Гъуазэхэр 11
11
ЯпшӀыкӀузэнэрэ шъхьэр
Ифтахъ
1ГъылыӀад щыщ Ифтахъ зэолӀ бланэу щытыгъ. Ащ янэ бзылъфыгъэ хэтэкӀуагъ, ятэр ГъылыӀад арыгъэ. 2ГъылыӀад ишъхьэгъуси къохэр къыфилъфыгъэх. Ахэр лӀыпкъым зеуцохэм, Ифтахъ зыхафыгъ.
– О тэ тянэ укъылъфыгъэпышъ, тятэ имылъкукӀэ Ӏэхьэгъу укъытфэхъущтэп, – аӀуи раӀуагъ.
3Ифтахъ ышхэр къыбгынэхи, ышъхьэ хихьажьи Тэу чӀыналъэр псэупӀэкӀэ къыхихыгъ. Ӏофынчъэ бзэджашӀэхэр пыщэгъу къыщыфэхъугъэх, Ифтахъ ягъусэу тео кӀохэу рагъэжьагъ.
4Охътэ дэхэкӀае тешӀагъэу Ӏамонхэм Израилым зао къызырашӀылӀэм, 5Ифтахъ къащэжьынэу ГъылыӀад щыщ нахьыжъ упчӀэжьэгъухэр Тэу кӀуагъэх.
6– КъэкӀожьи, дзэпащэ къытфэхъуи, Ӏамонхэм тягъэзау, – раӀуагъ ахэм.
7Арыти, Ифтахъ къариӀуагъ:
– Шъорыба сызылъэгъу мыхъугъэр, сятэ иунэ сыкъизыфыгъэр? Арымэ, сыда джы гузэжъогъу шъузхэфэм, садэжь шъукъызкӀэкӀуагъэр?
8– Арыба тыкъызкӀэкӀуагъэри тыкъызкӀыолъэӀури: укъыддэкӀожьынышъ, Ӏамонхэм укъыддязэонэу, ащ нэмыкӀэу ГъылыӀад щыпсэурэ пстэуми уряӀэшъхьэтетынэу тыфай, – аӀуагъ нахьыжъ упчӀэжьэгъухэм.
9Арыти:
– Ӏамонхэм сяжъугъэзэонэу сышъущэжьыгъэу, Зиусхьаным ахэр сӀэ къырилъхьагъэхэу сэӀо, етӀанэ сэ шъыпкъэ дэдэмкӀэ пстэуми Ӏэшъхьэтет сафэшъушӀыщта? – Ифтахъ яупчӀыжьыгъ.
10ГъылыӀад щыщ нахьыжъ упчӀэжьэгъухэм:
– Орырэ тэрырэ Тхьэр тишыхьат! О къызэрэпӀуагъэм фэдэ шъыпкъэу тшӀынкӀэ, – аӀуи, ягущыӀэ тхьэрыӀокӀэ къагъэшъыпкъэжьыгъ.
11Арыти, ГъылыӀад щыщ нахьыжъ упчӀэжьэгъухэм ягъусэу ар адэкӀожьыгъ, цӀыфхэми Ӏэшъхьэтетэуи дзэпащэуи ашъхьагъ рагъэуцуагъ. Ащ ыуж, Мыцпэ дэжь Ифтахъ джыри зэ Зиусхьаным ыпашъхьэ нахьыжъ упчӀэжьэгъухэм ариӀогъэ гущыӀэхэр къыщыкӀиӀотыкӀыжьыгъэх.
12ЕтӀанэ Ифтахъ Ӏамон пачъыхьэм лӀыкӀохэр фигъэкӀуагъэх.
– Сыд фэдэ дауа о къысфыуиӀэр сихэку укъытеонэу? – ыӀуи, ригъэупчӀыгъэх.
13Ӏамон пачъыхьэм лӀыкӀохэм джэуап къаритыжьыгъ:
– Израилыр Мысырым къызекӀыжьым, Арнон псыхъом щегъэжьагъэу Ябэкъ псыхъомрэ Иордан псыхъомрэ анэсыщтыгъэ сичӀыгу ыубытыгъ. Арышъ, бырсыр къыхэмыхьэу къысэтыжь.
