Гъуазэхэр 9
9
Ябгъонэрэ шъхьэр
Абимэлэх
1Зэгорэм ЕрыубэӀал (ар – ГъыдыӀон ары) ыкъо Абимэлэх Щэхэм янэшхэм адэжь кӀуи, ахэми янэ зыщыщ лӀакъом зэкӀэми ариӀуагъ:
2– Щэхэм щыпсэурэ пстэуми шъуяупчӀ: «Сыда шъоркӀэ нахьышӀур, ЕрыубэӀал ыкъо тӀокӀищырэ пшӀырэр шъуиӀэшъхьэтетыныр ара, хьаумэ зы нэбгырэ шъуигъэӀорышӀэныр ара?» Зыщышъумыгъэгъупш, шъул сызэрэщыщыри шъулъы сыкъызэрэхэкӀыгъэри!
3Ащ янэшхэм Щэхэм къалэм дэсхэм къэбарыр зараӀуатэм, «ар тэ тшы» аӀуи, ахэр Абимэлэх гоуцуагъэх. 4БэӀал-Бэрыт иунэ чӀэлъым щыщэу тыжьын шэкъэл тӀокӀищрэ пшӀырэ#9:4 Мыр грамм шъий фэдиз горэ мэхъу. къыратыгъэти, Абимэлэх а ахъщэмкӀэ шӀоигъор зышӀэрэ бзэджашӀэ куп къызгуищи, ахэр ыуж ихьагъэх. 5ЕтӀанэ ахэр игъусэхэу ятэ иунэу Ӏофрэ къалэ дэтым къакӀуи, ышхэр зэкӀэ, ЕрыубэӀал ыкъо тӀокӀищрэ пшӀырэр, зы мыжъом тыриукӀыхьагъэх. Ау ЕрыубэӀал ыкъо нахьыкӀэу Иотам закъор, зигъэбылъыгъэти псэоу къэнагъ.
6Къэлэдэсхэмрэ Бэт-Мылэ чэшъаным#9:6 Щэхэм къалэ игъунэгъу е ащ дэт пытапӀ. щыпсэухэрэмрэ зэкӀэ зэрэугъойхи, Щэхэм пэгъунэгъоу щыт чъыгэешхом дэжь Абимэлэх пачъыхьэу ашъхьагъ щырагъэуцуагъ.
Абимэлэхрэ Щэхэм дэсхэмрэ Иотам зэрябгыгъэр
7Хъугъэр Иотам зыраӀом, ар кӀуи, Гъэрызым къушъхьэм дэкӀуайи, къякууи, цӀыфхэм къариӀуагъ:
– ШъукъысэдэӀуи, Щэхэм дэсхэр, шъори Тхьэм шъукъызэхихыжьыщт! 8Пачъыхьэ ашъхьагъ рагъэуцонэу зэгорэм чъыгхэм рахъухьагъ. Зэйтуным раӀуагъ:
– Пачъыхьэ къытфэхъу!
9Ау зэйтуным къариӀожьыгъ:
– Чъыгхэм ашъхьагъ сызэритыщтым пай, тхьэхэмрэ цӀыфхэмрэ зэрагъэлъапӀэрэ дагъэр ӀэкӀыб сшӀынэуи?
10Арыти, чъыгхэм ахъо чъыгым раӀуагъ:
– КъакӀуи, о пачъыхьэ къытфэхъу.
11Ахъоми къариӀожьыгъ:
– Чъыгхэм ашъхьагъ сызэритыщтым пай, шхынцумпэ ӀэшӀоу къыспыкӀэрэр ӀэкӀыб сшӀынэуи?
12Чъыгхэм сэнэшъхьэ бжалэм раӀуагъ:
– О къакӀуи пачъыхьэ къытфэхъу.
13Ау сэнэшъхьэ бжалэм къариӀожьыгъ:
– Чъыгхэм ашъхьагъ сызэритыщтым пай, тхьэхэри цӀыфхэри зыгъэчэфхэрэ сисанэ ӀэкӀыб сшӀынэуи?
14Аужыпкъэм чъыгхэм пырэжъыем зыфагъэзагъ:
– КъакӀуи, о пачъыхьэ къытфэхъу.
