УблапӀэ 44

ЯтӀокӀитӀонэрэ плӀырэ шъхьэр

Юсыф ышхэр зэриушэтыгъэхэр

1Юсыф иунэ Ӏофхэр зезыхьэрэм унашъо фишӀыгъ: «Мыхэмэ ядзыомэ лэжьыгъэр арызы шӀы, ащэшъущтым фэдиз, шъхьадж итыжьыни идзыо кӀоцӀ ыкӀыӀукӀэ телъхьажь. 2Ау лэжьыгъапкӀэу къыхьыгъэ тыжьын ахъщэм кӀыгъоу сэ сиӀэгубжъэ, ситыжьын Ӏэгубжъэ, анахьыкӀэм идзыо кӀоцӀ ыкӀыӀукӀэ телъхь». Юсыф къызэрэриӀуагъэу адрэм ышӀыгъ.

3Нэф къызэрышъэу, ящыдхэри акӀыгъухэу зэшыхэр къатӀупщыжьыгъэх. 4Къалэм джыри ахэр чыжьэу ӀукӀыгъагъэхэп, Юсыф иунэ Ӏофхэр зезыхьэрэм зыреӀом: «ПсынкӀаӀоу акӀахь ахэмэ, узакӀахьэкӀэ, яӀу: „Сыд пае шӀум екӀэ шъупэгъокӀыгъа? 5Сыда ситыжьын Ӏэгубжъэ зыкӀэшъутыгъугъэр?#44:5 Ижъырэ джуртыбзэкӀэ тхыгъэ Ӏэпэрытхым мы гущыӀэхэр хэтхэп, ау нэмыкӀ ижъырэ Ӏэпэрытхым хэтых. А Ӏэгубжъэр ары сизиусхьан зэрешъорэр, ащкӀэ къэхъущт къэшӀэщтхэри къешӀэх. Дэеу шъушӀагъэ ар!“»

6Ар ахэмэ акӀахьи, а гущыӀэхэр ариӀуагъэх. 7Зэшмэ джэуап къатыжьыгъ: «Тизиусхьан, сыд пае ащ фэдэ гущыӀэхэр къапӀохэрэ? Хьау, уиунэӀутхэм ащ фэдэ ашӀэн алъэкӀыщтыгъэп. 8Ар хэгъэкӀыри, мары тидзыомэ къарыкӀыгъэ тыжьынхэр КъэнаӀан хэгъэгум къитхыжьхи, къыпфэтхьыжьыгъэх! Адэ сыдэущтэу о уизиусхьан иунэ тыжьын е дышъэ къиттыгъукӀына? 9УипщылӀхэм ащыщ горэм тыгъугъэр ебгъотылӀэмэ, арэукӀ, тэри тизиусхьан тырипщылӀэу тыкъэнэщт». 10«Дэгъу, зэрэшъуӀуагъэм тетэу орэхъу, – къыӀуагъ адрэм. – Тыгъугъэ зэдгъотылӀэрэр ары пщылӀы хъущтыр, адрэхэр хыеу хэкӀыщтых». 11Зэшхэм ядзыохэр псынкӀэу чӀыгум къыратӀупщэххи, шъхьадж идзыо къызэӀуихыгъ. 12Юсыф иунэ Ӏофхэр зезыхьэрэм зэкӀэ къылъыхъугъ, анахьыжъым къыщыригъажьи, анахьыкӀэмкӀэ кӀэкӀыжьэу – Ӏэгубжъэр Бинямин идзыо къыригъотагъ. 13Ягукъао ишыхьатэу, ахэмэ ящыгъынхэр ацунтхъагъэх, шъхьадж ищыд хьылъэхэр тырилъхьажьхи, къалэм къагъэзэжьыгъ.

14Ехъудрэ ащ ышхэмрэ джыри унэм исыгъэ Юсыф дэжь къакӀохи, ащ ыпашъхьэ чӀыгум зыщырадзыхыгъ. 15Юсыф ахэмэ къариӀуагъ: «Сыдэущтэу ащ фэдэ шъушӀэн шъулъэкӀыгъа? Сэщ фэдэ цӀыфым ар къызэришӀэщтыр шъушӀэщтыгъэба?» 16«Тизиусхьан сыд етӀон? – къыӀуагъ Ехъуд. – Сыда тӀощтыр? СыдкӀэ зытыухыижьыщт? Тхьэм уипщылӀхэм ямышъыпкъагъэ къычӀигъэщыгъ. Джы мары тизиусхьан тэ тырипщылӀ, тэри, Ӏэгубжъэр зыӀэкӀагъотагъэри». 17«Хьау, – Юсыф къыӀуагъ, – сэ ащ фэдэ сшӀэн слъэкӀыщтэп! Ӏэгубжъэр зыӀэкӀагъотагъэр ары сэ сипщылӀыщтыр, шъори рэхьатэу шъуятэ дэжь шъукӀожь».

