Хэбзэ тхыжьыгъэр 4

ЯплӀэнэрэ шъхьэр

Израил цӀыфхэр Тхьэм зэредэӀунхэ фэягъэр

1Мосэ игущыӀэ лъигъэкӀотагъ: «Джы, израил лъэпкъыр, шъозгъэшӀэщт шапхъэхэмрэ хэбзэ гъэунэфыгъэхэмрэ шъукъядэӀу. ШъущыӀэным, шъуятэжъмэ я Зиусхьанэу Тхьэм къышъуитырэ чӀыгум шъуихьанышъ, ар шъуиунае хъуным пае, джахэр жъугъэцакӀэх. 2Сэ къышъуасӀорэм зыпари хэшъумыгъахъу, хэшъумыгъэкӀ. Шъуи Зиусхьанэу Тхьэм къышъуфишӀыгъэ унашъохэу сэ къышъуасӀохэрэр жъугъэцакӀэх. 3Зиусхьаным чӀыпӀэу БэӀал-ПэӀор щишӀагъэр зэкӀэ шъулъэгъугъэ. Шъуи Зиусхьанэу Тхьэм зэкӀэ тхьэнэпцӀэу БэӀал-ПэӀор ыуж ихьагъэхэр шъухигъэкӀодыкӀыгъэх, 4ау шъо, шъуи Зиусхьанэу Тхьэм фэшъыпкъагъэхэм, шъукъэнагъ, джы къызынэсыгъэми шъущыӀ. 5Шъугу ишъуубыт: шъуиунэенэу шъуубытыщт чӀыгум щыжъугъэцэкӀэнхэ фэе шапхъэхэмрэ хэбзэ гъэунэфыгъэхэмрэ си Зиусхьанэу Тхьэм унашъо къызэрэсфишӀыгъэм тетэу шъуащызгъэгъозагъ. 6Ахэр пытэу жъугъэцакӀэх. Джащыгъум цӀыф лъэпкъ пстэуми шъуиакъылышӀуагъэрэ шъуизэхэшӀыкӀныгъэрэ къалъэгъущтых. А шапхъэхэм яхьылӀагъэу зызэхахыкӀэ, „Ары адэ, ар цӀыф лъэпкъышху, акъылышӀу, зэхэшӀыкӀныгъи иӀ“ аӀощт. 7ЩыӀэна джыри ащ фэдэ цӀыф лъэпкъышхо – сыдигъуи теджагъэми, ти Зиусхьанэу Тхьэр тэ къызэрэтпэблагъэм фэдэу, итхьэхэм апэблагъэу! 8ЩыӀэна джыри ащ фэдэ цӀыф лъэпкъышхо непэ сэ шъузщызгъэгъозэрэ шапхъэхэмрэ хэбзэ гъэунэфыгъэхэмрэ афэдэхэр иӀэу!

9Ау шъущэӀэфэ шъунэхэмкӀэ шъулъэгъугъэр зыщышъумыгъэгъупшэжьэу шъугухэм арыжъугъэлъ, гукъэкӀыжьхэр шъугухэм зэрарымыкӀосыкӀыжьыным шъуфэсакъ, шъузылъыплъэжь. ШъуикӀалэхэри ахэм ялъфыгъэхэри ащ фэжъугъасэх. 10Шъуи Зиусхьанэу Тхьэм ыпашъхьэ шъуитэу Синай къушъхьэм дэжь мафэу шъузщытыгъэр шъугу ижъугъэлъ. Зиусхьаным ащ дэжьым къыщысиӀогъагъ: „ЦӀыфхэр Сапашъхьэ къигъэуцохи, чӀыгум тетыфэхэ Сэ сиунашъохэр агъэцэкӀэнхэу, щынагъо къысфыряӀэу сагъэлъэпӀэныр зэрагъэшӀэнэу, якӀалэхэми ар арагъэшӀэнэу ахэм къясӀощт“. 11Шъо шъукъызэлъыкӀуати, уашъом нэсэу машӀоу блэщтыгъэ къушъхьэм ылъапсэ дэжь шъууцугъ. Пщэ шӀуцӀэхэм ар чӀагъэбылъыхьэгъагъ, щышӀункӀыбзагъ. 12Джащыгъум Зиусхьаныр машӀом къыхэгущыӀыкӀи къыжъудэгущыӀагъ. Шъо гущыӀэхэр зэхэшъухыгъэх нахь, зыпари шъулъэгъугъэп – мэкъэ закъу щыӀагъэр. 13ЖъугъэцэкӀэн фэе Ӏуагъэр Ащ къыжъугуригъаӀуи, унэшъуипшӀыр мыжъобгъуитӀум атыритхагъ. 14Шъуиунэенэу шъуубытыщт чӀыгум щыжъугъэцэкӀэнхэ фэе шапхъэхэмрэ хэбзэ гъэунэфыгъэхэмрэ шъозгъэшӀэнхэу а уахътэм Зиусхьаным унашъо къысфишӀыгъ».

