УблапӀэ 41

ЯтӀокӀитӀонэрэ зырэ шъхьэр

Юсыф фирхьауным ипкӀыхьапӀэхэм къарыкӀырэр зэрэгуригъэӀуагъэр

1ИлъэситӀу зытешӀэм, фирхьауным пкӀыхьапӀэ ылъэгъугъ: ар Нил псыхъом Ӏут. 2Джы мары дэгъухэу, апкъыкӀи пщэрхэу, чэмибл Нил псыхъом къыхэкӀыгъэхэу, нэпкъ зэхэкӀыхьагъэм щэхъух. 3Мары ахэмэ ауж итхэу, теплъаджэхэу, апкъыкӀэ одхэу, нэмыкӀ чэмибл Нил псыхъом къыхэкӀыхэшъ, адрэ чэмхэм агоуцох. 4Чэмибл теплъаджэхэу, зыпкъыкӀэ одхэм чэм дэхэ зишӀугъохэр ашхы. Фирхьауныр къэущыжьыгъ. 5ИкӀэрыкӀэу хэчъыежьи, джыри нэмыкӀ пкӀыхьапӀэ ылъэгъугъ: мары зы щэпкъым пщэрхэу, дэгъухэу шъхьибл къыпыкӀагъ. 6Ау мары ахэмэ ауж нэкӀхэу, тыгъэжьым ыгъэгъугъэхэу шъхьибл къэкӀыгъ. 7Фышъхьэ одхэм шъхьэ псэоу, шъхьэ ушъагъэхэр ашхыгъэх. Фирхьауныр къэущыжьи, пкӀыхьапӀэ зэрилъэгъугъэр къыгурыӀуагъ.

8Пчэдыжьым ар гумэкӀыгъо хэфагъэу зэкӀэ Мысырым ис тхьэгурымагъохэри акъылышӀохэри къаригъащэхи, ипкӀыхьапӀэ ахэмэ къафиӀотагъ, ау фирхьауным ар зыми къыфызэхифын ылъэкӀыгъэп. 9Джащыгъум сэнэзехьэ шъхьаӀэм фирхьауным риӀуагъ: «Джы сыгу къэкӀыжьы симысагъэ. 10Зэгорэм фирхьауныр иунэӀутмэ лъэшэу афэгубжи, сэри хьалыгъугъэжъэ шъхьаӀэри сигъусэу хьапсым, ухъумакӀомэ ятхьаматэ иунэ тычӀаригъэшӀыхьэгъагъ. 11А зы чэщым тэ титӀуи пкӀыхьапӀэхэр тлъэгъугъэх, мэхьэнэ шъхьаф иӀэу, шъхьадж ежь ипкӀыхьапӀэ ылъэгъугъ. 12Ащ щытигъусагъ джурт кӀалэ, ухъумакӀохэм ятхьаматэ иунэӀутыр. Тэ ащ типкӀыхьапӀэхэр къыфэтӀотагъэхэти, ащ шъхьадж пкӀыхьапӀэу ылъэгъугъэм имэхьанэ къытфызэхифыгъ. 13Тэ ащ типкӀыхьапӀэхэр къызэрэзэхифыгъэхэм фэдэуи хъугъэ: сэ сичӀыпӀэ къэсэбгъэгъэзэжьыгъ, адрэр пябгъэлъагъ».

14Ащ нэужым фирхьауным Юсыф лъигъэкӀуагъэх. ГузэжъогъукӀэ ар хьапсым къычӀащыжьыгъ, зэкӀаупсыхьи, ищыгъынхэр зэблахъухи, фирхьауным дэжь къэкӀуагъ. 15Фирхьауным къыӀуагъ: «Сэ пкӀыхьапӀэ слъэгъугъэ, ау ар къысфызэхэзыфышъун щыӀэп. О, зэраӀорэмкӀэ, пкӀыхьапӀэр зэрэзэхэпхэу, ащ лъыпытэу къикӀырэр къэоӀо».

16«Ар сэ сӀэ илъэп, – Юсыф джэуап къытыжьыгъ, – фирхьауным ишӀуагъэ екӀынэу Тхьэм джэуап къытыщт».

