МысырикӀыжь 29

ЯтӀокӀэнэрэ бгъурэ шъхьэр

КъурмэнышӀхэр тхьэфэлэжьэным зэрэфагъэхьазырыщтхэр#29:0 Мы шъхьэм къыӀуатэрэм ехьылӀагъэу еплъ Мосэ иящэнэрэ тхылъ ия 8-рэ шъхьэ.

1Зиусхьаным Мосэ къыриӀуагъ: «Сэщ пае хэушъхьафыкӀыгъэхэу къыфэслэжьэнхэу къурмэнышӀэу бгъэуцунхэм пае Хьарунэрэ ыкъохэмрэ япшӀылӀэн фаер мары: зы шкӀэхъужърэ тӀитӀурэ дагъо гори ямыӀэу къыхэхых. 2Хьалыгъу мыкӀумыпшыр, дагъэ дыхэлъэу апшэгъэ джэгурыдзэ хьалыгъу мыкӀумыпшыр, дагъэр зыщыфэжьыгъэ щэлэмэ мыкӀумыпшыр коц хьаджыгъэ анахь дэгъум хэшӀыкӀых. 3Ахэр зы мэтэжъыем илъхьэхи, мэтэжъыем илъхэу къэхьых, шкӀэхъужъри тӀитӀури зэгъусэхэу къащэх. 4Хьарунэрэ ыкъохэмрэ чэтэнгъэӀэгъэ лъапӀэм ичӀэхьапӀэ дэжь къещалӀэхи, псыкӀэ зягъэтхьакӀ. 5Ящыгъынхэр штэхи, Хьарунэ джэнэ гъопэ кӀыхьэр, щыгъын кӀыӀутелъыр, чэтэнӀабгъур, бгъэрышӀэр щылъэх. ЧэтэнӀабгъум къекӀокӀэу, ӀэпэӀэсэныгъэшхо хэлъэу ашъэгъэ кӀапсэмкӀэ бгъэрышӀэр тепхыхь. 6Хьарунэ ышъхьэ паӀор тегъэтӀысхьи, дышъэ бзыгъэр зытегъэпытыхьэгъэ танджыр а паӀом ыкӀыӀу шъхьащыгъэуцожь. 7Щыфэн ашӀырэ дагъэр шти, Хьарунэ ышъхьэ текӀи, щыф. 8Джащ фэдэу ащ ыкъохэри къащэхи, джэнэ гъопэ кӀыхьэхэр ащылъэх. 9Хьаруни ыкъохэми бгырыпхыхэр ателъхьэхи, шъхьэкӀапхэхэр афэшӀых. Ахэм унашъом тетэу, егъэшӀэрэу къурмэнышӀ Ӏофыр агъэцэкӀэщт. Джаущтэу Хьаруни ащ ыкъохэри къурмэнышӀэу бгъэуцущтых.

Къурмэн ашӀырэ шкӀэхъужъыр

10ШкӀэхъужъыр чэтэнгъэӀэгъэ лъапӀэм къещалӀи, Хьарунэрэ ыкъохэмрэ аӀэхэр ащ ышъхьэ тырарэлъхьэх. 11ЧэтэнгъэӀэгъэ лъапӀэм ичӀэхьапӀэ дэжь Зиусхьаным ыпашъхьэ шкӀэхъужъыр щышӀобз. 12ШкӀэхъужъым лъэу къыкӀэчъыгъэм пӀапэ хэгъауи, къурмэншӀыпӀэм бжъакъом фэдэу къыпыщхэрэм ащыф, лъэу къэнагъэр зэкӀэ къурмэншӀыпӀэм ылъапсэ екӀылӀ. 13ШкӀэхъужъым ыкӀоцӀ шэу къикӀырэр зэкӀэ, шӀум телъ шэ пӀуакӀэр, жъэжъыитӀури, ахэм шэу ателъыри штэхи, къурмэншӀыпӀэм щыгъэстых. 14ШкӀэхъужъым ыли, ащ ышъуи, зэкӀэ шӀоеу къыкӀоцӀыкӀыгъэри уцупӀэм пэчыжьэу машӀокӀэ гъэстых. Ар къурмэнышӀхэм япсэкӀодхэм апае къурмэн.

Къурмэн ашӀырэ тӀыхэр

15ЕтӀанэ тӀитӀум яз шти, Хьарунэрэ ыкъохэмрэ аӀэхэр ащ ышъхьэ тырарэлъхьэх. 16Зы тӀыр шӀобзи, лъэу къыкӀэчъырэр къурмэншӀыпӀэм ыбгъуиплӀ атекӀ. 17ТӀыр пкъырыпкъэу зэхэупкӀ. Ащ ыкӀоцӀ къикӀыгъэхэмрэ ылъакъохэмрэ тхьакӀыхи, ахэр пкъэу зэхэупкӀыгъэхэмрэ шъхьэмрэ ателъхьэх. 18Пкъэу зэхэупкӀыгъэхэр зэкӀэ къурмэншӀыпӀэм щыгъэстых. Ар Зиусхьаным пае къурмэнгъэст, Зиусхьаным пае машӀокӀэ агъэстыгъэ къурмэнэу мэ ӀашӀу къызпихырэр ары.

