Хэбзэ тхыжьыгъэр 1

Мосэ иапэрэ псалъ

(1:1-рэ – я 4:43-рэ шъхьэхэр)

Апэрэ шъхьэр

Мосэ израил цӀыфхэм агу къыгъэкӀыжьыгъэхэр

1Мары Мосэ зэрэизраил лъэпкъэу Иордан итыгъэ къокӀыпӀэ лъэныкъокӀэ щыӀэ шъоф нэкӀым зетхэм риӀуагъэхэр. Ар зыщыхъугъэр Пэран шъоф нэкӀыр зы бгъумкӀэ гъэзагъэу, Тофэл, Лабан, Хъацэрэт, Дызэхъаф псэупӀэ-тӀысыпӀэхэр адрэ бгъумкӀэ щыӀэхэу Суф чӀыпӀэм зыщыпэчӀынатӀэхэр ары. 2Синай къушъхьэм#1:2 Ижъырэ джуртыбзэкӀэ тхыгъэ Ӏэпэрытхым Синай къушъхьэм ыцӀэ зэрэщыхэтыр: «Хъорэб къушъхьэр». Мы тхылъым инэмыкӀ чӀыпӀэхэми джары къызэращыхафэрэр. къыщегъэжьагъэу СэӀир къушъхьэлъэ чӀыпӀэм узэпырыкӀэу къыблэ лъэныкъомкӀэ щыӀэ чӀыпӀэу Къадэщ-Барнэ нэс укӀомэ, гъогум мэфэ пшӀыкӀузэ утетынэу щыт. 3Мысырым къызикӀыжьыгъэхэр илъэс тӀокӀитӀум хэхьагъэу япшӀыкӀузэнэрэ мазэм иапэрэ мафэ Зиусхьаным#1:3 Адыгэ гущыӀэу «Зиусхьан»-м имэхьанэ джурт гущыӀэу «Яхве» зыфиӀорэм къикӀырэр къеты. ГущыӀэу «Яхве» зыфиӀорэмкӀэ Тхьэм ыцӀэ къыраӀо, мэхьанэу ащ иӀэмэ ащыщ: «ЕгъашӀэм ЩыӀэ Зэпытыр». израил цӀыфхэм яхьылӀагъэу зэкӀэ унашъоу къыфишӀыгъэхэм Мосэ ахэр ащигъэгъозагъэх. 4Хъэщбэн къалэм тетыгъор щызыӀыгъыгъэу, амэр цӀыфхэм япачъыхьэу Сыхъонрэ Бащан хэкум ипачъыхьэу, къалэхэу Ӏащтарэт, ЕдрэӀ тетыгъор ащызыӀыгъыгъэу Ӏогърэ затекӀохэм ыуж ар зыхъугъэр.

5Иордан итыгъэ къокӀыпӀэ лъэныкъокӀэ щыӀэ Моаб хэгъэгум итхэу Хабзэу Тхьэм къыриӀуагъэр Мосэ цӀыфхэм агуригъэӀонэу ригъэжьагъ:

6«Ти Зиусхьанэу Тхьэм Синай къушъхьэм къыщытиӀогъагъ: „Мы къушъхьэм дэжь шъузэрэщысыгъэр икъущт. 7Шъуигъогу шъутехьажьи, къушъхьэлъэ чӀыпӀэу амэрхэр зэрысхэм шъукӀу. Гъунэгъу лъэпкъ пстэури зыщыпсэухэрэ иордан шъофыр, къушъхьэлъэ чӀыпӀэхэмрэ кӀэйхэмрэ къызэшъунэкӀхи, къыблэ лъэныкъомкӀэ, хы ӀушъомкӀэ шъукъырыкӀуи, къэнаӀан цӀыфхэм ячӀыгу шъуихьи, Ливан хэгъэгум шъуекӀу, Ефрат псыхъошхоми шъунэс. 8Шъугу ишъуубыт Сэ а чӀыгур къызэрэшъостырэр. ШъукӀуи, шъуятэжъхэу Ибрахьимэ, Исхьакъ, Якъубэ, ахэм къахэкӀыгъэхэми къястынэу гущыӀэ пытэ зыфэсшӀыгъэ чӀыгур шъуиунэенэу шъуубыты“».

