МысырикӀыжь 28

ЯтӀокӀэнэрэ ирэ шъхьэр

КъурмэнышӀхэм ящыгъынхэр

1Зиусхьаным Мосэ къыриӀуагъ: «СикъурмэнышӀ хъунхэу пшэу Хьарунэрэ ыкъохэмрэ израиль цӀыфхэм къахэщых – Хьарун, ащ ыкъохэу Нэдэб, Абихъыу, ЕлыӀазар, Итамар. 2Пшэу Хьарунэ лъытэныгъэрэ теплъэшӀурэ иӀэнхэм пае шъошэ гъэлъэпӀагъэ фэшӀ. 3СикъурмэнышӀ хъунэу Хьарунэ къахэсхыным пае, Сэ ӀэпэӀэсэныгъэ къызыхэслъхьэгъэ цӀыф тегъэпсыхьагъэхэм унашъо афэшӀи, а щыгъынхэр фягъэхьазырых. 4Пшэу Хьарунэрэ ыкъохэмрэ Сэ сикъурмэнышӀ хъунхэм пае мыхэр ары щыгъынэу афашӀынхэ фаер: бгъэрышӀэр, чэтэнӀабгъур, джэнэ кӀыӀутелъыр, тхыпхъэхэр зыхэлъ джэнэ гъопэ кӀыхьэр, паӀор#28:4 КъурмэнышӀхэм зыщалъэрэ паӀор шэкӀ зэкӀоцӀыщыхьагъэм хэшӀыкӀыгъагъ., бгырыпхыр. 5Дышъэр, цы шхъуантӀэр, шхъонтӀашъор къызтеорэ цы плъыжь чӀапцӀэр, цы плъыжьыбзэр, чэтэн пӀуакӀэр ащ пае арагъэфедэх.

ЧэтэнӀабгъур

6ЧэтэнӀабгъур дышъэ Ӏуданэхэм, цы шхъуантӀэм, шхъонтӀашъор къызтеорэ цы плъыжь чӀапцӀэм, цы плъыжьыбзэм, чэтэн Ӏудэнэ псыгъохэм ӀэпэӀэсэныгъэшхо хэлъэу ахарэшъыкӀ. 7ЧэтэнӀабгъум ыгупэрэ ыкӀыбырэ зэрапхынхэу ахэм ацыпэхэм тэмэтелъитӀу къапыдэгъэн фае. 8ЧэтэнӀабгъум ыкӀыӀу телъ кӀапсэри, чэтэнӀабгъум фэдэу, дышъэ Ӏуданэхэм, цы шхъуантӀэм, шхъонтӀашъор къызтеорэ цы плъыжь чӀапцӀэм, цы плъыжьыбзэм, чэтэн Ӏудэнэ псыгъохэм ахэшъыкӀыгъэу щытын фае. ӀэпэӀэсэныгъэшхо хэлъэу ашъэгъэ кӀапсэри чэтэнӀабгъури зэу щытынхэ фае. 9Оникс мыжъуитӀур шти, Израиль ыкъомэ ацӀэхэр ахэм ащыхэбзыкӀых: 10зы мыжъом нэбгырихмэ ацӀэхэр щыхэбзыкӀых, адрэ нэбгырихмэ ацӀэхэр, къызщыхъугъэ илъэсхэмкӀэ къызэкӀэлъыкӀохэу, нэмыкӀ мыжъом щыхэбзыкӀых. 11Мыхъурхэр мыжъом хэзыбзыкӀыхэрэм зэрашӀырэм фэдэу, Израиль ыкъомэ ацӀэхэр зытет мыжъуитӀур хэбзыкӀых. Ӏу зэжъу зиӀэ набгъохэу дышъэм хэшӀыкӀыгъэхэм ахэр арыгъэтӀысхьэх. 12А мыжъуитӀур Израиль ыкъомэ апае гукъэкӀыжьхэу чэтэнӀабгъум итэмэтелъхэм атегъэпытыхьэх. Ахэр Зиусхьаным инэплъэгъу зэритхэм ишыхьатэу ацӀэхэр Хьарунэ ытэмитӀу телъхэу къырерэхьакӀых. 13Мыжъохэр зэрысыщт набгъохэр дышъэм хэшӀыкӀых. 14Пшъэхъу цӀыкӀуитӀуи дышъэ къабзэм хэпшӀыкӀыщт. Ахэр гъэщыгъэхэу, зэхэблагъэхэу пшӀынхэшъ, а пшъэхъу гъэщыгъэхэр дышъэм хэшӀыкӀыгъэ набгъохэу мыжъохэр зэрысыщтхэм ябгъэпытылӀэщтых.

