МысырикӀыжь 40

ЯтӀокӀитӀонэрэ шъхьэр

ЧэтэнгъэӀэгъэ лъапӀэр зэрагъэуцугъэмрэ ар зэрагъэлъэпӀагъэмрэ

1Зиусхьаным Мосэ къыриӀуагъ: 2«Апэрэ мазэм, мазэм иапэрэ мафэ Тхьэм зыщыӀукӀэхэрэ псэупӀэу чэтэнгъэӀэгъэ лъапӀэр гъэуцу. 3Пхъонтэ лъапӀэр ащ чӀахьи, пэӀухъор Ӏухъу. 4Ӏанэр ащ чӀахьи, ищыкӀагъэр зэкӀэ ащ тегъэуцу. Остыгъэр къахьи, гъэстылъэхэр ащ тегъэуцох. 5МыстхъугъэстыпӀэ къурмэншӀыпӀэр пхъонтэ лъапӀэм пэчӀынатӀэу гъэуцу. ЧэтэнгъэӀэгъэ лъапӀэм ичӀэхьапӀэ Ӏухъор щыпылъ. 6Тхьэм зыщыӀукӀэхэрэ псэупӀэу чэтэнгъэӀэгъэ лъапӀэм ичӀэхьапӀэ дэжь къурмэнгъэстхэр зыщашӀырэ къурмэншӀыпӀэр гъэуцу. 7ЧэтэнгъэӀэгъэ лъапӀэмрэ къурмэншӀыпӀэмрэ азыфагу зызэратхьакӀыщт псыр зэрытыщт лэджэныр дэгъэуцуи, ащ псы из шӀы. 8ЧэтэнгъэӀэгъэ лъапӀэм ищагу гъэпси, щагум икъэлапчъэ Ӏухъо фэшӀ. 9ЕтӀанэ щыфэ ашӀырэ дагъэр шти, чэтэнгъэӀэгъэ лъапӀэми ащ чӀэт пстэуми ащыфи, чэтэнгъэӀэгъэ лъапӀэри ащ дыкӀыгъоу агъэфедэрэ пстэури гъэлъэпӀагъэхэу хъущт. 10Джаущтэу къурмэнгъэстхэр зыщашӀырэ къурмэншӀыпӀэми ащ дыкӀыгъоу агъэфедэрэ пстэуми а дагъэр ащыфи, ахэр лъапӀэм илъэпӀэжьхэу хъущтых. 11ЗызэратхьакӀыщт псыр зэрытыщт лэджэнми итегъэуцуапӀи дагъэр ащыфи, ахэр гъэлъэпӀагъэхэу шӀы. 12Ащ ыуж Хьаруни ыкъохэри Тхьэм зыщыӀукӀэхэрэ чэтэнгъэӀэгъэ лъапӀэм ичӀэхьапӀэ дэжь къащэхи, зягъэтхьакӀ. 13Хьарунэ шъошэ лъапӀэр зыщегъалъи, ышъхьэ дагъэр щыф: Сэ сикъурмэнышӀ хъуным пае Сэщ пае хэушъхьафыкӀи, къысфэслэжьэнэу къурмэнышӀэу гъэуцу. 14Ащ ыкъохэр къащэхи, джэнэ гъопэ кӀыхьэхэр зыщягъалъэхи, 15Сэ сикъурмэнышӀ хъунхэм пае, ятэ фэдэу ахэми ашъхьэмэ дагъэр ащыф. А дэгъэщыфэнымкӀэ ялӀэуж зэкӀэлъыкӀохэр щэӀэхэфэ къурмэнышӀэу къысфэлэжьэщтых».

16Зиусхьаным унашъо къызэрэфишӀыгъэм тетэу, Мосэ зэкӀэ зэшӀуихыгъ.

17ЯтӀонэрэ илъэсым иапэрэ мазэ иапэрэ мафэ чэтэнгъэӀэгъэ лъапӀэр агъэуцугъ. 18Мосэ чэтэнгъэӀэгъэ лъапӀэр ыгъэуцугъ, игъэуцуапӀэхэр ыгъэтӀылъхи, пхъэмбгъу Ӏужъухэр бгыкъуидзэхэмкӀэ зэригъэкӀухи, ахэм аригъэуцуагъэх; пкъэухэр ыгъэуцухи, 19Зиусхьаным унашъо къызэрэфишӀыгъэм тетэу, чэтэнгъэӀэгъэ лъапӀэм техъозэхэдагъэр тырилъхьагъ, ащ ыкӀыӀу нэмыкӀ техъозэхэдагъэр тырилъхьажьыгъ.

