МысырикӀыжь 30

ЯщэкӀэнэрэ шъхьэр

МыстхъугъэстыпӀэ къурмэншӀыпӀэр

1Зиусхьаным Мосэ къыриӀуагъ: «Мэ ӀашӀухэр къызпихрэ мыстхъухэр щагъэстынхэу къурмэншӀыпӀэр гъэпсы, акацэ чъыгым ар хэшӀыкӀ. 2ПлӀэмыеу, икӀыхьагъэрэ ишъомбгъуагъэрэ Ӏэнтэгъу#30:2 Зы Ӏэнтэгъур сантиметрэ 44-рэ фэдиз хьазыр. зырыз, илъэгагъэ ӀэнтэгъуитӀу#30:2 Ар сантиметрэ 88-рэ фэдиз хьазыр. хъухэу ар щэрэт. Бжъакъом фэдэу къыпыщхэу къуапэхэр ащ фэшӀых. Ахэр къурмэншӀыпӀэм дыхэтхэу щытынхэ фае. 3Ышъхьагъи, ыбгъухэри, ыкъуапэхэри зэкӀэ къызэдиубытхэу дышъэ къабзэ ащ къеӀулӀэкӀ. ЫшъхьагъыкӀэ къыщыдекӀокӀэу дышъэм хэшӀыкӀыгъэу нэз кӀэракӀэ фэшӀ. 4Нэз кӀэракӀэм ычӀэгъыкӀэ щыӀэхэу дышъэ хъурджэнитӀу къурмэншӀыпӀэм ыкъопитӀу ащыхэгъэуцох. Джащ фэдэу адрэ бгъумкӀи ахэр щыхэгъэуцох, ар къырырахьакӀынэу бэщхэр а хъурджанэмэ арылъхьэх. 5Бэщхэр акацэ чъыгым хэшӀыкӀхи, дышъэр къягъэтӀылъэкӀ. 6Пхъонтэ лъапӀэр зыкӀыбкӀэ щыт пэӀухъом ыпашъхьэ, пхъонтэ лъапӀэм ишъхьатеӀубэу Сэ зыкъызщыпфэзгъэнэфэщтым пэчӀынатӀэу а къурмэншӀыпӀэр гъэуцу.

7Мэ ӀашӀухэр къызпихрэ мыстхъу зэфэшъхьафхэр Хьарунэ ащ щигъэстыщтых. Остыгъэ гъэстылъэхэр ыгъэхьазырхэ зыхъукӀэ, джаущтэу ахэр пчэдыжь къэс ащ ыгъэстыщтых. 8Чэпэ зэхэогъу къэси Хьарунэ остыгъэ гъэстылъэхэр зыхигъанэхэкӀэ, мэ ӀашӀухэр ыгъэущтых. Джаущтэу шъуилӀэуж зэкӀэлъыкӀохэр щэӀэхэфэ къурмэнышӀым Зиусхьаным ыпашъхьэ мэ ӀашӀухэр щигъэухэзэ ышӀыщт. 9А къурмэншӀыпӀэм мэ ӀашӀухэр къызпихрэ мыстхъумэ анэмыкӀ гори, къурмэнгъэсти, гъомылэ къурмэни щыпшӀыхэ, санэ къурмэни тепкӀэ хъущтэп. 10Джаущтэу Хьарунэ илъэсым зэ къурмэншӀыпӀэм ыкъуапэхэу бжъакъом фэдэу къыпыщхэрэм къурмэнылъыр ащифэзэ, къурмэншӀыпӀэр ыукъэбзыщт. ШъуилӀэуж зэкӀэлъыкӀохэр щэӀэфэхэ къурмэнышӀым илъэсым зэ ар псэкӀод къурмэным ылъыкӀэ ыукъэбзызэ ышӀыщт. Ар ЗиусхьанымкӀэ лъапӀэм илъэпӀэжьэу хъущт».

