Апэрэ Самуел 2
2
ЯтӀонэрэ шъхьэр
Хъаннэ итхьалъэӀу орэд
1«Джаузэ Зиусхьаным елъэӀузэ, Хъаннэ къыӀуагъ:
Зиусхьаным гушӀуагъо дэзгъотыгъ;
КӀуачӀэу схэлъым Тхьэм хигъэхъуагъ;
ГущыӀэкӀэ сипыйхэм сапырикъугъ;
Зиусхьаным ишӀуагъэкӀэ щыӀэныгъэм сыкӀэгушӀу.
2Зиусхьаным нахь шыихъ щыӀэп,
Ощ нэмыкӀ гори щыӀэп,
Ти-Тхьэ ебгъэпшэнэу пытапӀэ щыӀэп.
3ШъукъызшӀошӀыжьэу бащэ шъумыӀо,
ГущыӀэ дысхэр къызжэдэшъумыгъэкӀых;
Зиусхьаныр – зэпстэуми ащыгъозэ Тхьэр ары,
ЦӀыфмэ ашӀэрэр зэкӀэ къызэпещэчы.
4Лъэшмэ ящэбзащэхэр къызэпэкӀых,
Хъыбэйхэм кӀуачӀэкӀэ зарегъэузэнды;
5ШхэкӀыгъэхэм ягъомылэ къалэжьыжьы,
Гъаблэ хэтыгъэхэм аӀотэжьы;
Сабый къызхэмыкӀыщтыгъэр гъогогъуиблэ къэгъэгъагъ,
Сабыибэ зиӀагъэр чъыг гъугъэу къэнагъ.
6Зиусхьаным дунаир къыуегъэбгынэ, псэр къыпегъэкӀэжьы,
Хьадрыхапчъэр къыпфызэӀуехы, хьадрыхэ гъогу укъытырещыжьы;
7Зиусхьаным гъончэнджынчъэу укъегъанэ, былымыр хышхоу къыпфегъакӀо,
УеушъхьакӀу, уакъыхеӀэтыкӀы.
8ТхьамыкӀэхэр сапэм къыхещыжьых,
Ащыгъупшэжьыгъэхэр ежьэ Ӏуашъхьэм къыхехыжьых,
Лъэрыхьэмэ ахегъэуцожьых,
ЕгъэшӀэрэ щытхъум итетыгъо къареты.
ЧӀыгум ылъапсэ Зиусхьаным къыщежьагъ,
Тызтет дунайри ащ тыригъэуцожьыгъ.
9Шъыпкъэныгъэ зыхэлъ ицӀыфхэм ялъагъохэр къыухъумэщт,
Хэбзэнчъэмэ ялъагъо шӀункӀым ыдырыщт,
Къарыу закъор арэп цӀыфыр зыгъэлъэшырэр.
10Енэкъокъурэр зэкӀэ Зиусхьаным рихьаджыхьащт;
Ошъогум шыблэ мэкъэшхоу къыщыгъогъощт#2:10 Мы чӀыпӀэм мыщ фэдэ къэӀуакӀи иӀ: [Зиусхьаныр шыихъ. Губзыгъэр зэрэгубзыгъэм пае къызщэрэмытхъужь, къарыушӀури зэрэкъарыушӀум пае къызщэрэмытхъужь, байри зэрэбаим пае къызщэрэмытхъужь. Ау къызщытхъужьынэу зышӀоигъор Зиусхьаныр къызэрэгурыӀорэмрэ зэришӀэрэмрэ пае къызщэрэтхъужь]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп..
Дунаир зэрэщытэу Зиусхьаным ыухэсыщт,
Ипачъыхьи пытагъэ къыритыщт,
и-Тхьэихэхи#2:10 Тхьэихэх – мы къэӀуакӀэм пае джуртыбзэм гущыӀэу Мэшыяхъ, урымыбзэм Христос ащагъэфедэ. ГущыӀитӀуми къарыкӀрэр: дагъэр зыщафагъэр. Мэхьанэ шъыпкъэу иӀэр: Тхьэм къахихыгъэр. ыкӀуачӀэ зыдыригъэӀэтэещт».
11Елкъан ядэжь, Рамэ, ыгъэзэжьыгъ, ишъао Алый къурмэнышӀым дэжь, Зиусхьаным фэлэжьэным пае къыгъэнагъ.
