МысырикӀыжь 11

ЯпшӀыкӀузэнэрэ шъхьэр

ЯпшӀэнэрэ тхьамыкӀагъор: щыпэлъфыхэм хьадэгъур къызэрафэсыгъэр

1Зиусхьаным Мосэ къыриӀуагъ: «Джыри зы тхьамыкӀэгъошхо фирхьауными мысыр цӀыфхэми къафэзгъэкӀонышъ, ащ ыуж фирхьауным шъукъиутӀупщыжьыщт. ШъукъиутӀупщыжьыщт къодыеп, шъуигъэгузажъозэ, мы хэгъэгум шъурифыщт. 2Хъулъфыгъэ пэпчъ игъунэгъу хъулъфыгъэ, бзылъфыгъэ пэпчъ игъунэгъу бзылъфыгъэ ялъэӀухэзэ, тыжьын, дышъэ пкъыгъохэр къаӀахынхэу уӀушыхэзэ, лъэпкъым гурыгъаӀу». 3Зиусхьаным мысыр цӀыфхэр Ежь ИцӀыф лъэпкъ къыфигъэшӀугъэх, Моси Мысыр хэгъэгум щыцӀэрыӀоу щытыгъ, фирхьауным иӀумэт Ӏэшъхьэтетхэми аущтэу цӀыф къызэрыкӀохэми лъытэныгъэ къыфашӀыщтыгъэ#11:3 1-рэ усэм къыщегъэжьагъэу я 3-м нэс къэбарыр къэзыӀуатэрэм Мосэрэ фирхьаунымрэ язэдэгущыӀэн ыгузэгу хигъэуцогъэнкӀи мэхъу; ахэм язэдэгущыӀэн я 4-рэ усэм къыщыпедзэжьы..

4ЕтӀанэ Мосэ фирхьауным риӀуагъ: «Зиусхьаным ыӀорэр мары: „Чэщныкъом Сэ Мысыр хэгъэгур зэпысчынышъ, 5щыпэлъф пстэури ащ щылӀэщт: тахътэм тес фирхьауным ищыпэлъф шъао къыщегъэжьагъэу шъхьалӀут унэӀут бзылъфыгъэм ищыпэлъф шъао нэсыжьэу, былымхэм ящыпэлъф хъу пстэури. 6Фэдэ мыхъугъэуи тапэкӀэ мыхъужьынэуи тхьаусыхэ гъы мэкъэшхом Мысыр хэгъэгум зэфэдэкӀэ зыкъыщиӀэтыщт. 7Ау Зиусхьаным мысыр цӀыфхэмрэ израиль цӀыфхэмрэ зэрэзэфимыгъадэхэрэр шъушӀэным пае, израиль цӀыфхэм ащыщ горэми язы былымышъхьи хьэр къыригъэхьакъунэп“. 8Мы уиӀумэт Ӏэшъхьэтетхэр зэкӀэ садэжь къэкӀонхэшъ, шъхьащэ къысфашӀыщт, бгъэгукӀэ сапашъхьэ зыщырадзыхынышъ, къысаӀощт: „Ори узипэщэ уицӀыф лъэпкъи шъуикӀыжь“. Джащ ыуж сэ сызикӀыжьыщтыр». Мосэ лъэшэу губжыгъэу, къызэкӀэнагъэу фирхьауным дэжь къикӀыжьыгъ.

9Зиусхьаным Мосэ къыриӀуагъ: «Сэ Си Ӏоф шӀагъохэр Мысыр хэгъэгум нахьыбэу нэрылъэгъу къащыфэхъунхэм пае фирхьауныр къышъодэӀущтэп». 10Мосэрэ Хьарунэрэ а Ӏоф шӀагъохэр зэкӀэ фирхьауным ыпашъхьэ къыщагъэлъэгъуагъэх, ау Зиусхьаным фирхьауным ыгу зэшӀуригъэдзагъэти, израиль цӀыфхэр Мысырым къыригъэкӀыжьыгъэхэп.

Currently Selected:

МысырикӀыжь 11: АдыТГ

Highlight

Copy