Filibbi 4
4
1Amaydo, anu kixiniyoh, akah saanah, yi xeden kee yi bor kin yi kaxantoolit kin yi saculo, Maddaradde isbita.
Asuuso, aydukumusnan kee dhaaco
2Ewdiya kee Sintike Maddaralle sittiya geyoona ten dhaacimak aniyo. 3Yoo, rummaahit zoobattok, kotta gantah ta sayyo xatto ku esserak aniyo. Usun Kaleemes kee aki khidma yottaalih yangale marahi migoc aniinat kitaaballe akko yaneya kee yottaalih, agaggaagalle mece ware yukhdume mara kinon.
4Umman gedda Maddaradde xedenanta; malammih arhxo kiyo, xedenanta. 5Sin xiyaawinna umman tiyah tamadhdhagoo. Maddari kab-yerhxeh yane. 6Ummannim salaat kee dhaacoh, xamdeelih, sinni essero Yallalle kab-ishanta kibah, walaa inkimih manshaaqhalina. 7Umbuka fahaamaako aganalle kin Yallih salaam lel, sin afcaado kee sin niya Masiix kin Yeesus araxah dhawrho kinni.
8Abayshimalle, yi saculo, rumma akkinnannim, xishma-lem akkinnannim, xaqqe akkinnannim, tsitstsiyam akkinnannim, win-arhxinnannim, cirhe aallinnannim, ashshinnannim hido fayla akah eeddam tinniyemko, tayimhi sabbatah exeeseba. 9Inkoh yottaako tudrusiinim kee kabbatteenim kee toobbiinim kee tubliinim abanta, maaxiyot Yalli lel sinlih yakko kinni.
Yallih kelo
10Dherh waqhtek sarrah, yottah litin xaaliyo gaxteenih tuscussubiinimhi sabbatah, nabaatih Maddaradde xedenak aniyo. Atin rummah yoh xaalitteenih tinin, laakin caashir luuk mitiniini. 11Tayim arhxe gedda, yi farhshishsham liyoh maki. Amayim lel, farhe gondodde inniyeh liyomuh yalaggiinim labcaadeh aniyomhi sabbatah kinni. 12Inkoh xiyaa farhshishsham yaalliinim aarhigeh, xiyaa dhictam yaalliinim aarhige. Umman ginah farhinnan gondodde, xayi kee safradde, geyto kee waytoolih aaginah yadiinimhi sirre labcaadeh aniyo. 13Tamaa yi yaysiriye tiyahi araxah ummannim abo dhiica.
14Yi waqhaaqhac yoolih xazziilitteenimih lel mecem abten. 15#2 Korintos 11:9 Atin Filibbiiti xiyawak, anu erherhih mece warehi khidmah Makedooniyaako awcuk iniyo gedda, sinko bextih muttuxuwah yakko kabbatnanah, aki kaniisa yottaalih mangalinnam, atin sinneh taarhigin. 16#Fartottit hi Abittot 17:1Tessaloniikelle aniyuk gantah inkoh lamma gedda, yi farhshiisha xato yoh dhirhiiten. 17Anu tamaa sin muttuxuwahi fire sinah tammango erhxeh kibah, sin muttuxuwa farheh maki. 18#Muuca 29:18Yi dhictah yooko fertam kabbaateh aniyo. Tamaa Ebafroditosulle farteenim, basak-yarhxe ure leya, Yalla xedenishah kabbaatimta sadaqhaalih, mece sakaye geyeh aniyo. 19Yi Yalli ishi nabne le gadda balih, Masiix kin Yeesus araxah sin farhshishsham inkoh sinah yaxaw kinni. 20Ni Yalla kee ni Abbah lel umman gedda kee umman gedih nabne takkoo. Amin.
Abayshimat salaamta
21Inkoh Masiix kin Yeesusudde tane umbuka yinqiddise marak salaamat akko yoh erhexa. Yottaalih yane sacul salaamat sinak yarhxin. 22Yinqiddise mari inkoh, fertoh lel Roomaati naba nugus hi rooshanadde yane mari salaamat sinak yarhxin.
23Maddara kin Yeesus Masiix nicma sin ufayelih takkoo.
Currently Selected:
Filibbi 4: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
