Гъуазэхэр 21
21
ЯтӀокӀэнэрэ зырэ шъхьэр
Къэнэжьыгъэ биняминхэм шъхьэгъусэхэр къыздырахыгъэхэр
1Израилхэм Мыцпэ дэжь тхьэлъанэ щашӀыгъагъ:
– Тащыщи ыпхъу шъхьэгъусэу бинямин лӀакъом щыщ горэми ритыщтэп, – аӀуи.
2ЦӀыфхэр Бэтэл кӀохи, пчыхьашъхьэ охъуфэ, лъэшэу гъыхэу, пыхьэхэу Тхьэм ыпашъхьэ исыгъэх.
3– О Зиусхьанэу, Израилым и Тхь, – аӀощтыгъэ ахэм, – сыда мыр Израилым къызкӀехъулӀагъэр? Сыда непэ Израилыр зы лӀакъокӀэ нахь макӀэ зыкӀэхъугъэр?
4КъыкӀэлъыкӀогъэ пчэдыжьым, жьэу къэтэджхи, цӀыфхэм а чӀыпӀэм къурмэншӀыпӀэ щагъэуцугъ, ардэдэми къурмэнгъэсти, мамыр къурмэни щашӀыгъ.
5– ТилӀакъохэм ащыщэу хэта Зиусхьаным ыпашъхьэ щытиӀэгъэ зэхахьэм къемыкӀолӀагъэр? – АӀуи, зэупчӀыжьхи, Мыцпэ Зиусхьаным ыпашъхьэ щыкӀогъэ зэхахьэм къэмыкӀуагъэр, Ӏо хэмылъэу, аукӀынэу израилхэм тхьэрыӀо пытэ ащ щашӀыгъагъ.
6Акъош биняминхэм къяхъулӀагъэр израилхэм лъэшэу гухэкӀ ащыхъугъ.
– Непэ Израилым илӀэкъо чъыг зы лӀакъо пыупкӀыгъэ хъугъэ, – аӀощтыгъэ ахэм. – 7Къэнагъэхэм тыдэ шъхьэгъусэ къафитхын, тпхъухэр ахэм ащыщ горэми шъузкӀэ етымытынэу Зиусхьаным ыпашъхьэ тхьэлъанэ пытэ щытшӀыгъэмэ?
8ЕтӀанэ:
– Израил лӀакъохэм ащыщэу, Мыцпэ дэжь, Зиусхьаным ыпашъхьэ зэхахьэу щытшӀыгъэм хэта къэмыкӀуагъэр? – АӀозэ, зэхэупчӀыхьажьыгъэх.
ГъылыӀад чӀыналъэм ит Яощ къалэм щыпсэухэрэм ащыщэу зы нэбгырэ гори къызэрэмыкӀуагъэр зэрагъэшӀагъ. 9ЦӀыфэу зэхахьэм къекӀолӀагъэр къызапчъым ащ къикӀыгъэу зы нэбгырэ гори къахэкӀыгъэп.
10Джащыгъум цӀыфхэм зэолӀ бланэхэу нэбгырэ мин пшӀыкӀутӀу унашъо афашӀи, ащ агъэкӀуагъ:
– ШъукӀуи, ГъылыӀад чӀыналъэм ит Яощ щыпсэухэрэр зэкӀэ, бзылъфыгъи сабыйи къэшъумыгъанэу чатэкӀэ шъуукӀых. 11ШъушӀэщтыр мары: хъулъфыгъи бзылъфыгъи зэкӀэ зэхэшъоукӀэхэшъ, пшъашъэу джыри хъулъфыгъэ зымышӀэгъэ закъохэр къэшъогъанэх.
Аущтэуи ашӀыгъ. 12Арыти, ГъылыӀад чӀыналъэм ит Яощ къалэм щыпсэухэрэм пшъэшъэ шъиплӀ джыри хъулъфыгъэ амышӀагъэу къахагъуати, ахэр КъэнаӀан чӀыналъэм ит Щылэу щыӀэ дзэ уцупӀэм ащагъэх.
