Гъуазэхэр 19
19
ЯпшӀыкӀубгъонэрэ шъхьэр
Бинямин хэкум ит ГъыбӀэ къалэ щыпсэухэрэм бзэджэшӀагъэу ашӀагъэр
1А уахътэм, Израилым пачъыхьэ зимыӀагъэм, Ефраим къушъхьалъэ чыжьэм зы лэуй горэ щыпсэущтыгъ. Ехъудэм ит Бэтлэхъэм къалэм щыщ бзылъфыгъэ горэ ащ шъуз гуадзэу ыштагъ. 2Ау бзылъфыгъэм лэуим зыфигъэгуси#19:2 Е: «фэшъыпкъагъэп»., ятэ дэжь ыгъэзэжьыгъ. Бзылъфыгъэр тыщым зыщыӀэр мэзиплӀ хъугъэу, 3ыгу ыгъэшӀунышъ, къыщэжьынэу лӀыр ащ дэжь кӀуагъэ. Лэуим иунэӀут кӀалэ игъусагъ, щыдитӀуи зыдищагъ. Бзылъфыгъэм лӀыр унэм рищагъ, ятэ ар зелъэгъум гушӀозэ къыпэгъокӀи, ригъэблэгъагъ. 4Бзылъфыгъэм ятэ, лэуим ишӀупщ, махълъэр къыригъэшӀуи, ыдэжь къыгъэнагъ. Арыти, мэфищым къыкӀоцӀ лэуир ащ щышхагъ, щешъуагъ, щычъыягъ.
5ЯплӀэнэрэ мафэм ахэр жьэу къэтэджыгъэх, гъогум техьажьынхэу загъэхьазырыгъ, ау бзылъфыгъэ ныбжьыкӀэм ятэ махълъэм къыриӀуагъ:
– Хьалыгъу Ӏулъхьэ горэ апэ зыӀугъафи, угу къыкӀиубытэнэу, етӀанэ шъукӀожьын.
6Арыти, нэбгыритӀури зэгъусэхэу шхэнхэу, ешъонхэу тӀысыгъэх. ЕтӀанэ бзылъфыгъэ ныбжьыкӀэм ятэ ащ къыриӀуагъ:
– Джыри зы чэщ къани, зыгъэтхъэжь.
7А лӀыр кӀожьынэу фэеу къэтэджыгъэми, шӀупщым ыӀорэм едэӀуи, къани, джыри зы чэщ ащ щырихыгъ. 8Ятфэнэрэ мафэм ипчэдыжьи лӀыр гъогу техьажьынэу жьэу къэтэджыгъ. Ау бзылъфыгъэ ныбжьыкӀэм ятэ аргорэу къыриӀуагъ:
– Гъомлапхъэ горэм хаӀи, угу къыкӀегъэубыт. Умыгузажъу, щэджэгъуанэр екӀыфэ еж.
Арыти, зэгъусэхэу шхагъэх. 9ЕтӀанэ ишъуз гуадзи иунэӀути зыдырищэжьэжьынхэшъ, гъогу техьажьынэу лӀыр къэтэджыжьыгъ. Ау шӀупщым ащ къыриӀуагъ:
– Мары, мафэр пчыхьэм фэкӀо. СыолъэӀу, чэщыр мыщ щих. Мары, мафэр шӀэхэу ыухыщт, къани, зыгъэтхъэжь. Неущ нахьыжьэу шъукъэтэджынышъ, гъогу шъутехьажьын, уиунэ шъукӀожьын.
10Ау лӀым къэнэныр ымыдэу къежьэжьи, щыдитӀум хьылъэ ателъэу, шъуз гуадзэри игъусэу Еус къалэм (ар – Ерусэлэм) фиузэнкӀыгъ.
11Пчыхьэшъхьапэм адэжь Еус къалэм ихьэнэ-гъунэ ахэр нэсыгъэх. Арыти, унэӀутым изиусхьан риӀуагъ:
– Еусхэм мы якъалэ тыдэгъахьи, чэщыр ащ щитэгъэх.
12Ау изиусхьан ар ыдагъэп:
– Хьау, – ыӀуагъ ащ, – Израилым щымыщ хымэ лъэпкъым икъалэ тыдэхьащтэп, тапэ едгъэхъунышъ, ГъыбӀэ тынэсыщт нахь. – 13ЕтӀанэ къыпигъэхъожьыгъ, – некӀо, ГъыбӀэ е Рамэ тынэсмэ, итӀум яз чэщыр щитхыщт.
14Арыти, ягъогу техьажьхи, апэ рагъэхъугъ, тыгъэр къохьажьыгъахэу Бинямин чӀыналъэм ит ГъыбӀэ ахэр екӀолӀагъэх. 15Ахэр гъогум дэхыхи, ащ чэщыр щырахынэу ГъыбӀэ дэхьагъэх. КӀохи, лэуимрэ игъусэхэмрэ къэлэ пчэгум итӀысхьагъэх, ау зыми иунэ ригъэблэгъагъэхэп.
