Rooma 2

Xaqqe kin Yallih firde

1 # Maatiyos 7:1-2; Luukas 6:37 Amaydo, aketto yafride tiyak, farhe tiya tekkeh, takale malito. Atu garo akah tifridem isheh abtamhi sabbatah, tamaa inkoh aketto akah tafridemih isheh ishe akah aqhtsicuk tanito. 2Nanu lel ta gina lem aba maralle Yalli rumma kin firde alle oobisham naarhige. 3Atu ta gina lem aba mara yafride tiyak, atu isheh lel tena balih aba tiyak, Yallih firdeeko tassaacehi kolle iggida? 4Hido lel kaa mango mecaani, curtayyo kee sabre dhaytak tanito? Yallih mecaani tooballe ku bahto wagiitam mitaarhige? 5Ishi kafna kee afcaadot tiraareh tamaa xaqqe kin Yallih firdi adde yambulluwe kurat lellecih, atu isheh ishelle kura ascukuruk tanito.

6 # Zaabur 62:12; Missilit 24:12 Yalli umman tiyah kaa-kaa abittot balih akah yaxaw kinni. 7Tamaa mecaani abak nabne, xishma kee rabe wayaanam sabreelih wagiye marah, umman geedit aniina akah yaxaw kinni. 8Too rumma xinayaako xaqqi-wayto kabbaatah, ishi nabse kixin maralle, kura kee xurtaame alle obto kinni. 9Inkoh umaani abinnan tiyalle; erherhih Yahuuddolle, sarrah lel Giriiktolle, cazaab kee qadaab alle oobo kinni. 10Inkoh mecaani abinnanti laakin, erherhih Yahuuddo, sarrah lel Giriikto, nabne, xishma kee maaxiyo geyoona kinon. 11#Gabbaacime Sercat 10:17; Fartottit hi Abittot 10:34 Amayim lel Yalli ayfalaala malemhi sabbatah kinni.

Yallih firde kee Moosat sercat

12Inkoh Moosat sercat hinnim zambe abe mari, Moosat sercat hinnim yalawna kinon. Sercat luuk zambe abe mari lel amaa sercatah yamfarradoona kinon. 13Yallih nifidde, sercat aba mara kinni tatxaqqaqho lem kibah, sercat yaabbeh abinnixe mara maki xaqqi-wannun. 14Sercat hin Aki-mari, thabiicaako amaa sercatalle tanem aban gedda, usun sercat aalle wayoona kibah sinneh sercat kinon. 15Tayimhi sabbatah sercat ten afcaadodde yunkuttubeh yanem yaybulluyin. Usun abaanam araxalle tanem makinam ten afcaadohi dhaw akah warishayaako, ten xisaab isheh ten yaksise hido akah caara. 16Anu warroyshe mece wari akah yarhxeekah, Yalli Masiix kin Yeesus araxah xiyaw sirrit adde yafride maxadde, tayim takko kinni.

17Atu laakin, Yahuuddo ishek abtemko, sercatadde cikkishitteh, Yallah falittemko; 18sercat ku labcaadishemhi sabbatah, kaa farhi teerhegemko kee tashshem barhishshemko; 19-20tamaa sercatko kaamil kin irhga kee rumma litomhi sabbatah, atu isheh intit hin marahi santisheena kitom, ditedde yane marahi ifotta kitom, sorheenitih ustaaz, irroh lel mudarris kitom teemenemko, 21atu amaydo, aki mara yayduruse tiyak, ishe mitayduruse? Garacaanamko tayduruseh, isheh garacta? 22“Xiyawti yaznaw kaalle mitane” yarhxe tiyak, isheh tazniye? Asnaam akko nicibtoya, isheh maqhdas carwa garacta? 23Yallih sercatah falitta, sercat tagdileh Yalla tascundhuwe? 24Taymih lel: #Isayas 52:5“Sin sabbatah Aki-marahi addalle Yallih migac wattiime” yarhxiinim tunkuttubeh tane.

25Askok-kalum yamficem sercat dhawudhdha gedda kinni. Sercat tigdilemko laakin, ku askok-kalum, askok-kalum abe waytem balih yakke. 26Amaydo, askok-kalum abinnixeti sercat akko yarhxem abemko, kaa askok-kalum wayto askok-kalumudde miloyyimta? 27Atu yunkuttube sercat litoh askok-kalum abteh tanito hanuk, sercat yagdile tiyak, nabsi askok-kalum abinnixeti, sercat dhawrhaya, ku yafrado kinni. 28Irooko bisa Yahuuddo yakkiinim Yahuuddo xiyaak maabta. Nabseeko bisa aban askok-kalum lel askok-kalum miyakke. 29#Gabbaacime Sercat 10:16; 30:6Laakin Yahuuddo yakkiinim addaako kinni. Askok-kalum yakkem lel afcaadooko Ufayeh kibah, yunkuttube sercatah yakke askok-kalum maki. Ta gina le xiyawtih cawat lel xiyawko akkekkah Yallaako kinni.

Currently Selected:

Rooma 2: SCC

Highlight

Compare

Copy