МысырикӀыжь 2

ЯтӀонэрэ шъхьэр

Мосэ икъэхъукӀ

1Джа уахътэм ехъулӀэу лэуй лъэпкъым щыщ зы лӀы горэм ежь илъэпкъ щыщэу пшъашъэ къыщэгъахэу щытыгъ. 2Шъузыр лъэрымыхь хъуи, шъао къыфэхъугъ. Сабыир зэрэдахэр елъэгъути, мэзищым къыкӀоцӀ гъэбылъыгъэу ащ ыӀыгъыгъ. 3Ау нахьыбэрэ ыгъэбылъын ылъэкӀыжьырэпти, псыхъо Ӏушъом къыщыкӀырэ уц лъагэм хэшӀыкӀыгъэ мэтэжъыер ышти, къэтранрэ мыстхъурэ щифагъэх. Ащ шъэожъыер рилъхьи, Нил псыхъо нэпкъым дэжь уц лъагэм хигъэуцуагъ. 4Шъэожъыем къехъулӀэщтым лъыплъэнэу, ащ ышыпхъу чыжьэкӀэ къэуцугъ. 5А уахътэм тефэу фирхьауным ыпхъу зигъэпскӀынэу псыхъом къэкӀуагъ. Ащ иунэӀут пшъашъэмэ псыхъо нэпкъым тетхэу къакӀухьэщтыгъэ. Фирхьауным ыпхъу уц лъагэм хэт мэтэжъыер ылъэгъугъэти, унэӀут пшъашъэмэ ащыщ горэ ар къыхьынэу ыгъэкӀуагъ. 6Фирхьауным ыпхъу ар къызызэтырехым, сабыир ылъэгъугъ. Ар гъыщтыгъэ. Сабыим ыгу егъуи, къыӀуагъ: «Мыр джурт сабыймэ ащыщ». 7Ардэдэм сабыим ышыпхъу фирхьауным ыпхъу еупчӀыгъ: «СыкӀонышъ, сабыир пфипӀунэу джурт бзылъфыгъэмэ ащыщ къыпфэсщэна?» 8Фирхьауным ыпхъу ащ риӀожьыгъ: «КӀо». Пшъэшъэжъыер кӀуи, сабыим янэ къыщагъ. 9Фирхьауным ыпхъу бзылъфыгъэм риӀуагъ: «Сабыир шти, сфэпӀу; сэ ащ ыпкӀэ къыостыщт». Бзылъфыгъэм сабыир ышти, ар фипӀугъ. 10Сабыим хахъуи, зыкъызеӀэтым, ным ар фирхьауным ыпхъу фищэжьыгъ. Адрэм ар ыкъо папкӀэу иӀагъ. ЦӀэу фиусыгъэр Мос#2:10 Ижъырэ джуртыбзэмкӀэ гущыӀэу «Мосэм» икъэӀуакӀэ мэхьанэу иӀэмкӀэ зыпэблагъэр «къыхахыжьыгъ» зыфиӀорэр ары., «Сыда пӀомэ сэ ар псым къыхэсхыжьыгъ», – ыӀощтыгъэ ащ.

