МысырикӀыжь 4

ЯплӀэнэрэ шъхьэр

Тхьэм Мосэ шӀагъоу къыригъэлъэгъугъэхэр

1Мосэ Тхьэм риӀуагъ: «Ары шъхьае ясӀорэр ахэм ашӀошъ хъущтэп. ЯсӀорэм къемыдэӀухэу, „Зиусхьаныр къыпфэлъэгъуагъэп“ къысаӀощт». 2Зиусхьаным ащ къыриӀуагъ: «Сыда мы пӀыгъыр?» Ащ къыриӀожьыгъ: «Мыр бэщ». 3Зиусхьаным къыӀуагъ: «Тедз ар чӀыгум». ЧӀыгум ар тыридзагъ, бэщыр блэ хъугъэ. Бэщыр блэ зэхъум, Мосэ кӀитхъугъ. 4Зиусхьаным Мосэ къыриӀуагъ: «ПӀэ щэйи, блэм ыкӀэ убыт». Мосэ ыӀэ ыщэйи, блэм ыкӀэ ыубытыгъ. Ар къызэреубытэу, блэр бэщ хъужьыгъэ. 5Зиусхьаным къыӀуагъ: «Мы нэшанэр зэхьылӀагъэр израиль цӀыфхэм ятэжъхэм я Тхьэ, Ибрахьими, Исхьакъи, Якъуби я Тхьэу Зиусхьаныр, къызэрэпфэлъэгъуагъэр ашӀошъ хъуным пае». 6Зиусхьаным джыри Мосэ къыриӀуагъ: «ПӀэ угужъуакӀэ далъхь». Мосэ ыӀэ ыгужъуакӀэ дилъхьагъ. Къызыдехыжьым, мары шъоджэ узым къыхэкӀэу ыӀэ осым фэдэу фыжьыбзэ хъугъэ. 7ЕтӀани Зиусхьаным къыӀуагъ: «Джыри пӀэ угужъуакӀэ далъхь». Мосэ ыӀэ икӀэрыкӀэу ыгужъуакӀэ дилъхьи къызыдехыжьым, мары ар зэрэщытыгъэм фэдэу хъужьыгъэ. 8Зиусхьаным къыӀуагъ: «Ахэм япӀори апэрэ нэшанэри ашӀошъ зымыхъухэкӀэ, ащыгъум ятӀонэрэ нэшанэр ашӀошъ хъущт. 9Ау а нэшэнитӀур ашӀошъ мыхъоу, япӀорэм къыземыдэӀухэкӀэ, Нил псыхъо псы къыхэхи, чӀыгу шъхьашъом текӀ. Джащыгъум псыхъом къыхэпхи псэу ипкӀутыгъэр чӀыгу шъхьашъом лъы техъухьащт».

10Мосэ Зиусхьаным риӀуагъ: «О, Зиусхьан! Сэ сыцӀыф жашӀоп, сыдигъокӀи джащ фэдэу сыщытыгъ, джыри, уиӀумэт О укъызщыдэгущыӀэрэми, сыгущыӀэныр къин къысфэхъу, гущыӀэным сытегъэпсыхьагъэп». 11Арыти Зиусхьаным къыӀуагъ: «Хэта цӀыфыр гущыӀэу зышӀыгъэр? Хэта бзако, дэгу, ылъэгъоу е нэшъу зышӀыхэрэр? Сэрыба, Зиусхьаныр, арыба? 12Арышъ, Сэ укъэгущыӀэ зыхъукӀэ, сыпкӀыгъущт, къэпӀощтхэр озгъэшӀэщт». 13Мосэ къыриӀожьыгъ: «Зиусхьан! Сэщ нэмыкӀ горэ гъакӀоба». 14Ащ дэжьым Зиусхьаныр къызэкӀани, Мосэ къыфэгубжи къыриӀуагъ: «Пшы Хьарунэу лэуир уиӀэба? Ар зэрэжашӀор Сэ сэшӀэ. Мары ар о къыппэгъокӀынышъ, узилъэгъукӀэ, гушӀощт. 15О къэпӀощтхэр ащ епӀонхэшъ, къебгъэӀощт. ШъукъэгущыӀэ зыхъукӀэ, Сэ тӀуми сышъуигъусэщт, шъушӀэщтымкӀи шъузгъэгъозэщт. 16Хьарунэ о пчӀыпӀэкӀэ цӀыфмэ адэгущыӀэщт. Ар о пчӀыпӀэкӀэ гущыӀэщт, о ащ Тхьэ папкӀэу уфэхъущт. 17Мы бэщыр зыдашт, ащкӀэ о нэшанэхэр ябгъэлъэгъущтых».

