Апэрэ Самуел 25

ЯтӀокӀэнэрэ тфырэ шъхьэр

Самуел дунаир зэрихъожьыгъэр

1Самуел лӀагъэ. Израил цӀыф пстэури хьадагъэм къекӀуалӀэхи ар загъэежьым, иунэ зыдэтыгъэ къалэу Рамэ щагъэтӀылъыжьыгъ.

ЕтӀанэ Даут зыдэсыгъэ чӀыпӀэр къыбгыни, шъофнэкӀэу Пэран кӀуагъэ.

Даутрэ Абигаилрэ

2-3Къалэб лӀакъом щыщэу зы лӀы бай дэдэ горэ псэупӀэу МэӀон щыпсэущтыгъ, ыгъэлэжьэрэ чӀыгур чӀыпӀэу Къармэл щыӀэу; мэл минищрэ пчэн минрэ ащ иӀагъ. А лӀым Нэбал ыцӀагъэр, ишъуз – Абигаил; а бзылъфыгъэр лъэшэу Ӏушыгъэ ыкӀи дэхагъэ, ау лӀыр жъалымэу, гу цӀапӀэ кӀоцӀылъэу щытыгъ. Нэбал имэлхэм цыр къатырищыкӀынэу Къармэл кӀогъагъэ. 4Нэбал имэлхэм цыр къызэратырищыкӀрэр шъофнэкӀым щыӀэгъэ Даут зэхихыгъэти, 5ицӀыф нэбгырипшӀ ыӀофыти, ахэм ащ ариӀуагъ: «Къармэл шъукӀуи, Нэбал дэжь шъуӀухь, сэ сцӀэкӀэ сэлам ешъухи, 6мырэущтэу ешъуӀу: „Ори, уиунагъуи, уие пстэуми мамыр шъогъот; 7уимэлхэр зэращхэрэм икъэбар зэхэсхыгъ. Мары уимэлахъохэр къытихьылӀэщтыгъэхэшъ, ахэм агу зэрэхэтымыгъэкӀыгъэри, Къармэл щэӀэфэхэ зыпари зэрашӀомыкӀодыгъэри 8уицӀыфхэм яупчӀи къыуаӀощт. Арышъ, сицӀыфмэ нэшӀукӀэ укъарегъэплъ, мафэкӀэ уадэжь тыкъэкӀуагъ; уиӀумэтхэми уикӀалэу Даути пфызэшӀокӀрэр къяптыгъэмэ дэгъугъэ“». 9Ащ ыуж Даут ицӀыфхэр Нэбал дэжь кӀохи, Даут игущыӀэхэр зэкӀэ ащ ыцӀэкӀэ раӀохи, къызэтеуцуагъэх. 10Ау Нэбал Даут ицӀыфхэм къариӀожьыгъ: «Хэт щыща Даути, хэт щыща Ищай ыкъуи? Зизиусхьанхэм къашӀухэхьажьрэ унэӀутхэр джы бэ хъугъэ. 11Сихьалыгъуи, сипси, симэлхэр сфэзыщхэрэм апае згъэхьазырыгъэ лыри къыздикӀыгъэр сымышӀэрэ цӀыфхэм ястынэуи?» 12Даут ицӀыфхэм къагъэзэжьи, ягъогу къытехьажьхи къэкӀожьыгъэх. Хъугъэр зэкӀэ Даут зыфаӀотэжьым, 13Даут ицӀыфхэм ариӀуагъ: «Шъуичатэхэр къызгуашъулъхьэх». Арти зэкӀэми ячатэхэр къызгуалъхьагъэх, ежь Даути ичатэ къыштагъ. Нэбгырэ шъиплӀ фэдизыр Даут ыуж къихьагъ, нэбгырэ шъитӀур ӀапӀэхэм къапэнагъ.

14Ащ дэжьым чырэмэ ащыщ горэм Нэбал ишъузэу Абигаил къыриӀуагъ: «Даут ицӀыфхэр шъофнэкӀым къыригъэкӀхи тизиусхьан дэжь сэлам къырахынэу къыгъэкӀогъагъэх, ау мыдрэр губжыгъэу, атекуозэ ахэм адэгущыӀэжьыгъ. 15Ары шъхьае а цӀыфхэр лъэшэу къытфэшӀугъэх, тыгуи хагъэкӀыгъэп, ахэм тырягъусэу шъофым тыкъэтыфэ зыпари тшӀокӀодыгъагъэп. 16Тапэгъунэгъоу Ӏэхъогъухэр щыдгъэхъухэ зэхъум, чэщи мафи ренэу тыкъагъэгъунагъ. 17Джы хъурэм еплъи, пшӀэн фаем егупшыс, армырмэ тизиусхьани иунагъуи зэрэщытэу зыхэмыкӀыжьышъущтхэ тхьамыкӀагъо хэфэщтых, ежь гу цӀапӀэ зыкӀоцӀылъ цӀыфышъ, удэгущыӀэн плъэкӀыщтэп».

