УблапӀэ 42

ЯтӀокӀитӀонэрэ тӀурэ шъхьэр

Юсыф ышнахьыжъхэр Мысырым къызэрэкӀуагъэхэр

1Якъубэ Мысырым лэжьыгъэ зэрэщыӀэр зешӀэм, ыкъомэ ариӀуагъ: «Сыд шъузэплъыжьэу шъузкӀыщысыр? 2Мысырым лэжьыгъэ щыӀэу зэхэсхыгъ. ШъукӀу ащ, лэжьыгъэ къыщышъущэф, гъаблэм тимыгъалӀэу тыщыӀэным пае». 3Юсыф ышипшӀ лэжьыгъэ къащэфынэу Мысырым къэкӀуагъэх. 4Ау Бинямин, Юсыф ыш, Якъубэ адигъэкӀуагъэп; тхьамыкӀагъо горэ къыщымышӀыгъагъот ыӀуи. 5Джаущтэу Исраил ыкъохэр, нэмыкӀ купмэ ягъусэхэу лэжьыгъэ ащэфынэу кӀуагъэх, сыда пӀомэ КъэнаӀан хэгъэгур зэфэдэкӀэ гъаблэм ригъэзыгъагъ.

6Юсыф а хэгъэгоу къыздэкӀуагъэхэм щыӀэшъхьэтетыгъ. Ары лэжьыгъэр цӀыф пстэуми языщэщтыгъэри. Юсыф ышхэри къекӀуалӀэхи, анэгу чӀыгум нэсэу ащ шъхьащэ къыфашӀыгъ. 7Юсыф ышхэм къяплъи, къышӀэжьыгъэх, ау хымэ фэдэу зишӀи, пхъашэу къяупчӀыгъ: «Шъо тыдэ шъукъикӀыгъа?» Ахэмэ джэуап къатыжьыгъ: «КъэнаӀан хэгъэгур ары, гъомлапхъэ тщэфынэу ары». 8Юсыф ышыхэр ышӀэжьыгъэх, ау ежь ахэмэ къашӀэжьыгъэп ныӀа! 9Юсыф ахэмэ апае пкӀыхьапӀэу ылъэгъугъагъэхэр ыгу къэкӀыжьхи, къариӀуагъ: «Шъо шъуплъэкӀо дэӀуакӀу, тихэгъэгу мэхапӀэу иӀэхэр зэжъугъэлъэгъунхэу шъукъэкӀуагъ». 10«Хьау, тизиусхьан, – къаӀуагъ ахэмэ, – уипщылӀхэр гъомлапхъэ ащэфынэу къэкӀуагъэх. 11Тэ зэкӀэ зы цӀыфым тырикъох; тэ шъыпкъагъэ зыхэлъ цӀыфэу тыщыт; уипщылӀхэр нибжьи плъэкӀо дэӀуакӀохэу щытыгъэхэп». 12«Хьау, – ыӀуагъ Юсыф, – мы хэгъэгум мэхапӀэу иӀэхэр зэжъугъэлъэгъунхэу шъукъэкӀуагъ». 13«Тэ, о уипщылӀхэр, – аӀуагъ ахэмэ, – зэш пшӀыкӀутӀу тэхъу. Зы цӀыфэу, КъэнаӀан хэгъэгум щыпсэурэм тырикъох. АнахьыкӀэр джы тятэ кӀыгъу, тащыщэу зыр щыӀэжьэп». 14Юсыф ахэмэ къариӀуагъ: «Адэ сэ къэсӀуагъэба: шъо шъуплъэкӀо дэӀуакӀу. 15Ау тэ шъутыуплъэкӀущт. Фирхьауныр зэрэщыӀэмкӀэ игъашӀэкӀэ тхьэ сэӀо: шъушынахьыкӀэ къэмыкӀоу, мыщ шъо шъурагъэкӀыжьыщтэп. 16Шъуащыщ горэ жъугъакӀуи, шъушы къерэщ; шъо хьапсым шъучӀэсыщтыгу. Джаущтэу сыуплъэкӀущт къашъуӀорэр шъыпкъэмэ. Аущтэу щымытымэ, шъо шъуплъэкӀо дэӀуакӀох. Фирхьауныр зэрэщыӀэмкӀэ тхьэ сэӀо». 17Мэфищырэ къагъэгъунэнхэу Юсыф ахэр хьапс аригъэшӀыгъэх.

