Гъуазэхэр 10
10
ЯпшӀэнэрэ шъхьэр
ТолаӀ
1Абимэлэх ыуж Израилыр къэзыгъэнэжьынэу зыкъэзыӀэтыгъэр иссашхар лӀакъом щыщ Додэ ыкъо Пуа ыкъожьэу ТолаӀ ары. Ефраим къушъхьалъэхэм ахэт Шамир къалэм ар дэсыгъ. 2ТолаӀ Израилым игъуазэу илъэс тӀокӀрэ щырэ щытыгъ. ЕтӀанэ лӀи, Шамир щагъэтӀылъыжьыгъ.
Яир
3Ащ ыуж ГъылыӀад щыщ Яир зыкъыӀэти, илъэс тӀокӀрэ тӀурэ Израилым гъуазэу иӀагъ. 4Щыдыхэм атесэу зекӀохэу#10:4 ЦӀыфыр зыщыщ лӀакъор зэрэфэшӀыгъэм, зэрэлъэрыхьым а лъэхъаным итамыгъэу алъытэщтыгъэ. къо щэкӀ ащ иӀагъ. ГъылыӀад къэлэ щэкӀ ахэм щыряӀагъ, непэ къызнэсыгъэми Яир икъуаджэхэкӀэ#10:4 Ижъырэ джуртыбзэкӀэ: «Хьаот-ЯӀир». яджэх. 5Яир зэлӀэм ыуж, Къамон щагъэтӀылъыжьыгъ.
Израилхэр къин зэрэхэфагъэхэр
6Израилхэм джыри Зиусхьаным къемыкӀущтхэр ашӀэхэу рагъэжьэжьыгъ. ТхьэнэпцӀхэу БэӀалрэ Астартэрэ, арамхэм, цыдонхэм, моабхэм, Ӏамонхэм, фылистхэм ятхьэхэм ахэм шъхьащэ афашӀыщтыгъэти, я Зиусхьани кӀэрыкӀыгъэхэу Ащ фэлажьэщтыгъэхэп. 7Джащыгъум Зиусхьаным игубж къафызэкӀани фылистхэмрэ Ӏамонхэмрэ Израилыр аӀэ рилъхьагъ, 8адрэхэм израил цӀыф лъэпкъыр, хьэзаб рагъэщэчызэ, агъэпщылӀыгъ. Амэрхэр зыщыпсэущтыгъэхэ чӀыгоу Иорданым итыгъэкъокӀыпӀэ лъэныкъо ит ГъылыӀад исыгъэ израилхэр ащ щегъэжьагъэу илъэс пшӀыкӀуим къыкӀоцӀ бжьым чӀэтыгъэх. 9Аужыпкъэм Ехъудэ, Бинямин, Ефраим лӀакъохэм къязэонхэу, Ӏамонхэр Иордан псыхъом къызэпырыкӀхи, израилхэр тхьамыкӀэгъошхом хадзагъэх. 10Арыти, израилхэм Зиусхьаным лъэӀушхокӀэ зыфагъэзагъ:
– Уапашъхьэ тэ псэкӀод щытшӀагъ, ти Тхьэ ӀэкӀыб тшӀи БэӀал тыфэпщылӀыгъ.
11Зиусхьаным ахэм къариӀожьыгъ:
– Мысырхэм, амэрхэм, Ӏамонхэм, фылистхэм, 12цыдонхэм, Ӏамэлыкъхэм, мэӀонхэм#10:12 Е: «мыдианхэм». шъуагъэпщылӀы зэхъум, шъукъызысэлъэӀум Сэ шъуакъыӀэкӀэсхыжьыгъэба? 13Ау шъо сыкъэжъугъани, нэмыкӀ тхьэхэм шъуафэлэжьагъэшъ, джащ нахьэу Сэ шъукъэзгъэнэжьыщтэп. 14ШъукӀуи шъуялъэӀу нэмыкӀ тхьэхэу шъо къыхэшъухыгъэхэм. Ахэм гузэжъогъоу шъузыхэтым шъукъыхарэщи, шъукъарэгъэнэжь!
15Ау израилхэр етӀани Зиусхьаным елъэӀугъэх:
– Тэ псэкӀод тшӀагъэшъ, О узыфэе шъыпкъэр къыташӀ, ау мызэгъогум мы гузэжъогъум тыхэщыжьи!
16Арыти, ахэм хымэ тхьэхэр чӀадзыжьхи, Зиусхьаным шъхьащэ фашӀэу рагъэжьэжьыгъ. Джащыгъум израил цӀыфхэм къинэу ащэчырэр атыримыхын Тхьэм фэлъэкӀыгъэп.
17Ӏамонхэм заом зыфагъэхьазырзэ, ГъылыӀад чӀыналъэм дзэ уцупӀэ зыщагъэпсым, израилхэр къэзэрэугъоихи, ахэми Мыцпэ#10:17 ГъылыӀад чӀыналъэм Иордан псыхъом итыгъэкъокӀыпӀэ лъэныкъокӀэ гъэзагъэу ит къал. Мыр я 20-21-рэ шъхьэхэм зигугъу къащишӀырэ Мыцпэр арэп. дэжь яуцупӀэ щагъэпсыгъ. 18Ар зылъэгъугъэ цӀыфхэу ГъылыӀад дэсхэмрэ ащ ипащэхэмрэ зэраӀожьыщтыгъэ:
– Хэтми апэу Ӏамонхэм язэоныр езыгъажьэрэр ары ГъылыӀад щыпсэурэ пстэуми Ӏэшъхьэтет афэхъущтыр.
Currently Selected:
Гъуазэхэр 10: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