БгъэрышӀэр

15Хьыкум зэрэпшӀыщт бгъэрышӀэр, чэтэнӀабгъур зэрэшӀыгъэм фэдэу, тхыпхъэхэр хэлъхэу ӀэпэӀэсэныгъэшхо ехьылӀагъэу шӀы. Ар дышъэ Ӏуданэхэм, цы шхъуантӀэм, шхъонташъор къызтеорэ цы плъыжь чӀапцӀэм, цы плъыжьыбзэм, чэтэн Ӏудэнэ псыгъом ахэшъыкӀ. 16Ар итеплъэкӀэ плӀэмыеу, тӀо зэтелъэу, зы бжиз#28:16 Ар сантиметрэ 22-рэ фэдиз хьазыр. икӀыхьагъэу, зы бжиз ишъомбгъуагъэу шӀы. 17Мыжъоу бгъэхьазырыгъэхэр щырыщэу сатырэ пэпчъ тесхэу сатыриплӀэу ащ хэгъэуцох. Рубиныр, топазыр, изумрудыр#28:17 Мыжъо лъапӀэхэмрэ ахэм ацӀэхэмрэ зэрэзэтефэхэрэр бгъэунэфыныр къинэу щыт. апэрэ сатырэм щызэгогъэтӀысхьэх. 18ЯтӀонэрэ сатырэм: карбункулыр, сапфирыр, налмэс-налкъутэр. 19Ящэнэрэ сатырэм: яхонтыр, агатыр, аметистыр. 20ЯплӀэнэрэ сатырэм: хризолитыр, ониксыр, ясписыр. Ахэр дышъэ набгъомэ арыгъэтӀысхьэгъэнхэ фае. 21А мыжъохэр пшӀыкӀутӀу хъунхэ фае. Израиль ыкъомэ япчъагъэ диштэхэу, ахэм ацӀэмэ атефэхэу, мыхъурым зэрэщыхабзыкӀырэм фэдэу, израиль лӀакъохэм ацӀэхэр зырызэу мыжъо пэпчъ щыхэбзыкӀыгъэнхэ фае. 22БгъэрышӀэм пае гъэщыгъэхэу, зэхэблагъэхэу пшъэхъу цӀыкӀухэр дышъэм хэшӀыкӀых. 23ХъурджэнитӀу дышъэм хэшӀыкӀи, ахэр бгъэрышӀэм ыкъопитӀу апыгъэпытыхь. 24Зэхэблэгъэхэ дышъэ пшъэхъу цӀыкӀуитӀур бгъэрышӀэм ыкъопитӀу апыгъэпытыхьэгъэ хъурджанэмэ арыщых. 25А пшъэхъу цӀыкӀуитӀум ацыпэхэр нэбгъуитӀум апышӀэхи, чэтэнӀабгъум ыгупэкӀэ тэмэтелъхэм ащягъэпытылӀэх. 26Джыри дышъэ хъурджэнитӀу шӀи, чэтэнӀабгъум ынэӀу фэгъэзагъэхэу, бгъэрышӀэм ыкӀыбкӀэ щыӀэхэу ычӀэгъырэ къопитӀум ягъэпытылӀэх. 27Джащ фэдэу дышъэ хъурджэнитӀу шӀи, чэтэнӀабгъур зэрэтырапхыхьэрэ кӀапсэм ышъхьагъыкӀэ, чэтэнӀабгъум ыкӀыӀукӀэ щыӀэхэу, адрэ къопитӀоу тэмэтелъитӀум яӀэхэм ахэр ягъэпытылӀэх. 28БгъэрышӀэр къемыфэхыным пае ащ ихъурджанэхэмрэ чэтэнӀабгъум ихъурджанэхэмрэ цы Ӏудэнэ шхъуантӀэм хэшӀыкӀыгъэ кӀэпсэжъыемкӀэ зэрэрапхых. Джаущтэу хъурджанэхэу кӀыбымкӀэ щыӀэхэр кӀапсэм ышъхьагъыкӀэ щыӀэхэу чэтэнӀабгъум ыкӀыӀу терэпхыхьагъэх. 29Хьарунэ чӀыпӀэ лъапӀэм кӀо зыхъукӀэ, Израиль ыкъохэр Зиусхьаным инэплъэгъу зэритхэм ишыхьатэу, ахэм ацӀэхэр бгъэрышӀэм тетхэу, ыбгъэгу телъхэу зэрихьащтых. 30БгъэрышӀэм уримрэ туммимрэ#28:30 Мыжъо лъапӀэхэу уримымрэ туммимымрэ къурмэнышӀым Тхьэм ыӀорэр ышӀэным пае пхъэдз ышӀыщтыгъэхэкӀэ енэгуягъо. илъхьэх. Хьарунэ чӀыпӀэ лъапӀэм щыӀэ зыхъукӀэ, ахэр ыгу пэблагъэхэу щытын фае. Джаущтэу Зиусхьаным ыпашъхьэ итэу, Ащ израиль цӀыфхэм хьыкумэу къафишӀыгъэхэр Хьарунэ ыгу пэблагъэхэу ренэу зэрихьащтых.