15Арыти, пырэжъыем чъыгхэм къариӀожьыгъ:
– Сэ пачъыхьэу шъуашъхьагъ сижъугъэуцонэу шъузэрэфаер шъыпкъэмэ, шъукъакӀуи, сижьау зыщыжъугъэгупсэф. Мышъыпкъэмэ, пырэжъыем машӀо къызыхидзыни, ливан кедрэхэр ащ хэстыхьащтых.
16– Арышъ шъуеплъ, – ыӀуи Иотам игущыӀэ лъигъэкӀотагъ, – Абимэлэх пачъыхьэ зышъошӀым, шъыпкъагъэрэ зэфагъэрэкӀэ шъузекӀуагъа? ЕрыубэӀали ащ иунагъуи тэрэзэу шъуадэзекӀуагъа, къалэжьыгъа яшъушӀагъэр? 17Сятэ шъощ пай зэуагъ, мыдианхэм шъуакъыӀэкӀихыжьыным пай, ыпсэ еблэжьыгъэп. 18Ау шъо джы сятэ иунагъо шъупэуцуи, ащ ыкъо тӀокӀищрэ пшӀырэр зы мыжъом тешъуукӀыхьи, иунэӀут бзылъфыгъэ ыкъоу Абимэлэх зэрэшъуиӀахьылым къыхэкӀэу, Щэхэм щыпсэухэрэм пачъыхьэу ашъхьагъ ижъугъэуцуагъ. 19ЕрыубэӀалрэ иунагъорэ шъыпкъагъэрэ зэфагъэрэкӀэ шъуадэзекӀуагъэмэ, Абимэлэх джы шъущыгушӀукӀ, ежьыри къышъущэрэгушӀукӀыжь. 20Мышъыпкъэмэ, Абимэлэх машӀо къыхэрэкӀи, Щэхэмрэ Бэт-Мылэрэ ащыпсэухэрэр зэхерэстыхьэх, шъори Щэхэмрэ Бэт-Мылэрэ адэсхэм машӀо къышъухэрэкӀи Абимэлэх ерэст!
21Ар ыӀуи, Иотам Бэр къалэм чъи, дэтӀысхьагъ, ышэу Абимэлэх ащ зыщышӀуигъэбылъыгъ.
Абимэлэх зэрэлӀагъэр
22Абимэлэх Израилым илъэсищэ тетыгъо щиӀыгъыгъ. 23Ау Абимэлэхрэ Щэхэм дэсхэмрэ азыфагу Тхьэм джынапцӀэ къыдитӀупщыхьи, Щэхэм къэлэдэсхэр Абимэлэх емыдэӀужьхэ хъугъэ. 24Аущтэу зыкӀэхъугъэр, ЕрыубэӀал ыкъо тӀокӀищырэ пшӀырэм жъалымыгъэу адызэрахьагъэр ягъэпщыныжьыгъэным, Абимэлэхрэ Щэхэм щыпсэухэу ышхэр ыукӀынхэмкӀэ ӀэпыӀэгъу къыфэхъугъэхэмрэ ахэм алъ къатефэным пай. 25Абимэлэх зэрагъэпыйрэм къыхэкӀэу Щэхэм дэсхэр къушъхьэ дэкӀыпӀэхэм къащыпэтӀысхэти, зэкӀэ гъогум рыкӀорэ цӀыфхэр ахъункӀэщтыгъэх. А къэбарыр Абимэлэх фаӀотагъ.
26Ащ тефэу Ӏэбэд ыкъо ГъэӀал ышхэр игъусэхэу Щэхэм къэкӀуагъэти, къэлэдэсхэм ащ цыхьэ фашӀыгъ. 27Лэжьыгъэ Ӏухыжьыгъо хъугъэти, зэкӀэ къэлэдэсхэр губгъом дэкӀыгъэхэу, сэнашъхьэр пачыжьыщтыгъэ, сэнэшъхьэ кӀэфыпӀэхэм ащыкӀафыщтыгъэ. ЫужыкӀэ ятхьэ иунэ мэфэкӀышхохэр щызэхащэхэти, ащ щешхэщтыгъэх, щешъощтыгъэх, Абимэлэхи щебгыщтыгъэх.
