Хэбзэ тхыжьыгъэр 16

ЯпшӀыкӀухэнэрэ шъхьэр

Пэсах мэфэкӀыр

1Мосэ етӀани израил лъэпкъым риӀуагъ: «Уи Зиусхьанэу Тхьэм Абиб#16:1 Ижъырэ джуртыбзэкӀэ мы гущыӀэм къикӀырэр: зигъо хъугъэ лэжьыгъашъхьэхэр. Ар илъэсым иапэрэ мазэу фышъхьэ лэжьыгъэхэм ягъо зыщыхъурэм ыцӀ. мазэм чэщэу Мысырым шъукъырищыжьыгъэшъ, Ащ ыцӀэкӀэ Пэсах#16:1 Зиусхьаным джуртхэр Мысырым къызэрэрищыжьыгъэхэм фэгъэхьыгъэ мэфэкӀым ыцӀ. мэфэкӀыр Абиб мазэм хэгъэунэфыкӀ. 2МэфэкӀым пае уи Зиусхьанэу Тхьэм Ежь ЫцӀэ зэпхыгъэнэу къыхихыщт чӀыпӀэм мэл-пчэнхэм е былымхэм ащыщ пэсах къурмэн щыфэшӀ. 3А лыр хьалыгъу гъэтэджыгъэм дэмышх. Мысырым гузэжъогъукӀэ укъикӀыжьыгъэшъ, ащ укъызщикӀыжьыгъэ уахътэр егъашӀэм угу зэрилъынэу, хьалыгъу мыкӀу-мыпшыр, гуӀэн-гузэжъогъум ихьалыгъу, мэфиблэ шхы. 4Сыд фэдэрэ тэджэпси узыщыпсэурэ чӀыпӀэ пстэуми мэфиблым къыкӀоцӀ къащышъумыгъэхъый. Апэрэ мафэм ипчыхьэ къурмэн пшӀыгъэм щыщ лыр пчэдыжьым нэс щымыгъэлъ. 5Уи Зиусхьанэу Тхьэм пӀэ къырилъхьащт къалэмэ ащыщ горэми пэсах къурмэныр щыпшӀы хъущтэп. 6Ежь ЫцӀэ зэпхыгъэнэу Ащ къыхихыщт чӀыпӀэр ары ныӀэп пэсах къурмэныр зыщыпшӀыщтыр. Джащ мэфэкӀ къурмэныр Мысырым укъызщикӀыжьыгъэ уахътэм тефэу, пчыхьэм, тыгъэм икъохьажьыгъом, щыпшӀыщт. 7Уи Зиусхьанэу Тхьэм Ежь къыхихыщт чӀыпӀэм ар щыгъэхьазыри щышх. Пчэдыжьым шъуадэжь гъэзэжь. 8Мэфихэ хьалыгъу мыкӀу-мыпшыр шхы, яблэнэрэ мафэм уи Зиусхьанэу Тхьэм пае зэӀукӀэ шӀы, Ӏоф гори умышӀэ.

Хыныгъом имэфэкӀ

9Гъупчъэхэр пӀыгъэу хыныгъор зыщыублагъэм щегъэжьагъэу тхьэмэфибл къэлъыти, 10уи Зиусхьанэу Тхьэм инэшӀущыфэныгъэкӀэ бгъотыгъэ мылъкум елъытыгъэу ащ щыщ Ӏахьэр яптызэ, уи Зиусхьанэу Тхьэм пае Хыныгъом имэфэкӀ#16:10 Ижъырэ джуртыбзэкӀэ тхыгъэ Ӏэпэрытхым зэрэхэтыр: «тхьэмафэхэм ямэфэкӀ». хэгъэунэфыкӀ. 11Уи Зиусхьанэу Тхьэм Ежь ЫцӀэ зэпхыгъэнэу къыхихыщт чӀыпӀэм Ащ ыпашъхьэ щычэф: ори, уикӀалэхэми, ппхъухэми, уипщылӀ хъулъфыгъэхэми бзылъфыгъэхэми, уикъалэмэ адэс лэуйхэми, хымэ цӀыф лъэпкъмэ ащыщхэми, ибэу, шъузабэу къыпхэсхэми. 12Мысырым пщылӀэу узэрисыгъэр зыщымыгъэгъупшэу джа шапхъэхэм атетэу ахэр гъэцакӀэ.

Чэлхэм ямэфэкӀ

13Уигубгъохэмрэ уисэнэшъхьэшӀапӀэхэмрэ лэжьыгъэр защыуугъоижькӀэ, Чэлхэм ямэфэкӀ мэфиблэ хэгъэунэфыкӀ. 14Ори, уикӀалэхэми, ппхъухэми, уипщылӀ хъулъфыгъэхэми бзылъфыгъэхэми, лэуйхэу, хымэ цӀыф лъэпкъмэ ащыщхэу, ибэу, шъузабэу уикъалэмэ адэсхэми мэфэкӀым шъущычэф. 15Зиусхьаным Ежь къыхихыщт чӀыпӀэм уи Зиусхьанэу Тхьэм пае мэфиблэ щыгъэмэфэкӀ. Уи Зиусхьанэу Тхьэм лэжьыгъэ бэгъуагъэмкӀи сыдрэ нэмыкӀ уиӀоф пстэукӀи ынэшӀу къыпщыфэнышъ, угушӀощтба! 16Хьалыгъу мыкӀу-мыпшым имэфэкӀ, Хыныгъом имэфэкӀ, Чэлхэм ямэфэкӀ хэбгъэунэфыкӀынхэм пае, хъулъфыгъэу уиӀэр зэкӀэ илъэсым къыкӀоцӀ щэ уи Зиусхьанэу Тхьэм Ежь къыхихыщт чӀыпӀэм кӀонхэшъ, Ащ ыпашъхьэ щихьанхэ фае. Зыгори ӀэнэкӀэу Зиусхьаным ыпашъхьэ ихьэ хъущтэп. 17Уи Зиусхьанэу Тхьэм ынэшӀущыфэныгъэкӀэ хэти ыгъотыгъэ мылъкум елъытыгъэу ащ щыщ Ӏахьэр тын къыздерэхь.

ХьыкумышӀхэр

18Уи Зиусхьанэу Тхьэм къыуитырэ къалэ пэпчъ хьыкумышӀхэмрэ лӀакъомэ яӀэшъхьэтетыщтхэмрэ щытегъахьэх. Ахэм цӀыфхэм яӀофхэр зафэу зэхарэфых. 19Хьыкумым пцӀы хэмыусыхь, зэфагъэ зыхэгъэлъ. Къуалъхьэм зынэ плъэхэрэр нэшъу ешӀыхэшъ, зафэхэм яӀоф зэщегъакъошъ, къуалъхьэр къаӀымых. 20Уи Зиусхьанэу Тхьэм уиунэенэу къыуитырэ чӀыгум ущыпсэуным пае шъыпкъэм, шъыпкъэ закъом, тетэу Ӏофхэр зэхэфых.

21Уи Зиусхьанэу Тхьэм фэбгъэпсыгъэ къурмэншӀыпӀэм дэжь Ашэрэ тхьэнэпцӀым пае агъэлъэпӀэрэ чъыгхэр щымыгъэтӀыс, 22шъхьащэ зыфашӀырэ агъэлъэпӀэрэ мыжъо пкъэухэри щымыгъэуцу. Уи Зиусхьанэу Тхьэм а зэкӀэ ылъэгъу хъурэп».

Currently Selected:

Хэбзэ тхыжьыгъэр 16: АдыТГ

Highlight

Copy