МысырикӀыжь 12
12
ЯпшӀыкӀутӀонэрэ шъхьэр
Джуртхэм шъхьафитныгъэм имэфэкӀышхо къызэрафэсыгъэр
1Зиусхьаным Мысыр хэгъэгум Мосэрэ Хьарунэрэ къащыриӀуагъ: 2«Мы мазэр шъоркӀэ илъэсым адрэ имазэхэм яублапӀэу, ар шъо шъуиапэрэ мазэу хъущт. 3Израиль цӀыфхэм зэкӀэми яшъуӀу: мы мазэм ияпшӀэнэрэ мафэ унагъо пэпчъ ышъхьэ зы шъынэ ерэшт, унагъо пэпчъ – зы шъынэ. 4Ау унагъор зы шъынэр фэмышхынэу арэу цӀыкӀумэ, игъунэгъумэ ащыщэу цӀыф пчъагъэу исымкӀэ ар зыпари къэмынэу зыдишхын ылъэкӀыщтым ерэзэгъ. Нэбгырэ пэпчъ ышхыщтым телъытагъэу шъынэр зэтежъугуащ. 5Шъынэу къахэшъухырэм дагъо гори имыӀэу, хъоу, зы илъэс ыныбжьэу щытын фае. Шъынэхъум ычӀыпӀэ чэцӀыхъу шъуштэми хъущт. 6Ар а мазэм ияпшӀыкӀуплӀэнэрэ мафэ нэс шъуадэжь щышъуӀыгъ. Ащ ыуж израиль цӀыфхэм зэкӀэми къыхахыгъэхэ шъынэхэмрэ е чэцӀыхэмрэ пщэпэ зэхэогъум#12:6 Джуртхэм яхабзэкӀэ ятӀонэрэ мафэр ыпэрэ мафэм ипщэпэ зэхэогъу къыщежьэ. шӀуарэбзых. 7Ахэм алъ щыщ къыхарэхи, зыщашхыщтхэ унэ пэпчъ ипчъэ ихьапӀэ иблыпкъитӀурэ ипчъашъхьэрэ ащарэф. 8Мы чэщ дэдэм лыр машӀокӀэ гъэжъагъэу арэшх, хьалыгъу мыкӀу-мыпшырэ уц дыджхэмрэ дарэшхых. 9Ау цӀынэу е жъуагъэу лыр шъумышхы: машӀокӀэ гъэжъагъэу, ныбэ-шъхьэ-лъакъохэри зэригъусэхэу ар шъушхы. 10Пчэдыжьым нэс ащ щыщ къэшъумыгъан, къэнэжьыгъэ щыӀэмэ, машӀокӀэ жъугъэстыжь. 11Ар зэрэшъушхыщтыр мары: шъузэрэфэпагъэу, шъубгыхэр зэпыпхыкӀыгъэхэу, цуакъэхэри зэрэшъущыгъыхэу, шъуибэщхэри зэрэшъуӀыгъыхэу, псынкӀэу шъушхы: ар Зиусхьаным пае пэсахъ#12:11 Ижъырэ джуртыбзэмкӀэ мы гущыӀэм мэхьанэу иӀэхэм зэу ащыщ «ублэкӀыныр» зыфиӀорэр. къурмэн. 12Сэ а чэщ дэдэм Мысыр хэгъэгур зэпысчынышъ, хэтрэ щыпэлъфи, цӀыфым къыщегъэжьагъэу былымым нэсыжьэу, Мысыр хэгъэгум щызгъэфыкъощт, мысыр тхьэхэм зэкӀэми хьыкум атесшӀыхьащт. Сэры Зиусхьаныр. 13Шъузэрыс унэмэ лъэу ащыфагъэр шъукъэзыухъумэрэ нэшанэу хъущт, лъыр къэслъэгъунышъ, шъузблэкӀыщт. Мысырыр згъэкӀоды зыхъукӀэ, шъузтекӀодэн тхьамыкӀагъо къыжъунэзгъэсыщтэп. 14А мафэри шъущымыгъупшэн мэфэкӀышхоу орэхъу. Зиусхьаным пае ар жъугъэмэфэкӀы. ЛӀэуж зэкӀэлъыкӀохэм егъашӀэми жъугъэмэфэкӀы.
