Хэбзэ тхыжьыгъэр 18

ЯпшӀыкӀуенэрэ шъхьэр

Лэуй къурмэнышӀхэм яӀахьэхэр

1Мосэ ипсалъэ лъигъэкӀуатэзэ, къыӀуагъ: «Лэуйхэм ащыщ къурмэнышӀхэм – Лэуй лӀакъом зэрэщытэу – Израил адрэ къытекӀыгъэхэм афэмыдэу яунаеу чӀыгу Ӏахьэ е кӀэн Израилым щыряӀэщтэп. Ахэм яӀахьэр#18:1 Ижъырэ джуртыбзэкӀэ тхыгъэ Ӏэпэрытхым зэрэхэтыр: «яунаер». Зиусхьаным фагъэнэфэгъэ къурмэнгъэстхэр ары, джары зэрэщыӀэщтхэри. 2Ялъэпкъэгъухэм афэдэу ахэм яунаеу Ӏахьэ яӀэщтэп. Зиусхьаным къызэригъэгугъагъэхэм тетэу Ар ахэм яунэе Ӏахь. 3ЦӀыфхэм былымхэр е мэл-пчэнхэр къурмэн ашӀымэ, ахэр зием псэушъхьэмэ аблэбгъухэр, ажэпкъыхэр, аныбэхэр къурмэнышӀхэм аратын фае. 4Лэжьыгъэу, санэу, зэйтынэу апэ Ӏушъухыжьыгъэхэр, мэл-пчэнхэм апэрэ щыгъом къатешъухыгъэ цыр къурмэнышӀхэм шъо яшъутын фае. 5Лэуйхэмрэ ахэм къахэкӀыщтхэмрэ сыдигъуи ыпашъхьэ итынхэуи Ежь ЫцӀэ фэлэжьэнхэуи шъуи Зиусхьанэу Тхьэм шъуилӀэкъо пстэумэ ахиушъхьафыкӀыгъэхэба.

6Израилым ит къалэмэ ащыщ горэм дэс лэуир ащ дэкӀэу, ежь шӀоигъоу Зиусхьаным къыхихыщт чӀыпӀэм зыкӀокӀэ, 7адрэ илъэпкъэгъу лэуйхэу Зиусхьаным ыпашъхьэ ит пстэумэ афэдэу, ар и Зиусхьанэу Тхьэм ыцӀэкӀэ ащ щылэжьэн фит. 8Ятэ иунэгъо мылъку ыщи, ащ кӀихыгъэу ахъщэ иӀэу щытми, адрэ лэуйхэм афэдэу ежьми Ӏахьэ тефэн фае.

НэмыкӀ лъэпкъхэм яхабзэхэм защыдзыегъэныр

9Шъуи Зиусхьанэу Тхьэм къышъуитырэ чӀыгум шъузихьэкӀэ, ащ ис цӀыф лъэпкъхэм яхэбзэ емыкӀушхохэм шъуакӀырымыплъ. 10Зыкъорэ е зыпхъурэ машӀокӀэ къурмэн зышӀыхэрэр, усэрэжъхэр, джэнчыдзхэр, къэхъущтхэр къязыӀохэрэр, удыхэр, 11нэпх зышӀыхэрэр, джынапцӀэхэм апыщагъэхэр, щымыӀэжьхэр упчӀэжьэгъу зышӀыхэрэр къышъухэрэмытых. 12Хэти ащ фэдэхэр зышӀэрэр Тхьэм игущыкӀыгъу, джа хэбзэ емыкӀушхомэ къахэкӀэу шъуи Зиусхьанэу Тхьэм а цӀыф лъэпкъхэр шъукӀэлъырифыщтых. 13Мыхъун зи жъубгъодэмылъэу шъуи Зиусхьанэу Тхьэм ыпашъхьэ шъуитын фае.

Пегъымбарым ехьылӀагъ

14Шъо ижъугъэкощыкӀыщт цӀыф лъэпкъхэр джэнчыдзхэмрэ усэрэжъхэмрэ ядэӀух. Ау шъуи Зиусхьанэу Тхьэм ахэр шъо къышъуфидэрэп. 15Шъуи Зиусхьанэу Тхьэм сэщ фэдэу, шъуилъэпкъэгъоу пегъымбар къышъуфигъэкӀощт. Джащ шъуедэӀу. 16Синай къушъхьэм дэжь шъукъызщызэӀукӀэгъэгъэ мафэм шъуи Зиусхьанэу Тхьэр къыжъудэгущыӀэнэу, мэшӀошхори шъулъэгъунэу ащ нахьыбэрэ шъуфэмыежьэу зэшъоӀом, ар дэдэр арба шъуи Зиусхьанэу Тхьэм шъузфелъэӀугъагъэри. 17Ащ дэжьым Зиусхьаным сэ къысиӀуагъ: „Ахэм аӀорэр тэрэз. 18Ощ фэдэу, ялъэпкъэгъоу, Сэ ахэм пегъымбар къафэзгъэкӀощт. СигущыӀэхэр ащ ыбзэгу къытеслъхьащт, ариӀон фаеу Сэ къесӀощтхэр зэкӀэ ахэм ащ ариӀожьыщт. 19СигущыӀэхэу Сэ СцӀэкӀэ а пегъымбарым ариӀощтым зыгорэ къыземыдэӀукӀэ, ащ фэдэ цӀыфыр Сэр-Сэрэу згъэпщынэщт. 20Ау Сэ унашъо къызэрэфэсымышӀыгъэр Сэ СцӀэкӀэ ариӀонэу езыкущт пегъымбарыр е нэмыкӀ тхьэмэ ацӀэкӀэ гущыӀэщт пегъымбарыр укӀыгъэн фае“. 21ШъугукӀэ зэшъуӀожьын ылъэкӀыщт: „Зиусхьаным къымыӀуагъэр сыдэщтэу къэтшӀэн тлъэкӀыщта?“ 22Пегъымбарым Зиусхьаным ыцӀэкӀэ къыӀуагъэр зымыхъукӀэ, къызымышъыпкъэжькӀэ, а гущыӀэр Зиусхьаным къыбгъодэкӀыгъэп. А пегъымбарым ежь рикуи ар къыӀуагъ. Ащ шъущымыщын».

Currently Selected:

Хэбзэ тхыжьыгъэр 18: АдыТГ

Highlight

Copy