ЯтӀонэрэ Самуел 3

Ящэнэрэ шъхьэр

1Саул иунагъорэ ащ готхэмрэ Даут иунагъорэ ащ готхэмрэ зэнэкъокъухэу бэрэ хэтыгъэх. Даут ылъапсэхэр нахь пытэщтыгъэх, Саул иунагъорэ ащ готхэмрэ яӀофхэр нахь дэй хъу зэпытыщтыгъэх.

Даут икӀалэхэр

2ЕтӀанэ Даут кӀалэхэр Хъэурэн къыщыфэхъугъэх. Апэрэ шъаоу Аминон къыфэзылъфыгъэр изрыӀэлыпхъоу АхъынэӀам ары, 3ятӀонэрэр Къылау, ар#3:3 Ижъырэ урымыбзэмкӀэ зэрадзэкӀыжьыгъэ Ӏэпэрытхым зэрэхэтым фэдэу, Даут иятӀонэрэ кӀалэ ыцӀэ урыс синодальнэ Библием зэрэхэтыр Далуиа. зиягъэр, Нэбал игощагъэу Къармэл щыщ Абигаил; ящэнэрэр – Абищэлэм, ащ янагъэр Гъышыурым ипачъыхьэу Тэлмай ыпхъоу МэӀах; 4яплӀэнэрэр – Адоный, Хъаджэт икӀэлагъ; ятфэнэрэр – Щэфатый, Абитал икӀэлагъ; 5яхэнэрэр – ИтрэӀам, къэзылъфыгъэр Даут ишъхьагъусэу Ӏэгълэ. Ахэр Даут Хъэурэн къыщыфэхъугъэх.

Абинэррэ Даутрэ язэгурыӀоныгъ

6Саул иунагъорэ ащ готхэмрэ, Даут иунагъорэ ащ готхэмрэ азыфагу зэмызэгъыныгъэ елъыфэ Абинэр Саул иунагъорэ ащ готхэмрэ ягъусэу Ӏэшъхьэтетныгъэ ӀэнатӀэм щылъыкӀотагъ. 7Айэ ыпхъоу РицпэкӀэ заджэхэрэр Саул ишъузгуадзэщтыгъ. Саул ыкъо Ищбощэт Абинэр риӀуагъ: «Сятэ ишъузгуадзэщтыгъэм дэжь сыда узкӀихьэщтыгъэр?» 8Ищбощэт къыриӀуагъэм лъэшэу къыгъэгубжыгъэу Абинэр ащ риӀожьыгъ: «Сыкъумал къыпшӀошӀа? Ехъудэм сыпэшӀуекӀоу, уятэу Саул, ащ ышхэмрэ иныбджэгъухэмрэ сагоуцуагъ, ори Даут ыӀэ уислъхьагъэп, ау бзылъфыгъэм пае псэкӀодэу сшӀагъэр къыспэоӀэты. 9-10Пачъыхьагъур Саул иунагъо къызэрэӀэкӀихыжьыщтыр, Даут ипачъыхьагъу Дан къыщегъэжьагъэу БэрщэбаӀ нэсыжьэу Израилымрэ Ехъудэмрэ зэращигъэуцущтыр Тхьэм къыӀуагъ. Зиусхьаным Даут къыдишӀыгъэ зэзэгъыныгъэр зысымыгъэцэкӀэжькӀэ, ифэшъуаши ащ нахьыбэжьи Тхьэм Абинэр рерэгъэгъот!» 11Арти Ищбощэт Абинэр зыпари риӀожьышъугъэп, сыда пӀомэ ар ащ щыщынэщтыгъэ.