18Джащыгъум Ехъуд Юсыф екӀуалӀи, риӀуагъ: «Сизиусхьан, сэ, уипщылӀ, фит сышӀ сизиусхьан гущыӀэ есӀонэу. Уфэмыгубж уипщылӀ, фирхьауным уфэдэми. 19Сизиусхьан ипщылӀхэм къяупчӀыгъагъ: „Тырэ шырэ шъуиӀа?“ 20Тизиусхьан, жъы хъугъэу тыри, къо нахьыкӀэу ащ ижъышъхьэм къыфэхъугъэри зэрэтиӀэр о къыотӀогъагъ, ащ ыш лӀагъэ, ежь изакъоу янэ къыкӀэныгъ. Ар тятэ шӀу елъэгъу.

21О уипщылӀхэм къяпӀогъагъ: „Зэзгъэлъэгъунэу ар садэжь къашъущэ“. 22Тизиусхьан тэ къетӀожьыгъагъ: „КӀэлэхъум ятэ ӀэкӀыб ышӀын ылъэкӀыщтэп, ӀэкӀыб ышӀымэ, ятэ лӀэщт“. 23Ау о уипщылӀхэм къяпӀогъагъ: „ШъушынахьыкӀэ мокӀэ къыжъудэмыкӀомэ, ащ нахьыбэкӀэ сапашъхьэ шъукъимыхьажь“. 24УиӀумэтэу, тэ тятэм ыдэжь тызэкӀожьым, сизиусхьан игущыӀэхэр ащ етӀожьыгъэх. 25Ау тятэ джыри лэжьыгъэ тӀэкӀу къэтщэнэу къызеӀом, 26тшынахьыкӀэ тимыгъусэу тызэрэмыкӀощтыр, тшынахьыкӀэ тимыгъусэмэ, о унэгу тыкӀэплъэн тызэрэфимытыр тэ етӀожьыгъ.

27О уиӀумэтэу тэ тятэм къытиӀуагъ: „Сишъуз къуитӀу къызэрэсфилъфыгъэр шъо шъошӀэ. 28Зыр садэжь икӀыгъэти, сэ сӀуагъэ: ар хьэкӀэ къуакӀэмэ зэпкъыратхъыгъ. Непэ къызнэсыгъэм ар слъэгъужьыгъэп. 29Джы мыдрэри шъоштэ. Ащи тхьамыкӀагъо къехъулӀэмэ? Шъо шъуилажьэкӀэ, сэ, зышъхьац тхъогъэ лӀыжъым, гукъэошхом хьадрыхэ сихьыщт“. 30Джы сэ, о уиӀумэтэу тятэм дэжь, кӀэлэхъоу ащ ыпсэ хэтӀагъэр тимыгъусэу сыкӀожьын слъэкӀына? 31Тятэ, кӀэлэхъур зэрэтимыгъусэр зилъэгъукӀэ, лӀэщт. Тятэу уиӀумэт, лӀыжъ шъхьац тхъуагъэр, гукъаом Шеол дищэщт. 32Сэ, уипщылӀ, тятэ сшъхьэкӀэ гущыӀэ естыгъ тшы къыгъэзэжьынэу, ащ къызимыгъэзэжькӀэ, сыщэӀэфэ сятэ ыпашъхьэ сыщымысэщт.

33Арышъ сэ, о уипщылӀ, кӀэлэхъум ычӀыпӀэкӀэ сизиусхьан дэжь пщылӀэу сыкъэнэнэу фит сыкъэшӀ! Ежь ышымэ адэрэкӀожь. 34КӀэлэхъур скӀымыгъоу сыдэущтэу сыкӀожьыщта? Тятэ тхьамыкӀагъоу зыхэфэщтыр сэрэмылъэгъу».

Currently Selected:

УблапӀэ 44: АдыТГ

Highlight

Copy