ЧэтэнгъэӀэгъэ лъапӀэм къырахьылӀэрэ ахъщэр

11Джыри Зиусхьаным Мосэ къыриӀуагъ: 12«Израиль цӀыфхэм япчъагъэ къэплъытэ зыхъукӀэ, къызэралъытэхэрэм тхьамыкӀагъо хамыхыным пае, якъэлъытэгъум нэбгырэ пэпчъ ыпсэ Зиусхьаным щерэщэфыжь. 13Къалъытэрэ нэбгырэ пэпчъ шэкъэлым ызыныкъо тыжьын ахъщэ къытын фае, шэкъэл лъапӀэу чэтэнгъэӀэгъэ лъапӀэм чӀэлъым ионтэгъугъэ ызыныкъо. Шэкъэл лъапӀэр герэ#30:13 Герэм зы граммым ипшӀэних фэдиз ионтэгъуагъ. тӀокӀ мэхъу. А шэкъэлым ызыныкъо Зиусхьаным пае тын. 14Илъэс тӀокӀ е нахьыбэ зыныбжьэу къалъытэрэ нэбгырэ пэпчъ Зиусхьаным тын фишӀын фае. 15Шъупсэхэр къэщэфыжьыгъэхэу хъуным пае баими шэкъэлым ызыныкъо къемыхъоу, тхьамыкӀэми джащ къыщымыкӀэу Зиусхьаным тын фашӀын фае. 16Зыкъызэращэфыжьырэ тыжьыныр израиль цӀыфхэм къаӀыхи, чэтэнгъэӀэгъэ лъапӀэм ущылэжьэным пае гъэфедэ. Ар израиль цӀыфхэм шъо шъупсэхэр Зиусхьаным ыпашъхьэкӀэ зэращэфыжьыгъэхэр ащымыгъупшэным пае».

Гъоплъэ лэджэныр

17Зиусхьаным Мосэ къыриӀуагъ: 18«ИтегъэуцуапӀи ежьыри гъуаплъэм хэшӀыкӀыгъэхэу зызэратхьакӀыщт псыр зэрытыщт лэджэныр шӀы. ЧэтэнгъэӀэгъэ лъапӀэмрэ къурмэншӀыпӀэмрэ азыфагоу ар гъэуцуи, псы игъахъу. 19Хьарунэрэ ыкъохэмрэ ащ къыхахызэ, аӀэхэмрэ алъакъохэмрэ атхьакӀыхэзэ арэшӀ. 20ЧэтэнгъэӀэгъэ лъапӀэм чӀэхьанхэ зыхъукӀэ, мылӀэнхэм пае, ахэм зарэтхьакӀ. Зиусхьаным пае къурмэнхэр ашӀынхэу къурмэншӀыпӀэм екӀолӀэнхэ зыхъукӀэ, 21ахэм аӀэхэмрэ алъакъохэмрэ атхьакӀынхэ фае, армырмэ лӀэщтых. МылӀэнхэм пае аӀэхэри алъакъохэри арэтхьакӀых. Хьаруни лӀэужэу къыкӀэлъыкӀощтхэми щэӀэхэфэ ар яегъэшӀэрэ унашъу».