12Ащ ыуж Абинэр Даут дэжь лӀыкӀохэр ыгъакӀохи ригъэупчӀыгъэх: «Орба мы чӀыгур зыӀэ илъыщтыр? Ӏуагъэ зэдэтэгъэшӀи, израил лъэпкъыр зэрэщытэу къыбгоуцоным пае гъусэ сыпфэхъущт». 13Арти къыраригъэӀожьыгъ: «Дэгъу, Ӏуагъэ къыбдэсшӀыщт, ау зыгорэкӀэ сыолъэӀущт – Саул ыпхъоу Михэл къыздэмыщагъэу укъысӀукӀэнэу укъызыкӀокӀэ, зыозгъэлъэгъущтэп». 14Ащ ыуж Саул ыкъо Ищбощэт дэжь Даут лӀыкӀохэр ыгъакӀохи раригъэӀуагъ: «Фылист нэбгыришъэм яукӀытапӀэхэу къапысыупкӀыгъэхэр уасэу зыфэстыгъэ сишъузэу Михэл къысэтыжь». 15Арти Ищбощэт ащ лъигъакӀохи, илӀ, Лаиш ыкъо Палтый, къытырихыжьыгъ. 16ЛӀыр ауж къихьи, Бахъурим нэс гъызэ къадэкӀуагъ; ау Абинэр «Гъэзэжь!» ащ зыреӀом, адрэм ыгъэзэжьыгъ.

17ЕтӀанэ Абинэр Израилым инахьыжъ упчӀэжьэгъухэм ариӀуагъ: «Даут шъуипачъыхьэнэу тапэкӀэ шъуфэягъэшъ, 18шъуигухэлъ джы къыздэжъугъэхъун шъулъэкӀыщт. Сыда пӀомэ Зиусхьаным Даут къыгъэгугъагъ: „СиӀумэтэу Даут ишӀуагъэкӀэ сиизраил лъэпкъ фылистхэми адрэ ипый пстэуми ащысыухъумэщт“». 19Ар дэдэр Абинэр быняминхэми ариӀуагъ. ЕтӀанэ Абинэр зэрэ-Израилэуи бынямин лӀакъоми зэрэщытэу яшӀоигъоныгъэ зыфэдэр къыфиӀотэнэу Даут дэжь Хъэурэн кӀуагъэ. 20Нэбгырэ тӀокӀ игъусэу Абинэр Даут дэжь Хъэурэн къэкӀуагъ, Абинэррэ ащ игъусэхэмрэ ешхэ-ешъо Даут къафишӀыгъ. 21Арти Абинэр Даут риӀуагъ: «Сизиусхьанэу пачъыхьэм зэрэизраил лъэпкъэу Ӏуагъэ къыдишӀыным, къыӀукӀэнхэм, ыгу къызэриӀоу зэкӀэми япачъыхьэным пае сыкӀонышъ къыфесщэлӀэщт». Даут Абинэр ытӀупщыжьыгъ, адрэми мамырэу ыгъэзэжьыгъ.

Абинэр зэраукӀыгъэр

22Даут идзэкӀолӀхэу, Иоаб игъусэхэу чӀыпӀэ зэфэшъхьафмэ къащызэуагъэхэр мылъкушхо къыздащи къэкӀожьыгъэх. Ау Абинэр Даут ытӀупщыжьыгъагъэти, Даут дэжь, Хъэурэн, ар щыӀэжьыгъэп, ащ мамырэу ыгъэзэжьыгъагъ. 23Иоабрэ дзэу ащ игъусагъэмрэ къызагъэзэжьым, Нэр ыкъо Абинэр пачъыхьэм дэжь къызэрэкӀогъагъэри, адрэм ар зэритӀупщыжьыгъэри, мамырэу зэригъэзэжьыгъэри къыфаӀотагъэх. 24Арти Иоаб пачъыхьэм дэжь къакӀуи къыриӀуагъ: «Сыда пшӀагъэр? Абинэр уадэжь къэкӀогъагъ, сыда ар зыкӀэптӀупщыжьыгъэр, мамырэу зыкӀебгъэгъэзэжьыгъэр? 25Нэр ыкъо Абинэр зыфэдэр ошӀэба: уигъэпцӀэнэу, угу зыришӀыкӀынэу, уидэхьапӀи уидэкӀыпӀи – зэкӀэ пшӀэрэр пкӀэкӀишӀыкӀыным пае ар мыщ къызкӀэкӀогъагъэр».

26Ащ ыуж Иоаб Даут дэжь къикӀыжьи Абинэр лъыригъэжьагъэх; Бэр-Сирэ чӀыпӀэм нэсыжьыгъэу, Даут щымыгъуазэу ащ къырагъэгъэзэжьыгъ. 27Абинэр Хъэурэн къызегъэзэжьым, Ӏоф шъэф горэм пае дэгущыӀэщт фэдэу зыригъэшӀзэ, Иоаб ар къэлапчъэхэм акӀоцӀырищи, укъызщымылъэгъощт къогъу горэм дэжь ыныбэ щыхэпыджагъ. Джаущтэу Иоаб ышэу Ӏасаел ылъэу ыгъэчъагъэм Абинэр текӀодэжьыгъ.

