атетщэщтых.
33Израилхэм якӀочӀэ нахьышъхьэ кӀуати, БэӀал-Тамар дэжь уцугъ, ардэдэм ГъыбӀэ итыгъэ къохьэпӀэ лъэныкъокӀэ щысыгъэхэм ятӀысыпӀэ къабгыни, къалэм теуагъэх. 34Израилым изэолӀ анахьышӀоу нэбгырэ минипшӀыр ГъыбӀэ екӀухи, зэошхор щырагъэжьагъ, ау щытми тхьамыкӀагъор къызэрафэсыгъэр биняминхэм къагурыӀуагъэп. 35Зиусхьаным биняминхэр Израилым ыпашъхьэ щызэхикъутэхи, бинямин нэбгырэ мин тӀокӀрэ тфырэ нэбгыришъэрэ а мафэм израилхэм аукӀыгъэх, ахэр зэкӀэ уӀэшыгъэ зэолӀыгъэх. 36Биняминхэм джащыгъум къазэрэтекӀуагъэхэр къагурыӀуагъ.
А зэкӀэри мары зэрэхъугъэр#20:36 Ижъырэ джуртыбзэкӀэ тхыгъэ Ӏэпэрытхым мы гущыӀэухыгъэр хэтэп..
Израилхэр зэкӀакӀощтыгъэх, ГъыбӀэ пэтӀысыгъэхэм ахэр ащыгугъыщтыгъэх. 37ЗэолӀэу пэтӀысыгъэхэр, псынкӀэу ГъыбӀэ теохи, къалэм дахьэхи, дэсхэр зэкӀэ чатэкӀэ аукӀыгъэх. 38-39Къалэм Ӏугъо кореныр къышъхьарих зыхъукӀэ, ар ямэкъэгъэӀу тамыгъэу, залъэгъукӀэ, кӀочӀэ нахьышъхьэм зыкъыӀэтыни, атеонхэу израилхэр пэтӀысыгъэхэм агурыӀогъагъэх.
Бинямин зэолӀхэм нэбгырэ щэкӀым кӀахьэу израилхэр аукӀыгъэхэти, ахэр гугъагъэх:
– Щэч хэлъэп, ыпэрэ зэогъухэм афэдэу тэ ахэр зэхэткъутэщтых.
40Ары шъхьай биняминхэр зызэплъэкӀхэм алъэгъугъ къалэм зэфэдэкӀэ Ӏугъо кореныр къызэрэшъхьащыуцуагъэр, уашъом нэсэу ащ зызэриӀэтырэр. 41А дэдэм израилхэм къытырагъэзагъэти, тхьамыкӀагъо къазэрэфэсыгъэр биняминхэм къагурыӀуи, къэщынагъэх. 42Ахэр шъофнэкӀым екӀурэ гъогум телъадэхи, ечъэжьагъэх, ау пыир кӀэкӀэу ауж итэу язаощтыгъэ. Адрэ лъэныкъомкӀи къалэм#20:42 Ижъырэ джуртыбзэкӀэ тхыгъэ Ӏэпэрытхым зэрэхэтыр «къалэхэм». къыдэкӀыгъэ купри къапэуцугъэу, азыфагу даубытагъэу зэтыраукӀэщтыгъэх. 43Ахэр къаухъурэигъэхэу, афыхэзэ, Ныухъэ щегъэжьагъэу#20:43 Е: «зыгъэпсэфыгъо ямыӀэу афызэ». ГъыбӀэ итыгъэкъокӀыпӀэ лъэныкъо нэсыфэхэ аукӀыгъэх. 44Биняминхэм ащыщэу нэбгырэ мин пшӀыкӀуй а заом щыфэхыгъ, ахэр зэкӀэ зэолӀ блэнагъэх. 45Къэнагъэхэм агъази шъофнэкӀымкӀэ Римон къушъхьэ цакӀэ лъэныкъомкӀэ чъагъэх, ау а гъогуми израилхэм нэбгырэ минитф щызэтыраукӀагъ. Ахэм биняминхэр ГъыдыӀом нэс афыфэхэ, джыри нэбгырэ минитӀу аукӀыгъ.
46УӀэшыгъэ бинямин нэбгырэ мин тӀокӀрэ тфырэ а мафэм фэхыгъ, ахэр зэкӀэ зэолӀ блэнагъэх. 47Ау нэбгырэ шъих аӀэкӀэкӀи, шъофнэкӀым ихьажьхи, ашъхьэ Римон къушъхьэ цакӀэм рахьылӀэжьи, мэзиплӀэ ахэр а чӀыпӀэм щыӀагъэх. 48ЕтӀанэ израилхэм къагъэзэжьи, Бинямин чӀыналъэм зыщыӀукӀагъэхэр зэкӀэ – орэцӀыфы, орэпсэушъхьэ еблэми, къапэкӀэфэгъэ пстэури чатэкӀэ аукӀыгъэх. Ягъогу тет къалэхэр зэкӀэ машӀо акӀадзэзэ, агъэстыгъэх.
Currently Selected:
Гъуазэхэр 20: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