15Мэфиблым къыкӀоцӀ хьалыгъу мыкӀумыпш шъушхы. Мэфиблым иапэрэ мэфэ дэдэ къыщегъэжьагъэу тэджэпсэу шъуиунэмэ арытыр ишъукӀут, сыда пӀомэ апэрэ мафэм къыщегъэжьагъэу яблэнэрэ мафэм нэс тэджэпс зыхэлъыр зышхырэр израиль цӀыф лъэпкъым хэзыпэщт. 16Апэрэ мафэмрэ яблэнэрэ мафэмрэ СыжъугъэлъэпӀэнэу шъукъызэӀукӀ, ау а мафэхэм зы Ӏоф гори шъушӀэ хъущтэп. Нэбгырэ пэпчъ фырикъущтыр шъуупщэрыхьан закъор ары шъушӀэнэу шъузфитыр. 17Хьалыгъу мыкӀумыпшым имэфэкӀ хэжъугъэунэфыкӀ, сыда пӀомэ мы мэфэ дэдэм Сэ дзэр зэрагъэуцурэм фэдэу шъузэхэтэу Мысыр хэгъэгум шъукъисщыжьыгъ. Мы мафэр, егъэшӀэрэ ихъухьаныгъэшъ, лӀэуж зэкӀэлъыкӀохэм хэжъугъэунэфыкӀ. 18Апэрэ мазэм ияпшӀыкӀуплӀэнэрэ мафэ къыщегъэжьагъэу, пщэпэ зэхэогъум щежъугъажьи, а мэзэ дэдэм иятӀокӀэнэрэ зырэ мафэ ипщэпэ зэхэогъу нэс хьалыгъу мыкӀумыпшыр шъушхы. 19Мэфиблым къыкӀоцӀ тэджэпс шъуиунэмэ арыт хъущтэп, сыда пӀомэ тэджэпс зыхэлъыр зышхырэр израиль цӀыфхэм зэкӀэми ахэзыпэщт, хэхэсыр арми, а хэгъэгум къыщыхъугъэу щэпсэурэр арми. 20Тэджэпс зыхэлъ гори шъумышхы, сыд фэдэрэ чӀыпӀэ шъущэпсэуми, хьалыгъу мыкӀумыпшыр шъушхы».
Мосэ Пэсахъыр зэрашӀыщтыр къызэрафиӀотагъэр
21Мосэ израиль цӀыфхэм янахьыжъ упчӀэжьэгъухэм зэкӀэми къяджи, ариӀуагъ: «Пэсахъ къурмэнэу шъуиунагъохэмкӀэ шъушӀыщтыр шъуимэл-пчэнхэм къахэшъухи, шӀошъубз. 22Иссоп уц лъэпкъым щыщэу ӀапӀэ фэдиз горэ шъушти, къошыным лъэу итым хэжъугъауи, унэ ихьапӀэм ипчъашъхьэрэ ипчъэблыпкъитӀурэ ащышъуф, ау шъуащыщ гори пчэдыжьыр къэсыфэ унэм ерэмыкӀ. 23Мысыр цӀыфхэр ыгъэкӀодынхэу Зиусхьаным хэгъэгур зэпичыщт, пчъашъхьэми пчъэблыпкъитӀуми лъыр затырилъагъокӀэ, Зиусхьаныр пчъэмэ аблэкӀыщт, псэхэхыр шъуигъэкӀодынэу шъуиунэхэм къаригъэхьащтэп. 24Мы зэпстэури шъушӀэ, шъоркӀи шъукъохэмкӀи ахэр егъэшӀэрэ ихъухьаныгъэх. 25Зиусхьаным къышъуитынэу зыфиӀогъэгъэ хэгъэгум шъузихьэкӀэ, мы Ӏофхэр жъугъэцакӀэх. 26ШъуикӀалэхэм „Сыд Ӏофха мыхэр?“ къызышъуаӀокӀэ, 27яшъуӀу: „Мыр Зиусхьаным пае пэсахъ къурмэн. Зиусхьаным мысыр цӀыфхэр ыгъэкӀодыхэ зэхъум, израиль цӀыфхэм яунэхэм аблэкӀыгъ, тиунагъохэм къафэсакъыгъ“». Арыти цӀыфхэм шъхьащэ ашӀи, Тхьэр агъэлъэпӀагъ. 28Зиусхьаным Мосэрэ ХьарунэрэкӀэ унашъо къызэришӀыгъэм тетэу, израиль цӀыфхэм зэкӀэ агъэцэкӀагъ.
ЯпшӀэнэрэ тхьамыкӀагъор: щыпэлъфыхэм яхьадэгъу
29Чэщныкъом Зиусхьаным щыпэлъфыхэр зэкӀэ Мысыр хэгъэгум щигъэлӀагъэх, фирхьаунэу итахътэ тесым ищыпэлъфыкъо къыщегъэжьагъэу, хьапсыдэсым ищыпэлъфыкъо нэсыжьэу, былымхэм ящыпэлъфыхъухэри зэкӀэ. 30А чэщым фирхьауныр къэтэджыгъ, ащ иӀумэт Ӏэшъхьэтетхэри мысыр цӀыфхэри зэкӀэ. Мысыр хэгъэгум тхьаусыхэ гъы мэкъэшхом зыкъыщиӀэтыгъ, сыда пӀомэ хьадэ зэрымылъ унэ щыӀагъэп.
Израиль цӀыфхэр Мысырым къызэрикӀыжьыгъэхэр
31Фирхьауным Мосэрэ Хьарунэрэ чэщым къаригъащэхи, ариӀуагъ: «Шъукъэтэджи, сицӀыфхэм шъуахэкӀ, шъори израиль цӀыфхэми шъукӀуи, зэрэшъуӀогъагъэу Зиусхьаным шъхьащэ фэшъушӀ. 32ЗэрэшъуӀогъагъэу мэл-пчэнхэри былым пӀашъэхэри зыдешъущажьэхи, шъукӀуи, Тхьэм ынэшӀу къысщифэнэу шъусфелъэӀу».
