УблапӀэ 43

ЯтӀокӀитӀонэрэ щырэ шъхьэр

Бинямин ыкъошхэм ягъусэу Мысырым зэрэщыӀагъэхэр

1А чӀыгум гъаблэр щылъэшыщтыгъэ. 2Мысырым къыращыгъэ лэжьыгъэр заухым, ахэмэ ятэ ариӀуагъ: «Джыри шъукӀуи, гъомлэпхъэ тӀэкӀу къытфэшъущэф». 3Ехъуд джэуап къытыгъ: «А лӀым теубытагъэ хэлъэу къытиӀуагъ тшы ткӀымыгъоу ыпашъхьэ тимыхьажьынэу. 4Тшы къыддэбгъакӀомэ, тыкӀонышъ, гъомлапхъэ къыпфэтщэфыщт. 5Ау къыддэмыгъакӀомэ, тыкӀощтэп, а цӀыфым тшы ткӀымыгъоу ыпашъхьэ тимыхьажьынэу къытиӀуагъэшъ». 6Исраил къыӀуагъ: «А цӀыфым джыри зы шы зэрэшъуиӀэр ешъуӀуи, сыда мы насыпынчъагъэр къызкӀысэшъушӀагъэр?» 7Адрэмэ къаӀуагъ: «А цӀыфыр тэщ паий тиӀахьылхэм апаий къытӀуупчӀыхьагъ: „Шъуятэ джыри псэуа? Джыри къош шъуиӀа?“ – ыӀозэ. Тэри а упчӀэхэм яджэуап еттыжьыгъ. Сыдым фэтшӀэныя тшынахьыкӀэ зыдэтщэнэу къытиӀощтмэ».

8Ехъуд Исраилэу ятэм риӀуагъ: «КӀэлэхъур сэ къыздэтӀупщи, джыдэдэм тежьэщт, джащыгъум, тымыкӀодэу зэкӀэ псэоу тыкъэнэжьыщт – тэри, ори, тисабыйхэми. 9Ащ ищыӀэныгъэ сэ спшъэ исэлъхьажьы, сэ сӀэхэмкӀэ къыостыжьынэу унашъо къэшӀ. Ар сэ къыпфэсщэжьэу, уапашъхьэ къисымыгъэуцожьмэ, сыщэӀэфэ оркӀэ сэ сымысэщт. 10КӀыхьэ лыхьэ зетымыгъэшӀыгъагъэмэ, джырэ нэс тӀогъогогъо тыкӀощтгъагъэ».

11«Арэущтэу щытмэ, – ыӀуагъ Исраил, – ащыгъум мыры шъушӀэн фаер: мы чӀыгум къыщыкӀырэ лъэпкъхэм ащыщэу анахь дэгъухэр зыдашъуштэхи, а цӀыфым тынэу фэшъухь: Ӏэзэгъу уци, шъоу тӀэкӀуи, мэ ӀэшӀу зыпихрэ чъыги, пцантхъи, чӀыдэжъыий, миндаль дэжъыий. 12Тыжьын ахъщэр фэдитӀукӀэ нахьыбэу зыдашъушт; шъо шъуидзыомэ яӀугъуанэмэ къаралъхьэгъэгъэ тыжьыныри афызэкӀэжъугъэкӀожьынэу: хэукъогъагъэхэу къычӀэкӀын. 13Шъуши зыдешъущажьи, джыри а цӀыфым дэжь шъукӀу. 14ЛъэкӀ пстэури ЗиӀэ Тхьэм а цӀыфым ынэшӀу къышъущифэнэу ерэшӀ – Бинямини адрэ шъуши къытӀупщыжьынхэу. Сэ бынынчъэу сыкъэнэнэу щытмэ, бынынчъэу сыщэрэт».

15А тынхэр зэшмэ зыдаштагъэх, тыжьыныри фэдитӀоу зыдаштагъ, Бинямини зыкӀагъэгъугъ. ЕтӀанэ Мысырым кӀохи, Юсыф ыпашъхьэ иуцуагъэх. 16Бинямин ахэтэу Юсыф зелъэгъум, ежь иунэ Ӏофхэр зезыхьэрэм риӀуагъ: «Мы цӀыфхэр сиунэ ищэх, ищыкӀэгъэ былым фэдиз шӀобзи, къэгъэхьазыр; мыхэр сэ къыздэшхэщтых щэджагъом».

