Апэрэ Самуел 26

ЯтӀокӀэнэрэ хырэ шъхьэр

Даут Саул псэоу джыри къызэригъэнэжьыгъэр

1Зифхэр Саул дэжь, ГъыбӀэ, къакӀохи къыраӀуагъ: «Ещымон ыпашъхьэ ит Ӏуашъхьэу Хъахыл Даут зыщегъэбылъы». 2Арти Саул къежьи, израил дзэкӀолӀ анахь лӀыбланэмэ ащыщэу минищ къызэригъэгъуси, Даут лъыхъунэу шъофнэкӀэу Зиф кӀуагъэ. 3Саул Ещымон ыпашъхьэ ит Ӏуашъхьэу Хъахыл, гъогум дэжь, къыщыуцугъ. Даут шъофнэкӀым итыгъ. Ыуж къыфынэу Саул ащ къызэрихьагъэр къылъэгъугъэти, 4Даут ицӀыфхэр шъэфэу къэплъэнхэу ыгъакӀохи, Саул къызэрэкӀогъэ шъыпкъэм икъэбар къыфахьыжьыгъ. 5Арти Даут Саул къыхихыгъэ уцупӀэм зекӀуалӀэм, Саулрэ ащ идзэпащэу Нэр ыкъо Абинэррэ ягъолъыжьыпӀэ къылъэгъугъ. Саул игъусэхэр къегъэтэкъокӀыгъэхэу ежь ахэм агузэгу илъыгъ.

6Ащ дэжьым Даут хъыт лъэпкъым щыщ Ахъымэлэхрэ Иоаб ышэу, Цырыуй ыкъо Абищайрэ закъыфигъази къяупчӀыгъ: «Хэта Саул иуцупӀэ къыздэкӀощтыр?» Абищай къыриӀожьыгъ: «Сэ сыкъыбдэкӀощт». 7Чэщым Даутрэ Абищайрэ цӀыфхэм ахэхьагъэх; мары Саул, игъусэхэр къегъэтэкъокӀыгъэхэу мэчъые, ипчыпыджыни ышъхьэ зыдэгъэзэгъэ лъэныкъомкӀэ чӀыгум щыхэӀугъ; Абинэррэ дзэкӀолӀхэмрэ ащ къыкӀэрылъых. 8Абищай Даут риӀуагъ: «Тхьэм уипый джы пӀэ къырилъхьагъ; арышъ, Ӏизын къысэти, ятӀонэрэу сӀэ тесымыщэежьынэу, зэ огъукӀэ пчыпыджынымкӀэ чӀыгум хэсӀулӀэщт». 9Ау Даут Абищай къыриӀожьыгъ: «УмыукӀы, армырмэ Зиусхьаным пачъыхьэнэу къахихыгъэм зыӀэ тезыщэягъэу хэта псэоу къэнэжьын зылъэкӀыщтыр?» 10ЕтӀани Даут къыӀуагъ: «Зиусхьаныр зэрэщыӀэр сэӀо! Зиусхьаныр ащ къыферэх е иаужыпкъэрэ мафэ къыфэрэси орэлӀэ, е заом орэкӀуи, ащ хэрэкӀуад; 11ау Зиусхьаным пачъыхьэнэу къахихыгъэм сӀэ тесщэеныр Зиусхьаным къысфидэнэп; арышъ, ащ ышъхьэ зыдэгъэзэгъэ лъэныкъомкӀэ чӀыгум щыхэсэгъэ пчыпыджынымрэ псыр зэрыт къошынэу къыкӀэрытымрэ къаштэхи, тыӀугъэкӀыжь». 12Саул ышъхьэ зыдэгъэзагъэмкӀэ щытыгъэхэ пчыпыджынымрэ псыр зэрыт къошынымрэ Даут къыштэхи, нэбгыритӀум къагъэзэжьыгъ; зыгорэми зи къылъэгъугъэп, зыгорэми зи къышӀагъэп, зи къэущыгъэп. ЗэкӀэри чъыещтыгъэ, сыда пӀомэ Зиусхьаным къафигъэкӀогъэ чъые ӀэшӀум ахэр хэтыгъэх.

