МысырикӀыжь 26

ЯтӀокӀэнэрэ хырэ шъхьэр

ЧэтэнгъэӀэгъэ лъапӀэм итехъохэр

1Зиусхьаным Мосэ джыри къыриӀуагъ: «Чэтэн Ӏудэнэ псыгъохэм, цы шхъуантӀэм, шхъонтӀашъор къызтеорэ цы плъыжь чӀапцӀэм, цы плъыжьыбзэм ахэшъыкӀыгъэу чэтэнгъэӀэгъэ лъапӀэм пае техъуипшӀ шӀы. Къэрыуб сурэтхэр ӀэпэӀэсэныгъэшхо хэлъэу ахэм адыхэшъыхьэх. 2Техъо пэпчъ икӀыхьагъэщтыр Ӏэнтэгъу тӀокӀрэ ирэ#26:2 Ар метрэ 12 фэдиз хьазыр., ишъомбгъогъэщтыр ӀэнтэгъуиплӀ#26:2 Ар метри 2 фэдиз хьазыр. Техъохэр зэкӀэ яшапхъэхэмкӀэ зэфэдизынхэ фае. 3Техъуитфыр зыр адрэм годагъэу, адрэ техъуитфыри зыр адрэм годагъэу щэрэтых. 4Апэрэ техъо зэгодагъэхэм анэз адрэ техъо зэгодагъэмэ анэз зыщеуалӀэрэм цы шхъуантӀэм хэшӀыкӀыгъэхэу шӀодзапӀэхэр тедэх. Адрэ техъо зэгодагъэмэ анэзэу апэрэм къыфэгъэзагъэми джаущтэу фэшӀ. 5Апэрэ техъо зэгодагъэхэм анэз шӀодзапӀэу шъэныкъо фэшӀ, адрэ техъо зэгодагъэхэми анэз шӀодзапӀэу шъэныкъо фэшӀ. ШӀодзапӀэхэр зэпэчӀынэтӀэнхэ фае. 6Дышъэм къакъыщ шъэныкъо хэшӀыкӀ, а къакъыщхэмкӀэ техъо зэгодагъэхэр зэрэгъэубытхи, чэтэнгъэӀэгъэ лъапӀэр зы пкъы хъущт.

7ЧэтэнгъэӀэгъэ лъапӀэм къеупхъухыгъэнхэу техъохэр пчэныцым джыри хэшӀыкӀых. Ащ фэдэу техъо пшӀыкӀуз шӀы. 8Зы техъом икӀыхьэгъэщтыр Ӏэнтэгъу щэкӀ#26:8 Ар метрэ 13 фэдиз хьазыр., ишъомбгъогъэщтыр ӀэнтэгъуиплӀ Техъо пшӀыкӀузми яшапхъэхэр зы. 9Пчэныцым хэшӀыкӀыгъэ техъуитфыр шъхьафэу зэгуадэх, адрэ нэмыкӀ техъуихри шъхьафэу зэгуадэх. Хэу зэгодагъэм ияхэнэрэ Ӏахьэ тӀоу зэтелъхьи, ар чэтэнгъэӀэгъэ лъапӀэм ичӀэхьапӀэ къыфэгъаз. 10Пчэныцым хэшӀыкӀыгъэ апэрэ техъо зэгодагъэхэм ягъунэрэ Ӏахьэ ынэз шӀодзапӀэу шъэныкъо тед, адрэ техъо зэгодагъэхэм анэзи шӀодзапӀэу шъэныкъо тед тӀури зэбгъэубытылӀэнхэм пае. 11Гъуаплъэм къакъыщ шъэныкъо хэшӀыкӀи, къакъыщхэр шӀодзапӀэхэм арылъхьэхи, чэтэнгъэӀэгъэ лъапӀэм зэрэщытэу ятӀонэрэ техъо зэикӀ фэхъунэу зэрэгъэубытых. 12Техъо зэгодагъэхэм якӀыхьагъэ щыщэу къыпыщырэр чэтэнгъэӀэгъэ лъапӀэм ыкӀыбкӀэ къерэхъухыгъ. 13Техъо зэгодагъэхэм яшъомбгъуагъэ къелыжьырэр, зы бгъумкӀэ зы Ӏэнтэгъу#26:13 Ар сантиметрэ 44-рэ фэдиз хьазыр. хъоу, адрэ бгъумкӀи зы Ӏэнтэгъу хъоу, чэтэнгъэӀэгъэ лъапӀэр зэлъаубытэу къехъухыгъэу щэрэт. 14Мэлышъо гъэтэджыгъэ плъыжьмэ техъо ахэшӀыкӀ, ащ ышъхьагъ телъынэу шъо пӀуакӀэмэ джыри техъо ахэшӀыкӀ.