33Мысыр цӀыфхэм израильхэр яхэгъэгу нахь псынкӀэу зэрикӀыжьынхэм дагъэгузажъощтыгъэх, сыда пӀомэ ахэм аӀощтыгъэ: «Армырмэ тэ зэкӀэми тэлӀэ». 34ЦӀыфхэм ятхьацоу тэджэпс зыхамылъхьагъэр зыдырахьыжьагъ, ялъэтэнылъэхэр ящыгъынмэ акӀоцӀыпхагъэхэу атамэмэ атетыгъэх. 35Израиль цӀыфхэм Мосэ зэрариӀуагъэу ашӀыгъ, мысыр цӀыфхэм ялъэӀухэзэ, тыжьыным, дышъэм ахэшӀыкӀыгъэу пкъыгъохэр, щыгъынхэри къаӀахыгъэх. 36Зиусхьаным мысыр цӀыфхэр израиль цӀыфхэм нэшӀукӀэ къяплъынхэу ышӀыгъэти, ахэм тыжьыным, дышъэм ахэшӀыкӀыгъэу пкъыгъохэр, щыгъынхэр ялъэӀухи, къаӀахыгъэх. Джаущтэу ахэм мысыр цӀыфхэр къахъункӀагъэх.
37Израиль цӀыфхэр, бзылъфыгъэхэри сабыйхэри хэмылъытагъэхэу, хъулъфыгъэ мин шъих фэдиз хъухэу лъэсэу, РаӀымэсэс дэкӀхи, Сукъот ежьагъэх. 38НэмыкӀ цӀыф лъэпкъхэм ащыщхэри бэ хъухэу ахэм адежьагъэх, мэл-пчэнхэри былым пӀашъэхэри Ӏэхъогъу ин дэдэ хъухэу ягъусагъэх. 39Ахэм Мысырым тэджэпс зыхамылъхьэгъэ тхьацоу къыздырахыгъэм хьалыгъу мыкӀумыпшыхэр хашӀыкӀыгъ, сыда пӀомэ Мысырым гузэжъогъуш къырафыгъагъэхэти, аужыпкъэм гъогу гъомыли агъэхьазырынэу игъо ифэгъагъэхэп.
40Израиль цӀыфхэр Мысырым зэрисыгъэхэр илъэс шъиплӀырэ щэкӀырэ. 41Илъэс шъиплӀырэ щэкӀырэ зыщыхъугъэ мэфэ дэдэм Зиусхьаным ицӀыф лъэпкъ зэрэщытэу дзэр зэрагъэуцурэм фэдэу зэхэтэу Мысыр хэгъэгум къикӀыжьыгъ. 42А чэщым Зиусхьаныр израиль лъэпкъым къыфэсакъызэ, къыухъуми, Мысыр хэгъэгум къырищыжьыгъ. А чэщ дэдэр Зиусхьаным къызщиухъумэгъэхэ чэщышъ, израиль цӀыфхэм зэкӀэми ялӀэужхэр щэӀэхэфэ, Зиусхьаныр рагъэлъапӀэу, а чэщым сакъынхэ фае.
43Зиусхьаным Мосэрэ Хьарунэрэ къариӀуагъ: «Мары Пэсахъым фэгъэхьыгъэ ихъухьаныгъэр: хымэ цӀыф лъэпкъ щыщ горэми ар ышхы хъущтэп. 44Ау тыжьынкӀэ къащэфыгъэ хэтрэ пщылӀи, сунэт зыпшӀыкӀэ, ышхын фит. 45Хэхэсми чыракӀоу аубытыгъэми ар ашхы хъущтэп. 46Пэсахъ къурмэныр зыщаупщэрыхьэгъэ унэм щыпшхын фае, ащ ыл унэм ишъумых, икъупшъхьэхэр шъумыкъутэх. 47Мы мэфэкӀыр зэкӀэ израиль цӀыфхэм агъэмэфэкӀын фае. 48Ау нэмыкӀ лъэпкъ щыщэу къыпхэсыр, Зиусхьаным и Пэсахъ ыгъэмэфэкӀынэу фаемэ, ащ иунагъо ис хъулъфыгъэ пстэури сунэт ерэшӀых. Ащ ыуж, а хэгъэгум къыщыхъугъэу щыпсэурэмэ афэдэу, Пэсахъыр ыгъэмэфэкӀын фит, ау сунэт амышӀыгъэм ащ щыщ ышхы хъущтэп. 49Хэгъэгум къыщыхъугъэу щыпсэурэми хэхэсэу къышъухэсми а зы хабзэр шъуерэӀ».
50Зиусхьаным Мосэрэ ХьарунэрэкӀэ унашъо къызэришӀыгъэм тетэу израиль цӀыфхэм зэкӀэ агъэцэкӀагъ. 51Мы мэфэ дэдэм Зиусхьаным израиль цӀыфхэр дзэр зэрагъэуцурэм фэдэу зэхэтхэу Мысыр хэгъэгум къырищыжьыгъэх.
Currently Selected:
МысырикӀыжь 12: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
