Хэбзэ тхыжьыгъэр 2
2
ЯтӀонэрэ шъхьэр
Израил цӀыфхэр шъоф нэкӀым къызэрэщекӀокӀыгъэхэр
1Мосэ израил цӀыфхэм ариӀуагъ: «Ащ ыуж, Зиусхьаным унашъо къызэрэсфишӀыгъэм тетэу, къэдгъэзэжьи, хы Къамылым#2:1 Еплъ 1:40. ылъэныкъокӀэ щыӀэ шъоф нэкӀым тихьагъ. СэӀир къушъхьэлъэ чӀыпӀэм бэрэ къыщыткӀухьагъ. 2ЕтӀанэ Зиусхьаным къысиӀуагъ: 3„Икъущт мы къушъхьэлъэ чӀыпӀэм къызэрэщышъукӀухьагъэр, джы темыр лъэныкъомкӀэ жъугъазэ. 4ЦӀыфхэм мыщ фэдэ унашъо афэшӀ: Ӏэсау къыхэкӀыгъэ шъукъошхэу СэӀир щыпсэухэрэм ячӀыгу джы зэпышъучыщт. Ахэр шъо къышъущыщтэщтых, ау лъэшэу шъусакъ. 5Ахэм ячӀыгу щыщ зы щэрэчи къышъостыщтэпышъ, зао яшъумышӀылӀ. СэӀир къушъхьэлъэ чӀыпӀэр иунэенэу Ӏэсау Сэ естыгъ. 6Гъомлапхъэу шъушхыщтри псэу шъузэшъощтри тыжьын ахъщэкӀэ ахэм къащышъущэфых“. 7Шъуи Зиусхьанэу Тхьэм сыд фэдэ шъуиӀофкӀи ынэшӀу къышъущыфагъэба. Мы шъоф нэкӀышхор зэпытч зэхъум Ащ тыкъыухъумагъ. Мы илъэс тӀокӀитӀум шъуи Зиусхьанэу Тхьэр тигъусагъ, зыми тыщыкӀагъэп. 8Джаущтэу Ӏэсау къыхэкӀыгъэ ткъошхэу СэӀир итемыр лъэныкъокӀэ щыпсэухэрэм таблэкӀыгъ. ТылъыкӀуатэзэ, къалэхэу Елатрэ Ӏэцыон-Гъэбэрырэ апшъэкӀэ дэкӀоерэ гъогоу иордан шъоф нэкӀым пхырыкӀырэм тыкъытекӀи, Моаб шъоф нэкӀым пхырыкӀырэ гъогум тытетэу тыкӀозэ, къэткӀухьагъ. 9Зиусхьаным къысиӀуагъ: „Моаб цӀыфхэм ячӀыгу Сэ къышъостыщтэпышъ, ахэр шъумыгъэгубжых, зауи яшъумышӀылӀ. Лот къыхэкӀыгъэхэм яунэенэу къалэу Ӏар Сэ ястыгъ“».
10Ем цӀыфхэр – Ӏэнэкъ къыхэкӀыгъэмэ афэдэу, лъэпкъ кӀочӀэшхоу, лъагэу, зипчъагъэкӀэ бэ хъурэр, нахьыпэм ащ щыпсэущтыгъэх. 11Ӏэнэкъ къыхэкӀыгъэмэ афэдэу ахэри рэф цӀыфхэм ахалъытэщтыгъэх, ау моабхэр ахэм емкӀэ яджэщтыгъэх. 12Хъор цӀыфхэр нахьыпэм СэӀир щыпсэущтыгъэх, ау Ӏэсау къыхэкӀыгъэмэ ахэр рафыгъэх. Израил цӀыфхэр Зиусхьаным яунэенэу къаритыгъэ чӀыгум исыгъэ лъэпкъым зэрэдэзекӀуагъэхэм фэдэу, Ӏэсау къыхэкӀыгъэхэм хъор цӀыфхэр лъэпсэкӀод ашӀыхи, ахэм ячӀыгу итӀысхьагъэх.
13Зиусхьаным къыӀуагъ: «Джы шъуежьи, Зэрэд псы игъукӀыгъэр зэпышъуч». Арти ар зэпытчыгъ. 14Зэрэд псы игъукӀыгъэр зэпытчыным ыпэкӀэ, чӀыпӀэу Къадэщ-Барнэ къызэтэбгынэм ыуж илъэс щэкӀырэ ирэ тешӀэгъэхагъ. Ащ къыриубытэрэ уахътэм, Зиусхьаным гущыӀэ пытэ зэришӀыгъагъэу, къытхэтыгъэ дзэкӀолӀхэр зэкӀэ етэкъохыгъэх. 15Ежь Зиусхьанри ахэр зэкӀэ пщыпӀэм демыгъэкӀодыкӀыфэхэ къафэшъэбагъэп. 16Джы мары а дзэкӀолӀхэр зэлӀэхэм, 17Зиусхьаным къысиӀуагъ: 18«Моаб хэгъэгум ит къалэу Ӏар непэ шъублэкӀ. 19Ӏамонхэм апэблагъэ шъузыхъукӀэ, ахэр шъумыгъэгубжых, зауи яшъумышӀылӀ, ахэм ячӀыгу щыщ зыпари шъуиунэенэу къышъостыщтэп. Лот къыхэкӀыгъэхэм яунэенэу Сэ ар ястыгъ».