13ЕтӀанэ мамыр псалъэ афарагъэхьи, биняминхэм адэжь Римон къушъхьэ цакӀэм цӀыфхэм лӀыкӀохэр агъэкӀуагъэх. 14Ащ ыуж биняминхэм ядэжь загъэзэжьым, ГъылыӀад чӀыналъэм ит Яощ щыщ пшъашъэхэу, псэоу къагъэнагъэхэр, шъхьэгъусэу аратыгъэх. Ау ахэр зэкӀэми афикъугъэп.
15Зиусхьаным израил лӀакъохэм зы зэрахитхъыгъэр цӀыфхэм лъэшэу гухэкӀ ащыхъугъ. 16Арыти, лъэпкъым инахьыжъ упчӀэжьэгъухэм аӀуагъ:
– Бинямин лӀакъом ибзылъфыгъэхэр укӀыгъэхэмэ, сыда тшӀэщтыр, къэнагъэхэм шъхьэгъусэ тыдэ къафитхыщта? 17ЧӀы Ӏахьэу лӀакъом тефэгъагъэр, Израилым изы лӀакъо гори мыкӀодыным пае, биняминэу къэнэжьыгъэхэм къафэрэн. 18Ау тэ, израилхэм, «бинямин лӀакъом щыщым зыпхъу езытырэм нэлатыр терэф» тӀуи, тхьэлъанэ пытэ тшӀыгъэшъ, тпхъухэр шъхьэгъусэкӀэ ахэм яттын тлъэкӀыщтэп.
19Аужыпкъэм хэкӀыпӀэ къаугупшысыгъ:
– Марышъ, илъэс къэс Зиусхьаным имэфэкӀышхо Щылэу щызэхащэ.
А къалэр Бэтэл итемыр лъэныкъо, ащ укъикӀэу Щэхэм узэрыкӀорэ гъогум итыгъэкъокӀыпӀэ, Лэбонэ икъыблэкӀэ гъэзагъэу щыт.
20Биняминхэр ахэм агъэӀушыгъэх:
– ШъукӀуи сэнэшъхьэшӀапӀэм зыщыжъугъэбылъи, 21хъурэм шъулъыплъ. Щылэу щыщ пшъашъэхэр къалэм къыдэкӀхэу, къэзэрэугъойхэу, загъэчэрэгъузэ къэшъоныр зырагъажьэкӀэ, сэнэшъхьэшӀапӀэм шъукъыхэкӀи шъхьадж шъхьэгъусэ фэхъунэу зы пшъашъэ ерэпхъуати, бинямин чӀыналъэм орэкӀожь. 22Ащ ыуж пшъашъэхэм ятэхэр е ашыхэр къытэтхьаусыхылӀэнхэу тадэжь къызыкӀохэкӀэ, тэ ятӀощт:
– ТышъолъэӀу, шъунэшӀу къащышъуфэнэу! Шъхьэгъусэ ашӀынхэу заом къафитщыгъэхэр икъугъэпти, шъори шъупхъухэр къяшъутын шъулъэкӀыщтэпти, аущтэу ашӀагъ. Арышъ, шъо ащкӀэ шъумысэп.
23Биняминхэм аущтэу ашӀыгъ. Пшъашъэхэм къэшъоныр зырагъажьэм, хъулъфыгъэ пэпчъ нэбгырэ зырыз къахипхъоти, шъхьэгъусэ ышӀынэу, ыхьи, кӀожьыгъэ. Шъхьадж ичӀыгу Ӏахьэ ыгъэзэжьи, къалэхэр агъэпсыжьхи, ахэм адэтӀысхьажьыгъэх. 24Ардэдэм израилхэри зэбгырыкӀыжьхи, шъхьадж ежь илӀакъо, иунагъо екӀолӀэжьи, ичӀыгу Ӏахьэ итӀысхьажьыгъ.
25А уахътэм Израилым пачъыхьэ иӀагъэп, шъхьадж ежь тэрэзэу ылъытэрэр ышӀэщтыгъ.
Currently Selected:
Гъуазэхэр 21: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