18Арти Абигаил гуӀэнкӀэ хьалыгъу шъитӀу, нэтитӀум арыз санэр, гъэжъагъэу мэлитф, хьакукӀэ гъэгъугъэу лэжьыгъэ пщыгъитф, сэнэшъхьэгъэгъугъэ блэришъ, шхынцумпэр зыдэлъ хьалыгъу ӀашӀу шъитӀу къыштэхи, щыдхэм атырилъхьагъэх. 19ЕтӀанэ иунэӀутхэм ащ ариӀуагъ: «Шъо сапэ шъуитэу шъукӀу, сэ шъуауж ситыщт». Ишъхьагъусэу Нэбал зыпари ащ риӀуагъэп. 20Ар щыдым тесэу къушъхьэ лъагъом къех пэтзэ, Даутрэ ицӀыфхэмрэ зэгъусэхэу къакӀохэу ыпэ къифагъэх. 21Ежь Даут ыгукӀэ зэриӀожьщтыгъэ: «А цӀыфым имылъку зэрэщытэу шъофнэкӀым къызэрэщысыухъумагъэри иӀэм щыщ зыгори зэрэхэмыкӀодыкӀыгъэри хьаулый. ШӀоу фэсшӀагъэр зэхимышӀыкӀэу, бзаджэкӀэ къыспэгъокӀыжьыгъ. 22Даут ипыйхэм яфэшъуашэр Тхьэм аригъэгъотыщт, нахьыбэжьи къаришӀэщт, дэпкъым кӀэлъырыгъутхьэу Нэбал иунэ исмэ ащыщ горэ пчэдыжь нэс нэф къызизгъэкӀыкӀэ».

23Абигаил Даут къызелъэгъум гуӀэнкӀэ щыдым къехи, ынэӀу егъэзыхыгъэу Даут ыпашъхьэ зыщыридзыхи, чӀыгум нэсэу шъхьащэ къыфишӀыгъ. 24Ащ ыуж Даут ыпашъхьэ лъэгонджэмышъхьэу къитӀысхьи, къыриӀуагъ: «Лажьэр зытефэрэр сэры, сизиусхьан. УиӀумэт къэгущыӀэн ылъэкӀынэу фит къэшӀи, къыӀощтым къедэӀу. 25Сизиусхьан шэнрэ акъылрэ зимыӀэ Нэбал пэрэмылъ, сыда пӀомэ ыцӀэм фэд ащ ышъхьи. Ащ ыцӀэр Нэбал, къикӀрэр зиакъыл имыкъу. Ау сэ, сыуиӀумэт, сизиусхьан ицӀыфэу къыгъэкӀогъагъэхэр слъэгъугъэхэп.

26Джы, сизиусхьан, Зиусхьаныри о упси зэрэщыӀэхэр сэӀо. Арышъ, лъыр уигъэгъэчъэнэп, уигухьагужъи къызтырыуигъэгъэкӀонэп, уипыйхэри, сизиусхьан, гужъ къыбдызиӀэхэри Нэбал фэдэу джы орэхъух. 27Сизиусхьан фэлэжьэрэ кӀалэхэм аритынэу сизиусхьан иӀумэт къыхьыгъэ тынхэр мары. 28УиӀумэт илажьэ къыфэгъэгъу; сизиусхьан иунагъо Зиусхьаным егъашӀэм щигъэӀэщт, сыда пӀомэ сизиусхьан зыфэзаорэр Зиусхьаным иӀофышъ, ущэӀэфэ уишэнычъагъэ къызтебгъэкӀощтэп. 29Изэрар къыуигъэкӀынэу, цӀыф горэ уауж къихьэу, упсэ къеӀэ шӀоигъо зыхъукӀэ, сизиусхьан ыпсэ уи-Зиусхьанэу Тхьэм, мылъку лъапӀэр къызэраухъумэрэм фэдэу къыухъумэщт, ау уипыйхэм хьашъом далъхьэрэ мыжъор зэрадзырэм фэдэу Ар яощт. 30ЕтӀанэ Зиусхьаным сизиусхьан шӀоу къыдэхъунэу фигъэнэфагъэр зэкӀэ къыдигъэхъоу, Израилым иӀэшъхьэтетэу зытыригъахьэкӀэ, 31игухьагужъ джы къызтыримыгъакӀоу, лажьэ зимыӀэ цӀыфхэр зимыукӀхэкӀэ, сизиусхьан ыужкӀэ кӀэгъожьыщтэп, ыгуи къеожьыщтэп. Зиусхьаными сизиусхьан ишӀушӀэ ыгъэкӀодыщтэп, уиӀумэти угу къэгъэкӀыжь».