17Фирхьауным Юсыф къыфиӀотагъ: «Сэ пкӀыхьапӀэ слъэгъугъэ, мары Нил инэпкъ сытет. 18Джы мары дэгъухэу, апкъыкӀэ пщэрхэу, чэмибл Нил псыхъом къыхэкӀыгъэхэу, нэпкъ зэхэкӀыхьагъэм щэхъух. 19Джы мары ахэмэ ауж итхэу нэмыкӀ чэмибли къыхэкӀых, одхэу, теплъэджэ дэдэхэу, зэпкъырыуагъэхэу; ахэмэ афэдэ Мысыр чӀыналъэм щыслъэгъугъэп. 20Чэм зэпкъырыуагъэхэу, чэм одхэм апэрэ чэмибл пщэрхэр ашхыгъ. 21Пщэрхэр ахэмэ акӀоцӀ хъугъэх, ау ахэмэ аныбэмэ арыз хъугъэу къахэщыгъэп. Ыпэрэм фэдэу, ахэр теплъэджагъэх. ЕтӀанэ сыкъэущыжьыгъ. 22Ащ ыуж нэмыкӀ пкӀыхьапӀэ слъэгъугъэ: зы щэпкъым арызэу, дэгъухэу шъхьибл къыпыкӀагъ. 23Ахэмэ ауж псыгъохэу, тхьамыкӀэхэу, тыгъэжьым ыгъэгъугъэхэу шъхьибл къэкӀыгъ. 24Фышъхьэ одмэ шъхьибл дэгъухэр зи къэмынэу ашхыгъ. Сэ ар тхьэгурымагъохэм къафэсӀотагъ, ау зыми къысфызэхифышъугъэп».

25Юсыф фирхьауным риӀуагъ: «Ар пкӀыхьапӀитӀоп, зы нахь. Тхьэм ышӀэщтымкӀэ фирхьауным макъэ къыригъэӀугъ. 26Чэм дэгъуиблыр – ар илъэсибл; фышъхьэ дэгъуиблыри – ари илъэсибл. Арышъ ар зы пкӀыхьапӀ.

27Одхэу ыкӀи теплъаджэхэу чэмиблэу апэрэмэ ауж псым къыхэкӀыгъэхэр – илъэсибл, джащ фэдэуи одхэу, тыгъэжьым ыгъэгъугъэ шъхьиблыр – ахэри къыкӀэлъыкӀорэ илъэсибл гъабл. 28Джары сэ фирхьауным зыкӀесӀогъагъэр: Тхьэм ышӀэщтыр фирхьауным къыригъэлъэгъугъ.

29Мысыр хэгъэгум изэфэдэкӀэ илъэсибл гъэбэжъу къыщежьэщт. 30Ахэмэ ауж илъэсибл гъаблэ къэхъущт; Мысыр хэгъэгум гъэбэжъоу щыӀагъэр ащыгъупшэжьыщт. Гъаблэм чӀыгур ыунэкӀынышъ, 31ар къин дэдэу зэрэщытыщтым къыхэкӀыкӀэ ипэурэ гъэбэжъоу щыӀагъэр щымыӀагъэм фэдэу хъущт. 32ПкӀыхьапӀэр фирхьауным зэкӀэлъыкӀоу тӀо зэрилъэгъугъэм къикӀырэр, ар Тхьэм теубытагъэ хэлъэу зэрэрихъухьагъэр, шӀэхэуи ар зэригъэцэкӀэщтыр ары.

33Джы фирхьауным губзыгъэу, акъылышӀоу лӀы къерэгъоти, ар Мысыр хэгъэгум ипащэу ерэгъэуцу. 34Фирхьауным зэрэхэгъэгоу къулыкъушӀэхэр щерэгъэнафэх – илъэсибл гъэбэжъум къыкӀоцӀ Мысыр хэгъэгум къытекӀэщт лэжьыгъэм иятфэнэрэ Ӏахьэ цӀыфмэ къаӀахынэу. 35Лэжьыгъэу а къихьащт илъэс дэгъухэм къэкӀыщтыр арэугъой, фирхьауным ынаӀэ тетэу ар гъомлапхъэкӀэ къалэхэм ащарэгъэтӀылъи, къарэухъум. 36Джащыгъум хэгъэгум илъэсибл гъаблэу къыфэкӀощтым пае а гъомлапхъэр гъэтӀылъыгъэ хъущт, хэгъэгуми гъаблэр зэпичыщт!»

Юсыф фирхьауным игуадзэу зэрэхъугъэр

37Фирхьауными ащ иӀэнэтӀэзехьэхэми Юсыф игущыӀэхэр агу рихьыгъэх, 38ахэмэ ащ ариӀуагъ: «Ащ фэдэ цӀыф дгъотыщта, мыщ фэдэу, Тхьэм Ыпсэ хэлъэу?»

39Фирхьауным Юсыф зыфигъэзагъ: «А пстэури о Тхьэм къыпфызэӀуихыгъэшъ, ощ фэдэу губзыгъэрэ акъылышӀорэ щыӀэп. 40ЗэкӀэ сиунэ Ӏофхэр о зепхьащтых, зэкӀэ сицӀыфхэм уиунашъохэр агъэцэкӀэщтых. Пачъыхьэ тахътэр ары ныӀэп ощ нахьи сызэрэнахь иныщтыр».

41Фирхьауным Юсыф къыриӀуагъ: «Сакъы, зэкӀэ Мысыр хэгъэгум иӀэшъхьэтетэу узгъэуцугъ».

