Fartottit hi Abittot 22

1“Sacul kee abbubuk, ta anu akah ammoogotik aniyo gondo yoh oobbaanta” yerhxe.

2Usuk Cibriyaati waanih aalih waanishak yanem yoobbin gedda, meceetih sik-yerhxin. Usuk lel:

3 # Fartottit hi Abittot 5:34-39 “Anu Kilikiyaati Tarsusulle yooboke Yahuuddo kiyo. Laakin Gamli-eel rigidille lel ni abbubhi sercat cilleh adrusiyuk ta daafolle kinni carsimem; tamaa atin kaafa inkoh akah kitiiniikah lel Yallah mango cishqe le tiya kuuk iniyo. 4#Fartottit hi Abittot 8:3; 26:9-11Ta Yallih Araxalle yadiye mara rabi ten guddussa hadaano akah abak, labha kee sayyo inkoh arhuweh asxibishiyuk iniyo. 5Tayim abemih lel sheekhat manabotta kee inkoh naba marih akotta yoh yashhadoona dhiican. Usun lel Dimaashqalle yine Yahuud sacul fanah jawawub yolle yoxoynih yinin. Amalle edeyeh ta xiyaw urhuweyaako Yerusaalem fanah yanqatstsacoona ten baaho izne luuk iniyo.

6 # Fartottit hi Abittot 9:1-19; 26:12-18 Araxadde adiyuk lel Dimaashqah kab-erhxe gedda, lellecti abrha takkeh iggidin waqhte, naba ifi caranko yi lamma-galelle gamooko iffowe. 7Anu lel baarholle radeyaako: ‘Shaa-uul, Shaa-uul, aymih yi hadanak tanito?’ yok yarhxe dhaw oobbe. 8Anu lel: ‘Miyatto kito Maddara?’ erhxeh alle edebbe. Usuk lel: ‘Anu Naazret Yeesus atu hadantaya kiyo’ yok yerhxe. 9Yoolih yine mari amaa ifo yublin, yottaalih waanishe tiyahi dhaw laakin mabbinnooni. 10Anu lel: ‘Ayim abo, Maddara?’ akko erhxe. Maddari lel: ‘Ugutaaki Dimaashqa tedeeh, ayim abto kolle tanem amalle koh warishoona kinon’ yok yerhxe. 11Amaa dhacuma ifih sabbatah ablo mirhiiciyo, amaymih tamaa yottaalih yine mari gabadde yi zarhak Dimaashqa gufe.

12Dimaashqalle tine Yahuud inkoh faylishan, wuli Yalla mashshiitah sercatah yadiye Xananiya akko yarhxin labhatti yine. 13Usuk yottalle yemeeteh, yi nifille daw-yerhxeyaako: ‘Shaa-uul yi sacal, ishi mablo kabbat’ yok yerhxe. Amaa geddaakoh malammih ablo dhiiceyaako, kaa uble. 14Usuk lel: ‘Ni abbubhi Yalli kaa farhi taarhago, Xaqqi-wanna tablo kee waanishak kaa taabbo ku dooreh yane. 15Tayim lel tamaa tublem kee toobbemih umman tiyahi nifille shaahid akah takko ciloh kinni. 16Kado lel ayim ilaalak tanito? Ugutaaki, tinthimmiqheh ishi zambe cakalishsheyaako, kaa migacah deecim’ yok yerhxe.

17Yerusaalem gaxeh maqhdas caredde issilliye gedda lel himma xabe. 18Amaa mablodde lel Maddari: ‘Yi zacabah abta shahaada koh mikabbaataanamhi sabbatah Yerusaalemko dheh ewec’ yok arhxik kaa uble. 19Anu lel: ‘Maddara, tamaa kottah yeemene mara barhsime sunagoogitidde ten axbishe gedda kee ten aatuke gedda akkuk inem usun sinneh yaarhigin. 20#Fartottit hi Abittot 7:58 Ku shaahid kuuk yine Istifaanos biilo xarhen gedda, anu gantah inneh tenlih gaba-beeteh amalle daw-erhxeh iniyo; kayya yigdife marih sara lel dhawrhak iniyo’ akko erhxe. 21Usuk lel: ‘Anu dherh baarholle yane Aki-mara fanah ku faro kiyok, aduu’” yok yerhxe.

Bawlos kee Roomaati caskar filcohi manabotta

22Amaa xiyaw Bawlos ta waanitta fanah kaa yoobbin. Sarrah sinni dhaw wac-isheenih: “Ta xiyawti maro alle mitanemhi sabbatah, baarhot garbaako asac nok ishanta!” yerhxin. 23Amaa xiyaw andhadhdhaxak sinni sara cidenyaako buure cashshaballe cabuubukusak, 24amaa Roomaati caskar filcohi manabotta aymih taginah kayyalle andhadhdhaxak yiniinim yaarhago ciloh macaskaradde orbishenyaako sabaceenih kaa yamarmaroona ten yeemere. 25Kaa sabacoona kaa yurhuwin gedda, Bawlos amalle daw-arhxuk yine bool caskartiyah manabottak: “Roomaati barha walaa inki xukme hinnim sabacto qaanun koh yasmixe?” akko yerhxe. 26Amaa bool caskartiyah manabotti tayim yoobbe gedda, amaa Roomaati caskar filcohi manabottalle yedeyeh: “Atu ayim kinni abak tanitom? Tati Roomaati barha kinni” akko yerhxe. 27Amaa Roomaati caskar filcohi manabotta lel yemeeteh: “Iski yoh warish, atu Roomaati barha kito?” akko yerhxe. Usuk lel: “Yoo” akko yerhxe. 28Amaa Roomaati caskar filcohi manabotti lel: “Anu ta jinsiya mango solaadih kinni dhaamem” akko yerhxe. Bawlos lel: “Anu ubkaako Roomaati barha kiyo” akko yerhxe. 29Amaa kaa yamarmaroona amalle yine mari akkanih amakkeeko yicrhiyin. Amaa Roomaati caskar filcohi manabotti lel usuk Roomaati barha kinam yeerhege gedda, kaa yurhuwemhi sabbatah mashshiite.

Bawlos araballe kab-yarhxe

30Malammit max lel Yahuud aymih kaa yiksisiinim yaarhago ciloh kaa yiftixe. Sheekhat manabottit kee arabat zooba lel alle anniinnanikkeeko yakattoona ten yeemereh, Bawlos baaheyaako ten nifille soolishe.

Currently Selected:

Fartottit hi Abittot 22: SCC

Highlight

Compare

Copy