ТхьэнэпцӀыхэм шъхьащэ афашӀ зэрэмыхъущтыр

15Мосэ игущыӀэ лъигъэкӀотагъ: «Пытэу шъугу ишъуубыти, шъусакъ, шъузылъыплъэжь. Синай къушъхьэм дэжь шъущытэу Зиусхьаныр машӀом къыхэгущыӀыкӀи къызыжъудэгущыӀэ мафэм теплъэ гори иӀэу шъулъэгъугъэп. 16ЕмыкӀу шъумышӀэ, тхьэ сурэт гори, хъулъфыгъэм е бзылъфыгъэм ятеплъэ фэдэ иӀэу, 17чӀыгум тет псэушъхьэхэми, ошъогум щыбыбырэ бзыухэми, 18чӀыгум щыпшырэ псэушъхьэхэми е псымэ ахэс пцэжъыеми афэдэ шъушӀынэу шъуфемыжь. 19ЕтӀанэ уашъом шъудэплъыеу тыгъэри, мазэри, жъуагъохэри – ошъогум ит пстэури зышъулъэгъухэкӀэ, зышъумыгъэгъуащ: жъугъэлъапӀэхэу ахэм шъхьащэ афэшъумышӀ. Шъуи Зиусхьанэу Тхьэм ахэр ошъогу чӀэгъым щыпсэурэ цӀыф лъэпкъ пстэумэ апае къыгъэшӀыгъэх. 20Джы зэрэщытым фэдэу, шъо Зиусхьаным шъукъышти, Тхьэм Ежь къахихыгъэ иунэе Ӏэхьэ лъапӀэу шъущытынэу, гъучӀыр зыщагъэткӀурэ хьакум, Мысырым, шъукъырищыжьыгъ. 21Шъощ пае Зиусхьаныр къысфэгубжыгъ, Иордан сызэпырымыкӀынэуи, шъуи Зиусхьанэу Тхьэм шъуӀэ къырилъхьэрэ чӀыгушӀум симыхьанэуи гущыӀэ пытэ ышӀыгъ. 22Мы хэгъэгум сэ сыщылӀэщт, Иордани сызэпырыкӀыщтэп, ау шъо шъузэпырыкӀынышъ, а чӀыгушӀур шъуиунэенэу шъуубытыщт. 23Шъусакъ, шъуи Зиусхьанэу Тхьэм къыжъудишӀыгъэ Ӏуагъэр зыщышъумыгъэгъупш. Шъуи Зиусхьанэу Тхьэм къызэрэшъуфимыдагъэу, тхьэ сурэт гори зыфэшъумышӀыжь. 24Шъуи Зиусхьанэу Тхьэр – Ар узышхырэ мэшӀошху, зыгорэм удигощыныр, нэкъокъогъу иӀэныр къызэмыкӀурэ Тхьэ Ар. 25Шъо кӀалэхэри ахэм къахэкӀыгъэхэри къызышъуфэхъухэкӀэ, а хэгъэгуми бэрэ шъузыщыпсэукӀэ, шъуи Зиусхьанэу Тхьэм инэрылъэгъоу, Ар жъугъэгубжэу тхьэ сурэт горэ шъушӀэу емыкӀу зышъушӀэкӀэ, 26уашъори чӀыгури шъоркӀэ непэ сишыхьатых, Иордан шъузэпырыкӀынышъ, шъуиунэенэу шъуубытыщт чӀыгум шъутекӀодыкӀыпэщт. Ащ бэрэ шъуисыщтэп, Ӏо хэмылъэу шъукӀодыщт. 27Зиусхьаным цӀыф лъэпкъхэм шъуахитэкъощт, Зиусхьаным зыдэжь шъуифыщт цӀыф лъэпкъэм ахэсэу шъуащыщэу псэоу къэнэжьыщтыр макӀэ. 28А чӀыпӀэм цӀыфым пхъэм, мыжъом ахишӀыкӀыгъэ тхьэнэпцӀыхэу зымылъэгъухэрэм, зэхэзымыххэрэм, мышхэхэу, мэр зымышӀэхэрэм шъхьащэ ащыфэшъушӀыщт. 29Джа чӀыпӀэр ары шъуи Зиусхьанэу Тхьэм шъулъыхъоу зыщежъугъэжьэщтыр, шъугукӀи шъупсэкӀи шъуфалӀэу зызыфэжъугъазэкӀэ, Ащ шъуӀукӀэщт. 30КъэкӀощт охътэ чыжьэм а зэпстэур зышъупэкӀэкӀыхэкӀэ, къиным шъузызэлъикӀукӀэ, шъуи Зиусхьанэу Тхьэм зыфэжъугъэзэжьынышъ, Ащ ыӀорэм шъуедэӀущт. 31Шъуи Зиусхьанэу Тхьэр – Тхьэ гукӀэгъушӀыба, Ащ шъукъыбгынэщтэп, шъуигъэкӀодыщтэп, Ӏуагъэу шъуятэжъмэ гущыӀэ пытэкӀэ адишӀыгъэр щыгъупшэщтэп».

