МысырикӀыжь 13

ЯпшӀыкӀущэнэрэ шъхьэр

Зиусхьаным щыпэлъфыхэр фэгъэшъошэгъэнхэр

1Зиусхьаным Мосэ къыриӀуагъ: 2«Израиль цӀыфхэм къафэхъурэ щыпэлъф шъао пэпчъ, цӀыфым къыщегъэжьагъэу былымым нэсыжьэу, ным апэу къыхэкӀырэ щыпэлъфыхъур къысфэжъугъэшъуаш, сыда пӀомэ ахэр Сэ сыех».

Хьалыгъу мыкӀумыпшым имэфэкӀ

3Мосэ илъэпкъэгъухэм ариӀуагъ: «ПщылӀыпӀэм шъукъызщикӀыжьыгъэу, тэджэпс зыхэлъыр зыщамышхырэ мы мафэр шъугу ижъугъэлъ, сыда пӀомэ Зиусхьаным кӀочӀэ лъэшкӀэ шъо Мысырым шъукъырищыжьыгъ. 4ШъуиикӀыжьыгъо мафэр Абиб#13:4 Ижъырэ джуртыбзэмкӀэ мы гущыӀэм къикӀырэр: зигъо хъугъэ лэжьыгъашъхьэхэр. Ар илъэсым иапэрэ мазэу фышъхьэ лэжьыгъэхэм ягъо зыщыхъурэм ыцӀ. мазэр ары. 5КъэнаӀан, хьат, амэр, еуй, еус цӀыфхэм ячӀыгоу, щэмрэ шъоумрэ зыщычъэхэу, Зиусхьаным къышъуитынэу шъуятэжъхэр гущыӀэ пытэкӀэ къызэригъэгугъагъэхэм шъузырищэкӀэ, мы мазэм мощтэу щыжъугъэмэфэкӀ: 6Мэфиблым къыкӀоцӀ хьалыгъу мыкӀумыпшыр шъушхы. Яблэнэрэ мафэм Зиусхьаным мэфэкӀ фэшъушӀ. 7Хьалыгъу мыкӀумыпшыр мэфиблэ шъушхын фае, тэджэпс зыхэлъ хьалыгъуи сыд фэдэрэ тэджэпси шъузщыпсэурэ чӀыпӀэ пстэуми тыдэкӀи шъулъэгъунэу ащышъуиӀэ хъущтэп. 8А мафэм шъуикӀалэхэм яшъуӀу: „Мысырым тыкъикӀыжь зэхъум, Зиусхьаным къытфишӀагъэм пае мыр зыкӀыхэдгъэунэфыкӀырэр“. 9Ар гукъэгъэкӀыжь тамыгъэу шъуӀэхэми шъунэтӀэ гузэгухэми атерэт, Зиусхьаным ихабзэ шъужэ дэрэмыкӀ, сыда пӀомэ Зиусхьаным кӀочӀэ лъэшкӀэ Мысырым шъукъырищыжьыгъ. 10Мы ихъухьаныгъэр охътэ гъэнэфагъэм илъэс къэс жъугъэцакӀэ.

11ЕтӀанэ Зиусхьаным шъори шъуятэжъхэми гущыӀэ пытэкӀэ шъукъызэригъэгугъэгъэ КъэнаӀан хэгъэгум шъурищэу, ар къызышъуитыкӀэ, 12джащыгъум ным апэу къыхэкӀырэ щыпэлъф шъэо пстэури Зиусхьаным фэжъугъэшъуаш. Былымхэм къахэкӀырэ щыпэлъф хъу пстэури Зиусхьаным фэжъугъэшъуаш. 13Щыдыбз пэпчъ ищыпэлъфыхъу ычӀыпӀэ шъынэхъур ижъугъахь, армырмэ апэрэм ыпшъэтыкъ зэпышъуут. Шъуищыпэлъф шъао пэпчъи къэшъущэфыжь. 14ЕтӀанэ шъуикӀалэхэр „Сыд мыр зыфэгъэхьыгъэр?“ аӀозэ, къызышъоупчӀыхэкӀэ, джащыгъум ахэм яшъуӀу: „КӀочӀэ лъэшкӀэ Зиусхьаным Мысырым, пщылӀыпӀэм, тыкъырищыжьыгъ. 15Сыда пӀомэ фирхьауным ыгу зэшӀуидзи, тыкъымыутӀупщыжь зэхъум, Зиусхьаным щыпэлъфыхъухэр зэкӀэ Мысыр хэгъэгум щигъэлӀагъэх, цӀыф щыпэлъфым къыщегъэжьагъэу былым щыпэлъфым нэсыжьэу: джащ пае тэ Зиусхьаным былымхэм къахэкӀырэ щыпэлъф хъу пстэури къурмэн фэтэшӀых, тищыпэлъф шъаохэр къэтэщэфыжьых“. 16А хабзэр гукъэгъэкӀыжь тамыгъэу шъуӀэхэми шъунэтӀэгухэми атерэт, сыда пӀомэ кӀочӀэ лъэшкӀэ Зиусхьаным Мысырым тыкъырищыжьыгъ».

Израиль цӀыфхэр гъогу зэрэтетыгъэхэр

17Фирхьауным израиль цӀыфхэр къызеутӀупщыжьхэм, Тхьэм ахэр филистхэм яхэгъэгу гъогукӀэ рищэжьагъэхэп, ар нахь блэгъагъэ нахь мышӀэми, сыда пӀомэ Тхьэм къыӀуагъ: «ЦӀыфхэм заор залъэгъукӀэ, кӀэгъожьынхэшъ, Мысырым агъэзэжьынкӀи мэхъу». 18Ащ ычӀыпӀэкӀэ Тхьэм къыдаригъэухьи, шъоф нэкӀ гъогумкӀэ, хы Къамылым ылъэныкъокӀэ кӀохэзэ, цӀыфхэр ащ рищэлӀагъэх. Израиль цӀыфхэр уӀэшыгъэхэу Мысыр хэгъэгум къикӀыжьыгъэх. 19Мосэ Юсыф икъупшъхьэхэр къыздаригъэштэжьыгъэх, сыда пӀомэ Юсыф израиль цӀыфхэм Тхьэр шъыпкъэ дэдэмкӀэ ӀэпыӀэгъукӀэ къызэрафэкӀощтыр къариӀуи, икъупшъхьэхэр мыщ къыздырахыжьынхэу тхьэрыӀо пытэ аригъэшӀыгъагъ. 20Израиль цӀыфхэр Сукъот дэкӀхи, ежьагъэх, кӀохэзэ, шъоф нэкӀым ыгъунэу Етам къыщыуцугъэх. 21Зиусхьаныр ахэм мафэм ошъопщэ пкъэум фэдэу гъогур къаригъэлъэгъузэ, чэщырэ мэшӀо пкъэум фэдэу ягъогу къафигъэнэфызэ, апэ итыгъ. Джаущтэу ахэм чэщи мафи кӀонхэ алъэкӀыщтыгъ. 22Ошъопщэ пкъэур мафэм, мэшӀо пкъэур чэщым цӀыфхэм апэ итыгъ.

Currently Selected:

МысырикӀыжь 13: АдыТГ

Highlight

Copy