3 Yohannis 1
1
Salaamta
1Naba tiyaako, rummah kixiniyo yinkixxine Gaayos fanah.
2Yinkixxine tiyaw, ku rooxi meceetih akah yaneeka balih umman xaaja lel meceetih kottaalih tannaw kee mece caafiyat taallo koh dhaacimak aniyo. 3Atu rummadde akah gerhak tanitookah, sacul yemeetiinih ku rummah yishhidin gedda, amayim mangum yi xedenishshe. 4Yi cindham rummadde gerhak yaniinim aabbem, tayimko naba xeden maliyo.
Xato kee didde
5Yinkixxine tiyaw; walaa usun cusub mara yakkoona kibah saculuh abak tanitomuh umun kito. 6Usun kaniisat nifidde ku kaxanoh yishhidiinih yanin. Yallah missil araxah ten sukuukuytemko mecem kinni. 7Migac Masiix idhdhah yewciinih yanin, ummatko inkim mikabbaatinnooni. 8Amaydo rummah inkidde khidma nangalo ciloh, ta gina le mara baclayshno nolle tane.
9Anu kaniisa fanah wulim uktube. Diyotrofes, tenadde erherh tiya yakko duumutaya laakin, ni miyaqhbile. 10Amaydo, anu emeetemko, usuk abak yane abittot kee umam waanishak ni xamitak yanem, kaa ayzakkaro kiyo. Tayim kaa dhiicamko, sacul kabbaato xina, abo farha mara deesa, kaniisaako lel ten yayyaace.
11Yinkixxine tiyaw, mecemih kibah umamah mixarassimin. Micim abinnanti Yallaako kinni; umam abinnanti Yalla yubleh miyane. 12Demeetriyos umman tiyaako shahaada geyeh yane, rummi gantah isheh akah yishhideh yane. Nanu gantah akah nashhide. Ni shahaada lel rumma kinam teerhegeh tanito.
Abayshimat salaamta
13Kottalle aktube mango xaaja liyo hanuk, qalam kee midad atnaafaco mifarha. 14Dheh ku ablo caaga. Af kee afah lel waanishno kino.
15Salaam kottaalih yakkoo. Ku kaxantoolit kolle yaysillimin. Ni kaxantoolitille lel tiya tiyah alle iysillim.
Currently Selected:
3 Yohannis 1: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia