Апэрэ Самуел 1
1
Апэрэ шъхьэр
Самуел икъэхъукӀэрэ Тхьэм фэлэжьэнэу ар зэраратыгъэмрэ
1Цыуф лӀакъом щыщэу, ефрат лъэпкъым къыхэкӀыгъэу, Елкъан ыцӀэу зы лӀы горэ Ефраим къушъхьэлъэ хэкум итыгъэ къалэу Рэмэтэим-Цэфим дэсыгъ. Ащ ятагъэр Ерэухъам, ятэжъыгъэр Елыхъу, ятэжъым ятагъэр Цыуф ыкъо Тэхъу. 2Елкъан шъузитӀу иӀагъ: зым ыцӀагъэр Хъаннэ, адрэм – Пынин. Пынин лъфыгъэхэр иӀагъэх, ау Хъаннэ сабый хэкӀыщтыгъэп.
3Зиусхьанэу ошъогу дзэхэр зиӀэрылъхьэ Тхьэм шъхьащэ фишӀынэуи, Ащ ыцӀэкӀэ къурмэн ышӀынэуи а лӀыр зыщыщ къалэм икӀыти илъэсым зэ къалэу Щылэу кӀощтыгъэ. Алый икӀэлитӀоу Хъофныйрэ Пинхъасрэ къурмэнышӀхэу Зиусхьаным Щылэу щыфэлажьэщтыгъэх. 4Елкъан къурмэн зишӀыкӀэ ишъхьагъусэу Пынинрэ ащ къылъфыгъэ кӀалэхэмрэ пшъашъэхэмрэ Ӏахьэхэр аритыщтыгъэх. 5Адрэмэ афэмыдаӀоу Хъаннэ шъхьафэу Ӏахьэ ритыщтыгъ#1:5 Мы чӀыпӀэм мыщ фэдэ къэӀуакӀи иӀ: [ащ сабыйхэр иӀагъэпти]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп., сыда пӀомэ Хъаннэ шӀу ылъэгъущтыгъэ, Зиусхьаным сабый къыримытщтыгъэ нахь мышӀэми. 6Зиусхьаным сабый къызэрэримытрэр гукъао щыхъунэу тӀуанэу иӀэм къызэрэрихъонщтыгъэм Хъаннэ ыгу къыгъэцӀыкӀущтыгъэ. 7Илъэс къэс Зиусхьаным иунэ зыкӀокӀэ, тӀуанэм ыгу къыхигъэкӀыщтыгъэ, мыдрэр, гукъао зэриӀэм нахь хэмылъэу, шхэщтыгъэп. 8Арти ишъхьагъусэу Елкъан мыщ фэдэу къыриӀуагъ: «Хъаннэ! Сыда узкӀэгъыри, узкӀэмышхэри, угу къэзгъэцӀыкӀури? ШъэуипшӀэу уиӀэн ылъэкӀыщтыгъэм оркӀэ сыанахь лъэпӀэнба сэ?»
9-11Зы илъэс горэм Щылэу кӀохи Зиусхьаным иунэ зыщэшхэхэм, зыщешъохэм Хъаннэ къэтэджыжьыгъ. Лъэш дэдэу ыгу еӀэжьыгъэти, пчъэнымрэ гъынымрэ зэдыхэтхэу бзылъфыгъэр Зиусхьаным елъэӀузэ, тхьэлъанэ ышӀыгъ: «Зиусхьанэу ошъогу дзэхэр зиӀэрылъхьэр! СигукӀае къыплъэӀэсмэ, ащ ипэгъокӀэу гукӀэгъу къысфэпшӀынышъ, сыпщымыгъупшэу, угу сыкъэкӀыжьэу, уиӀумэт шъао къептмэ, ежь къыгъэшӀэщтым фэлэжьэнэу, Зиусхьаным ар естынэу#1:9-11 Мы чӀыпӀэм мыщ фэдэ къэӀуакӀи иӀ: [сани шъуати ар яшъощтэп]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп., ышъхьашъо егъашӀэми чан нэсымыгъэсыхэнэу тхьэлъанэ сэшӀы».
А уахътэм къурмэнышӀэу Алый пчъэихьапӀэм дэжь щытыгъэ тетӀысхьапӀэм тесэу Зиусхьаным иунэ лъапӀэ чӀэсыгъ.