ЧэтэнгъэӀэгъэ лъапӀэм ыпкъ зэрэзэхэтыщтыр

15Пхъэмбгъу Ӏужъухэр#26:15 ШӀэныгъэлэжь горэхэм къызэраӀорэмкӀэ, мыхэр рамэм фэдэу зэхэӀулӀэгъагъэх. акацэ чъыгым хэшӀыкӀых. 16Пхъэмбгъу Ӏужъу пэпчъ икӀыхьэгъэщтыр ӀэнтэгъуипшӀ#26:16 Ар метри 4-рэ сантиметрэ 40-рэ фэдиз хьазыр., ишъомбгъогъэщтыр Ӏэнтэгъурэ ныкъорэ#26:16 Ар сантиметрэ 66-рэ фэдиз хьазыр. Пхъэмбгъухэм яӀужъуагъэ зыфэдизыгъэм ехьылӀагъэу ижъырэ джуртыбзэмкӀэ тхыгъэ Ӏэпэрытхым хэтэп.. 17Пхъэмбгъу Ӏужъу пэпчъ ыӀэпакӀэхэм къапыщхэу шӀохэгъэуцуапӀэхэр фэшӀ зыр адрэм пэчӀынатӀэу. Джащ фэдэу чэтэнгъэӀэгъэ лъапӀэм зэкӀэ ипхъэмбгъу Ӏужъухэм афэшӀ. 18ЧэтэнгъэӀэгъэ лъапӀэм ыбгъоу къыблэмкӀэ гъэзэгъэщтым пае пхъэмбгъу Ӏужъоу тӀокӀ гъэхьазыр. 19Пхъэмбгъу Ӏужъу тӀокӀмэ аӀэпакӀэмэ къапыщхэрэр арыуцонхэу тыжьын игъэуцопӀэ тӀокӀитӀу шӀы: зы пхъэмбгъу Ӏужъум ыӀэпакӀэмэ къапыщхэрэм апае игъэуцопӀитӀу, адрэ пхъэмбгъу Ӏужъум ыӀэпакӀэмэ къапыщхэрэм апайи игъэуцопӀитӀу. 20ЧэтэнгъэӀэгъэ лъапӀэм ыбгъоу темырымкӀэ гъэзэгъэщтым пайи пхъэмбгъу Ӏужъоу тӀокӀ гъэхьазыр. 21ИгъэуцуапӀэхэуи тӀокӀитӀу гъэхьазыр – пхъэмбгъу Ӏужъу пэпчъ ыӀэпакӀэмэ къапыщхэрэм язырызэу. 22ЧэтэнгъэӀэгъэ лъапӀэм ыкӀыбэу къохьапӀэмкӀэ гъэзэгъэщтым пае пхъэмбгъу Ӏужъоу хы гъэхьазыр. 23ЧэтэнгъэӀэгъэ лъапӀэм ыкӀыбырэ къуапэхэм апае пхъэмбгъу Ӏужъоу тӀу гъэхьазыр. 24Ахэм алъапсэхэр зэпэшъхьафхэу#26:24 Мы чӀыпӀэр нэмыкӀ бзэхэмкӀэ зэрэзэрадзэкӀыгъэр: «ашъхьагъхэри алъапсэхэри зэрэгъэубытыгъагъэх»., ашъхьагъхэр апэрэ хъурджанэр зыщыхэтым дэжь щызэнэсхэу щытын фае. Ащ фэдэ пхъэмбгъу Ӏужъухэр къопитӀумэ ахэтынхэ фае. 25Джа пхъэмбгъу Ӏужъухэм япчъагъэ зыфэдиз хъущтыр 8. Ахэм тыжьын игъэуцуапӀэу пшӀыкӀух ягъэгъусэн фае, пхъэмбгъу Ӏужъу пэпчъ игъэуцопӀэ тӀурытӀу зэрафэхъунэу. 26Акацэ чъыгым бгыкъуидзэхэр хэшӀыкӀых, тфым чэтэнгъэӀэгъэ лъапӀэм ызыбгъу хэт пхъэмбгъу Ӏужъухэр зэрапхынхэу, 27адритфым ятӀонэрэ бгъум хэт пхъэмбгъу Ӏужъухэр, ящэнэрэ бгыкъуидзитфым кӀыбэу къохьапӀэмкӀэ гъэзэгъэщтым хэтхэр зэрапхынхэу. 28Гузэгум рыгъэчъэгъэ бгыкъуидзэ кӀыхьэм зы бгъум ыцыпитӀу зэрипхын фае. 29Пхъэмбгъу Ӏужъухэм дышъэ къягъэтӀылъэкӀи, ахэр зэзыпхыщт бгыкъуидзэхэр аралъхьанхэу дышъэ хъурджанэхэр ягъэпытылӀэх, бгыкъуидзэхэми дышъэ къягъэтӀылъэкӀ. 30Мы къушъхьэм Сэ джы къызэрэщыозгъэлъэгъурэм фэдэ къабзэу чэтэнгъэӀэгъэ лъапӀэр шӀы.