Алый ыкъохэм ябзэджэшӀагъэхэр
12Алый ыкъохэр цӀыф хъэтагъэхэп; ахэр Зиусхьаным шӀолӀыкӀщтыгъэхэп. 13КъурмэншӀынымкӀэ Тхьэм къафигъэуцугъэ хабзэхэу къурмэнышӀым цӀыфмэ аригъэлэжьынэу щытхэр аукъощтыгъэх. Зыгорэм къурмэн зишӀыкӀэ лым игъэжъогъум къурмэнышӀым иӀофтабгэ цацэр ыӀэдакъэ чӀэгъэнагъэу къэсыти, 14ар зыщыжъорэ лэгъупым рыхэӀабэщтыгъ, цацэм къыпыфэрэр къурмэнышӀым фихьыщтыгъ. Щылэу къэкӀорэ израил цӀыф пстэуми джары зэрадэзекӀощтыгъэхэр. 15КъурмэнышӀым иӀофтабгэ шэр джыри амыгъэстызэ къэсыти къурмэн зышӀырэм риӀощтыгъ: «КъурмэнышӀым ыгъэжъэнэу лы къысэт, лы жъуагъэр ащ пӀихыщтэп, зэрэцӀынэзэ къаштэ». 16«Хабзэм тетэу Тхьэм пае шэр загъэстыхэкӀэ о узыфаем фэдиз етӀанэ штэ» зыгорэм къызыриӀокӀэ, мыдрэм риӀожьыщтыгъ: «Хьау, джыдэдэм къаштэ, армырмэ, кӀуачӀэкӀэ птесхыщт». 17А кӀалэмэ псэкӀодышхо Зиусхьаным ыпашъхьэ щызэрахьэщтыгъ, сыда пӀомэ Зиусхьаным ыцӀэкӀэ ашӀырэ къурмэныр зэщагъакъощтыгъ.
КӀалэу Самуел Щылэу щыӀ
18КӀалэу Самуел къурмэншӀыгъом къурмэнышӀ чэтэнӀабгъур ыбг пыпхагъэу Зиусхьаным фэлажьэщтыгъ. 19Илъэс къэс атефэрэ къурмэныр ашӀынэу янэрэ ятэрэ зэгъусэхэу къакӀощтыгъэхэти, щыгъын кӀыӀутелъ цӀыкӀур ным къыфидыти, ащ къыфихьыщтыгъ. 20Алый Елкъанрэ ишъхьагъусэрэ Зиусхьаным ынэшӀу къащыфэнэу афелъэӀущтыгъ: «Зиусхьаным фэбгъэшъошэгъэ кӀалэм ычӀыпӀэ мы уишъуз къыхэкӀыгъэу сабыйхэр Зиусхьаным къыпферэгъэхъух!» ЕтӀанэ ахэр ядэжь къэкӀожьщтыгъэх.
21Зиусхьаныр Хъаннэ къыфеплъыгъ, кӀэлищрэ пшъэшъитӀурэ ышъо хыригъадзи, джыри къыритыгъ. Самуел Зиусхьаным ынаӀэ къытетэу зыкъиӀэтыщтыгъ.
22Алый жъы дэдэ хъугъагъэ. ИкӀалэхэр зэкӀэ израил цӀыфхэм зэрадэзекӀохэрэм, Тхьэм ицӀыфхэр зэкӀолӀэрэ чэтэнгъэӀэгъэ лъапӀэм щылэжьэрэ бзылъфыгъэхэм зэращыкӀыгъухэрэм якъэбархэр зэхихыщтыгъэти, 23ахэм ариӀуагъ: «Сыд пае аущтэу зыжъугъэпсыра? ЗэкӀэ цӀыфхэм гущыӀэ Ӏае нэмыкӀ къышъуаӀуалӀэу зэхэсхырэп. 24Хьау, сикӀалэхэр, къэбар дэгъоп къыслъыӀэсхэрэр#2:24 Мы чӀыпӀэм мыщ фэдэ къэӀуакӀи иӀ: [ащ фэдэу шъумышӀэ, сыда пӀомэ шъощ пае къэбар дэгъоп зэхэсххэрэр]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп., Зиусхьаным ицӀыфхэр къызэӀэшъогъахьэх. 25Зы цӀыфым адрэ цӀыфым лые зырихкӀэ, Тхьэм изэхэфын, ау хэта лӀыкӀо фэхъущтыр Зиусхьаным емыкӀун бзаджэ зышӀэрэм?» Ау кӀалэхэр ятэ къыӀорэм едэӀугъэхэп, сыда пӀомэ Зиусхьаным хьадэгъур ахэм афигъэнэфэгъэхагъ.
26КӀалэу Самуел ыныбжь нахьи нахь хахъощтыгъэ, Зиусхьаныри цӀыфхэри шӀукӀэ ащ къыпэгъокӀыщтыгъэх.
Къэхъущтыр зышӀэрэм Алый икӀалэхэм къяхъулӀэщтыр къызэрариӀуагъэр
27Тхьэм илӀыкӀо Алый дэжь къакӀуи къыриӀуагъ:
«Зиусхьаным ыӀорэр мары:
„Фирхьауным Мысыр хэгъэгум шъущигъэпщылӀ зэхъум
Уятэжъ ятэжъхэм закъыфэзгъэнэфэгъагъэба?
