МысырикӀыжь 31

ЯщэкӀэнэрэ зырэ шъхьэр

Зиусхьаным къыхихыгъэ цӀыф ӀэпэӀасэхэр

1Зиусхьаным Мосэ къыриӀуагъ: 2«ЗэгъашӀэ: Ехъуд лӀакъом щыщэу Хъур къыхэкӀыгъэ Урый ыкъо Бэцалэл ары Сэ згъэнафэрэр. 3Сэ Спси къыхэслъхьагъ, сыд фэдэрэ ӀофкӀи Ӏушыгъэрэ зэхэшӀыкӀныгъэрэ, шӀэныгъэрэ ӀэпэӀэсэныгъэрэ къыхэслъхьагъэхэшъ, 4дышъэм, тыжьыным, гъуаплъэм Ӏоф зэрадэпшӀэщтым фэӀэпэӀас, 5курб цӀыкӀухэм арагъэтӀысхьэрэ мыжъохэмрэ пхъэмрэ хибзыкӀынхэ елъэкӀы – сыд фэдэрэ сэнэхьати хэлъ. 6Дан лӀакъом щыщэу Ахъысэмакъ ыкъо Ахолыаб ӀэпыӀэгъоу Сэ ащ есэты. Адрэ ӀэпэӀэсэ пстэуми сэнэхьатхэр Сэ къахэслъхьагъэх. О пшӀынэу унашъо Сэ къыпфэсшӀыгъэхэр зэкӀэ ахэм арэшӀых: 7чэтэнгъэӀэгъэ лъапӀэр, пхъонтэ лъапӀэмрэ ащ ишъхьатеӀубэрэ#31:7 Мы гущыӀэм ижъырэ джуртыбзэмкӀэ тхыгъэ Ӏэпэрытхым ятӀонэрэ мэхьани щыриӀ: псэкӀодхэм ятехъуапӀ. Ар къызэрэбгурыӀон фаер: «псэкӀодхэр къыпфэгъунхэр»., чэтэнгъэӀэгъэ лъапӀэм дыкӀыгъоу агъэфедэрэ пстэури, 8Ӏанэри ащ дыкӀыгъоу агъэфедэрэ пстэури, дышъэ къабзэм хэшӀыкӀыгъэ остыгъэри ащ дыкӀыгъоу агъэфедэрэ пстэури, мэ ӀашӀухэр къызпихрэ мыстхъухэр зыщагъэстырэ къурмэншӀыпӀэри, 9къурмэнгъэстхэр зыщашӀырэ къурмэншӀыпӀэри ащ дыкӀыгъоу агъэфедэрэ пстэури, гъоплъэ лэджэнри ащ итегъэуцуапӀи, 10чӀыпӀэ лъапӀэм щыӀэхэу къурмэншӀыгъом ащыгъыщт щыгъынхэр – Хьарунэ къурмэнышӀым ишъошэ лъапӀэу шъагъэмрэ ащ ыкъохэм зыщалъэщт щыгъынхэмрэ, 11джащ фэдэу щыфэн ашӀырэ дагъэмрэ мэ ӀашӀу къызпихрэ мыстхъухэу чӀыпӀэ лъапӀэм щагъэстхэмрэ. Сэ унашъо къызэрэпфэсшӀыгъэм тетэу ахэм зэкӀэри ашӀын фае».

Зыгъэпсэфыгъо мафэу шэмбэтыр

12Зиусхьаным Мосэ къыриӀуагъ: 13«Сишэмбэтхэр агъэлъэпӀэнхэу израиль цӀыфхэм яӀу. Шэмбэтыр – ар шъуилӀэуж зэкӀэлъыкӀохэр щэӀэфэхэ Сэрырэ шъорырэ тазыфагу дэгъэуцогъэ тамыгъэу зэрэщытыр, Сэ сызэрэ Зиусхьыныр, Сэщ пае шъузэрахэсыушъхьафыкӀыгъэр шъушӀэным пае. 14Шэмбэтыр хэшъуушъхьафыкӀ: ар шъоркӀэ лъапӀэ. Шэмбэтыр емыкӀу зышӀырэр аукӀын фае, сыда пӀомэ хэтми шэмбэтым Ӏоф зышӀэрэр ицӀыф лъэпкъ хэзыпэщт. 15Мэфихэ Ӏоф арэшӀ, яблэнэрэ мафэр – шэмбэт, Зиусхьаным фэгъэшъошэгъэ зыгъэпсэфыгъо мэфэ лъапӀ. Шэмбэтым Ӏоф зышӀэрэ пэпчъ аукӀын фае. 16Арышъ, израиль цӀыфхэм ялӀэуж зэкӀэлъыкӀохэр щэӀэфэхэ зэпымыоу шэмбэтыр арэгъэлъапӀ, ар лъапӀэ. 17Сэрырэ израиль цӀыфхэмрэ тазыфагу дэт егъэшӀэрэ тамыгъэр зыфэдэр джары. Сыда пӀомэ Сэ, Зиусхьаным, мэфихым къыкӀоцӀ уашъомрэ чӀыгумрэ къэзыгъэшӀыгъэх, яблэнэрэ мафэм сирэхьатыгъоу зызгъэпсэфыгъ».

18Джа Синай къушъхьэм Мосэ къыщыдэгущыӀэныр Зиусхьаным зеухым, зэзэгъыныгъэр зытетхэгъэ мыжъобгъуитӀур ащ къыритыгъэх – Тхьэм ыӀэкӀэ ытхыгъэ мыжъобгъуитӀур.

Currently Selected:

МысырикӀыжь 31: АдыТГ

Highlight

Copy