ЧэтэнгъэӀэгъэ лъапӀэм иӀухъорэ ипэӀухъорэ

31Цы шхъуантӀэм, шхъонтӀашъор къызтеорэ цы плъыжь чӀапцӀэм, цы плъыжьыбзэм, чэтэн Ӏудэнэ псыгъохэм ахэшъыкӀыгъэу пэӀухъо шӀы. Къэрыуб сурэтхэр ӀэпэӀэсэныгъэшхо хэлъэу ащ дыхэшъыхьэгъэнхэ фае. 32Дышъэр зытегъэлъэдагъэхэу, дышъэм хэшӀыкӀыгъэ къакъыщхэр зиӀэ пкъэуиплӀэу акацэ чъыгым хэшӀыкӀыгъэхэм ар апылъ. А пкъэухэр арыбгъэуцонхэу тыжьыным хэшӀыкӀыгъэхэу игъэуцопӀиплӀ щыӀэн фае. 33ПэӀухъор техъо зэгодагъэхэм ахэшӀыкӀыгъэ ычӀэгъырэ техъом икъакъыщхэм апышӀи, Сэ сиунашъохэр зытет мыжъобгъуитӀур зыдэлъ пхъонтэ лъапӀэр ащ ыкӀыбкӀэ щыӀэу гъэуцу. А пэӀухъом чӀыпӀэ лъапӀэмрэ лъапӀэм нахь лъэпӀэжьымрэ зэпэшъхьаф ышӀыщтых. 34Пхъонтэ лъапӀэу лъапӀэм нахь лъэпӀэжьым итым ишъхьатеӀубэ телъхьажь. 35ПэӀухъо пашъхьэм дэжь Ӏанэр гъэуцу. Ӏанэм ыпашъхьэ остыгъэр игъэуцу. ЧэтэнгъэӀэгъэ лъапӀэм идэпкъэу къыблэмкӀэ гъэзагъэм остыгъэр кӀэрытын фае. Ӏанэр темырымкӀэ гъэзэгъэн фае. 36ЧэтэнгъэӀэгъэ лъапӀэм ичӀэхьапӀэ Ӏухъо фэшӀ. Ӏухъор чэтэн Ӏудэнэ псыгъохэм ахэшъыкӀыгъэу, шъо зэфэшъхьафхэр щызэгъэкӀугъэхэу щытын фае. 37Ӏухъор апылъэгъэнэу пкъэуитф акацэ чъыгым хэшӀыкӀ. Ахэм дышъэр къяӀулӀэкӀ, дышъэм хэшӀыкӀыгъэ къакъыщхэр афэшӀых. А пкъэухэм апае игъэуцопӀитф гъуаплъэм хэгъэткӀукӀ».

Currently Selected:

МысырикӀыжь 26: АдыТГ

Highlight

Copy