14Ифтахъ ятӀонэрэу лӀыкӀохэр Ӏамон пачъыхьэм дэжь ыгъэкӀуагъэх, 15мырэущтэу раригъэӀуагъ:
– Ифтахъ мары ыӀорэр: Израилым ыубытыгъэхэп Моаб ичӀыгуи, Ӏамон чӀыгури. 16Израилхэр Мысырым къикӀыжьхэ зэхъум, шъофнэкӀым итхэу хы Къамылым нэс кӀохи, Къадэщ къалэм екӀугъэх#11:16 Еплъ: тхылъэу «МысырикӀыжь» 13:18–15:22; тхылъэу «ШъофнэкӀым къыщекӀокӀыгъэхэр» 12:16, 13:26.. 17Ащ ригъэкӀхи Израилым Едом пачъыхьэм лӀыкӀохэр фигъэкӀуагъэх: «УичӀыгу сырыкӀонэу фит сыкъэшӀ», – ыӀуи, раригъэӀуагъ. Ау Едом пачъыхьэр ащ къезэгъыгъэп. Моаб пачъыхьэми джащ фэдэу лӀыкӀохэр фигъэкӀуагъэх, ау ари къезэгъыгъэп. Джаущтэу Израилыр Къадэщ къыдэнагъ.
18Ащ ыуж шъофнэкӀым къыщикӀухьагъ, Едоми Моаби ячӀыгухэм къадиухьи, Моаб итыгъэкъокӀыпӀэ лъэныкъо щыӀэ чӀыгухэм анэси, Арнон псыхъом ыкӀыбкӀэ пщыпӀэ щигъэуцугъ. Арнон псыхъор Моаб игъунапкъэти, ар Моабым ичӀыгу ихьагъэп.
19ЕтӀанэ Израилым лӀыкӀохэр Хъэщбэн тетыгъор щызыӀыгъыгъэ амэр пачъыхьэу Сыхъон фигъакӀохи, раригъэӀуагъ: «УичӀыгу сыпхырыкӀынышъ, сичӀыгу сыкӀонэу фит сыкъэшӀ». 20Ау израилхэр ичӀыгу ригъэкӀонхэу Сыхъон къезэгъыгъэп. ИзэолӀхэр зэкӀэ къыугъойхи, Ехэц дэжь дзэ уцупӀэ щигъэпси, Израилым къезэуагъ.
21Джащыгъум Зиусхьанэу Израилым и Тхьэ, Сыхъони изэолӀхэри израилхэм аӀэ къырилъхьагъэхэти, зэтыраукӀагъэх. Джаущтэу амэрхэм ячӀыгу Израилым иунаеу хъугъэ, 22Арнон псыхъом щегъэжьагъэу Ябэкъ псыхъом нэси, шъофнэкӀым щегъэжьагъэу Иордан нэси зэкӀэ ыубытыгъэх#11:22 Я 17-рэ усэм щегъэжьагъэу я 22-рэ усэр къыдыхиубытэу къаӀуатэрэр тхылъэу «ШъофнэкӀым къыщекӀокӀыгъэхэр» 20:14-21, 21:21-32 къыщытхыгъ..
23Армэ, Зиусхьанэу, Израилым и Тхьэ, ежь илъэпкъэу израилым амэрхэр закӀэлъырифыгъэхэкӀэ, джы о сыд фэдэ фитныгъа уиӀэр ар пштэнэу? 24Уитхьэу Къэмэщ#11:24 Моабхэмрэ Ӏамонхэмрэ ятхьэхэм ащыщ, ащ цӀыфхэр къурмэн фашӀыщтыгъэх. къыуитыгъэр арба о пӀэ илъыр? Арышъ, тэри ти Зиусхьанэу, ти Тхьэ, къытитыгъэ пстэури тиунай. 25СыдкӀэ о Моабым ипачъыхьэу Цыпор ыкъо Бэлакъ#11:25 Илъэс шъищкӀэ узэкӀэӀэбэжьмэ Бэлакъ усэрэжъыр Израилым ригъэбгынэу ыуж итыгъ, ау Тхьэм иӀэмыркӀэ бгыбзэм ычӀыпӀэ ащ а лъэпкъым нэшӀущыфэныгъэ фиӀуагъ. (Еплъ: тхылъэу «ШъофнэкӀым къыщекӀокӀыгъэхэр» 22–24). нахьи унахьышӀу? Израилым зэгорэм, зэ нахь мыхъуми ар къыщыхьагъа е къезэуагъа? 26Илъэс шъищ хъугъэ Израилыр Хъэщбэни, ӀэрӀори ахэм япхыгъэ псэупӀэхэм зэкӀэми, Арнон псыхъом къегъэтӀысэкӀыгъэ къалэхэми защыпсэурэр. Ащ фэдиз уахътэм ахэр сыда закӀытемыхыгъэхэр? 27ОркӀэ сэ сымысэп, ау о екӀэ укъыспэгъокӀы, зао къысэошӀылӀэ. Зиусхьаныр хьыкумышӀ зафэшъ, израилхэмрэ Ӏамонхэмрэ азыфагу илъ даор непэ Ащ зэхерэф.