42Фирхьауным имыхъур Ӏэлъын къызпихи, Юсыф ыӀэ къыпилъхьагъ; лен дэгъу дэдэм хэшӀыкӀыгъэ щыгъынхэр щилъэхи, ыпшъэ дышъэ пшъэхъу къырилъхьагъ; 43Заом фытегъэпсыхьэгъэ ку псынкӀэу хэгъэгум ятӀонэрэ цӀыфэу исыр зэрэзэращэрэр къыритыгъ; Юсыф ащ исэу кӀо зыхъукӀэ, «гъогур ешъут!»#41:43 ЯтӀонэрэ мэхьанэр: Шъхьащэ фэшъушӀ! аӀозэ, куощтыгъэх.

Джаущтэу фирхьауным Мысыр хэгъэгум ар Ӏэшъхьэтет фишӀыгъ.

44Фирхьауным Юсыф риӀуагъ: «Мары сэ, фирхьауным, сиунашъо: о уишӀэ хэмылъэу, Мысыр хэгъэгум зыми ыӀи щигъэсысыщтэп, лъэбэкъуи щидзыщтэп».

45Фирхьауным Юсыф цӀэ фишӀыгъ: Цафнат ПаӀынэах; ащ шъузкӀэ ритыгъ Асэнат, къалэу Он дэс къурмэнышӀэу ПотыпэраӀ ыпхъу. Юсыф Мысыр хэгъэгум лъытэныгъэ щыриӀэу хъугъэ. 46Юсыф илъэс щэкӀ ыныбжьыгъ Мысырым ипачъыхьэу фирхьауным фэлажьэу зеублэм.

Юсыф фирхьауным ыпашъхьэ къикӀыжьи, Мысыр хэгъэгур зэкӀэ къыкӀухьанэу ежьагъ.

47ЧӀыгум илъэсиблым къыкӀоцӀ гъэбэжъу иӀэу, зы лэжьыгъацэ пэпчъ Ӏэбжыб къытыщтыгъэ. 48Илъэсиблым къыкӀоцӀ сыдрэ лэжьыгъэуи Мысыр хэгъэгум щыбэгъуагъэр ащ зэӀуигъэкӀагъ, лэжьыгъэр къалэхэм ащигъэтӀылъыгъ; къалэ пэпчъ ащ къегъэтӀылъэкӀыгъэ губгъохэм ялэжьыгъэ дилъхьагъ. 49Юсыф лэжьыгъэ бэдэдэ ыугъоигъ, хыӀушъо пшахъом фэдэу, арыти лъытэныри щигъэтыжьыгъ, сыда пӀомэ плъытэн плъэкӀыжьыщтгъагъэп.

50А лъэхъаным, гъэблэ илъэсхэр къэмысыхэзэ, Юсыф шъэуитӀу къыфэхъугъ: ахэр Он дэс къурмэнышӀэу ПотыпэраӀ ыпхъу Асэнат къыфилъфыгъэх. 51Юсыф ищыпэлъф Мынасэ#41:51 Мынасэ – ижъырэ джуртыбзэкӀэ къикӀырэр: лӀыгъэкӀэ щыбгъэгъупшэн. фиуси, къыӀуагъ: «Тхьэм сщигъэгъупшагъ зэкӀэ ситхьамыкӀагъохэри сятэ иуни». 52Адрэм Ефраим#41:52 Ефраим – ижъырэ джуртыбзэкӀэ къикӀырэр: угъэбэжъуныр. фиуси, къыӀуагъ: «Къин зыщысщэчыгъэ хэгъэгум цӀыф гъэбэжъу Тхьэм сыщишӀыгъ».

53Гъэбэжъу илъэсиблэу Мысыр хэгъэгум щыӀагъэр текӀыгъ. 54Юсыф зэриӀогъагъэу, гъэблэ илъэсиблыр къэсыгъ. ЧӀынэлъэ пстэуми гъаблэ ащыӀагъ, ау Мысыр хэгъэгум тыдэкӀи гъомлапхъэ щыӀагъ. 55Ау Мысыр хэгъэгуми тыдэкӀи цӀыфхэр гъаблэм щигъалӀэхэу зырегъажьэм, цӀыфхэр лэжьыгъэ къаритынэу фирхьауным елъэӀухэу фежьагъэх. Фирхьауным къариӀуагъ: «Юсыф дэжь шъукӀуи, ащ къышъуиӀорэр шъушӀэ».

56Дунаим изэфэдэкӀэ гъаблэм зызщеушъомбгъум, Юсыф зэкӀэ лэжьыгъэ гъэтӀылъыпӀэхэр къызэӀуихыхи, мысыр цӀыфмэ лэжьыгъэр арищэу ыублагъ. Мысыр хэгъэгум гъаблэр нахь ины щыхъущтыгъэ. 57Хэгъэгу гъунэгъу пстэуми къарыкӀыхэти, Юсыф лэжьыгъэ щащэфынэу Мысырым къакӀощтыгъэх, сыда пӀомэ чӀыгум изэфэдэкӀэ щыгъэблэшхуагъ.

Currently Selected:

УблапӀэ 41: АдыТГ

Highlight

Copy