Мосэ Мысырым зэригъэзэжьыгъэр

18Мосэ къыгъэзэжьи, ишӀупщэу Итрэу дэжь къэкӀожьи, риӀуагъ: «СытӀупщыба, сежьэнышъ, сиӀахьылхэу Мысырым щыӀэхэм адэжь сыкӀощт, ахэр псэухэмэ къызэзгъэшӀэщт». Арыти Итрэу Мосэ къыриӀуагъ: «КӀоба адэ, гъогумаф».

19Мосэ мыдианмэ яхэгъэгу щыӀэзэ, Зиусхьаным къыриӀуагъ: «КӀо, Мысырым гъэзэжь, сыда пӀомэ о ппсэ къешэщтыгъэхэр зэкӀэ лӀагъэх». 20Мосэ ишъузи ыкъохэри зыдырищэжьагъэх, щыдым тыригъэтӀысхьэхи, Мысыр хэгъэгум кӀонэу ежьагъ. ЫӀыгъынэу Тхьэм зыфиӀогъэ бэщыри зыдиштагъ. 21Зиусхьаным Мосэ къыриӀуагъ: «Уежьэу, Мысыр хэгъэгум узыкӀожькӀэ, кӀуачӀэу къыостыгъэмкӀэ Ӏоф шӀагъохэр фирхьауным ыпашъхьэ къыщыгъэлъагъох. Ау Сэ ащ ыгу къызэшӀуезгъэдзэнышъ, цӀыфхэр къытӀупщыщтхэп. 22Фирхьауным еӀу: „Зиусхьаным ыӀорэр мары: Израиль Сэ скъо, Сищыпэлъф“. 23Ау Сэ о къыосӀогъагъ: Скъо сигъэлъапӀэу къурмэнкӀэ шъхьащэ къысфишӀыным пае къэтӀупщ. Ау къэптӀупщынэу уфэягъэпышъ, зэгъашӀэ, Сэ о уищыпэлъфыкъо сыукӀыщт».

24Гъогум чэщ чъыегъур зыщырахыщт чӀыпӀэм къыщыуцугъэхэу, ащ#4:24 Мы чӀыпӀэм зигугъу къыщишӀырэр зэхьылӀагъэр Мосэми е ащ ыщыпэлъфыкъор арми Библием Ӏоф дэзышӀэрэ шӀэныгъэлэжьхэм еплъыкӀэу фыряӀэр ыкӀэм нэсэу зэтефэрэп. Зы купым ар Мосэу еӀо, адрэмэ къызэраӀорэмкӀэ, ар Мосэ ишъау. ыпсэ хих шӀоигъоу Зиусхьаныр къышъхьарыхьагъ. 25Ащ дэжьым Ципорэ мыжъо шъэжъыер къышти, ыкъо хъулъфыгъэ пкъынэу иӀэм ыцыпэ пиупкӀыгъ, ащ ылъакъохэм анэси, къыӀуагъ: «СэркӀэ о лъымкӀэ уӀахьыл»#4:25 Мы чӀыпӀэм ижъырэ джуртыбзэмкӀэ тхыгъэ Ӏэпэрытхым «ЛъымкӀэ уӀахьыл» ыӀоу зэритхагъэм имэхьанэ нафэп.. 26Зиусхьаныр ащ кӀэрыкӀыжьыгъ. Ащ дэжьым бзылъфыгъэм къыӀуагъ: «ЛъымкӀэ уӀахьыл». Ащ къыӀуагъэм къыригъэкӀыгъэр сунэт зэришӀыгъэр ары.

27Зиусхьаным Хьарунэ риӀуагъ: «Мосэ ипэгъокӀэу шъоф нэкӀым кӀо». Арыти ар ежьи, Тхьэм икъушъхьэ дэжь адрэм зыщыӀокӀэм, зэбэугъэх. 28КъэзӀофтэгъэ Зиусхьаным зэкӀэ къыриӀуагъэхэри къыгъэлъэгъонхэу унашъо къыфишӀыгъэ нэшанэхэри Мосэ Хьарунэ къыфиӀотагъэх.

29Мосэрэ Хьарунэрэ ежьэхи, израиль цӀыфхэм янахьыжъ упчӀэжьэгъухэр зэкӀэ къаугъоигъэх. 30Зиусхьаным Мосэ къыриӀогъэ гущыӀэхэр зэкӀэ Хьарунэ къафиӀотагъэх, Мосэ нэшанэхэр цӀыфмэ апашъхьэ къыщигъэлъэгъуагъэх. 31ЦӀыфмэ ашӀошъ хъугъэ. Зиусхьаныр израиль цӀыфхэм къафехи, тхьамыкӀагъоу зыхэтхэр зэрилъэгъугъэр зызэхахым, Тхьэм чӀыгум нэсэу шъхьащэ фашӀыгъ.

Currently Selected:

МысырикӀыжь 4: АдыТГ

Highlight

Copy