Хэт фэдэн Зиусхьанэу Тхьэ закъом?!

32Мосэ джыри ариӀуагъ: «Шъо шъукъэхъункӀэ джыри бэ щыӀэу, Зиусхьаным цӀыфыр чӀыгум къызщигъэшӀыгъэ лъэхъаным къыщегъэжьагъэу дунаир зыфэдагъэр зэжъугъашӀэ. Зы цыпэм щегъэжьагъэу адрэм нэсыжьэу дунаир къызэпэшъуплъыхь, ащ фэдэ шӀэгъошхохэр хъугъэна, ащ фэдэ горэм икъэбар зэхэшъухыгъэна? 33МашӀом къыхэгущыӀыкӀэу Тхьэм ымакъэ зэхихыгъэу шъощ фэдэу нэмыкӀ цӀыф лъэпкъ горэ псэоу къэнэжьыгъэна?! 34Адэ тхьэ горэм ушэтыпӀэхэмкӀэ, гъэунэфыпӀэхэмкӀэ, шӀэгъошӀагъэхэмкӀэ, заохэмкӀэ, илъэшыгъэрэ ыкӀуачӀэрэкӀэ, гуих тхьамыкӀагъохэмкӀэ лъэпкъыр нэмыкӀ цӀыф лъэпкъым ежь пае къыхихыгъэу зэгорэм ыгъэунэфыгъэна! Шъуи Зиусхьанэу Тхьэм шъуинэрылъэгъоу шъощ пае Мысырым а зэпстэури щишӀагъ. 35Зиусхьаныр зэрэ Тхьэр, Ащ нэмыкӀ тхьэ зэрэщымыӀэр шъушӀэным пае, ахэр шъо нэрылъэгъу къышъуфишӀыгъэх. 36Къышъоушъыиным пае, Ащ ымакъэ ошъогум къиӀукӀэу зэхышъуигъэхыгъ. Ащ имэшӀошхо чӀыгум къыщышъуигъэлъэгъугъ, машӀом Ар къыхэгущыӀыкӀэу шъо зэхэшъухыгъ. 37Шъуятэжъхэр шӀу ылъэгъугъэхэти, шъо, ахэм къахэкӀыгъэхэм, шъукъахихыгъ, Ежь ыкӀочӀэ лъэшкӀэ Мысырым шъукъырищыжьыгъ. 38Шъощ нахьыбэ хъоу, шъощ нахь лъэшэу щыт цӀыф лъэпкъхэм шъуатыригъэкӀонышъ, ахэр зэрысыгъэ чӀыгум шъурищэнышъ, джы зэрэщытым фэдэу, ар шъуиунае хъуным пае. 39Зиусхьаныр уашъоми чӀыгуми зэря Тхьэр джы щегъэжьагъэу зэжъугъашӀи, егъэшӀэрэу шъугу ишъуубыт. НэмыкӀ тхьэ зыпари щыӀэп. 40Шъори шъуилъфыгъэхэми шъуиӀофхэр зэрэдэгъунхэу, шъуи Зиусхьанэу Тхьэм егъэшӀэрэу къышъуитырэ чӀыгум бэрэ шъузэрэщыпсэунэу, Ащ ишапхъэхэу, иунашъохэу непэ шъузыфэзгъасэхэрэр жъугъэцакӀэх».