19Адрэ тӀыри къащи, Хьарунэрэ ыкъохэмрэ аӀэхэр ащ ышъхьэ тырарэлъхьэх. 20ТӀыр шӀобзи, лъэу къыкӀэчъыгъэм щыщ Хьарунэрэ ыкъохэмрэ яджабгъу тхьакӀумэ пакӀэхэм, яджабгъу Ӏэхъомбэшхохэмрэ яджабгъу лъэхъомбэшхохэмрэ ащыф. Лъыр къурмэншӀыпӀэм ыбгъу пстэуми атекӀ. 21КъурмэншӀыпӀэм текӀэгъэ лъым щыщрэ щыфэ ашӀырэ дагъэмрэ штэхи, Хьаруни, ащ ищыгъынхэми, ыкъохэми, ахэм ящыгъынхэми атеутх. Джаущтэу Хьаруни ащ ищыгъынхэри, ыкъохэри, ахэм ящыгъынхэри Сэщ пае хэушъхьафыкӀыгъэхэу къысфэлэжьэнхэу хъущт. 22ТӀым шэу къытекӀыгъэри, икӀапи, кӀоцӀым къикӀыгъэ шэри, шӀум шэу къытекӀыгъэри, жъэжъыитӀури, ахэм шэу ателъри, джабгъу кори штэх, сыда пӀомэ къурмэнышӀхэр а тӀы къурмэнымкӀэ тхьэфэлэжьэным фагъэхьазырых. 23Ахэм ягъусэнхэу зы хьалыгъу хъурае, зы джэгурыдзэ мыкӀумыпшыр, дагъэр зыщыфэжьыгъэ зы щэлэмэ мыкӀумыпшыр Зиусхьаным ыпашъхьэ ит мэтэжъыеу хьалыгъу мыкӀумыпшыр зэрылъым къихых. 24А зэкӀэ Хьарунэрэ ыкъохэмрэ аӀэгумэ арылъхьэхи, ахэр къыдарэӀэтаехи, Зиусхьаным фагъэшъуашэхэу, ыпашъхьэ щарэгъэсысых. 25Мыщ къыкӀэлъыкӀоу аӀагумэ арылъхэр къарыхыжьхи, къурмэнгъэстым игъусэхэу къурмэншӀыпӀэм щыгъэстых. Ар Зиусхьаным пае мэ ӀашӀу къызпихэу, гуапэ щыхъурэ тын. 26Хьарунэ тхьэфэлэжьэным фагъэхьазырынэу къурмэн ашӀыгъэ тӀым ыбгъэгу шти, Зиусхьаным ыпашъхьэ щыдэӀэтай. Ар о уиӀахь.

27Хьарунэрэ ыкъохэмрэ апае къыхахыгъэ тӀы бгъэгоу дэпӀэтэягъэмрэ тӀым ыкоу Зиусхьаным фэбгъэшъошагъэмрэ гъэлъэпӀагъэхэ хъунхэу хэушъхьафыкӀых. 28Израиль цӀыфхэм мамыр къурмэнэу ашӀырэм щыщ а пкъыхэр Хьарунэрэ ыкъохэмрэ аратынхэ фае. Джары егъэшӀэрэ унашъоу щытыр. Ар израиль цӀыфхэм мамыр къурмэнэу Зиусхьаным фагъэшъошагъэхэм ащыщхэр ары.

29Хьарунэ щымыӀэжь зыхъукӀэ, ащ пае ашӀыгъэ щыгъын лъапӀэхэр ыужкӀэ ыкъомэ акъожьхэм аратыжьынхэ фае. А щыгъынхэр ащыгъхэу, ахэм дагъэр ащафэнышъ, къурмэнышӀэу агъэуцущтых. 30Хьарунэ ыкъомэ ащыщэу ащ ичӀыпӀэ иуцуагъэу чэтэнгъэӀэгъэ лъапӀэм хэт чӀыпӀэ лъапӀэм ихьащтым мэфиблым къыкӀоцӀ а щыгъынхэр зыщилъэхэзэ ышӀын фае.

