Rooma 8

Ufayeddehi aniina

1Amaydo kado, Masiix kin Yeesusudde yane mari qitscat yaalloona makinooni. 2Amayim lel, Masiix kin Yeesus araxah Ufayi sercat aniina yaxayeya, zambe kee rabit sercatko finja koh yoxoyeh yanemhi sabbatah kinni. 3Amayim lel, xazotta taanishshemhi sabbatah sercat abo taanem, Yalli abeh yane. Ishi Barha zambi beezza yakko zambe-le xazottat xibarah dhirhiyeh, zambe lel xazottadde yiqhtsice. 4Amayim lel, Ufayi araxah kibah, xazottat araxah adiinnixe marak, amaa sercat farhshiisha xaqqi nottadde yakmalo ciloh kinni. 5Inkoh tamaa xazottat araxah yadiye mari, amaa xazottaatim kinni xangaladde loonim. Tamaa Ufayi araxah yadiye mari laakin, Ufayim niyadde lon. 6Xazottaatim xangaladde yaxeesebiinim raba kinni, Ufayim xangaladde yaxeesebiinim laakin aniina kee maaxiyo kinni. 7Xazottat xangal Yallih didde kinni; Yallih sercat miyaabbe, yaabbo lel mirhicta. 8Xazottadde yane mari lel Yalla xedenishoona mirhiicaana.

9Atin laakin, Yallih Ufayi rummah sin addadde sigah yekkemko, Ufayedde kibah xazottadde mitaniini. Masiix Ufaye hinti kaa tiya maki. 10Masiix sin addadde yinniyemko, walaa sin nabsi zambi sabbatah rabo kibah, Ufayi xaqqi sabbatah aniina sinah yaxaye. 11#Rooma 6:4; 1 Korintos 3:16; 6:14; 2 Korintos 4:14Tamaa Yeesus rabaako uguse tiyahi Ufayi sinadde sigemko, tamaa Yeesus rabaako uguseti sin addadde siga ishi Ufayehi araxah rabe sin nabseh aniina akah yaxaw kinni.

Masiixlih waarish yakkiinim

12Amaydo, yi sacul, xazottat araxah marno ciloh, xazottat cida malino. 13Xazottat araxah marteenimko, rabtoona kitin, nabsi abitto Ufayeh tigdifiinimko laakin martoona kitin. 14Amayim lel inkoh Yallih Ufayi santisha mari, Yallih cindham kinoonimhi sabbatah kinni. 15#Galaatiya 4:5-7Atin tamaa, “Abba! Wobba!” narhxeh akah deecimna Yallih cindham akah takkin Ufaye kinni kabbatteenim kibah, mashshidde sin yadabbe garuuzinnat ufaye maki kabbatteenim. 16Nanu Yallih cindham kinom Yallih Ufayi isheh ni ufayelih yakkeh kinni yashhidem. 17Amaydo, Yallih cindham nekkemko, Yallih waarish kino, Yallih waarish nekkemko lel inkidde Masiixlih waarish kino. Kaalih waaxelta nengelemko gantah kaalih nanabem takke.

Niiroohit nabne

18Ta kado adde nanino waqhtehi waaxelti, tamaa nottah tamballaw le nabneelih kabkabbot malem balih kinni lowam. 19#Erhedhdhö 3:17-19Makhaaliqho lel amaa Yallih cindham adde yambulluwin max mango hambereeroolih ilaalak tane. 20Amaa makhaaliqho lel ishi farhih akkekkah, tamaa abshiisha tiyahi sabbatah hannas tekkeh tane, laakin cag yane. 21Amaa cag lel, makhaaliqho isheh ishi abrasti madhdhuwaako finja geyto kinni, finja kee Yallahi cindhamhi nabnelle lel tamaato kinni. 22Umbuka makhaaliqho umlaalot waaxeltah balih kado fanah inkidde araadishak tanem naarhige. 23#2 Korintos 5:2-4Amaa makhaaliqho bisa akkekkah, tamaa Ufayi afti daro le marak nanu gantah ninneh, Yallih cindham nakko kee ni nabsi muuca geyo addaako araadishak hambereeroolih ilaalak nane. 24Amayim lel nanu ta cagadde gargeerimnemhi sabbatah kinni. Tambulluwemih cag abitaanam cag maki. Yablemih cag abita tiyah miyatti yane? 25Ablinnixinomuh cag abinnemko laakin, sabreelih ilalna.

26Amayim balih, Ufayi ni tantodde ni xata. Dhaaciminno akah nolle taneekah minaarhige, laakin Ufayi isheh waani hinnim yamoofoyeh ni idhdhadde yakkeh noh tillaaba. 27Amaa afcaado meecetih idhdhitati lel Ufayi xangaladde ayim yaxeesebem yaarhige. Amayim lel Ufayi Yallih farhi balih yinqiddise marahi idhdhadde tillaabamhi sabbatah kinni. 28Tamaa Yalla kixinah kaa xagara balih decsiime marah ummannim Yalli mecaanih akah abam naarhige. 29Usuk mango saculhi fanadde riish yakko ciloh, tamaa yookomeh yeerhege mara, kaa Barhahi misleh yammangadoona ciloh yookomeh yixiggire. 30Usuk tamaa yookomeh yixiggire marah gantah akah deecimeh, tamaa akah deecime mara yisxiqqiqheh, tamaa yisxiqqiqhe mara gantah yeynebe.

Umman geedit Yallih kaxano

31Tayimhi sabbatah ayim narhxo kinni? Yalli nottaalih yekkek sarrah, ni didde yakko dhiicati miyatto kinni? 32Ishi Barha umman nottah yaxaw suumutinnixeti, aaginah kaalih ummannim amaa ginah noh axaye waya? 33Yalli dooreh yane mara taksisem miya kinni? Yalla kinni ku yasxiqqiqheti. 34Amaa yaqhtsiceti lel miyatto kinni? Tamaa rabeti, amayimko ziyaada lel, rabaako uguteti, Yallih mizgi gabooko yaneti, ni idhdhadde lel noh tillaabati Masiix kin Yeesus kinni. 35Masiix kaxanooko ni barhishati miyatto kinni? Cazaab, qadaab, hadaano, hido culul, hido casno, camaza hido sefi?

36 # Zaabur 44:22 “Ku idhdhadde max-yeenim ni agdifuk yanin;

tamruxxude ciidodde loyyimne”

yarhxiinim tunkuttubeh tane. 37Maale, umbuka taymidde, ni kixin tiyahi araxah tamaa yamlike maraako nashshe. 38Amaydo, hido rabi hido aniina, hido malaykut hido manabottit, hido kado tanem hido niiroh tamaato lem, hido xaylit, 39hido xafta, hido samta, hido akim umbuka ta makhaaliqhodde Yallih kaxano ni Maddara kin Yeesus Masiixidde linoyaako ni barhisho dhiicati miyanemih thummut kiyo.

Currently Selected:

Rooma 8: SCC

Highlight

Compare

Copy