МысырикӀыжь 3

Ящэнэрэ шъхьэр

Тхьэм Мосэ зэригъэгъозагъэр

1Мосэ мыдиан къурмэнышӀэу ишӀупщ Итрэу имэл-пчэнхэр фигъэхъущтыгъэх. Зэгорэм ащ мэл-пчэнхэр шъоф нэкӀым чыжьэу рищагъэхэу, Тхьэм икъушъхьэу Хъорэб екӀолӀагъ. 2Пырэжъые куандэу мэшӀотхъуабзэм ымыстырэм хэтэу, Зиусхьаным имэлэӀич Мосэ къыфэлъэгъуагъ. Пырэжъые куандэр машӀом хэтыгъэми, ар зэрэмыстырэр ащ ылъэгъугъ. 3Мосэ ыӀуагъ: «Мы шӀагъоу хъурэм, куандэр зыкӀэмыстырэм сыкӀонышъ, сыкъеплъын». 4Ар къеплъынэу къызэрыкӀорэр Зиусхьаным къылъэгъугъ. Тхьэр куандэм къыхэджыкӀыгъ: «Мос! Мос!» Ащ риӀожьыгъ: «СыкъэдаӀо!» 5Тхьэм къыӀуагъ: «Мыщ укъемыкӀуалӀ, уицуакъэхэр зыщых, сыда пӀомэ, уздэщытыр чӀыпӀэ лъапӀ». 6Джыри Ащ Мосэ къыриӀуагъ: «Сэ о уятэ сыри Тхь. Ибрахьими, Исхьакъи, Якъуби сыря Тхь». Мосэ ынэгу рихъуагъ, сыда пӀомэ Тхьэм еплъынкӀэ щынэщтыгъэ. 7Мыщ дэжьым Зиусхьаным къыриӀуагъ: «ШъыпкъэмкӀэ, Сэ сицӀыф лъэпкъ Мысырым тхьамыкӀагъо зэрэщыхэтыр слъэгъугъэ, ар лъыплъакӀохэм зэрагъэтхьаусыхэрэр зэхэсхыгъэ. Ащ игукӀаехэр къыслъыӀэсыгъэх. 8Мысыр цӀыфмэ ар къаӀэкӀэсхыжьынэу сыкъехыгъ, а хэгъэгум къисщыжьынхэшъ, хэгъэгу дэгъоу, хэгъэгу хъоо-пщаоу, щэмрэ шъоумрэ зыщычъэхэу, къэнаӀан, хьат, амэр, пэрыц, еуй, еус цӀыфхэм яхэгъэгу исщэщтых. 9Мары израиль цӀыфхэм ятхьаусыхэ макъэ Сэ къыслъыӀэсыгъ, мысыр цӀыфхэр ахэм жъалымэу къызэрадэзекӀохэрэр Сэ къэслъэгъугъ. 10Арышъ кӀо: Сэ фирхьауным дэжь осэгъакӀо, СицӀыф лъэпкъ, израиль цӀыфхэр, Мысырым къипщыжьынхэм пае». 11Мосэ Тхьэм риӀуагъ: «Сыхэта сэ, фирхьауным дэжь сыкӀонышъ, израиль цӀыфхэр Мысырым къисщыжьынхэу?» 12Тхьэм къыӀуагъ: «Сэ о сыпкӀыгъущт. Сэ узэрэзгъэкӀуагъэр къэзгъэшъыпкъэжьыщт нэшанэр мыры: Мысырым цӀыфхэр къызипщыжьхэкӀэ, мы къушъхьэм сыжъугъэлъапӀэу шъхьащэ къыщысфэшъушӀыщт». 13Ау Мосэ Тхьэм риӀуагъ: «Дэгъу, израиль цӀыфхэм адэжь джы сыкӀонышъ, ясӀощт: „Шъуятэжъхэм я Тхьэ шъуадэжь сыкъигъэкӀуагъ“. ЕтӀанэ ежьхэм къысаӀощт: „Ащ сыда ыцӀэр?“ Сыда сэ ахэм джэуапэу ястыжьыщтыр?» 14Тхьэм Мосэ къыриӀожьыгъ: «Сэры ЕгъашӀэм ЩыӀэр. Израиль цӀыфхэм моущтэу яӀу: „ЕгъэшӀэрэр Сэры“ зыӀорэм шъуадэжь сыкъигъэкӀуагъ». 15Джыри Тхьэм Мосэ къыриӀуагъ: «Моущтэу израиль цӀыфхэм яӀу: „ЕгъэшӀэрэ Зиусхьанэу шъуятэжъхэм я Тхьэ, Ибрахьими, Исхьакъи, Якъуби я Тхьэ, шъуадэжь сыкъигъэкӀуагъ“. Джары егъашӀэм Сэ сцӀэр, лӀэуж зэкӀэлъыкӀохэм сащымыгъупшэу агу сыкъызэрэкӀыжьыщтыр. 16КӀуи, Израиль инахьыжъ упчӀэжьэгъухэр къэугъойхи, яӀу: „Зиусхьанэу, шъуятэжъхэм я Тхьэ, Ибрахьими, Исхьакъи, Якъуби я Тхьэ, зыкъысфигъэлъагъуи, къысиӀуагъ: Сэ сыкъышъуфехи, Мысырым къыщышъуашӀэрэр къэслъэгъугъ. 17Арыти тесыубытагъ: Мысырым егъэзыгъэ щыӀакӀэу щышъуиӀэм шъукъыхэсщыжьынышъ, къэнаӀан, хьат, амэр, пэрыц, еуй, еус цӀыфхэм яхэгъэгу, щэмрэ шъоумрэ зыщычъэхэрэ хэгъэгум, шъуисщэщт“. 18Ахэр пӀорэм къедэӀущтых, ори Израиль инахьыжъ упчӀэжьэгъухэми мысыр пачъыхьэм дэжь шъукӀонышъ, ешъуӀощт: „Зиусхьаным, джуртмэ я Тхьэ, зыкъытфилъэгъуагъэшъ, Ащ къурмэн фэтшӀынэу шъоф нэкӀым мэфищ гъогукӀэ тыкӀонэу тытӀупщыба“. 19Ау Сэ сэшӀэ, кӀочӀэ лъэшкӀэ ебгъэзэу къемыгъэуцуалӀэмэ, мысыр пачъыхьэм шъукъызэримытӀупщыщтыр. 20Сэ скӀуачӀэкӀэ мысыр лъэпкъым сыкъыфехынышъ, Ӏоф шӀагъохэмкӀэ згъэпщынэщт, етӀанэ пачъыхьэм шъукъыитӀупщыщт. 21Мысыр цӀыфхэр къышъуфэзгъэшӀущтых, етӀанэ шъузежьэкӀэ, шъуӀэнэкӀыщтэп. 22Джурт бзылъфыгъэ пэпчъ игъунэгъу мысыр бзылъфыгъэми ащ иунэ ис бзылъфыгъэхэми тыжьын, дышъэ пкъыгъохэр, щыгъынхэр ярэлъэӀуи, къаӀерэхых. Шъо ахэмкӀэ шъукъохэмрэ шъупхъухэмрэ жъугъэкӀэрэкӀэнхэшъ, мысыр цӀыфхэр джаущтэу къэшъухъункӀагъэхэу хъущт».

Currently Selected:

МысырикӀыжь 3: АдыТГ

Highlight

Copy