31КъурмэнышӀыр тхьэфэлэжьэным зэрэфагъэхьазырырэ къурмэнэу ятӀонэрэ тӀым ыл шти, чӀыпӀэ лъапӀэм щыгъажъу. 32Хьарунэрэ ыкъохэмрэ а лыри Зиусхьаным ыпашъхьэ ит мэтэжъыем илъ хьалыгъу мыкӀумыпшыри чэтэнгъэӀэгъэ лъапӀэм ичӀэхьапӀэ дэжь щарэшхых. 33Джаущтэу къурмэнышӀэу агъэуцунхэм пае зэраукъэбзыгъэхэу, зэрагъэлъэпӀагъэхэ а къурмэнхэу афыхаушъхьафыкӀыгъэхэр ахэм ашхын фае. Ежьхэм нэмыкӀ горэми ахэр ышхы хъущтэп, сыда пӀомэ ахэр гъэлъэпӀагъэх. 34КъурмэнышӀэу агъэуцунхэм пае зэраукъэбзыгъэхэу, зэрагъэлъэпӀэгъэхэ лымрэ хьалыгъумрэ ащыщ пчэдыжьым нэс къэнэжьмэ, ахэр гъэстыжьых, ахэр пшхы хъущтэп, сыда пӀомэ гъэлъэпӀагъэх.

35Хьаруни ыкъохэми Сэ унашъоу къыпфэсшӀыгъэм тетэу япшӀылӀэн фаер зэкӀэ гъэцакӀэ, мэфиблым къыкӀоцӀ джаущтэу шӀызэ, къурмэнышӀэу гъэуцугъэнхэм ахэр фэгъэхьазырых. 36Мафэ къэс зы шкӀэхъужъ псэкӀод къурмэн шӀы, къурмэншӀыпӀэр укъэбзыгъэнэу псэкӀод къурмэн ащ щышӀ, гъэлъэпӀэгъэнэу дагъэ щыф. 37Мэфиблым къыкӀоцӀ къурмэншӀыпӀэр укъэбзызэ, гъэлъэпӀагъэу шӀы. Джаущтэу ар лъапӀэм илъэпӀэжьэу хъущт, къурмэншӀыпӀэм нэсырэ пстэури гъэлъэпӀагъэ хъущт.

Мафэ къэс ашӀыщт къурмэнхэр

38Мары къурмэншӀыпӀэм къурмэн щыпшӀыщтхэр: мафэ къэс илъэс зырыз аныбжьэу шъынитӀу. 39Зы шъынэр пчэдыжьым, адрэр чэпэ зэхэогъум къурмэн шӀых. 40Коц хьаджыгъэ анахь дэгъум фэдэу ефэ#29:40 Ижъырэ джуртыбзэмкӀэ тхыгъэ Ӏэпэрытхым гущыӀэу «ефэ» зыфиӀорэр хэтэп, ау зытхыгъэм джарын фае мы чӀыпӀэм зигугугъу къыщишӀырэр, сыда пӀомэ ар пщэлъэ шапхъэу а лъэхъаным агъэфедэщтыгъэ. шапхъэм изыпшӀанэ ӀэкӀэ къыкӀафыгъэ зэйтун дагъэу хыным#29:40 Хыныр литри 4 фэдиз горэ зэрыфэрэ пщэлъэ шапхъэу ижъырэ джуртхэм агъэфедэщтыгъэр ары. ызыплӀанэр дыхэгъэкӀухьагъэу апэрэ шъынэм игъусэхэу къурмэн шӀых. Шъон къурмэн рыпшӀынэу, къурмэншӀыпӀэм тепкӀэнэу хыным изыплӀанэ санэ ахэм акӀыгъэгъужь. 41Адрэ шъынэр пчэдыжьым пшӀыгъэ гъомылэ тынымрэ шъон къурмэнымрэ афэдэхэр игъусэхэу чэпэ зэхэогъум къурмэн шӀы. Ар Зиусхьаным пае къурмэнгъэст, Зиусхьаным пае машӀокӀэ агъэстыгъэ къурмэнэу мэ ӀашӀу къызпихырэр ары. 42ШъуилӀэуж зэкӀэлъыкӀохэр щэӀэхэфэ а къурмэнгъэстыр чэтэнгъэӀэгъэ лъапӀэм ичӀэхьапӀэ дэжь Зиусхьаным ыпашъхьэ щышъушӀыщт. Джары Сэ израиль цӀыфхэм зыкъызщафэзгъэнэфэщтри о сыкъызщыбдэгущыӀэщтри. 43Сэ израиль цӀыфхэм ащ закъыщыфэзгъэнэфэщт, Сэ СищытхъушхокӀэ а чӀыпӀэр гъэлъэпӀагъэу хъущт. 44ЧэтэнгъэӀэгъэ лъапӀэри къурмэншӀыпӀэри гъэлъэпӀагъэхэу сшӀыщтых. Сэ къурмэнышӀэу къысфэлэжьэнхэм пае Хьаруни ыкъохэри гъэуцух. 45Сэ израиль цӀыфхэм сырягъусэщт, ахэм Сыря Тхьэщт. 46Джаущтэу Сы Зиусхьанэу, сызэря Тхьэр ахэмэ къашӀэщт. Сырягъусэным пае Сэры Мысыр хэгъэгум ахэр къизыщыжьыгъэхэр. Сэры Зиусхьанэу ахэм я Тхьэр!»

Currently Selected:

МысырикӀыжь 29: АдыТГ

Highlight

Copy