Хэбзэ тхыжьыгъэр 17

ЯпшӀыкӀублэнэрэ шъхьэр

ТхьэнэпцӀыхэм шъхьащэ афэзышӀыхэрэр

1Мосэ етӀани ариӀуагъ: «Дагъо горэ зиӀэ былымхэр е мэл-пчэнхэр шъуи Зиусхьанэу Тхьэм къурмэн фэшъумышӀых, сыда пӀомэ ар АщкӀэ емыкӀушху.

2Шъуи Зиусхьанэу Тхьэм къышъуитырэ къалэмэ ащыщ горэм шъуи Зиусхьанэу Тхьэм къемыкӀущтхэр ыпашъхьэ щишӀэу, Ащ дэшъушӀыгъэ зэзэгъыныгъэр ыукъоу хъулъфыгъэ е бзылъфыгъэ горэ къыдэкӀмэ, 3сэ къышъуфэсшӀыгъэ унашъом пэшӀуекӀоу, хэтми зыгорэ нэмыкӀ тхьэхэм афэлажьэу, ахэм е тыгъэм, е мазэм, е ошъогу жъуагъохэм шъхьащэ афишӀэу 4икъэбар зызэхэшъухыкӀэ, а Ӏофыр тэрэзэу зэхэшъуф. Ар шъыпкъэу къызычӀэкӀыкӀэ, ащ фэдэ емыкӀушхо Израилым щашӀагъэу зыжъугъэунэфкӀэ, 5ар зышӀэгъэ хъулъфыгъэр е бзылъфыгъэр къалэм идэхьэпӀэ къэлапчъэхэу хьыкумыр зыщашӀырэм#17:5 Пэсэрэ зэманым ижъырэ джуртхэм мы чӀыпӀэр яхьыкумшӀыпӀэщтыгъ. Ижъырэ джуртыбзэкӀэ тхыгъэ Ӏэпэрытхым гущыӀэхэу «хьыкумыр зыщашӀырэм» хэтхэп. адэжь къешъущалӀи, мыжъокӀэ шъуеозэ, шъуукӀ.

6Зылъэгъугъэ нэбгыритӀум е щым яшыхьаткӀэ цӀыфыр шъуукӀ хъущт, ау зы нэбгырэ закъом ишыхьаткӀэ хэти шъуукӀ хъущтэп. 7ШъуукӀ зыхъукӀэ, шыхьатхэр ары апэ дэдэ еонхэ фаер, етӀанэ – адрэ цӀыфхэр. Бзаджэр зыхэжъугъэкӀодыкӀ.

Хьыкумым щызэхэфыгъое Ӏофхэр

8УкӀын Ӏофым, зэдэон е фыкъуагъэхэм яхьылӀэгъэ Ӏофхэр арми, язэхэфын къин къышъуфэхъумэ, зэдаохэрэр шъуи Зиусхьанэу Тхьэм къыхихыщт чӀыпӀэм къешъущалӀэх. 9Лэуй лӀакъом щыщ къурмэнышӀхэу, хьыкумышӀэу а уахътэм къышъухэтыщтхэм адэжь шъукӀуи, шъуяупчӀ. Хьыкумым щызэдаштагъэр ахэм къышъуаӀощт. 10Ахэм хьыкумым щызэдаштагъэу Зиусхьаным къыхихыщт чӀыпӀэм къыщаӀощтым тетэу шъо шъузекӀон фае. КъышъуаӀорэр зэкӀэ дэх имыӀэу зэрэжъугъэцэкӀэным шъуфэсакъ. 11Ахэм шъузыфагъэсэщт хабзэм тетэу зэкӀэ шъушӀэ, зэдаштагъэу къышъуаӀощтыр жъугъэцакӀэ. Ащ джабгъумкӀи сэмэгумкӀи шъудэмых. 12Шъуи Зиусхьанэу Тхьэм а чӀыпӀэм щыфэлэжьэрэ къурмэнышӀым е хьыкумышӀым къыӀорэм емыдэӀурэр укӀыгъэн фае. Бзаджэр Израилым ижъугъэкӀодыкӀ! 13ЦӀыфхэм зэкӀэми ар зызэхахкӀэ, лъэшэу ыгъэщынэнхэшъ, тапэкӀэ ащ фэдэ зекӀуакӀэр ракужьыщтэп.

Пачъыхьэр зэрыгъозэщт хабзэр

14Шъуи Зиусхьанэу Тхьэм шъуиунэенэу къышъуитырэ чӀыгум шъуихьэу, ар шъуубытыгъэу, шъущыпсэузэ, къышъогъэтӀысэкӀыгъэ адрэ цӀыф лъэпкъ пстэумэ афэдэу шъори пачъыхьэ тежъугъахьэ шъушӀоигъо зыхъукӀэ, 15тежъугъэхьан фаер шъуи Зиусхьанэу Тхьэм къыхихыщтыр ары. Ар шъуицӀыф лъэпкъ щыщын фае. Хымэ цӀыф лъэпкъым щыщыр, шъуицӀыф лъэпкъ къыхэмыкӀыгъэр, шъуашъхьагъ ижъугъэуцо хъущтэп. 16Пачъыхьэм шы бащэ иӀэнэу щытэп, ахэм джыри зэрахигъэхъонэу цӀыфхэр Мысырым ыгъакӀо хъущтэп. Зиусхьаным къышъуиӀуагъэба: „Мы гъогумкӀэ ащ жъугъэзэжьыщтэп!“ 17Пачъыхьэм ыгу зэокӀыгъэ мыхъуным пае шъуз бащэ иӀэнэу щытэп. Тыжьыни дышъи бащэу ащ иӀэнэу щытэп. 18Пачъыхьагъум зытехьэкӀэ, лэуй къурмэнышӀхэм адэжь щыӀэ мы хабзэр ежь пае тхылъыпӀэм тыритхэн фае. 19ИгъашӀэм ар ыдэжь щерэӀыгъ, ерэдж, джаущтэу и Зиусхьанэу Тхьэм иунашъохэр ыгъэцэкӀэнэу, щынагъо фыриӀэу Ар ыгъэлъэпӀэнэу, мы хабзэм итхэгъэ гущыӀэ пстэури шапхъэхэри дэх имыӀэу ыгъэцэкӀэнэу зэригъэшӀэщт. 20Илъэпкъэгъухэм ежь анахьышӀоу зыкъыщэрэмыхъужь, мы хабзэм джабгъумкӀи сэмэгумкӀи дэрэмых. Джащыгъум ежьми къыхэкӀыщтхэми пачъыхьагъур Израилым бэрэ щаӀыгъыщт».

Currently Selected:

Хэбзэ тхыжьыгъэр 17: АдыТГ

Highlight

Copy