МысырикӀыжь 5

Ятфэнэрэ шъхьэр

Мосэрэ Хьарунэрэ фирхьауным дэжь зэрэкӀуагъэхэр

1Ащ ыуж Мосэрэ Хьарунэрэ фирхьауным дэжь кӀохи, раӀуагъ: «Зиусхьаным, Израиль и Тхьэ, ыӀорэр мары: „СицӀыф лъэпкъ Сэ сищытхъу пае шъоф нэкӀым къурмэн мэфэкӀыр щыхигъэунэфыкӀынэу къэтӀупщ“». 2Ау фирхьауным къыӀуагъ: «Хэта Зиусхьаныр, Ащ ыӀорэм седэӀунышъ, израиль лъэпкъыр стӀупщынэу? Зиусхьаныр сэ сшӀэрэп, израиль лъэпкъри стӀупщыщтэп». 3Ахэм къаӀуагъ: «Джуртхэм я Тхьэ зыкъытфигъэлъэгъуагъэшъ, Зиусхьанэу, ти Тхьэ, къурмэн фэтшӀынэу шъоф нэкӀым мэфищ гъогукӀэ тыкӀонэу тытӀупщыба. Армырмэ Ащ чатэкӀэ е емынэ шӀуцӀэкӀэ тигъэпщынэщт». 4Мысыр пачъыхьэм ахэм къариӀуагъ: «Сыда шъо, Мосэрэ Хьарунэрэ, цӀыфхэр жъугъэохъухэу Ӏоф зыкӀяшъумыгъашӀэрэр? ШъукӀуи, шъхьадж иӀоф ерэшӀ». 5ЕтӀани фирхьауным къыӀуагъ: «Мары, мы хэгъэгум шъо шъуицӀыфэу щыпсэурэр бэ мэхъу, ау шъо ахэр жъугъэохъухэзэ, ӀофшӀэным зэрэпэшъущынхэм шъупылъ арба?»

6А мэфэ дэдэм фирхьауным цӀыфмэ ялъыплъакӀохэу Ӏоф язгъашӀэхэмрэ джуртхэм ащыщ ӀофзегъакӀохэмрэ унашъо афишӀи, ариӀуагъ: 7«Мыщ ыпэкӀэ зэрэшъушӀыщтыгъэм фэдэу, цӀыфмэ саманэу ашӀырэм пае уарзэ яшъумыт. Ежь-ежьырэу, къакӀухьэзэ, уарзэр къызфарэугъоижь. 8Ау саманэу ащ ыпэкӀи ашӀыщтыгъэ пчъагъэм фэдиз джыри ашӀынэу къафэжъугъан, ащ къыщышъумыгъакӀ. Ахэр шъхьахынэх, джары „Ти Тхьэ къурмэн фэтшӀынэу тытӀупщ“ аӀозэ, зыкӀэкуохэрэр. 9Арышъ, шъхьэубэтагъэхэм ямыдэӀунхэм пае, яӀофшӀэн нахь къин афэшъушӀ». 10Арыти цӀыфмэ ялъыплъакӀохэу Ӏоф язгъашӀэхэмрэ джуртхэм ащыщ ӀофзегъакӀохэмрэ цӀыфмэ адэжь кӀохи, араӀуагъ: «Фирхьауным ыӀорэр мары: „Уарзэр шъостыщтэп. 11Уарзэр къызщыжъугъотыщтым шъукӀуи, шъор-шъорэу къыщышъуугъой. Ау шъушӀэн фаем къыщыкӀэщтэп“». 12Джаущтэу цӀыфхэр уарзэм ычӀыпӀэкӀэ фыркъор хыпкъым къыщаугъоенэу зэрэ Мысырэу зэфэдэкӀэ щызэбгырыкӀыгъэх. 13ЦӀыфмэ ялъыплъакӀохэу Ӏоф язгъашӀэхэрэм ахэр агъэгузажъохэзэ, араӀощтыгъэ: «Уарзэр къышъуат зэхъум шъушӀэщтыгъэм фэдиз къабзэ мафэ къэс шъушӀэ». 14Фирхьауным фэлажьэхэу, цӀыфмэ ялъыплъакӀохэу Ӏоф язгъашӀэхэрэр джуртхэм ащыщ ӀофзегъакӀохэм яохэзэ, араӀуагъ: «Сыда джы нэс къэшъушӀыщтыгъэ саман пчъагъэм фэдиз къызкӀэшъумышӀыжьырэр?»

15Джащыгъум джуртхэм ащыщ ӀофзегъакӀохэр кӀохи, фирхьауным етхьаусхылӀэхэзэ, раӀуагъ: «Сыд пае тэ, уипщылӀхэм, ащ фэдэу укъыддэзекӀора? 16Тэ, уипщылӀхэм, уарзэ къытатырэп, ау саманхэр тшӀынэу къытаӀо. Тэ, уипщылӀхэм, къытэохэми, лажьэр зиер уицӀыфхэр ары». 17Ау ащ къыӀуагъ: «Шъо шъушъхьахын, шъушъхьахынэ дэд, джары шъо „Зиусхьаным къурмэн фэтшӀынэу тытӀупщ“ зыкӀашъуӀорэр. 18ШъукӀуи, Ӏоф шъушӀэ. Къышъуатыщтэп уарзэ, ау ыпэкӀэ къэшъушӀыщтыгъэ саман пчъагъэм фэдиз къэшъушӀ».

19Мыщ дэжьым джуртхэм ащыщ ӀофзегъакӀохэм ыпэкӀэ къашӀыщтыгъэ саман пчъагъэм фэдиз къашӀынэу фирхьауным къызэрариӀуагъэм хэлъ тхьамыкӀагъор къагурыӀуагъ. 20Ахэр фирхьауным ыпашъхьэ къызекӀыжьхэм, къяжэхэу щытыгъэхэ Мосэрэ Хьарунэрэ аӀукӀагъэх. 21Джуртхэм ащыщ ӀофзегъакӀохэм ахэм араӀуагъ: «Фирхьаунми ащ иӀумэт Ӏэшъхьэтетхэми талъэгъу мыхъоу, таукӀыным пае ушъхьагъу яӀэу зэрэшъушӀыгъэр Зиусхьаным къерэлъэгъуи, шъуерэгъэпщын!».

22Ащ ыуж Мосэ Зиусхьаным зыфигъази, риӀуагъ: «О Зиусхьан! Сыда мы цӀыф лъэпкъыр мыщ фэдэ тхьамыкӀагъо зыкӀыхэбдзагъэр, сэри сыда сыкъызкӀэбгъэкӀуагъэр? 23Фирхьауным дэжь сыкъэкӀуагъэу, О пцӀэкӀэ сызыдэгущыӀэрэм къыщегъэжьагъэу ащ мы цӀыфхэм ящыӀакӀэ нахь дэй ышӀыгъ, Ори О уицӀыф лъэпкъ хэпщыжьынэу хэпщыжьыгъэп».

Currently Selected:

МысырикӀыжь 5: АдыТГ

Highlight

Copy