ЯтӀонэрэ Самуел 4
4
ЯплӀэнэрэ шъхьэр
Ищбощэт зэраукӀыгъэр
1Абинэр Хъэурэн зэрэщылӀагъэм икъэбар Саул ыкъо Ищбощэт зызэхехым, ыгу къышӀуефэхыгъ, зэрэ-Израилэуи зытыриубытэщтыр ымышӀэу гумэкӀым зэлъиштагъ. 2Саул ыкъо Ищбощэт дзэ куп хэушъхьафыкӀыгъэмэ япащэхэу нэбгыритӀу иӀагъ, зым ыцӀагъэр БэӀан, адрэм – Рехаб. Ахэм ятагъэр бынямин лӀакъом къыхэкӀыгъэу, БэӀэрот къалэм щыщэу Риммон. БэӀэрот Бынямин хэкум къыхиубытэщтыгъэ. 3БэӀэрот щыщхэр Гъытаим екӀужьыгъагъэх, хэхэсыцӀэр яӀэу джы къызнэсыгъэми ахэр ащ щэпсэух.
4Саул ибын къыхэкӀыгъэу джыри зы кӀалэ щыӀагъ. Ар Саул ыкъо Ионэтан икӀалэу лъащэщтыгъэр ары. Ионэтанрэ Саулрэ якъэбар ИзрыӀэл къалэм къырахи къызагъэсым ащ ыныбжьыгъэр илъэситф. Ар зыӀыгъыщтыгъэ бзылъфыгъэм шъэожъыер къыпхъуати къечъэжьагъ. ГуӀэным хэтэу чъэзэ, къыӀэпызи тыригъэфэгъагъэти ары кӀалэр лъащэ зыкӀэхъугъагъэр. Ащ зэреджэщтыгъэхэр Ищбощэт. 5БэӀэрот щыщ Риммон ыкъохэу Рехабрэ БэӀанрэ ежьэхи, щэджэгъонэстырым тефэу Ищбощэт иунэ екӀолӀагъэх; щэджэгъо чъые ышӀэу адрэр щылъыгъ. 6#4:6 Мы чӀыпӀэм мыщ фэдэ къэӀуакӀи иӀ: [Унагъом икъэлэпчъэӀутэу коцыр зэхэзышыпыкӀыщтыгъэр къечъыехи хэчъыягъ]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп. Рехабрэ ышэу БэӀанрэ коц къырахыщт фэдэу унэм ихьэхи, ащ ыныбэ хэпыджэхи къыкӀатхъужьыгъ. 7Унэм ихьэгъагъэх, чъыяпӀэм ит пӀэкӀорым ар илъыгъагъэти, ахэр ащ еохи аукӀыгъагъ, ышъхьэ къышӀуаупкӀыгъагъ. Ар къыздашти, чэщ ренэм Араба шъофнэкӀым итхэу кӀуагъэх. 8ЕтӀанэ Ищбощэт ышъхьэ Даут дэжь Хъэурэн къахьи пачъыхьэм раӀуагъ: «Мары Ищбощэт, упсэ ыуж итыгъэ уипыеу Саул ыкъо ышъхьэ; тизиусхьанэу пачъыхьэм пае Саули ащ ибыни яфэшъуашэр Зиусхьаным аригъэгъотыжьыгъ».
9Ау Даут БэӀэрот щыщ Риммон ыкъохэу Рехабрэ ащ ышэу БэӀанрэ ариӀожьыгъ: «Къиныгъо пстэуми спсэ ащызыухъумэгъэ Зиусхьаныр зэрэщыӀэр сэӀо! 10„Мары Саул лӀагъэ“, – ыӀоу къэбар къысфэзыхьыгъэр, мэкъэшӀу къысигъэӀугъэу зылъытэщтыгъэр сыубыти Цыкълагъ щязгъэукӀыгъ. Джары къэбарышӀоу къыхьыгъэм пае сэ ащ фэзгъэшъошагъэр. 11Адэ джы лажьэ зимыӀэ цӀыфыр иунэ илъэу пӀэм хэзыукӀыхьэгъэ бзэджэ-наджэхэм аӀэкӀэ хьакъынчъэу агъэчъэгъэ лъыр ясымыгъэпщыныжьынэуи, чӀыгум тесымыгъэкӀодыкӀынхэуи?» 12Ащ тетэу Даут идзэкӀолӀхэм унашъо афишӀи, ахэр аригъэукӀыгъэх, аӀэхэмрэ алъакъохэмрэ паупкӀхи, Хъэурэн дэт псыутӀэм дэжь щыпалъагъэх. Ищбощэт ышъхьэ Хъэурэн щагъэтӀылъыгъэ Абинэр икъэ дычӀалъхьажьыгъ.
Currently Selected:
ЯтӀонэрэ Самуел 4: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