20Нахьыпэм ащ исыгъэ рэф цӀыфхэм ячӀыгоу ар алъытэщтыгъэ, ау Ӏамонхэр ахэм замзумкӀэ яджэщтыгъэх. 21Рэф цӀыфхэр Ӏэнэкъ къыхэкӀыгъэмэ афэдэу, лъэпкъ кӀочӀэшхоу, лъагэу, япчъагъэкӀэ бэ хъоу щытыгъэх. Зиусхьаным ахэр Ӏамонхэм апэкӀэ лъэпсэкӀод ышӀыгъэх. Ӏамонхэм ахэр рафыхи, ячӀыгу итӀысхьагъэх. 22Зиусхьаным Ӏэсау къыхэкӀыгъэу СэӀир къушъхьэлъэ чӀыпӀэм исыгъэхэм джар дэдэр къафишӀагъ. Ащ хъор цӀыфхэр лъэпсэкӀод зешӀыхэм, Ӏэсау къыхэкӀыгъэмэ хъор цӀыфхэр рафыхи, ахэм ячӀыгу итӀысхьагъэхэу джы къызынэсыгъэми ащ щэпсэух. 23Къалэу Ӏазэ нэс чӀыпӀэм итыгъэ къуаджэмэ адэсыгъэ Ӏао цӀыфхэр пӀомэ, Крит#2:23 Ижъырэ джуртыбзэкӀэ тхыгъэ Ӏэпэрытхым Крит ыцӀэ зэрэхэтыр: «Къафтор». къикӀыгъэ къафтор цӀыфхэм ахэр лъэпсэкӀод ашӀыхи, чӀыпӀэу зэрысыгъэхэм итӀысхьагъэх.
Хъэщбэн къалэм ипачъыхьэу Сыхъон зэрэтекӀуагъэхэр
24Мосэ израил цӀыфхэм ариӀуагъ: «Ӏамонхэм ячӀыгу тыкъызыблэкӀым Зиусхьаным къытиӀуагъ: „Арнон псы игъукӀыгъэм шъузэпырыкӀ. Шъугу ишъуубыт, амэрэу, Хъэщбэн къалэм ипачъыхьэу Сыхъони ащ ихэгъэгуи шъуӀэ къислъхьагъэхэшъ, шъуиунае зэрэхъунэу иубытын шъуфежьи, зэоным дэшъуубл. 25Мы мафэм къыщегъэжьагъэу ошъо чӀэгъым щыпсэурэ лъэпкъ пстэури щынэгъошхо къыпфыряӀэуи къыпщыщтэхэуи къэсшӀыщт. Уикъэбар зэхахынышъ, къыпщыщынэщтых, къызэрэпщыщынэхэрэм къыхэкӀэу кӀэзэз хъущтых“».
26Мосэ къыӀуагъ: «МэкъэгъэӀухэр шъоф нэкӀэу Къэдэмэт изгъэкӀыхи мамыр тызэрэфаем икъэбар рагъэшӀэнэу Хъэщбэн къалэм ипачъыхьэу Сыхъон дэжь згъакӀохи рязгъэӀуагъ: 27„Уихэгъэгу зэпытчынэу изын къытэтба. Гъогу шъхьаӀэр ары тызэрыкӀощтыр – джабгъумкӀи сэмэгумкӀи тыдэхыщтэп. 28Гъомлапхъэу тшхыщтымрэ псэу тызэшъощтымрэ тыжьын ахъщэкӀэ къытащэх. ТыблэкӀын къодыеу изын къытэт, 29Ӏэсау къыхэкӀыгъэу СэӀир щыпсэухэрэмрэ Ӏар къалэм дэс моабхэмрэ Ӏизын къызэрэтатыгъэм фэдэу, Иордан тызэпырыкӀэу, ти Зиусхьанэу Тхьэм къытитырэ чӀыгум темыхьафэ“.
30Ау Хъэщбэным ипачъыхьэу Сыхъон тыблигъэкӀынэу къезэгъыгъэп. Джа зэрэхъугъэм фэдэу, Сыхъон тӀэ къырилъхьаным пае, шъуи Зиусхьанэу Тхьэм ащ ыгу къызэшӀуригъэдзагъэба, ыпси къаигъэ ышӀыгъэба. 31Зиусхьаным сэ къысиӀуагъ: „Сыхъони ащ ихэгъэгуи шъуӀэ къисэлъхьэхэшъ, шъугу ишъуубыт. Джы ар шъуиунае зэрэхъунэу иубытын шъуфежь“. 32Сыхъон идзэ зэкӀэ игъусэу къалэу Ехэц дэжь къыщытпэуцужьыгъ. 33Ти Зиусхьанэу Тхьэм ащ тытыригъэкӀуагъ, ежьыри, ыкъохэри, зэкӀэ идзи зэхэтыукӀагъ. 34А уахътэм ащ икъалэхэр зэкӀэ тыубытыхи, зэкӀэ цӀыфхэр – хъулъфыгъи, бзылъфыгъи, сабыи зэхэтыукӀагъ. Псэоу хэти къэдгъэнагъэп. 35Ау былымхэмрэ тыубытыгъэ къалэхэм къадэтщыгъэ къонтхъымрэ къызфэдгъэнагъэх. 36Арнон псы игъукӀыгъэм тет къалэу ӀароӀэр къыщегъэжьагъэу ГъылыӀад чӀыпӀэм нэсэу кӀэим дэт псэупӀэхэм ащыщ гори тымыштэшъун къахэкӀыгъэп. Ти Зиусхьанэу Тхьэм зэкӀэри тӀэ къырилъхьагъ. 37Ау ти Зиусхьанэу Тхьэм унашъо къызэришӀыгъэу, Ӏамонхэм ячӀыгуи къушъхьэмэ ахэт къалэхэм къапэӀулъ чӀыгухэри къатетхыгъэхэп, Ябэкъ псы игъукӀыгъэм инэпкъхэми танэсыгъэп».
Currently Selected:
Хэбзэ тхыжьыгъэр 2: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