ЗыкъэухъумэжьыпӀэ къалэхэр

41Ащ ыуж Мосэ Иордан икъокӀыпӀэ лъэныкъокӀэ щыӀэ къэлищ къахихыгъ, 42хэтми ымышӀахэу цӀыф зыӀэкӀэукӀагъэм ахэм закъыщиухъумэжьын ылъэкӀынэу. А къалэмэ ащыщ горэм екӀужьынышъ, ащ зыкъыгъэнэжьын ылъэкӀыщтыгъ. 43А къалэхэр мары: Рубэн къыхэкӀыгъэхэм апае шъоф нэкӀымкӀэ щыӀэ бгы тешъомэ атет къалэу Бэцэр; Гъад къыхэкӀыгъэхэм апае ГъылъыӀадым ит къалэу Рамот; Мынасэ къыхэкӀыгъэхэм апае Бащаным ит къалэу Гъолан.

Мосэ иятӀонэрэ псалъ

(я 4:44-рэ – я 26-рэ шъхьэхэр)

Мосэ зэзэгъыныгъэм игъэпсыкӀэ цӀыфхэм зэрагуригъэӀуагъэр

(я 4:44-рэ – я 11:32-рэ шъхьэхэр)

44Мары Тхьэм и Хабзэу Мосэ израил цӀыфхэм къафиӀотагъэр. 45Джахэр ары Мысырым къызекӀыжьхэм Мосэ къафиӀотэгъэ ухэсыгъэхэр, шапхъэхэр, хэбзэ гъэунэфыгъэхэр. 46Ар зыхъугъэр Мосэрэ израил цӀыфхэмрэ Иордан ыкӀыбкӀэ, Бэт-ПэӀор къалэм пэблэгъэ кӀэим зыщэӀэхэр, Хъэщбэн къалэр зыӀэ илъыгъэ амэр пачъыхьэу Сыхъон зытекӀохэ нэуж ары. 47Ахэм а пачъыхьэми, Бащан хэкум ипачъыхьэу Ӏогъи, амэр пачъыхьитӀуми ячӀыгухэу Иордан иадырабгъукӀэ щыӀэхэр яунэенхэу аӀэ къырагъэхьагъэх. 48А чӀыгум Арнон псы игъукӀыгъэм тетыгъэ ӀароӀэр къалэм щегъэжьагъэу Сирион къушъхьэм, ар дэдэр Хъэрмон къушъхьэр, нэсэу чӀыпӀэ зэлъиубытщтыгъэ. 49Иордан итыгъэ къокӀыпӀэ лъэныкъокӀэ щыӀэ иордан кӀэир зэрэщытэу Пысгъахъ къушъхьэ лъапэм къеолӀэрэ хы ЛӀагъэм#4:49 Ижъырэ джуртыбзэкӀэ тхыгъэ Ӏэпэрытхым зэрэхэтыр: «Араба хыр». нэс ащ къыхиубытэщтыгъэ.

Currently Selected:

Хэбзэ тхыжьыгъэр 4: АдыТГ

Highlight

Copy