28Ӏэбэд ыкъо ГъэӀал ыӀуагъ:
– Хэта Абимэлэх, тэри, Щэхэм дэсхэм, тыхэт, ащ тыфэӀорышӀэнэу? ЕрыубэӀал ыкъоба ар, Зэбулба ащ пащэу ыгъэнэфагъэр? Щэхэм ятэу Хъамор ицӀыфхэм шъуафэлажь! Сыда Абимэлэх тызкӀыфэӀорышӀэщтыр? 29А цӀыфхэр сэ сфэӀорышӀэщтыгъэхэмэ, Абимэлэх къыӀэкӀэсхыжьыныгъэхи! «Уидзэ къэугъои, къыдэкӀ!» – сӀони, есӀоныгъи.
30Къэлэ пащэу Зэбул Ӏэбэд ыкъо ГъэӀал игущыӀэхэр зызэхехым, лъэшэу къэгубжыгъ. 31Абимэлэх шъэфэу къэбарыхьэхэр фигъэкӀуагъэх:
– Ӏэбэд ыкъо ГъэӀалрэ ащ ышхэмрэ Щэхэм къэкӀуагъэхэу, къэлэдэсхэр къыпфагъэблых. 32Арышъ, къэтэджи, уизэолӀхэр уигъусэхэу, чэщым шъофым дэкӀи, ащ къащыпэтӀыс. 33Пчэдыжьым, нэфылъыр къызыщызэкӀичырэм тэджи, къалэм теу. ГъэӀал изэолӀхэр игъусэхэу къызыппежьэхэкӀэ, укъызэкӀэмыкӀоу пфяшӀэшъурэр зэкӀэ яшӀ.
34Арыти, Абимэлэх изэолӀхэр игъусэхэу къакӀохи, купиплӀэу загощи, Щэхэм дэжь ащыпэтӀысыгъэх. 35Ӏэбэд ыкъо ГъэӀал къалэм къыдэкӀи, къэлэпчъэшхохэм адэжь къыщыуцугъэу, Абимэлэхрэ ащ игъусэгъэ зэолӀхэмрэ зызщагъэбылъыгъэ чӀыпӀэм ар дэдэм къыкъокӀыгъэх.
36Ахэр зелъэгъухэм ГъэӀал Зэбул риӀуагъ:
– Плъэлъ, олъэгъуа модэ къушъхьэм цӀыфхэр къехых!
– Къушъхьэм къытыридзэрэ ныбжьыкъур ары о цӀыфэу къыпщыхъурэр, – къыриӀожьыгъ ащ Зэбул.
37Ау ГъэӀал ятӀонэрэуи риӀуагъ:
– Еплъ, мо лъэгапӀэм цӀыфхэр къехых, зы купи Усэрэжъхэм ячъыгае зыдэщыт лъэныкъомкӀэ къекӀы.
38Арыти, Зэбул ащ къыриӀуагъ:
– «Хэта Абимэлэх, тыфэӀорышӀэнэу?» – орыба зыӀуагъэр, уишъхьащытхъужьныгъэ джы тыдэ хъужьыгъа? А цӀыфхэр арыба о узкӀэнакӀэщтыгъэр? Арымэ, джы еу, дэкӀи, ахэмэ язау!
39Джащыгъум ГъэӀал Щэхэм дэсхэм апэ иуцуи, Абимэлэх езэуагъ. 40ГъэӀалрэ игъусэхэмрэ Абимэлэх къызырефыжьэхэм, ахэм агъэзэжьи къэлэ дэхьапӀэмкӀэ чъагъэх, ау къэлапчъэм нэмысхэзэ ащыщэу бэ аукӀыгъ. 41ЕтӀанэ Абимэлэх Арум къалэм дэтӀысхьагъ, къэлэ пащэу Зэбул ГъэӀали ащ ышхэри Щэхэм къыдифыгъэх.
