Yacqoob 3

Anrab yabbirhiinim

1Yi saculo, nanu tamaa yayduruse marak sirii ginah namfarrado kinom taarhigiinimhi sabbatah, mango marak mudarrisiin makkina. 2Amayim lel mango araxah andafinnamhi sabbatah kinni. Akkinnanti tamaa yarhxemih andafite wayemko, usuk gadma hin xiyawto yekkeh, umbuka ishi nabse gantah yabbarho dhiica tiya kinni. 3Faaris noh yam-azzazo ciloh afofudde lugam akko hayna, umbuka ten nabse lel amaa tiyah santishna. 4Taykinna lel dooniika tayidhdha nabaya, dhacuma xaaxattah duffuumta hanuk, tamaa naakuda alle farhinnan gabolle cindha sukkaanah kinni santishimanaam. 5Amayim balih, anrab cindhaa karima kinni hanuk, naba caleh falita. Ubula, garab ayidhdha naba hanuk cindha thinqillicoh bolola. 6Anrab lel gira yekkeh caalamti umaani kinni. Anrab ni karimhi addadde yakkeh, umbuka ni nabse masxishayaako, umbuka aniinat araxadde gira hayah, jahannab giradde saya. 7Umbuka caynah alluula kee kimbir, mexeltam kee badti ufayle, xiyawti ten yagziye, yingizziinih lel yanin. 8Anrab yagzaw dhiica xiyawti laakin miyane. Acrufinnixe uma tiya, xiyaa yagdife xinzeeko yemmeegeya kinni. 9#Erhedhdhö 1:26Kayyah abnah ni Maddara kee Abba faylishinna, kayyah abnah lel Yallih misleh yunkhulluqhe mara abarna. 10Inki afko fayla kee abaaro tawce. Yi saculo, tayim takko eeddam maki. 11Siyak inki afko mece laye kee mulxu kin laye raxaho? 12Yi saculo, indacarto oolac bahtaho, hido cinab xarha indacaaro bahtaho? Mulxu-le laye raxa siyak lel mece laye miraxa.

Kas aganaako

13Sin fanadde kas-le tiya kee fahaama leti miyatto kinni? Ishi mece xaalah kasle xiyaawinnadde ishi abitto yayballaw. 14Laakin sinni afcaadodde dhacuma ashshiino kee sinni nabsehi kaxano teelliinimko, mifalitina, rummi bukalle lel mizirabbitina. 15Tayim aganaako ooba kas makiiki, baarhootim, xazottaatim kee ibliisim kinni. 16Ashshiino kee nabsi kaxani alle yanelle, cigirgir kee uma abitto tane. 17Laakin aganaako kin kas erherhih tsitstsii tiya kinni, sarrah lel maaxiyo le tiya, mece tiya, aki xiyawhi mablo kabbaata tiya, raxmaako yemmeege tiya, mece fire le tiya, babbarhishnan hin tiya kee doolab hin tiya kinni. 18Xaqqi fire lel maaxiyodde maaxiyo aba marah tamzirriye.

Currently Selected:

Yacqoob 3: SCC

Highlight

Copy

Compare