Щыфэ ашӀырэ дагъэр зэрэзэхалъхьащтыр

22Зиусхьаным Мосэ къыриӀуагъ: 23«Мэ ӀашӀу къызпихрэ уц анахьышӀухэу смирнэм фэдэу шэкъыл лъапӀэм ишэпхъэ шъитф, а пчъагъэм ызыныкъо, шэкъэл шъитӀурэ шъэныкъорэ хъоу мэ ӀашӀу къызпихрэ корицэр, мэ ӀашӀу къызпихрэ къамылыр шэкъэл шъитӀурэ шъэныкъорэ хъоу штэх. 24Ахэм ягъэгъус касиеу шэкъэл лъапӀэм фэдэу шъитф хъурэр, зэйтун дагъэу зы хын#30:24 Ар литри 4 фэдиз хьазыр. хъоу. 25Щыфэ Ӏэзэгъухэр зэхэзылъхьэрэм зэришӀырэм фэдэу а зэкӀэ дагъэм халъхь. ГъэлъэпӀэгъэнхэм пае щыфэ ашӀырэ дэгъэ лъапӀэу ар хъущт. 26А дэгъэ гъэлъэпӀагъэр ащыф: чэтэнгъэӀэгъэ лъапӀэм, пхъонтэ лъапӀэм, 27Ӏанэм, остыгъэми ащ дыкӀыгъоу агъэфедэрэ пстэуми, мэ ӀашӀухэр къызпихрэ мыстхъухэр зыщагъэстхэрэ къурмэншӀыпӀэм, 28къурмэнгъэстхэр зыщашӀырэ къурмэншӀыпӀэми ащ дыкӀыгъоу агъэфедэрэ пстэуми, лэджэнми ащ итегъэуцуапӀи. 29Джаущтэу ахэр хэушъхьафыкӀыгъэхэу, лъапӀэм илъэпӀэжьэу хъущтых, ахэм анэсырэр зэкӀэ гъэлъэпӀагъэхэу хъущт. 30Хьарунэрэ ыкъохэмрэ ашъхьэхэм дэгъэ гъэлъэпӀагъэр ащыф, Сэщ пае хэушъхьафыкӀыхи, къысфэлэжьэнхэу къурмэнышӀэу гъэуцух. 31Израиль цӀыфхэм яӀу: „ШъуилӀэуж зэкӀэлъыкӀохэр щэӀэфэхэ гъэлъэпӀагъэхэ рашӀынхэу а дэгъэ лъапӀэр Сэ сиӀэщт. 32НэмыкӀ цӀыфхэм апкъымэ ар ащыпфэ хъущтэп. ИзэхэлъыкӀэкӀи ащ фэдэ шъумышӀы, сыда пӀомэ ар гъэлъэпӀагъэ, шъоркӀэ лъапӀэм илъэпӀэжьэу щытын фае. 33Хэтми фимытэу ащ фэдэ дагъэр зэхэзылъхьэрэр е нэмыкӀ цӀыф горэм ар щызыфэрэр илъэпкъ хэзыпэщт“».

Мыстхъухэр зэрэзэхалъхьащтхэр

34Зиусхьаным Мосэ къыриӀуагъ: «Мэ ӀэшӀу къызыпиххэрэ нэтафыр#30:34 КъэкӀырэ уц горэм къыхахырэ дагъэу мэ ӀашӀу къызпихрэр., хьэлбэнахыр#30:34 Иранми Азием щыщ нэмыкӀ хэгъэгухэми къащыкӀырэ уц горэм къыкӀафырэ псэу мэ ӀашӀу къызпихрэр., лэунах къабзэр#30:34 Мэ ӀашӀу къызпихрэ мыстхъоу къыблэ Арабыемрэ къокӀыпӀэ Африкэмрэ къащыкӀырэ чъыг лъэпкъ горэмэ къахахыгъэр. ӀахьэхэмкӀэ зэфэдизхэу штэх. 35Щыфэ Ӏэзэгъухэр зэхэзылъхьэрэм зэришӀырэм фэдэу, щыгъур адыхэгъэкӀухьагъэу, гъэкъэбзагъэхэу, гъэлъэпӀагъэхэу мэ ӀашӀухэр къызпихрэ мыстхъухэу агъэстхэрэр зэхалъхьэх. 36Ахэр зэкӀэ шъабэу зэхэубэхи, чэтэнгъэӀэгъэ лъапӀэм чӀэт пхъонтэ лъапӀэм ыпашъхьэу Сэ зыкъызщыпфэзгъэнэфэщтым дэжь щыгъэстых. Мэ ӀашӀухэр къызпихрэ а мыстхъухэр шъощ пае лъапӀэм илъэпӀэжьэу хъущтых. 37Мэ ӀашӀухэр къызпихрэ а мыстхъухэр шъощ пае зэхэшъумылъхьэх: Зиусхьаным пае гъэлъэпӀагъэхэу шъоркӀэ ахэр щэрэтых. 38Хэтми мэ ӀашӀухэр къызпихрэ а мыстхъухэм амэ епэмынэу ахэр зыгъэстырэр зыщыщ лъэпкъым хэзыпэщт».

Currently Selected:

МысырикӀыжь 30: АдыТГ

Highlight

Copy