28Ау Ӏамон пачъыхьэр Ифтахъ раригъэӀогъэ гущыӀэхэм къядэӀугъэп.
29Джащыгъум Ифтахъ Зиусхьаным ы Псэ къыхэхьагъ. Ифтахъ ГъылыӀадрэ Мынасэрэ адэкӀи, ГъылыӀад ит Мыцпэ къызэринэкӀи, Ӏамонхэм язэонэу якӀугъ. 30Ӏамонхэм зафеузэнкӀым ыуж Ифтахъ Зиусхьаным ыпашъхьэ тхьэлъанэ щишӀыгъ:
– Ӏамонхэр О сӀэ къиплъхьэхэу, 31ахэмэ сатекӀуагъэу къызызгъэзэжькӀэ, унэм къикӀэу, зэкӀэм апэ къыспэгъокӀрэр, О Зиусхьан, къыостынышъ, къурмэнгъэст пфэсшӀыщт.
32Арыти, Ифтахъ Ӏамонхэм язэонэу якӀугъэти, Зиусхьаным ахэр ыӀэ къырилъхьагъэх. 33Ифтахъ текӀоныгъэшхо ащ къыщыдихи, Ӏэрэор щегъэжьагъэу Мынитрэ Абэл-Къырамымрэ анэсыфэ къэлэ тӀокӀ хэкужь ышӀыгъ. Джаущтэу израилхэр Ӏамонхэм ашъхьагъ иуцуагъэх.
34ЕтӀанэ Ифтахъ ядэжь Мыцпэ къызегъэзэжьым, ыпхъу армырмэ, шъонтрыпэм еомэ, къыдэшъожьызэ, хэт къыпэгъокӀынгъи! А зыр ары ащ къыхэкӀыгъэу иӀагъэр, нэмыкӀ къуи пхъуи Ифтахъ иӀагъэп. 35Ыпхъу зелъэгъум, Ифтахъ, джанэу щыгъыр зыщитхъыжьзэ#11:35 КъокӀыпӀэ Благъэм щыпсэурэ лъэпкъхэм зыгорэ зылӀэкӀэ ящыгъынхэр зыщатхъыжьыныр хабзэу ахэлъыгъ., къэкууагъ:
– О, сипшъашъ! СыуукӀыпагъи! Насыпынчъэ сыпшӀыгъи! Сыукъон сымылъэкӀыщт тхьэлъанэ Зиусхьаным ыпашъхьэ сэ щысшӀыгъи!
36– Тят, – къыриӀожьыгъ ащ ыпхъу, – о Зиусхьаным гущыӀэ пытэ фэпшӀыгъ. Зиусхьаным иӀэмыркӀэ уипый Ӏамонхэр бгъэпщынагъэхэшъ, Ар зэрэбгъэгугъагъэр къысашӀ. 37Ау зы лъэӀу къысфашӀ. МэзитӀу къысэт, къушъхьэхэм сахэхьани къащыскӀухьанэу, сипшъэшъэгъухэр сигъусэхэу сипшъэшъашъхьэ згъэежьынэу.
38– Дэгъу, кӀо, – ыӀуи, Ифтахъ ыпхъу мэзитӀукӀэ ытӀупщыгъ.
Ипшъэшъэгъухэр игъусэхэу пшъашъэр къушъхьэм дэкӀуайи, ипшъэшъашъхьэ ыгъэежьыгъ. 39МэзитӀу зытешӀэм ыуж ар ятэ дэжь къэкӀожьыгъ, Ифтахъи ыпхъукӀэ тхьэлъанэу ышӀыгъэр ыгъэцэкӀэжьыгъ#11:39 Библиер зэхэзыфхэрэм ащыщыбэм Ифтахъ ыпхъу къурмэнгъэст ышӀыгъэу алъытэ. НэмыкӀхэр зэреплъыхэрэмкӀэ бзылъфыгъэр дэмыкӀоу, Тхьэм фэлэжьэнэу ритыгъэу ары.. Джаущтэу адрэми хъулъфыгъэ ышӀэнэуи хъугъэп.
Джащ щегъэжьагъэу 40илъэс къэс израил бзылъфыгъэ ныбжьыкӀэхэр дэкӀынхэшъ, мэфиплӀым къыкӀоцӀ ГъылыӀад щыщ Ифтахъ ыпхъу агъэеныр израилхэм хабзэ афэхъугъ.
Currently Selected:
Гъуазэхэр 11: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