16Мары, зы лӀыжъ горэ игубгъо щылэжьагъэу къэкӀожьыщтгъэ. Ар Ефраим къушъхьалъэм щыщыгъ, ау бинямин лӀакъом хэсэу ГъыбӀэ щыпсэущтыгъ. 17Къэлэ пчэгум ис гъогурыкӀор зелъэгъум, лӀыжъыр ащ еупчӀыгъ:
– Тыда уздакӀорэр, укъыздикӀыгъэри тыда?
18Лэуим ащ риӀожьыгъ:
– Ехъудэм ит Бэтлэхъэм тыкъекӀыжьы, сызщыщ Ефраим къушъхьалъэ чыжьэм тэкӀожьы. Ащ Ӏоф сиӀэу сыкӀогъагъ, джы Зиусхьаным иунэ#19:18 ЗыфиӀорэр Щылэу дэтыгъэ чэтэнгъэӀэгъэ лъапӀэр ары. Еплъ: мы тхылъым усэу 18:31-м ехьыхыгъэу иӀэм. Ижъырэ урымыбзэкӀэ зэрадзэкӀыгъэхэм ащыщхэм зэрэхэтыр: «сиунэ сэкӀожьы». сэкӀожьы, ауми зыми иунэ сыригъэблэгъагъэп. 19Тэ уарзэу щыдхэм Ӏусэу яттыщтри тиӀ, тэ, уипщылӀхэу – сэри, сигъусэ бзылъфыгъэу уиунэӀутми, кӀалэми тфэхъун сани хьалыгъуи тӀыгъ. Арышъ, а лъэныкъомкӀэ тэ зыпарэми тыщыкӀэрэп.
20– УмыгумэкӀ! НекӀо, садэжь шъукъакӀу, – къыриӀуагъ лӀыжъым. – Шъузыфэныкъор зэкӀэ сэ шъозгъэгъотыщт. Пчэгум шъукъимынэ закъуи.
21Ащ ар ядэжь къыздищи, ищыдхэм Ӏус аритыгъ. ГъогурыкӀохэм алъакъохэр зафатхьакӀхэм ыуж, шхагъэх, ешъуагъэх.
22Уахътэр джаущтэу тхъэжьэу агъэкӀофэ, нэпэнчъэ-бзэджашӀэу къалэм дэсхэм унэр къауцухьагъ. Пчъэм лъэшэу къытеохэзэ, унэр зие лӀыжъым къекуохэу аублагъ:
– Уиунэ къекӀолӀэгъэ цӀыфыр къытфигъэкӀ, тэ ащ тизэщ рызытедгъэущт.
23ЛӀыжъыр, унэм къикӀи, къариӀуагъ:
– Хьау, сшыхэр, ащ фэдэ бзэджагъэ шъумышӀэ. Ар сэ сихьакӀэшъ, ащ фэдэ нэпэнчъагъэкӀэ шъудэмызекӀу. 24Мары сипшъашъэрэ хьакӀэм ишъуз гуадзэрэ сэ къышъуфисщынхэшъ, ахэмэ шъуябэн, джарышъ шъо тэрэзэу шъулъытэрэр, шъузыфаер яшъушӀ. Ау сэ сихьакӀэ ащ фэдэ нэпэнчъагъэкӀэ шъудэмызекӀу.
25Ау а хъулъфыгъэхэр ащ къедэӀунэу фэягъэхэп. Джащыгъум лэуим ишъуз гуадзэ къыубыти, къафырищи къаритыгъ. Арыти, ахэм бзылъфыгъэр аӀэ къырагъахьи, чэщ реным нэф къэшъыфэ хьайнэпагъэкӀэ дэзекӀуагъэх. Нэфылъыр къызызэкӀечым бзылъфыгъэр къатӀупщыжьыгъ. 26Нэфшъагъом бзылъфыгъэр изиусхьан зэрыс унэм къекӀолӀэжьи, пчъэ ихьапӀэм дэжь щызэхафи, ащ дэжьым щылъэу нэф къэшъыгъ.
27Пчэдыжьым изиусхьан къэтэджи, пчъэр къыӀуихыгъ, гъогум техьажьын имурадэу, арыти, ишъуз годзэ бзылъфыгъэр ыӀитӀу пчъэшъхьаӀум телъэу, пчъэӀупэм зэрэӀулъыр ылъэгъугъ.
28– Къэтэджи, некӀо, – ыӀуи, еджагъ, ау бзылъфыгъэм джэуап къытыжьыгъэп. Джащыгъум лӀым бзылъфыгъэр къыӀэти, щыдым къытыригъэгъуалъхьи, кӀожьынэу къежьэжьыгъ.
29Унэм зынэсыжьым, шъэжъыер къышти, ишъуз гуадзэ Ӏэпкъ-лъэпкъ пшӀыкӀутӀоу иӀэмкӀэ зэхиупкӀи, Израилым ичӀыналъэхэм афаригъэхьыгъ. 30Ар зылъэгъугъэхэм зэкӀэми аӀуагъ:
– Израилыр Мысырым къызикӀыжьыгъэм щегъэжьагъэу непэ къызнэсыгъэм ащ фэдэ зыми ылъэгъугъэп ыкӀи ышӀагъэп ыкӀи. Шъуегупшыси ащ, шъузэхэупчӀыхьажьи, тшӀэмэ хъущтыр къашъуӀо!
Currently Selected:
Гъуазэхэр 19: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
