Хэбзэ тхыжьыгъэр 3
3
Ящэнэрэ шъхьэр
Бащаным ипачъыхьэу Ӏогъ зэрэтекӀуагъэхэр
1Мосэ цӀыфхэм ариӀуагъ: «Ащ ыуж къэдгъази, Бащаным кӀорэ гъогумкӀэ тыдэкӀоягъ. Бащаным ипачъыхьэу Ӏогъ зэкӀэ идзэ зэригъусэу къытэзэонэу ЕдрэӀ къалэм дэжь къыщытпэуцужьыгъ. 2Зиусхьаным сэ къысиӀуагъ: „Ежьыри, зэкӀэ идзи, ичӀыгуи пӀэ къислъхьащтхэшъ, ащ ущымыщын. Хъэщбэным тетыгъор щызыӀыгъыгъэ амэр пачъыхьэу Сыхъон узэрэдэзекӀуагъэу ащи дэзекӀу“. 3Джаущтэу ти Зиусхьанэу Тхьэм Бащан хэкум ипачъыхьэу Ӏогъи ащ идзи зэкӀэ тӀэ къырилъхьагъэх. Ахэм ащыщ хэти псэоу къэтымыгъанэу зэхэтыукӀагъэх. 4Ащыгъум ащ икъалэхэр зэкӀэ тыубытыгъэх. Къэлэ тӀокӀищыри зэкӀэ тыубытыгъэх – зэрэ Аргоб хэкоу – Ӏогъ ипачъыхьагъоу Бащаным щыӀэр зэрэщытэу. 5А къалэхэр зэкӀэ дэпкъ лъагэхэмкӀэ, къэлэпчъэ тӀурытӀухэмкӀэ, пчъэдадзэхэмкӀэ зэтегъэпытыхьэгъагъэх, ахэм анэмыкӀэу дэпкъхэмкӀэ къэмышӀыхьэгъэ псэупӀэхэри бэу итыгъэх. 6Хъэщбэным ипачъыхьэу Сыхъон ицӀыфхэм афэдэу ахэри – хъулъфыгъи, бзылъфыгъи, сабыи зэкӀэ зэхэтыукӀагъэх. Псэоу хэти къэдгъэнагъэп. 7Ау былымхэмрэ тыубытыгъэ къалэхэм къадэтщыгъэ къонтхъымрэ къызфэдгъэнагъэх. 8Джащ фэдэу Иордан псыхъом итыгъэ къокӀыпӀэ лъэныкъокӀэ гъэзагъэу, Арнон псы игъукӀыгъэм къыщегъэжьагъэу Хъэрмон къушъхьэм нэс щыӀэ чӀыгур а амэр пачъыхьитӀум ащ дэжьым къатетхыгъ.
9Цыдон цӀыфхэр Хъэрмон къушъхьэм СирионкӀэ еджэх, амэр цӀыфхэр зэреджэхэрэр Сэнир.
10Ахэм якъалэхэу къушъхьэ-шъоф чӀыпӀэм итхэр, Сэлкъахрэ ЕдрэӀрэ анэсэу зэрэ ГъылыӀадэу, зэрэ Бащан хэкоу, Ӏогъ ипачъыхьагъоу Бащаным щыӀэм къалэу итхэр тыубытыгъэх».
11Бащаным ипачъыхьэу Ӏогъ ары рэф цӀыф лъэпкъым щыщ закъоу къэнэжьыгъагъэр. Мары ащ ихьадэ щылъыпӀэу гъучӀыкӀэ#3:11 Непэрэ шӀэныгъэлэжьхэр зэрегупшысэхэрэмкӀэ, ар базальт мыжъо лъэпкъэу, шъоу иӀэмкӀи изэхэлъыкӀэкӀи гъучӀым фэдэм хэшӀыкӀыгъагъ. зэкӀэгъэпытыхьэгъагъэри, икӀыхьагъэ шапхъэкӀэ зэдаштагъэм фэдэу Ӏэнтэгъуибгъу#3:11 Ар метриплӀ фэдиз., ишъомбгъуагъэ ӀэнтэгъуиплӀ#3:11 Ар метритӀу фэдиз. хъущтыгъэ. Ӏамон цӀыфхэм якъэлэ шъхьаӀэу Раббэ джыри ар дэт.
Иордан псыхъом итыгъэ къокӀыпӀэ лъэныкъокӀэ щыӀэ чӀыгур зэрагощыгъэр
12Мосэ къыӀуагъ: «А уахътэм тиунэенэу тыубытыгъэгъэ чӀыгум щыщэу ӀароӀэр итемыр лъэныкъокӀэ гъэзэгъэ хэкоу Арнон псы игъукӀыгъэм къыпэӀулъыр, къалэу итхэри къыхиубытэхэу, къушъхьэлъэ хэкоу ГъылыӀад ызыныкъо Рубэнрэ Гъадрэ ялӀакъохэм ястыгъ. 13ГъылыӀад адрэ икӀэлъэныкъорэ Ӏогъ ипачъыхьагъоу Бащанымрэ зэрэщытэу Мынасэ илӀакъо ыныкъо фэзгъэзагъэх. Бащаным къыхиубытэщтыгъэ Аргоб хэкум нахьыпэм рэф цӀыфхэм ячӀыгукӀэ еджэщтыгъэх. 14Мынасэ къыхэкӀыгъэ Яир гъышыур, маӀах цӀыфмэ ячӀыгу гъунапкъэхэм анэсэу Аргоб хэкур зэрэщытэу ыубытыгъагъ. Ежь ыцӀэ ащ фиусыгъ, джы къызнэсыгъэми Бащаным зэреджэхэрэр: «Яир ипсэупӀэхэр».