Мосэ хьыкумышӀхэр зэрэтыригъэхьагъэхэр

9Джыри Мосэ ариӀуагъ: «А уахътэм сэ къышъосӀогъагъ: „Шъо лъэшэу шъукъысэхьылъэкӀы, сизакъоу сышъуфырикъужьырэп. 10Шъуи Зиусхьанэу Тхьэм шъуигъэбэгъуагъ, мары джы непэ шъо ошъогум ит жъуагъохэм афэдэу бэ шъохъу. 11Зиусхьанэу, шъуятэжъмэ я Тхьэ, джы шъузэрэхъурэм фэдэ минкӀэ шъуерэгъэбагъу, шъукъызэригъэгугъагъэуи ынэшӀу къышъущерэф! 12Ау сыдэущтэу сизакъоу шъуизэрэшхыжьын ибжь хьылъэ къесхьакӀышъуна? 13ШъуилӀакъохэм ащыщ цӀыф акъылышӀухэу, зэхэшӀыкӀ зиӀэхэу лъытэныгъэ зыфашӀыхэрэр къызыхэшъудзыхи, ахэр Ӏэшъхьэтет къышъуфэсшӀыщтых“. 14„О зыфапӀорэр дэгъу“, – шъуӀуи, джэуап шъо къысэшъутыжьыгъагъ. 15ШъуилӀакъохэм цӀыф акъылышӀоу лъытэныгъэ зыфашӀэу ахэт пащэхэр нэбгырэ минхэм, нэбгыришъэхэм, шъэныкъохэм, пшӀыхэм яӀэшъхьэтетынхэу, лӀакъохэм янахьыжъ упчӀэжьэгъунхэу згъэуцугъэх. 16ШъуихьыкумышӀхэм унашъо афэсшӀыгъ: „Шъукъошхэр зыфызэнэкъокъухэрэр зэхэшъуфых, израил цӀыфхэр е израил цӀыфымрэ хымэ лъэпкъ щыщыр арми, зафэу хьыкум шъушӀы. 17Хьыкум шъушӀы зыхъукӀэ темыфэу зыгорэми шъудемыӀ. ЛъэкӀ зиӀэми цӀыф къызэрыкӀоми къаӀорэм шъуедэӀу. Хьыкумыр Тхьэм фэгъэзагъэшъ, хэти шъущымыщын. ЗыгорэкӀэ Ӏофым изэхэфын шъоркӀэ къинэу щытмэ, садэжь шъукъакӀуи сэ ащ сыхэплъэщт“. 18А уахътэм зэкӀэ шъушӀэн фаехэм яхьылӀагъэу унашъо сэ къышъуфэсшӀыгъагъ.