Джэнэ кӀыӀутелъыр

31ЧэтэнӀабгъум ычӀэгъ чӀэлъынэу джэнэ кӀыӀутелъыр зэрэщытэу цы шхъуантӀэм хэшъыкӀ. 32Ащ шъхьэм пае икӀыпӀэ фэшӀ. ДзэкӀолӀым иджанэ зэрашӀырэм фэдэу, джэнэ кӀыӀутелъыр шъхьэикӀыпӀэм дэжь щызэӀымытхъынэу, ащ ынэз къыдекӀокӀэу пытэу ӀушӀыкӀыгъэн фае. 33Ащ ыкӀэ зэрэщытэу къыдекӀокӀэу цы шхъуантӀэм, шхъонтӀашъор къызтеорэ цы плъыжь чӀапцӀэм, цы плъыжьыбзэм ахэшӀыкӀыгъэхэу нар теплъэ зиӀэ цы такъырхэр щыпышӀэх. А цы такъырхэм азыфагу дышъэм хэшӀыкӀыгъэу одыджын цӀыкӀухэр щыпылъэх. 34Дышъэ одыджын цӀыкӀухэмрэ нар теплъэ зиӀэ цы такъырхэмрэ зыр адырэм къыкӀэлъыкӀоу джэнэ кӀыӀутелъым ыӀэпакӀэ зэрэщытэу егъэкӀугъэхэу щытын фае. 35Хьарунэ ипшъэрылъ ыгъэцэкӀэн зыхъукӀэ, джэнэ кӀыӀутелъыр зыщерэлъ. Хьарунэ Зиусхьаным фэлэжьэнэу чӀыпӀэ лъапӀэм окӀофи, ащ къекӀыжьыфи, одыджын цӀыкӀухэм амакъэ къэӀун фае, арымырмэ ар лӀэщт.

ПаӀор, джэнэ гъопэ кӀыхьэр, бгырыпхыр

36Дышъэ къабзэм бзыгъэ цӀыкӀу хэшӀыкӀи, мыхъурым зэрэтыратхэрэм фэдэу ащ щыхэбзыкӀ: „Зиусхьаным фыхахыгъэр“. 37Цы Ӏудэнэ шхъуантӀэм хэшӀыкӀыгъэ кӀэпсэжъыемкӀэ паӀом ынэӀукӀэ ар щытырегъэубыт. 38Ар Хьарунэ ынатӀэ телъыщт. Израиль цӀыфхэм тынэу къырахьылӀэхэрэр Зиусхьаным игуапэ зэрэхъунхэу, ахэм щыкӀагъэу яӀэхэм къахэкӀырэ псэкӀодхэр зэкӀэ Хьарунэ зэрихьащтых. Зиусхьаныр къызэрафэшӀум инэшанэу дышъэ бзыгъэр Хьарунэ ынатӀэ ренэу телъыщт. 39Чэтэн Ӏудэнэ псыгъохэм джэнэ гъопэ кӀыхьэмрэ паӀомрэ ахэшъыкӀых. Чэтэн Ӏудэнэ псыгъохэм ахэшъыкӀыгъэу, шъо зэфэшъхьафхэр щызэгъэкӀугъэхэу бгырыпхыр шӀы.

Хьарунэ ыкъохэм ящыгъынхэр

40Хьарунэ ыкъомэ лъытэныгъэрэ теплъэшӀурэ яӀэнхэм пае джэнэ гъопэ кӀыхьэхэр, бгырыпххэри шъхьэкӀапхэхэри афэшӀых. 41Пшэу Хьарунэрэ ыкъохэмрэ ахэр ащылъэхи, ашъхьэхэм дагъэ ащыф, Сэщ пае хэушъхьафыкӀыхи, къысфэлэжьэнхэу къурмэнышӀэу гъэуцух. 42Чэтэн фыжьым хэшӀыкӀыгъэу, абгыхэм къащегъэжьагъэу алъэкӀапӀэмэ анэсэу, кӀышъо пцӀанэр рагъэбылъынэу, гъончэдж чӀэгъычӀэлъхэр ахэм афэшӀых. 43Хьарунэрэ ыкъохэмрэ чӀыпӀэ лъапӀэм щылэжьэнхэу чэтэнгъэӀэгъэ лъапӀэм чӀахьэхэ е къурмэншӀыпӀэм екӀуалӀэхэ зыхъукӀэ, псэкӀод ателъ мыхъуным, мылӀэнхэм пае, ахэр ащэрэгъых. Хьаруни лӀэужэу къыкӀэлъыкӀощтхэми щэӀэхэфэ ар яегъэшӀэрэ унашъу».

Currently Selected:

МысырикӀыжь 28: АдыТГ

Highlight

Copy