28О плъэпкъба къурмэнышӀэу къысфэлэжьэнэу
Израил лъэпкъ пстэумэ къахэсхыгъэр,
СикъурмэншӀыпӀэ шъукъекӀолӀэным,
Гъомэ ӀэшӀухэр къызпихырэ чъыг мыстхъухэр щыжъугъэстыным,
КъурмэнышӀ чэтэнӀабгъур шъубгмэ апыпхагъэу
Сапашъхьэ шъуитыным пае?
Израил цӀыфхэм сэ сцӀэкӀэ
МашӀокӀэ агъэстырэ къурмэн пстэумэ ащыщхэр
УкъызхэкӀыгъэхэм къаӀузгъэкӀагъэба?
29Сыд пае шъуӀупс къафечъэра
Сэщ пае ашӀырэ къурмэнхэмрэ гъомылэ тынхэмрэ?
Сыда зытехъухьэрэр Сэщ нахь лъэшэу
УикӀалэхэр бгъэлъэпӀэнхэр?
Израил цӀыфхэм сэ къысфагъэшъошэрэ шӀухьафтын
Анахь дэгъухэр къызыфыхэпхыжьзэ, уишӀугъо ухъуныр?“»
30Ащ пае Израилым и-Зиусхьанэу Тхьэм
Джы ыӀорэр мары:
«А лъэхъаным унашъо къышъуфэсшӀыгъагъ:
„О уиуни уятэ иуни егъашӀэм
Сапашъхьэ шъуимыкӀэу шъукъысфэлэжьэнэу“».
Ау Зиусхьаным джы къыӀорэр мары:
«Ар хъужьыхэщтэп, сыда пӀомэ
Сэ зищытхъу сӀотэщтыр
Сищытхъу зыӀуатэхэрэр ары,
Ау мыхъун Ӏаягъэхэр къыспызыӀухьэхэрэр
ЦӀыфхэм япхъэтэпэмыхьэу хъущтых.
31Мары лъэхъан къэсыщт
Ори укъызхэкӀыгъэ уяти шъуилъэкӀ сыкъыхэӀанэу.
Уиунагъо щыщ горэми игъашӀэ жъыгъом нэсыщтэп.
32Израилым итхьамыкӀагъо къэплъэгъужьыщт#2:32 Ижъырэ джуртыбзэмкӀэ атхыгъэ Ӏэпэрытхым мы гущыӀэхэм къарыкӀрэр къыбгурыӀонэу зэхэугуфыкӀыгъэу итэп. Урыс синодальнэ Библием зэрэхэтыр: [СипсэупӀэ итхьамыкӀагъо о къэплъэгъужьыщт].,
Зиусхьаным ынэшӀу Израилым къызэрэщыфэзи,
О уиунагъо ис горэми
ИгъашӀэ жъыгъом нэсыщтэп.
33Сиунэ лъапӀэ къурмэнышӀэу чӀэтынэу,
Зы нэбгырэ закъу ныӀэп къэзгъэнэщтыр,
ЫнапӀэхэр къэонтэгъунхэм,
Ыпсэ хэӀэжьыным пае#2:33 Ижъырэ Ӏэпэрытххэм къэӀокӀэ зэфэшъхьафхэр мыщ дэжьым ащыряӀэх. Урыс синодальнэ Библием зэрэхэтыр: [Уибын щыщ пстэури сикъурмэншӀыпӀэ Ӏусщыщтхэп, унапӀэхэр къэонтэгъунхэм, упсэ ухэӀэжьыным пае]..
Ау уиунэ къихъорэ пстэури
Гурыт ныбжьым итэу лӀэщт.
34УикӀэлитӀоу ХъофныйкӀи ПинхъаскӀи
ГъэунэфыпӀэ сэ къыпфэсшӀыщт:
А зы мафэм ахэр зэдэлӀэщтых,
КъыосӀуагъэм ишъыпкъапӀэ бгъэунэфыщт.
35Къысфэшъыпкъэщт къурмэнышӀыр сэ къахэсхыщт,
Сыгу илъым къытыригъафэу,
Сыгу илъыр къышӀэу ар зекӀощт.
Иунагъо щыщхэр егъашӀэм къурмэнышӀыщтых,
Тхьэихэхым ыпашъхьэ ар итэу
ЕгъашӀэм Ащ фэлэжьэщт.
36Уиунагъо щыщэу псэоу къэнагъэм пэпчъ
А къурмэнышӀым ыдэжь къакӀозэ шъхьащэ фишӀыщт,
Тыжьын ахъщэ тӀэкӀурэ хьалыгъу такъыррэ
Къыритынхэу ащ елъэӀущт.
„КъурмэнышӀым ыгъэцэкӀэн ылъэкӀыщт
ӀофшӀэн горэм сыфэгъаз,
Сшхын тӀэкӀу горэ къырызгъэхъэн слъэкӀынэу“, –
ащ риӀощт».
Currently Selected:
Апэрэ Самуел 2: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