42КъыкӀэлъыкӀогъэ мафэм Щэхэм дэсхэр губгъом зыдэкӀхэм, а къэбарыр Абимэлэх нагъэсыгъэти, 43изэолӀхэр ыугъоихи, купищэу ыгощхи, губгъом щапэтӀысыгъ. Къалэм къыдэкӀырэ цӀыфхэр зелъэгъухэм, зиӀати, атеуагъ. 44Абимэлэхрэ ащ игъусэгъэ купхэмрэ къалэм зэрыдахьэхэрэ къэлапчъэхэм адэжь уцугъэх, адрэ купитӀур губгъом итыгъэхэм атебанэхи, ахэр зэхаукӀагъэх. 45Абимэлэх къалэр ештэфэ, ащ дэсхэр зэкӀэ еукӀыфэхэ, мэфэ реным зэуагъэ. Аужыпкъэм къалэр зэхикъути, ар зыдэщытыгъэ чӀыпӀэм щыгъу тыритэкъожьыгъ#9:45 Нэлат зэрэрихыгъэм мыр инэшанэу щыткӀэ енэгуягъо..
46А къэбарыр зызэхахым, Щэхэм чэшъаным дэсыгъэхэр БэӀал-Бэрыт#9:46 Ижъырэ джуртыбзэкӀэ тхыгъэ Ӏэпэрытхым зэрэхэтыр: «Эл Берит». Имэхьанэр – «Зэзэгъыныгъэм итхь». Мыр БэӀал-Бэрыт ятӀонэрэ цӀэу иӀ. (Еплъ: 8:33; 9:4). унэм ичӀыунэ-пытапӀэ ехыгъэх. 47Ахэр ащ зэрэщызэрэугъоигъэхэр Абимэлэх зыраӀом, 48изэолӀхэр игъусэхэу Цалмон къушъхьэм дэкӀоягъ. Обзэгъур къышти, къутэмэ заулэ къыпиупкӀи, ытамэ къытырилъхьагъ. Игъусэгъэ зэолӀхэм унашъо афишӀыгъ:
– ПсынкӀэу сэ зэрэсшӀыгъэм фэдэу шъори шъушӀы.
49Арыти, зэкӀэми къутамэхэр къыпаупкӀхи, Абимэлэх ыуж ихьагъэх. ЧӀыунэ чӀэхьапӀэм дэжь къутамэхэр щызэтыралъхьэхи, машӀо кӀадзэжьыгъ. Джащ фэдэ шӀыкӀэу чэшъаным чӀэсыгъэ хъулъфыгъэхэри бзылъфыгъэхэри зэкӀэ, нэбгырэ мин фэдиз агъэстыгъэх.
50Ащ ыуж Абимэлэх Тэбэц къалэм екӀуи, ар ыубытыгъ. 51Ау къалэм чэшъан пытэ дэтыгъэти, хъулъфыгъи бзылъфыгъи къалэм дэсыр зэкӀэ ащ ечъэжьыгъэх. Зыдагъэпытыхьи, чэшъанэм ышъхьэ дэкӀоягъэх. 52Абимэлэх чэшъанэм екӀуи, къыдзыхьи, машӀо кӀидзэнэу ипчъэм благъэу екӀолӀагъ. 53Джа чӀыпӀэм зы бзылъфыгъэ горэм мыжъошъхьалышъхьэр чэшъаным къыридзыхи, Абимэлэх ышъхьэ къупшъхьэ пхыриутыгъ.
54Арыти, Абимэлэх иӀэшэзехьэ кӀалэм къеджи, ащ риӀуагъ:
– «Ар бзылъфыгъэм ыукӀыгъ» зэрамыӀоным пай, уичатэ къихи, сыукӀ.
Ащ зэриӀуагъэу, иӀумэт чатэр къызыхеӀум, ыпсэ хэкӀыгъ.
55Израилхэм Абимэлэх зэрэлӀагъэр залъэгъум, зэбгырыкӀыжьхи, шъхьадж ядэжь кӀожьыгъ. 56Джаущтэу Тхьэм Абимэлэх ыгъэпщынэжьыгъ, ыш тӀокӀищрэ пшӀырэр ыукӀи, ятэ бзэджэшӀагъэ зэрэлъишӀэжьыгъэм пай. 57Джащ фэдэу Щэхэм дэсхэри бзэджэшӀагъэу ашӀагъэхэм апае ыгъэпщынагъэх. ЕрыубэӀал ыкъо Иотам ибгыбзэ ахэм атефагъ.
Currently Selected:
Гъуазэхэр 9: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