15Мынасэ илӀакъо щыщ Махыр ГъылыӀад естыгъ. 16ГъылыӀад къыщегъэжьагъэу Арнон псы игъукӀыгъэм нэс къехырэ чӀыгур, псыхъо игъукӀыгъэм ыгузэгу игъунапкъэу, Ӏамонхэм ячӀыгу гъунапкъэу иӀэм Ябэкъ псы игъукӀыгъэмкӀэ гъэзагъэу, Рубэнрэ Гъадрэ ялӀакъохэм ястыгъ. 17Джащ фэдэу Иордан псыхъор зигъунэпкъэ шъоф нэкӀэу Иордан итыгъэ къокӀыпӀэ лъэныкъокӀэ щыӀэр, Гъалыл хыкъумэм къыщегъэжьагъэу хы ЛӀагъэм,#3:17 Ижъырэ джуртыбзэкӀэ тхыгъэ Ӏэпэрытхым зэрэхэтыр: «хы Щыугъэр». тыгъэ къокӀыпӀэмкӀэ щыӀэ Пысгъахъ къушъхьэ лъапэхэм анэс къызэдиубытыхэу ахэм ястыгъ».
18Джыри Мосэ къыӀуагъ: «А уахътэм Рубэн, Гъад, Мынасэ ялӀакъохэм сэ ясӀогъагъ: „Шъуи Зиусхьанэу Тхьэм мы чӀыгур шъуиунэенэу къышъуитыгъ. Зэон зылъэкӀыщт шъуихъулъфыгъэхэр зэкӀэ зэоным фытегъэпсыхьагъэхэу шъуикъош израилхэм апэ итхэу мы псыхъом зэпырыкӀынхэ фае. 19Шъуишъузхэр, шъуисабыйхэр, шъуибылымхэр, былым бэу зэрэшъуиӀэр сэшӀэ, сэ къышъостыгъэ къалэхэм къадэнэнхэ фитых. 20Шъощ фэдэу Зиусхьаным шъуикъошхэм гупсэфыгъо къызариткӀэ, шъуи Зиусхьанэу Тхьэм Иордан иадырабгъу къащаритырэ чӀыгур заубытыкӀэ, шъуащыщ пэпчъ шъуиунэенэу къышъостыгъэ чӀыгум къыгъэзэжьын ылъэкӀыщт“. 21А уахътэм Ехъошуа унашъо фэсшӀыгъ: „Шъуи Зиусхьанэу Тхьэм а пачъыхьитӀум аришӀагъэр унитӀукӀэ плъэгъугъэ. Адрэ зэпыпчыщт пачъыхьагъухэми Зиусхьаным джа дэдэр аришӀэщт. 22Уащымыщын ахэм, Ежь Зиусхьанэу Тхьэр шъощ пае язэощт“».
Тхьэм Мосэ КъэнаӀан хэгъэгум зэрэримыгъэхьагъэр
23Мосэ къыӀуагъ: «А уахътэм Зиусхьаным сэ селъэӀугъ: 24„ЗэкӀэ зыӀэ илъэу Зиусхьан, О уилъэрыхьыгъи уилъэшыгъи уиӀумэт къеогъэлъэгъух. О зепхьэрэ лӀыгъэмрэ зэшӀопхырэ Ӏофыгъошхохэмрэ афэдэ зыфызэшӀокӀын нэмыкӀ тхьэ горэ уашъом е чӀыгум атетына? 25СызэпырыкӀынышъ, Иордан иадырабгъукӀэ щыӀэ чӀыгушӀур – а къушъхьэлъэ хэку дахэмрэ Ливанрэ къызэзгъэлъэгъунхэу фит сышӀыба“. 26Ау шъощ пае Зиусхьаныр къысфэгубжыгъ, къысэдэӀугъэп. „Икъущт, – къыӀуагъ Зиусхьаным, – ащ пае нахьыбэрэ укъысэмылъэӀужь. 27Пысгъахъ къушъхьэм ышыгу дэкӀуаи, тыгъэ къохьапӀэмкӀи, темырымкӀи, къыблэмкӀи, тыгъэ къокӀыпӀэмкӀи зыплъыхь. Иордан узэпырыкӀыщтэпышъ, унитӀукӀэ а чӀыгур къызэпэплъыхь. 28Арышъ, Ехъошуа еушъый, ыгу къыдэщай, гъэпытэ. Джары цӀыфхэм япащэу зэпырыкӀыщтри о плъэгъущт чӀыгур яунэенэу ахэм афэзгощыщтри“. 29Арти Бэт-ПэӀор къалэм пэблагъэу кӀэим тыкъыщыуцугъ».
Currently Selected:
Хэбзэ тхыжьыгъэр 3: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