32Арти Даут Абигаил къыриӀуагъ: «Израилым и-Зиусхьанэу Тхьэу непэ сапэ укъизгъэфагъэм щытхъур ыдэжь! 33ШъхьакӀоу сагъэшӀыгъэм пае лъы згъэчъэнэу сежьагъэу сыкъызэтебгъэуцуагъэшъ, Зиусхьаным ынэшӀу уиакъыли ори къащэф. 34Ау, Израилым и-Зиусхьанэу Тхьэу, сизэрар къыозгъэкӀыным сыщызыухъумагъэр, зэрэщыӀэр къэсэӀо – укъемылъэкӀоныгъагъэмэ, сапи зыкъимыгъэфэгъагъэмэ, дэпкъым кӀэлъырыгъутхьэу Нэбал иунэ исмэ ащыщ горэ пчэдыжь нэс нэф къизгъэкӀыщтгъэп». 35ЕтӀанэ Абигаил къыфищагъэхэр къыӀиххи, Даут ащ риӀуагъ: «Гупсэфэу шъуадэжь гъэзэжь, къэпӀуагъэми сыкъедэӀугъ, узфаер къыпфэсшӀагъ». 36Ащ ыуж Абигаил ыгъэзэжьи, Нэбал дэжь зыӀохьэм, пачъыхьэм иешхэ-ешъо фэдэу, яунэ щыешхэ-ешъошхощтыгъ, Нэбали ыгукӀэ чэфыгъ; ар лъэшэу утэшъогъагъэти, пчэдыжьым нэс зы гущыӀи ащ риӀуагъэп. 37Пчэдыжьым Нэбал чэфыр кӀэкӀыжьи, шъузым къэбарыр зыфеӀуатэм, лӀым ыгучӀэ изи, ыӀэпкъ-лъэпкъхэр ыубытыгъэх. 38Джыри мэфипшӀ фэдиз зытешӀэм, Зиусхьаныр Нэбал къыфехыгъ, ащ къыхэкӀэуи лӀагъэ.

39Нэбал икъэбар зызэхехым Даут ыӀуагъ: «ШъхьакӀоу къысихыгъэм пае Нэбал ифэшъуашэр езгъэгъоти, иӀумэт бзаджэ езымыгъашӀэу, Нэбал ыгу илъыгъэ шӀоир ащ ышъхьэ къезкъутэхыжьыгъэ Зиусхьаным щытхъур ыдэжь». Ащ ыуж Даут Абигаил дэжь иӀумэт лӀыкӀохэр ыгъакӀохи, шъузкӀэ зэриштэрэр раригъэӀуагъ. 40Арти Даут илӀыкӀохэр Абигаил дэжь, Къармэл, кӀохи раӀуагъ: «Даут шъузэу уфэтщэнэу тыкъыплъигъэкӀуагъ». 41Ар къэтэджи, чӀыгум нэс шъхьащэ ышӀи къыӀуагъ: «Мары уиӀумэт, сизиусхьан илӀыкӀохэм алъакъохэр афитхьакӀзэ фэчырэнэу ар хьазыр». 42Абигаил гузэжъогъукӀэ зыкъыгъэхьазыри щыдым къытетӀысхьагъ. УнэӀут бзылъфыгъитфыр ащ игъусагъ; Даут къылъигъэкӀуагъэхэм ауж итэу, Даут дэжь кӀуи, шъуз фэхъугъ.

43Ащ ыуж Даут ИзрыӀэл щыщ АхъынэӀами къыщи, тӀури шъузкӀэ ыштагъ. 44Даут ишъхьагъусэщтыгъэу Саул ыпхъу Михэл Гъалым щыщ Лаиш ыкъо Палтый ятэ ригъэщэгъагъ.

Currently Selected:

Апэрэ Самуел 25: АдыТГ

Highlight

Copy