ЯтӀонэрэ Самуел 5

Ятфэнэрэ шъхьэр

Даут Израилымрэ Ехъудэмрэ япачъыхьэ зэрэхъугъэр

1Ащ ыуж Израилым илӀэкъо пстэури Даут дэжь Хъэурэн къакӀохи къыраӀуагъ: «Тэри ори зыл тыщыщ шъыпкъ. 2Нахьыпэм, Саул зыщыпачъыхьагъэм, израилыдзэхэм урягъуазэу заом Ӏупщэщтыгъэхэба. Зиусхьаным о къыуиӀуагъ: „Мэлахъом Ӏэхъогъур хъупӀэшӀум зэрифырэм фэдэу, сиизраил лъэпкъ зезыщэщтыр оры, Израилым ипэщэщтыр оры“». 3Израилым инахьыжъ упчӀэжьэгъухэу пачъыхьэм дэжь Хъэурэн къэкӀогъагъэхэм пачъыхьэу Даут Зиусхьаным ыпашъхьэ Ӏуагъэ ащыдишӀыгъ; зэрэ-Израилэу ипачъыхьанэу Даут ышъхьэ дагъэ щафагъ. 4Даут пачъыхьэ зэхъум ыныбжьыгъэр илъэс щэкӀ; зэрэпачъыхьагъэр илъэс тӀокӀитӀу. 5Хъэурэн дэсэу илъэсиблрэ мэзихрэ Ехъудэм ипачъыхьагъ, Ерыусэлэм дэсэу илъэс щэкӀырэ щырэ Израилымрэ Ехъудэмрэ зэрэщытэу япачъыхьагъ.

Даут Ерыусэлэм зэриштагъэр

6ЕтӀанэ пачъыхьэу Даутрэ ащ идзэхэмрэ Ерыусэлэм аштэнэуи а чӀыпӀэм щыпсэурэ еусхэм язэонхэуи ежьагъэх. Ау адрэхэр «Даут мыщ къыдэхьашъущтэп» аӀозэ егупшысщтыгъэхэти, Даут къыраӀуагъ: «Мыщ укъыдэхьашъущтэп, нэшъухэри лъащэхэри къыозэожьышъущтых». 7Ау Цион пытапӀэр Даут ыштагъ: ыужкӀэ Даут икъалэкӀэ ащ еджагъэх. 8Арти а мафэм Даут ыӀуагъ: «Еусхэр шъуукӀынхэу шъуфаемэ, къалэр зытет къушъхьэм пхыраутыгъэ псырыкӀуапӀэмкӀэ шъукӀуи, Даут зыфэмылъэгъухэу зыфаӀорэ нэшъухэмрэ лъащэхэмрэ шъуащытебан». «Нэшъухэмрэ лъащэхэмрэ Зиусхьаным иунэ ихьашъущтхэп» джары зытыраӀукӀыгъэри. 9Ащ ыуж Даут пытапӀэм дэтӀысхьи, Даут икъалэкӀэ ащ еджагъ. ЫкӀыбкӀи, ыкӀоцӀкӀи, тыдэкӀи ар зэкӀигъэпытыхьагъ. 10Джащ тетэу Даут иӀофхэр нахьышӀоу кӀохэзэ, нахь лъэши, нахь лъэрыхьи хъущтыгъэ. Зиусхьанэу ошъогу дзэхэр зиӀэрылъхьэ Тхьэр ащ игъусагъ. 11ЕтӀанэ Цэур ипачъыхьэу Хъирам лӀыкӀохэр Даут дэжь къыгъэкӀуагъэх, кедр пхъэхэр къыфаригъэщагъэх, пхъашӀэхэмрэ унэзэтелъхьэхэмрэ къыгъэкӀуагъэхэти, ахэм Даут къэлэсэрай фашӀыгъ. 12Джащ тетэу Израилым ипачъыхьанэу Зиусхьаным зэрэтыригъэхьагъэри, Ежь иизраил лъэпкъ пае ипачъыхьагъу зэрахиӀэтыкӀыгъэри Даут къыгурыӀуагъ.

Даут икӀалэхэр

13Даут Хъэурэн къызыдэкӀыжьым ыуж, Ерыусэлэм дэсзэ, шъузхэри шъузгуадзэхэри джыри къыщагъэх. Арти шъаохэмрэ пшъашъэхэмрэ боу джыри ащ къыщыфэхъугъэх. 14Ерыусэлэм къыщыхъугъэхэм мары ацӀэхэр: ЩаммыуаӀ, Щэубаб, Нэтан, Сэлмэн, 15Ипхъар, ЕлышыуаӀ, Нэфэгъ, ЯфиаӀ, 16ЕлыщэмаӀ, ЕладаӀ, Елыфэлэт.

Фылистхэм зэратекӀуагъэхэр

17Израилым ипачъыхьанэу Даут дагъэ зэрэщафагъэр зызэхахым, ар къаубытыным пае фылистхэр лъыхъухэу къезэрэфыжьагъэх. Ар Даут зызэхехым пытапӀэм екӀугъ. 18Джы фылистхэр къэсхи РэфаӀим кӀэим къыщыуцугъэх. 19Арти Даут Зиусхьаным еупчӀыгъ: «Фылистмэ сязаомэ хъущта? Ахэм сатебгъэкӀощта?» Зиусхьаным Даут къыриӀожьыгъ: «КӀо, фылистхэр Сэ, шъыпкъэмкӀэ, пӀэ къислъхьащтых». 20ЕтӀанэ Даут БэӀал-Фэрацим кӀуи, ахэр ащ щызэхикъутагъэх. Даут ыӀуагъ: «Псы къиугъэм зэкӀэ зэрыздихьырэм фэдэу, Зиусхьаным сипыйхэр, слъэгъузэ, сыпырт ригъэфагъэх». Джары а чӀыпӀэм БэӀал-ФэрацимкӀэ#5:20 БэӀал-Фэрацимым къикӀырэр – Тхьэу сыпырт изгъэфагъэхэр. зыкӀеджагъэхэр. 21Теплъэ зэфэшъхьафхэр зиӀэ тхьэ папкӀэхэу ашӀыгъэхэр фылистмэ къагъэнагъэхэти, ахэр Даутрэ идзэкӀолӀхэмрэ чӀыпӀэ горэм Ӏуащыгъэх.

22Ащ ыужи фылистхэр къакӀохи РэфаӀим кӀэим къыщыуцугъэх. 23Арти ышӀэщтымкӀэ Даут Зиусхьаным#5:23 Мы чӀыпӀэм мыщ фэдэ къэӀуакӀи иӀ: [фылистмэ апэшӀуекӀоу апэуцужьмэ, ахэр ыӀэ къыригъэхьащтхэмэ ыӀуи Даут Зиусхьаным еупчӀыгъ]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп. зеупчӀым, Ащ къыриӀожьыгъ: «УапэмыгъокӀэу, мэркӀо чъыгхэр зыщызэхэт чӀыпӀэм кӀуи, акӀыбкӀэ къикӀи къатебан. 24ЕтӀанэ дзэм икӀо макъэ мэркӀо чъыгмэ ашъхьагъкӀэ къыщыӀоу зызэхэпхкӀэ ежь, сыда пӀомэ фылистыдзэм утекӀоным пае Зиусхьаныр уапэ итыщт». 25Зиусхьаным къыриӀуагъэм тетэу Даут зекӀуагъэ, ГъэбаӀ къыщегъэжьагъэу Гъэзэр нэс фылистхэр щызэхикъутагъэх.

Currently Selected:

ЯтӀонэрэ Самуел 5: АдыТГ

Highlight

Copy