Къэбарыхьхэр зэраӀофытагъэхэр

19ЕтӀанэ Зиусхьаным унашъо къызэрэтфишӀыгъэм тетэу гъогум тытехьагъ. Синай къушъхьэм щедгъажьи, джа шъулъэгъугъэ шъоф нэкӀ щынэгъошхор зэпытчи, амэр цӀыфхэр зэрыс къушъхьэлъэ чӀыпӀэм тыкӀуи, чӀыпӀэу Къадэщ-Барнэ тынэсыгъ. 20Джащ дэжьым сэ къышъосӀуагъ: „Амэрхэр зэрыс къушъхьэлъэ чӀыпӀэу ти Зиусхьанэу Тхьэм къытитырэм шъукъэсыгъ. 21Шъуи Зиусхьанэу Тхьэм#1:21 Ижъырэ джуртыбзэкӀэ тхыгъэ Ӏэпэрытхым зэрэхэтыр: «уи Зиусхьанэу Тхьэм». Зы пчъагъэм ит къэӀуакӀэр цӀыф лъэпкъым фэгъэзагъ. Мыщ фэдэу тхылъым инэмыкӀ чӀыпӀэхэм къащыхэфэ. мы чӀыгур къызэрэшъуитыгъэр шъугу ишъуубыт. Зиусхьанэу шъуятэжъмэ я Тхьэ къызэрэшъуиӀуагъэм фэдэу, зышъуӀати ар зэрэшъуиунэенэу шъуубыты. Шъумыщын, шъугуи шъумыгъэкӀоды“. 22Ащ дэжьым шъо зэкӀэми садэжь шъукъакӀуи къысэшъуӀуагъ: „ЛӀы горэхэр тапэ итхэу дгъэкӀонхэшъ, а чӀыгур къызэпарэплъыхь, тызэрыкӀощт гъогури тыздэхьащт къалэхэри зыфэдэхэр къытфызэрагъашӀ“. 23КъэшъуӀуагъэр дэгъукӀэ слъыти, шъуащыщэу нэбгырэ пшӀыкӀутӀу, лӀакъо пэпчъ зы нэбгырэ, къыхэсхыгъ. 24Ахэр ежьэхи къушъхьэлъэ чӀыпӀэм кӀуагъэх, Эшкол псы игъукӀыгъэм#1:24 Зыщыогъум игъукӀырэ псы чъапӀэр. нэс чӀыгур къызэпаплъыхьагъ. 25А чӀыгум къыщыкӀырэмэ къапыкӀэхэрэр къыздаштэхи, къытфахьхи къытаӀуагъ: „Ти Зиусхьанэу Тхьэм къытитырэ чӀыгур гъэбэжъулъ“.

ЦӀыфхэр Тхьэм зэрэпэуцужьыгъэхэр

26Ау шъо шъукӀонэу шъуфэягъэпти, шъуи Зиусхьанэу Тхьэм иунашъо шъупэуцужьыгъ. 27ШъуичэтэнгъэӀагъэхэм шъуачӀэсэу, шъумыразэу шъугъум-тӀымыщтыгъ: „Зиусхьаным тыфэлъэгъурэпти, амэрхэм аӀэ тырилъхьанышъ, тигъэкӀодынэу Мысырым тыкъырищыжьыгъ. 28Тыда тыздэкӀощтыр? Къэбарыхьэу дгъэкӀуагъэхэм тагъэщтагъ. Ахэм аӀо: ‘А цӀыф лъэпкъыр тэщ нахь лъэш, тэщ нахь лъаг. А чӀыпӀэм ит къалэхэр иных, ахэр къызэрэшӀыхьэгъэ дэпкъхэр уашъом нэсэу лъагэх. Ӏэнэкъ иныжъ лъэпкъым къыхэкӀыгъэхэри ащ къыщытлъэгъугъэх’“. 29Арти сэ къышъосӀуагъ: „Шъумыщын, ахэм зыкъяшъумыгъэгъащт. 30Шъуи Зиусхьанэу Тхьэр шъуапэ итэу макӀо. Шъулъэгъузэ, Мысырым зэрэщишӀагъэм фэдэу, шъощ пае Ар зэощт. 31Шъоф нэкӀыми ар щишӀагъ, гъогум шъутетэу мыщ шъукъэсыфэ тыр ишъао зэрэфыщытыным фэдэу, шъуи Зиусхьанэу Тхьэм шъукъызэрэрихьакӀыгъэр шъори шъулъэгъугъэба“. 32Ау шъуи Зиусхьанэу Тхьэм цыхьэ фэшъушӀыгъэп, 33шъукъызщыуцущт чӀыпӀэхэр къышъуфигъэнафэхэу, шъузэрыкӀощт гъогур къышъуигъэгъотынэу чэщырэ къэзыгъэнэфырэ машӀоу, мафэрэ ошъуапщэм хэтэу Ар шъуапэ итыгъэ нахь мышӀэми.