12ЫӀупэхэр хъублаблэхэу ар Зиусхьаным бэрэ елъэӀуфэ Алый къыӀуплъыхьагъ. 13ЫгукӀэ зэриӀожьзэ, ышъхьэ фэгущыӀэжьрэм фэдэу, ыӀупшӀэхэр ыгъэхъублаблэхэу Хъаннэ щысыгъэти, ар утэшъуагъэу Алый къышӀошӀыгъ. 14Арти Алый ащ риӀуагъ: «Сыдигъо нэс уутэшъуагъэу ухэтыщта? Чэфыр зыкӀэгъэкӀыжь». 15Ащ иджэуап Хъаннэ къыритыжьыгъ: «Хьау, сизиусхьан, сэ гукӀаем сызэлъиштэгъэ бзылъфыгъ, унагъуи сис, узгъэутэшъони зыӀузгъэфахэрэп, ау сыгу илъыр зэкӀэ Зиусхьаным фэсэӀуатэ. 16УсиӀумэт, ау бзылъфыгъэ мыхъатэ фэдэу укъысэмыплъ, сигуузышхорэ сызгъэчэфынчъэмрэ якъэбар джы нэс сӀотагъэ». 17Алый ащ къыриӀожьыгъ: «Зыгъэрэхьати шъуадэжь гъэзэжь, узэрелъэӀугъэр Израилым и-Тхьэ къыпфишӀэщт». 18Арти къыриӀожьыгъ: «УиӀумэт уинэшӀукӀэ еплъ!» Ар къыӀуи игъогу техьажьыгъ, шхэуи ар хъужьыгъэ, нахьыпэм фэдэуи чэфынчъэжьыгъэп.
19Пчэдыжьым Елкъан ибын къэтэджыжьыгъ. Зиусхьаным шхьащэ фашӀи ядэжь, Рамэ, къагъэзэжьыгъ. Елкъанрэ Хъаннэрэ зызэкӀэгъухэм бзылъфыгъэм илъэӀу Зиусхьаным къызэхихыгъ. 20Уахътэ зытешӀэм Хъаннэ ышъо сабый хэфагъ, шъауи къыфэхъугъ. Самуел цӀэу ащ фиусыгъ. Хъаннэ ыӀощтыгъ: «Зиусхьаным селъэӀугъэти, ар къыситыгъ».
Самуел Тхьэм фэлэжьэнэу зэрэратыгъэр
21Зиусхьаным илъэс къурмэн фашӀынышъ, Ащ елъэӀунхэм пае Елкъанрэ унагъом исхэмрэ зэгъусэхэу Щылэу кӀуагъэх. 22Хъаннэ ахэм адэмыкӀоу илӀ риӀуагъ: «Сабыир быдзыщэм пызгъэзыжьэу зыкъызиӀэткӀэ, сэр-сэрэу Зиусхьаным иунэ сщэнышъ, Зиусхьаным ыпашъхьэ итэу фэлэжьэным пае егъэшӀэрэу къэзгъэнэщт». 23Ишъхьагъусэу Елкъан шъузым къыриӀуагъ: «Узэрэфаеу зекӀо; быдзыщэр екъуфэ егъашъу; Зиусхьаным ыӀуагъэр къыбдэрэхъу». Шъузыр къани зегъэшъокӀыфэ сабыир быдзыщэм ригъэшъуагъ. 24КӀалэм ибыдзешъон зекъум, илъэсищ зыныбжь шкӀэхъужъыр, шъонтым из санэр, хьаджыгъэ дзыожъыер къыздаштэхи янэрэ ыкъорэ Зиусхьаным иунэу Щылэу дэтым кӀуагъэх. А лъэхъаным кӀалэр джыри сабыигъ. 25#1:25 Мы чӀыпӀэм мыщ фэдэ къэӀуакӀи иӀ: [Ар къащи Зиусхьаным ыпашъхьэ рагъэуцуагъ; мэфэ гъэнэфагъэхэм Зиусхьаным фишӀыщтыгъэ къурмэныр ащ ятэ къурмэн ышӀыгъ. ЕтӀанэ кӀалэр къащагъ]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп. ШкӀэхъужъыр шӀуабзи, янэ шъэожъыер Алый къыфищагъ. 26Хъаннэ къыӀуагъ: «О сизиусхьан, упсэ Зиусхьаным бэ регъэгъашӀ! Уапашъхьэ исэу Зиусхьаным елъэӀущтыгъэ бзылъфыгъэр къэошӀэжьмэ, сизиусхьан, ар сэры; 27Мы кӀалэр ары Ащ сызфелъэӀугъагъэр, сызэрелъэӀугъэри Зиусхьаным къысфишӀагъ. 28Ежь къыгъэшӀэщтым фэлэжьэнэу Зиусхьаным джы ар сэ есэты, сыда пӀомэ ар къыситынэу Зиусхьаным селъэӀугъагъ». Ар къызеӀом ыуж Зиусхьаным фэлэжьэнэу Хъаннэ кӀалэр ащ къыгъэнагъ.
Currently Selected:
Апэрэ Самуел 1: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
