1 Bithroos 4
4
Yallih nicmahi aysaasa
1Amaydo, Masiix xazottat araxah waaxelsiitek sarrah, atin gantah amah iggidin xisaabah sinne iskitiyanta. Amayim lel xazottat araxah waaxelsiitinnanti, zambe abaanam xabamhi sabbatah kinni. 2Amayim lel, tamaa udduuniyalle martoona sinak raaceh yane waqhtedde, nabsi farhih akkekkah, Yallih farhih martoona ciloh kinni. 3Tamaa Aki-mari aban cibdaan, nabsi farhi, sakar, jihle, tiskiriinih digirak kee xaraame kin asnaamah acbuduk tillabishshen waqhti sin dhiica. 4Tayimhi zacabah, tamaa usun aban fasaadadde tenlih angale wayteenim cibra akah takkeh sinah lel waatiman. 5Tamaa tanem kee rabtem yafrado yinqirribeh yanetiyah laakin abeenim warishoona kinon. 6Xiyaw balih xazottat araxah ten yafrado ciloh, ufayeh lel Yalla balih maroona ciloh, taymih kinni mece wari rabtemille gantah warroyem.
7Ummanimhi abayshima kab-terhxeh tanemhi sabbatah, amaydo cilleh dhaaco abittoona ciloh, sinne tibbirhiinih himma-abitanta. 8#Missilit 10:12Ummanimko bukalle lel, kaxani mango zambe alifamhi sabbatah, cilleh sittiya ikxinanta. 9Ammeererekkah lel gerha kixin mara tika. 10Yallih nicma umman caynahiya meceetih baclaysha mara tekkiinih, inkoh tamaa kabbatten nicmat muttuxuwah sittiya ukhdumanta. 11Waanishati, tamaa Yallih waanitta waanisha tiya balih; yakhdumeti, tamaa Yalli akah yoxoye xaylah yakhdume tiya balih yakhdamoo. Amayim lel, Yalli Yeesus Masiix araxah umman ginah yanabo ciloh kinni. Nabne kee reeza lel kayyah takkoo, umman gedda kee umman gedih. Amin.
Kishtanto balih waaxelsiitaanam
12Yi kaxantoolito, gira balih bololta cakanadde raddan gedda, cusubam alle tekke mara balih cibra sinalle akke wayoo. 13Masiix waaxelta xazziilittan gedda xedenanta, amayim lel kaa nabne tambulluwe gedda, xedenteenih cafaddoona ciloh kinni. 14Masiix migacah arhxitin wattimteenimko, tamaa Ufaye kee Yallih nabne sinalle tacrufemhi sabbatah barakä-lem kitin. 15Laakin sinko walaa inketti nabsi-wanna, hido garceena, hido umam abeena, hido xiyaw gondodde gaba saysha tiya yekkeh waaxelsiiteya yannaw kaalle mitane. 16Laakin, masiixto yekkemih waaxelsiitati, ta migacah Yalla yaynaboo kibah, xoolashshiite wayoo. 17Firdi waqhti kab-yerhxeh yane, akko erherhisho lem lel tamaa Yallih caredde yane maraako kinni. Nottaako erherho yekkek sarrah, tamaa Yallih mece wareh am-izzize waye marih abayshima ayim takko kinni? 18Amayim balih:
#
Missilit 11:31
“Tamaa xaqqi-wanna dagumudde gargeerimemko,
tamaa Yallih mashshi hin tiya kee zambi-wanna ayim yakkoona kinooni?”
19Amaydo, tamaa Yallih farhih waaxelsiita mari, mecem abak, sinni rooxe tamaa umun kin Khaaliqhille amaanatishoonaa.
Currently Selected:
1 Bithroos 4: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