Мосэ шъхьэегъэзыпӀэкӀэ мыдианмэ яхэгъэгу зэрэкӀожьыгъэр

11Мафэ горэм Мосэ, кӀэлэ чъэпхъыгъэ хъугъэу, илъэпкъэгъухэм адэжь зэкӀом, яӀофшӀэнкӀэ ахэр къинышхо зэрэхэтхэр ылъэгъугъ. Ащ дэжьым Мосэ илъэпкъэгъу джуртым мысыр цӀыф горэ еоу рихьылӀагъ. 12Зиплъыхь-зыкъиплъыхьажьи, зи щымытэу зелъэгъум, мысыр цӀыфыр ыукӀи, пшахъом чӀиухъумэжьыгъ. 13ЯтӀонэрэ мафэм къызыдэкӀым, мары джыри нэбгыритӀу, джуртхэу, зэзаохэу ылъэгъугъ. Арыти мысэм риӀуагъ: «Сыда адэ уилъэпкъэгъу узкӀеорэр?» 14Адрэм къыриӀожьыгъ: «Хэта о пщэуи хьыкумышӀэуи ташъхьагъ укъизгъэуцуагъэр? Мысыр цӀыфыр зэрэуукӀыгъэм фэдэу сэри сыуукӀынэу оӀошъ ара?» Мосэ къащти, зэриӀожьыгъ: «ШъыпкъэмкӀэ а сшӀагъэр джы къашӀагъ». 15Фирхьауным къэбарыр зэхихыгъэти, Мосэ ыукӀынэу рихъухьагъ.

Мосэ фирхьауным зышӀуигъэбылъи, мыдианмэ яхэгъэгу екӀужьыгъ. КӀозэ, псынэ горэм дэжь нэси, щетӀысэхыгъ. 16Мыдиан къурмэнышӀ горэ пхъуибл иӀэу ащ щыпсэущтыгъ. Тым имэл-пчэнхэр ахэм агъэхъущтыгъэхэти, псы рагъэшъонхэу, псынэм къырахызэ, хьакъуашъомэ арыз ашӀыгъ. 17Ардэдэм мэлахъохэр къакӀохи, пшъашъэхэр Ӏуафыгъэх. Джащыгъум Мосэ къэтэджи, ахэм ӀэпыӀэгъу афэхъугъ, ямэл-пчэнхэри псы ригъэшъуагъэх. 18Пшъашъэхэр ятэу Итрэу#2:18 Мы цӀэм нэмыкӀ къэӀуакӀи иӀ: РэӀуел. дэжь къызэкӀожьыхэм, ар къяупчӀыгъ: «Сыда непэ ащ фэдэу нахь жьэу шъукъызкӀэкӀожьыгъэр?» 19Ахэм къаӀуагъ: «Мысыр цӀыф горэ къыддеӀи, мэлахъомэ апэуцужьыгъ. Ар хэгъэкӀи, пси къытфырихи, мэл-пчэнхэр псы ригъэшъуагъэх». 20Ипшъашъэмэ ащ ариӀуагъ: «Адэ тыдэ ар щыӀа? Сыд пае ар къэжъугъэнагъа? Къежъугъэблагъи, жъугъашхэба». 21А цӀыфым дэжь щыпсэунэу Мосэ рихъухьагъ. Ащ ыпхъоу Цыпорэ Мосэ шъуз фэхъунэу къыритыгъ. 22Уахътэ тешӀи, Цыпорэ шъао къызыфэхъум, Мосэ «Сэ хымэ хэгъэгум сыщыхэхэсыгъ» ыӀуи, Гъэршэм#2:22 Мы цӀэм ижъырэ джуртыбзэмкӀэ къэӀуакӀэу иӀэм имэхьанэ зыпэблагъэр «хымэ хэгъэгум щыщ» зыфиӀорэр ары. цӀэу ащ фиусыгъ.

23Бэ тешӀагъэу Мысырым ипачъыхьэ лӀагъэ. Джуртхэр Ӏоф хьылъэу ашӀэрэм зыкӀэмыӀажь ехъулӀагъэхэу тхьаусыхэ-гырзыным зэрэхэтхэр Тхьэм лъыӀэсыгъ. 24Ахэм ятхьаусыхэ-гырз макъэ Тхьэм къызэхихи, Ибрахьимэ, Исхьакъ, Якъубэ Ӏуагъэу адишӀыгъагъэр ыгу къэкӀыжьыгъ. 25Тхьэр джуртхэм къяплъи, ахэр къинэу зыхэтхэр къызэхишӀыкӀыгъ.

Currently Selected:

МысырикӀыжь 2: АдыТГ

Highlight

Copy