13ЕтӀанэ Даут адрэ бгъумкӀэ зэпырыкӀыжьи, чыжьэкӀэ апэӀудзыгъэ къушъхьэтхым къытеуцуагъ; уцупӀэмрэ ежь зыдэщыт чӀыпӀэмрэ бэкӀэ зэпэчыжьагъэх. 14Ащ ыуж Даут цӀыфхэмрэ Нэр ыкъо Абинэррэ къяджагъ: «Зэхэоха, Абинэр?» Абинэр ащ риӀожьыгъ: «Ухэт о, сыда узкӀэкуорэр, пачъыхьэри зыкӀэбгъэгумэкӀрэр?» 15Арти Даут Абинэр риӀуагъ: «УлӀыба о, хэт о пфэдэу Израилым исыр? Сыда уизиусхьан, пачъыхьэм, узкӀыфэмысакърэр? Пачъыхьэр, уизиусхьан, ыукӀынэу цӀыф горэ къызэрыкӀогъагъэр ошӀа? 16УизекӀуакӀэ дэгъоп; Зиусхьаныр зэрэщыӀэр сэӀо! Зиусхьаным пачъыхьэнэу къахихыгъэм шъузэрэфэмысакъырэм пае шъуаукӀыныр къышъутефэ. Еплъэлъ, тыдэ хъугъа пачъыхьэм ышъхьэкӀэ щыӀэгъэхэ пчыпыджынымрэ псыр зэрытыгъэ къошынымрэ?» 17Ащ дэжьым Саул Даут ымакъэ къышӀэжьыгъэти риӀуагъ: «СикӀалэу Даут, умакъа зэхэсхырэр?» Даут къыриӀожьыгъ: «Сымакъэ адэ, сизиусхьанэу пачъыхьэр». 18ЕтӀани ащ къыӀуагъ: «Сыд пае сизиусхьан иӀумэт илъэуж зэрифэра? Сыда сшӀагъэр? БзэджагъэкӀэ сӀэ къыптесщэягъа? 19Сизиусхьанэу пачъыхьэр иӀумэт къыӀощтым джыри къерэдэӀу: Зиусхьаным укъысфигъэгубжыгъэмэ, сикъурмэн Зиусхьаным шӀу къысферэшӀыжь; цӀыфхэр армэ тазыфагу къихьагъэр, Зиусхьаным ынае къащэф, сыда пӀомэ, „КӀо, тхьэ хамэхэм афэлажь“ аӀозэ, Зиусхьаным сфыхихыгъэ чӀыгум сизыфыгъэхэр ахэр ары. 20Арышъ, Зиусхьаным инэрылъэгъу, чӀыгур слъыкӀэ згъэшъокӀынэп; сыда пӀомэ, щылэчэтыр къушъхьэм къызэрэщырафэкӀырэм фэдэу, зы бжыдзэм лъыхъунэу Израилым ипачъыхьэ къежьагъ».

21Арти Саул къыӀуагъ: «Сыхэукъуагъ, къэгъэзэжь, сикӀалэу Даут, ащ нахьыбэрэ сизэрар озгъэкӀыжьыщтэп, нычэпэ спсэ бгъэлъэпӀагъэ: акъылынчъэу сэ сызекӀуагъ, бэрэ сыхэукъуагъ». 22ЕтӀанэ Даут джэуап къытыжьыгъ: «Мары пачъыхьэм ипчыпыджын, зы кӀалэ горэ къэрэкӀуи ар ерэштэжь; 23Зиусхьаным шъхьадж ифэшъуашэр ригъэгъотын; Зиусхьаным о сӀэ укъырилъхьэгъэхагъ, ау Зиусхьаным пачъыхьэнэу къахихыгъэм сӀэ тесщэягъэп; 24непэ о упсэ сэ зэрэзгъэлъэпӀагъэм фэдэу сищыӀэныгъэ Зиусхьаным ерэгъэлъапӀ, сыд фэдэрэ тхьамыкӀагъуи ащ сыщерэухъум!» 25ЕтӀанэ Саул Даут риӀуагъ: «Зиусхьаным ынэшӀу къыпщэф, сишъаоу Даут; Ӏофыбэ пшӀэщт, гъэхъагъэхэри уиӀэщт». Ащ ыуж Даут игъогу техьажьыгъ, Саули ичӀыпӀэ ыгъэзэжьыгъ.

Currently Selected:

Апэрэ Самуел 26: АдыТГ

Highlight

Copy