20Мосэ Зиусхьаным иунэшъуипшӀ зытет мыжъобгъуитӀур ышти, пхъонтэ лъапӀэм дилъхьагъэх. Бэщхэр пхъонтэ лъапӀэм пилъхьэхи, ишъхьатеӀубэ ащ тырилъхьагъ. 21Мосэ пхъонтэ лъапӀэр чэтэнгъэӀэгъэ лъапӀэм чӀихьи, Зиусхьаным унашъо къызэрэфишӀыгъэм тетэу, унэшъуипшӀыр зытет мыжъобгъуитӀур зыдэлъ пхъонтэ лъапӀэр къэмылъэгъонэу пэӀухъор пилъагъ. 22Мосэ Ӏанэр чэтэнгъэӀэгъэ лъапӀэм – Тхьэм зыщыӀукӀэхэрэ псэупӀэм – чӀихьи, ащ итемыр лъэныкъокӀэ щыӀэу, пэӀухъо пашъхьэм дэжь ыгъэуцугъ. 23Зиусхьаным унашъо къызэрэфишӀыгъэм тетэу, Зиусхьаным ыпашъхьэ илъынэу гъомылэ тынэу хьалыгъухэр Ӏанэм тырилъхьагъэх. 24Мосэ чэтэнгъэӀэгъэ лъапӀэм – Тхьэм зыщыӀукӀэхэрэ псэупӀэм – икъыблэ лъэныкъокӀэ щыӀэу, Ӏанэм пэзанкӀэу остыгъэр ыгъэуцуи, 25Зиусхьаным унашъо къызэрэфишӀыгъэм тетэу, Зиусхьаным ыпашъхьэ итынхэу, гъэстылъэхэр ащ тыригъэуцуагъэх. 26Мэ ӀашӀухэр къызпихрэ мыстхъухэр зыщагъэстыщтхэ къурмэншӀыпӀэу дышъэр къызэгъэтӀылъэкӀыгъэр Тхьэм зыщыӀукӀэхэрэ чэтэнгъэӀэгъэ лъапӀэм, пэӀухъом ыпашъхьэ щигъэуцуи, 27Зиусхьаным унашъо къызэрэфишӀыгъэм тетэу, мэ ӀашӀухэр къызпихрэ мыстхъухэр ащ щигъэстыгъэх. 28ЧэтэнгъэӀэгъэ лъапӀэм ичӀэхьапӀэ Ӏухъор щыпилъагъ. 29Тхьэм зыщыӀукӀэхэрэ псэупӀэу чэтэнгъэӀэгъэ лъапӀэм ичӀэхьапӀэ дэжь къурмэнгъэстхэр зыщашӀыщт къурмэншӀыпӀэр ыгъэуцуи, Зиусхьаным унашъо къызэрэфишӀыгъэм тетэу, ащ къурмэнгъэстрэ гъомылэ къурмэнрэ щишӀыгъэх. 30Тхьэм зыщыӀукӀэхэрэ чэтэнгъэӀэгъэ лъапӀэмрэ къурмэншӀыпӀэмрэ азыфагоу лэджэныр ыгъэуцуи, зызэратхьакӀыщт псыр ащ ригъэхъуагъ. 31Моси, Хьаруни, Хьарунэ ыкъохэми псыр ащ къыхахызэ, 32Тхьэм зыщыӀукӀэхэрэ чэтэнгъэӀэгъэ лъапӀэм чӀэхьанхэ е къурмэншӀыпӀэм екӀолӀэнхэ фае зыхъукӀэ, Зиусхьаным МосэкӀэ унашъо къызэришӀыгъэм тетэу, аӀэхэри алъакъохэри ахэм атхьакӀыщтыгъэх. 33ЧэтэнгъэӀэгъэ лъапӀэмрэ къурмэншӀыпӀэмрэ кӀоцӀымкӀэ щыӀэхэу щагу ащ ыгъэпси, щагум икъэлапчъэ Ӏухъо фишӀыгъ. Джаущтэу Мосэ иӀофшӀэн ыухыгъ.

Зиусхьаным и Щытхъу ошъуапщэ къызэрехыгъэр

34Мыщ дэжьым Тхьэм зыщыӀукӀэхэрэ псэупӀэр ошъуапщэм ыгъэбылъыгъ, Зиусхьаным и Щытхъу ошъуапщэ чэтэнгъэӀэгъэ лъапӀэр зэлъикӀугъ. 35Мосэ Тхьэм зыщыӀукӀэхэрэ псэупӀэм чӀэхьан ылъэкӀыщтыгъэп, сыда пӀомэ ошъуапщэм ар ыгъэбылъыгъэу, Зиусхьаным и Щытхъуи Тхьэм ичэтэнгъэӀэгъэ лъапӀэ зэлъикӀугъагъ.

36Ошъуапщэм чэтэнгъэӀэгъэ лъапӀэр къызибгынэкӀэ, израиль цӀыфхэр ежьэхэти, зичэзыу гъогууанэр акӀущтыгъэ. 37Ошъуапщэм зимыӀэтмэ, ахэр зы чӀыпӀэ икӀыщтыгъэхэп, гъогум техьэщтыгъэхэп, ошъуапщэм зызщиӀэтыщт мафэм ежэщтыгъэх. 38Зиусхьаным иошъуапщэ мафэрэ чэтэнгъэӀэгъэ лъапӀэм шъхьащытыщтыгъ, чэщырэ а ошъуапщэм ыкӀоцӀ машӀор щыстыщтыгъэ – ар израиль цӀыф пстэуми алъэгъущтыгъэ. Ахэр гъогухэм зыщатетыгъэхэ уахътэм къыкӀоцӀ джары ренэу зэрэщытыгъэр.

Currently Selected:

МысырикӀыжь 40: АдыТГ

Highlight

Copy