Тхьэм цӀыфхэр зэригъэпщынагъэхэр

34Зиусхьаным шъуӀохэрэр зызэхехым лъэшэу къэгубжи, гущыӀэ пытэ ышӀыгъ: 35„Мы цыхьэмышӀ-мыдэӀо лъэпкъым щыщ горэми шъуятэжъхэм къястынэу гущыӀэ пытэ зыфэсшӀыгъэ чӀыгушӀур ылъэгъущтэп. 36Епунэх ыкъо Къалэб нэмыкӀэу. ЫгукӀэ Сэ къысфэшъыпкъагъэшъ, ащ ар ылъэгъущт, ылъэ зытеуцогъэ чӀыгур ежьыми къыхэкӀыщт цӀыфхэми къястыщт“. 37Шъощ пае сэри къысфэгубжи, Зиусхьаным къысиӀуагъ: „Ори ащ уихьащтэп.

38Ау о уиӀумэтэу Ныун ыкъо Ехъошуа а чӀыгум ихьащт. Израил цӀыфхэр зылъищэхэзэ, а чӀыгур аштэнэу ар гъэгушхо“. 39Джащыгъум Зиусхьаным къышъуиӀуагъ: „Гъэры хъунхэу шъуӀуи, зигугъу шъушӀыгъэ шъуисабыйхэу шӀумрэ бзаджэмрэ джыри зэхэзымышӀыкӀхэрэр ары а чӀыгум ихьащтхэр. Сэ ахэм ар къястынышъ, яунэенэу аубытыщт. 40Ау шъо къэжъугъази хы Къамылым#1:40 «ШӀэныгъэлэжьхэм янахьыбэ зыдырагъаштэрэр мыщ дэжьым зигугъу къыщишӀырэ хы Къамылыр зэрэ Акабэ хытӀуалэр ары». ылъэныкъокӀэ щыӀэ шъоф нэкӀым шъукӀу“. 41Ащ дэжьым къысэшъуӀожьыгъ: „Зиусхьаным ыпашъхьэ псэкӀод щытшӀагъ. ТыкӀонышъ, ти Зиусхьанэу Тхьэм къызэрэтиӀуагъэм тетэу, тязэощт“. Къушъхьэлъэ чӀыпӀэм укӀоныр ӀэшӀэх къышъуфэхъун къышъущыхъоу, нэбгырэ пэпчъ иӀашэ къыштагъ. 42Ау Зиусхьаным къысиӀуагъ: „ЯӀу ахэм: ‘Сэ сышъуигъусэщтэпышъ, шъуипыйхэм шъукъызэхамыкъутэнэу шъуемыжь, шъумызау’“. 43Сэ къышъосӀуагъ, ау шъукъысэдэӀугъэп. Зиусхьаным иунашъо шъупэуцужьи, зыкъышъушӀошӀыжьэу къушъхьэм шъудэкӀоягъ. 44А къушъхьэмэ ахэсыгъэ амэр цӀыфхэр къышъупэуцужьыгъэх. БжьэпчӀым фэдэу къышъутебанэхи, шъукъафыгъ, Хъорым къалэм нэс СэӀир къушъхьэлъэ чӀыпӀэм къыщышъозэуагъэх. 45Къэжъугъэзэжьи Зиусхьаным ыпашъхьэ шъущыгъыгъ, ау Зиусхьаныр шъуӀорэм къедэӀугъэп, къышъуфэгумэкӀыгъэп. 46Джаущтэу Къадэщ чӀыпӀэм охътабэрэ шъущыпсэугъ».

Currently Selected:

Хэбзэ тхыжьыгъэр 1: АдыТГ

Highlight

Copy