17Юсыф зэриӀуагъэм фэдэу а цӀыфыр зекӀуагъэ, зэшхэр Юсыф иунэ рищагъэх. 18Юсыф иунэ зыращэхэм, зэшхэр къэщтагъэхэу зэраӀожьыгъ: «Тыжьынэу мыщ ыпэкӀэ тидзыомэ къарыкӀыгъагъэм пай ащ тызкӀащэрэр! Къыттебэнэнышъ, тэ пщылӀ тишӀыщт, тищыдхэри ыштэщтых».

19Ахэр Юсыф иунэ Ӏофхэр зезыхьэрэм екӀуалӀэхи, унапчъэм Ӏутхэу дэгущыӀагъэх: 20«Моу къытэдэӀу, тизиусхьан! Тэ мыщ ыпэкӀи тыкъэкӀогъагъ гъомлапхъэ тщэфынэу. 21ТыкӀожьызэ, чэщыр зыщитхыщтым тидзыохэр къызызэӀутэххэм, шъхьадж итыжьын идзыо кӀоцӀ ыкӀыӀу телъ – ытыгъэм фэдиз къабзэ. Тэ ар джы къышъотэтыжьы. 22Гъомылэ тщэфыным пае нэмыкӀ тыжьыни къэтхьыгъ. Адрэ тыжьынхэр тидзыомэ къарызылъхьэгъагъэр тшӀэрэп». 23«Шъурэхьат, – къариӀуагъ ащ, – шъумыщын, шъуи Тхьэ – шъуятэ и Тхьэ – шъуидзыохэм шъэфэу ар шӀухьафтынэу къарилъхьэгъэн фае. Шъуитыжьын сэ къысӀукӀагъ!» ЕтӀанэ ахэмэ адэжь ЩымӀон къыщагъ.

24Юсыф иунэ Ӏофхэр зезыхьэхэрэм зэшхэр Юсыф иунэ рищагъэх, псы къарити, алъакъохэр атхьакӀыгъэх, ящыдхэми Ӏус аратыгъ. 25Щэджагъом, Юсыф къызщыкӀожьырэм тефэу, ахэмэ тынхэр къагъэхьазырыгъэх, сыда пӀомэ а унэм щэджэгъуашхэ зэрэщашӀыщтыр къариӀогъагъ.

26Юсыф къызэкӀожьым, ахэмэ тынхэр ащ ратыгъэх, чӀыгум нэсэу шъхьащи фашӀыгъ. 27Ахэмэ япсэуныгъэ къыкӀэупчӀи, ащ къыӀуагъ: «Зигугъу къысфэшъушӀыгъэгъэ лӀыжъэу шъуятэ иӀоф сыдэу щыта? Джыри ар щыӀа?» 28«Тятэу уиӀумэт псэу. Джыри щыӀ», – джэуап къатыжьыгъ. ЕтӀанэ зыфауфи, шъхьащэ фашӀыгъ.

29Юсыф зызеплъыхьэм, ышэу Бинямин, ежь янэ ыкъо, ылъэгъугъ. «Мыра шъушынахьыкӀэу зигугъу къысфэшъушӀыгъагъэр? – къэупчӀагъ ар. – Тхьэм гукӀэгъу къыпферэшӀ, сишъау». 30Ышы итеплъэ ыгу къызэхигъэхьагъэу, Юсыф псынкӀэу икӀи, къызщамылъэгъун чӀыпӀэ лъыхъоу фежьагъ. Къыгот унэм псынкӀэу чӀэкӀи, ащ щыгъыгъ. 31ЕтӀанэ ынэгу ытхьакӀыжьи, къихьажьыгъ, ыгу теӀункӀэжьи, шхыныр къахьынэу ариӀуагъ.

32Ежьыми шъхьафэу къыфытырагъэуцуагъ, ышыхэми шъхьафэу къафытырагъэуцуагъ, сыда пӀомэ мысыр цӀыфхэр джуртхэм адэшхэ хъущтэп, ежьхэмкӀэ ар емыкӀушъ. 33Зэшхэр Юсыф ыпашъхьэ щытӀысыгъэх, нахьыжъыр инахьыжъыгъэ елъытыгъэу; нахьыкӀэри инахьыкӀагъэ елъытыгъэу; алъэгъурэр ашӀогъэшӀэгъонэу заплъыхьэщтыгъэ. 34Ащ шхынхэр иӀанэ къытекӀэу къафигъэхьыщтыгъэ; Бинямин иӀахьэ фэдитфыкӀэ анахьыбэу къаритыщтыгъэ. Аущтэу тхъэжьхэу Юсыф дешъуагъэх.

Currently Selected:

УблапӀэ 43: АдыТГ

Highlight

Copy