Waxye 7

Israa-eelko 144,000 xiyawtiyalle maxtam alle gaxe

1 # Ermiyaas 49:36; Daaniyeel 7:2; Zakariyya 6:5 Taymik sarrah, amaa affara malaykatti baarhot affara nukurudde sooleh uble. Baarhot affara xaaxatti baarholle, badalle, hido akkinnan xarhalle xaaxayshamko lel deesak yine. 2Sarrah, yane Yallahi maxtam yibbirhe aki malaykatti ayrommaaxaako foorolle awcuk uble. Tamaa baarho kee bad biyaako reeza akah tomxoyeh tine affara malaykattoh wac-yerhxeyaako akah deecimeh: 3#Yexetsqeel 9:4,6 “Nanu tamaa ni Yallahi khaddamteeko ten-ten dambaralle maxtam akko haynam fanah, baarho, bad hido xorh mibiyaakina” akko yerhxe. 4Maxtam alle gaxe marahi manga lel ayidhdha kinam oobbe. Umbuka Israa-eel kishoshko maxtam alle gaxe mari lel bool kee marootom kee afar shixtiya kuuk yinin:

5Yahuudaati kishooko maxtam alle gaxem lamman kee taman shixtiya kuuk yinin,

Ruubeen kishooko lamman kee taman shixtiya,

Gaad kishooko lamman kee taman shixtiya,

6Aasheer kishooko lamman kee taman shixtiya,

Naftaali kishooko lamman kee taman shixtiya,

Menashshet kishooko lamman kee taman shixtiya,

7Simcoon kishooko lamman kee taman shixtiya,

Leewiiti kishooko lamman kee taman shixtiya,

Yissaakhaar kishooko lamman kee taman shixtiya,

8Zebuuluun kishooko lamman kee taman shixtiya,

Yoosuf kishooko lamman kee taman shixtiya,

Binyaamin kishooko maxtam alle gaxem lel lamman kee taman shixtiya kuuk yinin.

Mangum mango xiyaw umbuka wathunko

9Taymik sarrah, kulux-erhxe, taykinna lel, umbuka wathunko, inkoh kishosh, xiyaw kee waaniiko mangum mango xiyaw walaa inketti loolaysho taanaya, cado sara sariteenih, tamri xakuk gabubudde yibbirhinyaako, amaa nugus-kurse kee Leemih nifille sooleenih yinin. 10Wac-yerhxiinih lel: “Garger nugus-kurselle defeyak yane ni Yalla kee Leemi tiya kinni!” yerhxiinih andhaxak yinin. 11Amaa malaykut lel inkoh amaa nugus-kurse, naba mara kee affara ufayletta makareenih daw-arhxuk yinin. Amaa nugus-kursehi nifille kumeenih lel Yallah yucbudin. 12Tahe lel arhxuk yinin: “Amin! Fayla, nabne, kas, xamde, xishma, xayla kee maso umman gedda kee umman gedih ni Yallah takkoo! Amin.”

13Sarrah, amaa naba maraako inketti tahe yok yerhxe: “Ta cado sara sarittem miya kinooni, awlaako lel yemeetiini?” 14#Daaniyeel 12:1; Maatiyos 24:21; Markos 13:19Anu lel: “Yi casa-abba, atin taarhigin” akko erhxe. Usuk lel: “Ta mari tamaa naba waaxeltaako yewce mara kinon. Sinni sara cakalisheenih lel Leemi biiloh caddoyshen” yok yerhxe. 15“Amaydo, usun Yallih nugus-kursehi nifille yanin, kaa macbadadde lel bar kee lellecih akah yacbudin; amaa nugus-kurselle defeyati lel ishi aniinah ten silaalisho kinni. 16#Zaabur 23:1-2; Yexetsqeel 34:23; Isayas 49:10; 25:8 Kamboh safriitoona makinooni, bakhaaritoona lel makinooni, ayrottat lacna kee, harur ten dhafo maki. 17Amayim lel, tamaa nugus-kursehi fanadde yane Leemi ten loyna yakkeh, tane layet raxeena fanah lel ten santisheyaako, Yalli ten intit hi dhiimo inkoh akah kalo kinamhi sabbatah kinni.”

Currently Selected:

Waxye 7: SCC

Highlight

Copy

Compare