МысырикӀыжь 27

ЯтӀокӀэнэрэ блырэ шъхьэр

КъурмэншӀыпӀэр

1Зиусхьаным Мосэ къыриӀуагъ: «Акацэ чъыгым плӀэмыеу къурмэншӀыпӀэ хэшӀыкӀ, къопиплӀ иӀэнэу, икӀыхьагъи ишъомбгъуагъи Ӏэнтэгъуитф#27:1 Ар метри 2-рэ сантиметрэ 20-рэ фэдиз хьазыр. хъоу, илъэгагъэ Ӏэнтэгъуищ#27:1 Ар зы метрэрэ сантиметрэ 30-рэ фэдиз хьазыр. хъоу. 2КъурмэншӀыпӀэм бжъакъом фэдэу къыпыщхэу къуапэхэр фэшӀых. Ахэр къурмэншӀыпӀэм дыхэтхэу щытын фае. А зэкӀэри къызэдиубытэу гъуаплъэ къяӀулӀэкӀ. 3Яжьэр рызэрахьанэу лэгъупхэр, хьакужъотхъухэр, лэджэнхэр, цацэхэр, къопс зиӀэ жъокулъэхэр шӀы. Ахэр зэкӀэ гъуаплъэм хэшӀыкӀ. 4КъурмэншӀыпӀэм пае гъуаплъэм хэшӀыкӀыгъэу хъагъэ шӀы, а хъагъэм ыкъопиплӀымэ гъоплъэ хъурджанэхэр ягъэпытылӀэх. 5Гъоплъэ хъагъэр къурмэншӀыпӀэм илъэгагъэ ыгузэгу къынэсэу ащ къыдекӀокӀырэ нэз ӀушӀыкӀыгъэм ычӀэгъ чӀэгъэуцу. 6КъурмэншӀыпӀэм пае акацэ чъыгым хэшӀыкӀыгъэхэу, гъуаплъэр къягъэтӀылъэкӀыгъэу бэщхэр шӀы. 7КъурмэншӀыпӀэр гъэкощыгъэн фае зыхъукӀэ, бэщхэр ащ ыбгъуитӀу ягъэпытылӀэгъэ хъурджанэмэ арылъхьэх. 8КъурмэншӀыпӀэр ыкӀоцӀ нэкӀэу пхъэмбгъумэ ахэшӀыкӀ, мы къушъхьэм Сэ джы къызэрэщыозгъэлъэгъурэм фэдэкъабзэу ар шӀы.