Абинэр ихьадэгъу Даут къызэрэзыхишӀагъэр

28Ащ ыуж Даут къэбарыр зишӀагъэр, арти ащ ыӀуагъ: «Нэр ыкъо Абинэр ылъэу агъэчъагъэм сэри сипачъыхьагъуи тилажьэ Зиусхьаным ыпашъхьэ егъашӀи щыхэлъынэп. 29Иоабрэ ащ ятэ иунагъорэ зэрэщытэу лажьэр атерэф, Иоаб иунагъо щынуз зиӀэхэм, бэгушӀоӀунэ хъугъэхэм, е бэщыр зикӀэгъэкъон сэкъатхэм, е чатэкӀэ хагъафэхэрэм, е зышхын зэзымыгъотылӀэжьхэрэм егъашӀэм ащэрэмыкӀ». 30ГъыбӀон дэжь щыкӀогъэ заом Ӏасаел зэрэщиукӀыгъагъэм пае ащ ышхэу Иоабрэ Абищайрэ Абинэр зыкӀаукӀыжьыгъэр.

31Даут Иоабрэ ащ игъусэ цӀыфхэмрэ унашъо афишӀыгъ: «Шъуищыгъынхэр зэӀышъутхъхи, дзыопхъэ шэкӀ пхъашэм хэшӀыкӀыгъэ шъыгъошъэ джанэхэр зыщышъулъэхи, Абинэр жъугъае». Ар зыдэлъ пхъэмбаим ыуж итэу пачъыхьэу Даут кӀощтыгъэ. 32Абинэр Хъэурэн щагъэтӀылъ зэхъум, ащ икъэ дэжь щытэу пачъыхьэм лъэшэу ар ыгъэягъ; зэкӀэ цӀыфхэми ар агъэягъ. 33ЕтӀанэ пачъыхьэм гъыбзэ ащ фызэхилъхьагъ:

«Абинэр фэдэр ара делэгъэ лӀакӀэр зэпэсыгъэр?

34О пӀэхэр пхыгъагъэхэп,

плъакъохэми пшъэхъухэр ателъыгъэп,

бзэджашӀэхэм цӀыфыр зэраукӀ хабзэу,

жъалымыгъэкӀэ узыхагъафэм».

Ащ цӀыфхэр зэкӀэ джыри нахь къыгъэгъыгъэх. 35ЦӀыфхэр Даут дэжь къакӀохи гъомлапхъэм хэӀанэу къызыраӀом джыри мэфагъэ, ау Даут тхьэлъанэ ышӀыгъ: «Тыгъэр къомыхьафэ хьалыгъуми е нэмыкӀ гори зызӀузгъафэкӀэ Тхьэм сифэшъуашэри нахьыбэжьи серэгъэгъот». 36ЦӀыфхэм зэкӀэми ар зэхахыгъэти, пачъыхьэм адрэ ышӀэрэ пстэури зэрягуапэщтыгъэм фэдэу мыдрэри ягопагъ. 37Нэр ыкъо Абинэр пачъыхьэм зэремыкӀодылӀагъэр зэкӀэ дзэкӀолӀхэми зэрэ-Израилэуи а мафэм къагурыӀуагъ. 38Пачъыхьэм иӀумэтхэм ариӀуагъ: «Пэщэшхощтыгъэмрэ зы лӀэу щытыгъэмрэ мы мафэм Израилым зэрэщаукӀыгъэр шъошӀэба? 39Сыпачъыхьэнэу сшъхьэ дагъэ къыщафагъэми, сэ джыри лъэкӀ сиӀэгоп, мыдрэ лӀыхэр, Цырыуй ыкъохэр, сэщ нахь лъэшых. Бзэджагъэ зышӀэрэ цӀыф бзаджэм ифэшъуашэ Зиусхьаным рерэгъэгъот!»

Currently Selected:

ЯтӀонэрэ Самуел 3: АдыТГ

Highlight

Copy