18Ящэнэрэ мафэм Юсыф ахэмэ ариӀуагъ: «Сэ къызэрэсӀоу шъушӀымэ, ащыгъум псэоу шъукъэнэщт, сыда пӀомэ сэ Тхьэм щынагъо фысиӀ. 19Шъо шъыпкъагъэ зиӀэ цӀыфэу шъущытмэ, зэшымэ ащыщэу зы мы унэу шъузщаӀыгъым къерэн; адрэхэм шъуиунагъохэу гъаблэм ыгъалӀэхэрэм апае лэжьыгъэр арэщ. 20Ау шъуигущыӀэхэр къэшъыпкъэжьынхэшъ, псэоу шъукъэнэжьыным пае шъушынахьыкӀэ къысфэшъущэн фае». Ахэмэ ащ дырагъэштагъ. 21«ПсэкӀодэу тшыкӀэ тшӀагъэм пае тызэрэпщынэжьырэр нафэ, – зэраӀожьыгъ ахэмэ. – Тэ тлъэгъугъэба ар тхьамыкӀагъоу зыхэтыгъэр, ау тыгу егъугъэп къытэлъэӀу зэхъум. Джы мары тэри тхьамыкӀагъом тыхэфагъ». 22Рубэн ащ къыхигъэхъуагъ: «Сэ къышъосӀогъагъэба: „КӀэлэхъумкӀэ псэкӀод шъумышӀэ“, ау шъо шъудэӀуагъэп; джы ащ ылъ тагъэпщыныжьы». 23АӀорэр Юсыф къызэрэгурыӀорэр ахэмэ ашӀэщтыгъэп – ежь Юсыф зэдзэкӀакӀо иӀэу къадэгущыӀэщтыгъэ. 24Юсыф ахэмэ акӀэрыкӀи, къэгъыгъ. ЕтӀанэ къыгъэзэжьи, джыри адэгущыӀагъ, ащ ыуж ЩымӀон къахищи, ахэмэ алъэгъузэ, ар зэкӀоцӀапхэнэу унашъо ышӀыгъ. 25Ахэмэ ядзыомэ лэжьыгъэр арызы ашӀынэу, шъхьадж итыжьын идзыо фыралъхьажьынышъ, гъогу гъомыли аратынэу Юсыф ариӀуагъ. Джаущтэуи афашӀагъ.

26Къаратыгъэ лэжьыгъэр ящыдмэ атыралъхьи, ядэжь ежьэжьыгъэх. 27Ахэмэ ащыщ горэм, чэщ гъэпсэфыгъом ищыд Ӏус ритынэу, идзыо къызетӀатэм, – мары, дзыо кӀоцӀым ыкӀыӀукӀэ итыжьын телъ! 28Арыти ышымэ ариӀуагъ: «Ситыжьын къысатыжьыгъ; мары ар, ыкӀыӀу телъ!» Ахэр агукӀэ къэгумэкӀыгъэх, щтагъэхэу, зэупчӀыжьыхэу фежьагъэх: «Сыд лӀэужыгъуа тэ Тхьэм къытишӀэрэр?»

29Ахэр ятэу Якъубэ дэжь, КъэнаӀан хэгъэгум къызэкӀожьхэм, зэкӀэ къяхъулӀагъэр ащ къыфаӀотагъ: 30«А хэгъэгум иӀэшъхьэтет пхъашэу къыддэгущыӀагъ, а хэгъэгумкӀэ тэ тыплъэкӀо дэӀуакӀоуи ылъытагъ. 31Шъыпкъагъэ зиӀэ цӀыфхэу тэ тызэрэщытыр, плъэкӀо дэӀуакӀоу тызэрэщымытыри тэ ащ етӀуагъ. 32Тэ, зэш пшӀыкӀутӀур, зы тым тырикъох, зыр щыӀэжьэп, анахьыкӀэр тятэ кӀыгъоу КъэнаӀан хэгъэгум джы щыӀ». 33Джащыгъум а цӀыфэу а хэгъэгум изиусхьан къытиӀуагъ: «КъэшъуӀуагъэр шъыпкъэмэ, мары сэ къызэрэсшӀэщтыр: шъушыхэм ащыщэу зыр сэ садэжь къэжъугъэнэщт, адрэхэм лэжьыгъэр шъуиунагъохэу, гъаблэ зиӀэхэм афэшъущэнэу шъуигъогу шъутехьажь, 34шъушынахьыкӀэ шъуигъусэу къэжъугъэзэжь. ЕтӀанэ сэ сшӀошъ хъущт шъо дэӀокӀо плъакӀоу шъущымытэу, шъыпкъагъэ зиӀэ цӀыфэу шъузэрэщытыр; шъушэу гъэры сшӀыгъэри шъостыжьыщт, мы хэгъэгум шъхьафитэу шъукъыщекӀокӀын шъуфитэуи сшӀыщт».

35Ядзыохэр заунэкӀыжьхэм, шъхьадж идзыо ежь итыжьын зэкӀоцӀыпхагъэ илъэу къычӀэкӀыгъ. Ахэмэ ятыжьын зэкӀоцӀыпхагъэхэр залъэгъухэм, ежьхэми ахэмэ яти агучӀэ изыгъ. 36«Скъохэр сшӀожъугъэкӀодыгъэх, – ариӀуагъ ахэмэ Якъубэ, – Юсыф щыӀэжьэп. ЩымӀони щыӀэжьэп. Джы Бинямини зыдешъущэжьэн шъугу хэлъ, а пстэури сэ сищэчын!» 37Рубэн ятэ джэуап ритыжьыгъ: «Бинямин сэ къызыпфэсымыщэжькӀэ, сэ скъуитӀу укӀы; ащкӀэ цыхьэ къысфэшӀи, сэ ар къыпфэсщэжьыщт». 38«Хьау, – ыӀуагъ Якъубэ, – скъо къыжъудэкӀощтэп. Ащ ыш лӀагъэ, ар изакъоу къысфэнагъ. Шъо шъузытехьащт гъогум ащ тхьамыкӀагъо къыщехъулӀэмэ, шъо шъуилажьэкӀэ сэ, зышъхьац тхъогъэ лӀыжъыр, гукъэошхом хьадрыхэм сищэщт».

Currently Selected:

УблапӀэ 42: АдыТГ

Highlight

Copy