ЧэтэнгъэӀэгъэ лъапӀэм ищагу

9ЧэтэнгъэӀэгъэ лъапӀэм ищагу гъэпсы. Щагубгъоу къыблэ лъэныкъомкӀэ гъэзагъэр къэшӀыхьэгъэнэу чэтэн Ӏудэнэ псыгъохэм ахэшъыкӀыгъэу, Ӏэнтэгъуишъэ#27:9 Ар метрэ 44-рэ фэдиз хьазыр. икӀыхьагъэу Ӏухъо фэшӀ. 10Ӏухъор пкъэу тӀокӀым апышӀэгъэн фае. Пкъэухэм гъуаплъэм хэшӀыкӀыгъэхэу игъэуцопӀэ тӀокӀ ящыкӀагъ. Пкъэумэ якъакъыщхэмрэ ябгыкъурыгъачъэхэмрэ тыжьыным хэшӀыкӀыгъэнхэ фае. 11Джащ фэдэу щагубгъоу темыр лъэныкъомкӀэ гъэзагъэр къэшӀыхьэгъэнэу чэтэн Ӏудэнэ псыгъохэм ахэшъыкӀыгъэу, Ӏэнтэгъуишъэ икӀыхьагъэу Ӏухъо фэшӀ. Ӏухъор пкъэу тӀокӀым апышӀэгъэн фае. Пкъэухэм гъуаплъэм хэшӀыкӀыгъэу игъэуцопӀэ тӀокӀ ящыкӀагъ. Пкъэухэм якъакъыщхэмрэ ябгыкъурыгъачъэхэмрэ тыжьыным хэшӀыкӀыгъэнхэ фае. 12Щагум ишъомбгъуагъэу къохьапӀэ лъэныкъомкӀэ гъэзагъэр къэшӀыхьэгъэнэу Ӏэнтэгъу шъэныкъо#27:12 Ар метрэ 22-рэ фэдиз хьазыр. икӀыхьагъэу Ӏухъо фэшӀ. А Ӏухъор игъэуцопӀипшӀ зигъусэ пкъэуипшӀым апышӀэгъэн фае. 13Щагум ынэӀоу къокӀыпӀэ лъэныкъомкӀэ гъэзагъэм ишъомбгъуагъэ зэрэхъун фаер Ӏэнтэгъу шъэныкъу. 14ДэхьапӀэм ызы бгъукӀэ Ӏэнтэгъу пшӀыкӀутф#27:14 Ар метри 6-рэ сантиметрэ 60-рэ фэдиз хьазыр. икӀыхьагъэу Ӏухъо фэпшӀыщт. Ар игъэуцопӀищ зигъусэ пкъэуищым апылъэгъэщт. 15Адрэ бгъумкӀи Ӏэнтэгъу пшӀыкӀутф икӀыхьагъэу Ӏухъо фэпшӀыщт. Ари игъэуцопӀищ зигъусэ пкъэуищым апылъэгъэщт. 16Щагу къэлапчъэм иӀухъо Ӏэнтэгъу тӀокӀ#27:16 Ар метри 9 фэдиз хьазыр. икӀыхьагъэу, цы шхъуантӀэм, шхъонтӀашъор къызтеорэ цы плъыжь чӀапцӀэм, цы плъыжьыбзэм, чэтэн Ӏудэнэ псыгъомэ ахэшъыкӀыгъэщт. Ар игъэуцопӀиплӀ зигъусэ пкъэуиплӀымэ апылъэгъэщт. 17Щагу шӀыхьагъэм хэт пкъэухэм зэкӀэми ябгыкъурыгъачъэхэмрэ якъакъыщхэмрэ тыжьыным, пкъэухэм яигъэуцуапӀэхэр гъуаплъэм ахэшӀыкӀыгъэнхэ фае. 18Щагум икӀыхьагъэ зэрэхъун фаер Ӏэнтэгъуишъ#27:18 Ар метрэ 44-рэ фэдиз хьазыр., ишъомбгъуагъэ – Ӏэнтэгъу шъэныкъу#27:18 Ар метрэ 22-рэ фэдиз хьазыр., чэтэн Ӏудэнэ псыгъомэ ахэшъыкӀыгъэ пэӀухъом икӀыхьагъэ зэрэхъун фаер Ӏэнтэгъуитф#27:18 Ар метри 2-рэ сантиметрэ 20-рэ фэдиз хьазыр. Пкъэухэм ягъусэщт игъэуцуапӀэхэр гъуаплъэм хэшӀыкӀыгъэнхэ фае. 19ЧэтэнгъэӀэгъэ лъапӀэм дыкӀыгъоу агъэфедэрэ пстэури, пчэгъу цӀыкӀухэри, щагур къызэрэшӀыхьэгъэ Ӏухъор зыпылъэгъэ пкъэухэри гъуаплъэм хэшӀыкӀыгъэнхэ фае.

ЧӀыпӀэ лъапӀэм щыӀэ остыгъэм идагъ

20Остыгъэр ренэу блэным пае зэйтун дэгъэ къабзэр къахьызэ ашӀынэу израиль цӀыфхэм яӀу. 21Хьарунэрэ ащ ыкъохэмрэ зылъыплъэнхэ фаер пхъонтэ лъапӀэр зыкӀыбкӀэ щыӀэ пэӀухъом дэжь Зиусхьаным ыпашъхьэ щыт остыгъэм игъэстылъэхэм пщэпэ зэхэогъум къыщегъэжьагъэу пчэдыжьым нэс машӀор зэращыблэныр ары. Зыщыщхэ израиль цӀыфхэм ялӀэуж зэкӀэлъыкӀохэр щэӀэхэфэ ахэм ар яегъэшӀэрэ унашъу».

Currently Selected:

МысырикӀыжь 27: АдыТГ

Highlight

Copy