1 Korintos 2

Masiix masqalak takarimem warroyshaanam

1Yi saculo, anu gantah sinalle emeete gedda, waanit dhic hido kasah Yallih mashthir sinah warisho maamaatiyo. 2Yeesus Masiix kee masqalak takarime kaako bextih sinlih aniyuk akih inkim aarhigemko abayshe. 3Anu lel rukta, mashshi kee mango arharhoolih kinni sinlih iniyom, 4yi waani kee yi warroyishnan lel waanit cijaajinna kee kasah tekkem akkekkah, Ufaye kee xayla caddoyishsham kuuk tine. 5Amayim lel, sin imaan xiyaw kasadde akkekkah Yallih xayladde cikittem takko ciloh kinni.

Kas Yallih Ufayeko

6Hamme-le marahi fanadde kasti zacabah waanishna, tamaa nanu waanishnam laakin ta waqhtih kas hido lel alayi tane ta waqhtih reezonhi kas maki. 7Nanu waanishnam, tamaa dherh waqhtih basolle Yalli ni nabneh yisqirribe yine mashthir kee sucuteh yine Yallih kas kinni. 8Ta waqhtih reezonko tayim walaa inketti mafhaminna, yifhimiinih yakkeedo, nabnet Maddara masqalak takareenih anniye mirhaarhinnooni. 9Amaymih lel tayim tunkuttubeh tane:

# Isayas 64:4 “Inti ablinnixem, cokka aabbinnixem,

xiyawti afcaado axeesebinnixem,

Yalli tamaa kixin marah yisqirribeh yane.”

10Yalli tayim Ufayi araxah ni yuybulluweh yane. Ufayi lel ummannim Yallih adda raacekkah meceetih idhdhita. 11Xiyawti addadde yane ufayeko bextih, amaa xiyawtih xisaab miyatti yaarhige? Amayim balih lel Yallih Ufayeko bextih Yallih xisaab walaa inketti miyaarhige. 12Kado, nanu Yalli limo hinnim noh yoxoyem naarhago ciloh, Yallaako kin Ufaye kinni kabbatneh nanem kibah ta caalamti ufaye maki. 13Tayimhi zacabah waanishnam, xiyaw waanih araxah nudruse kasah maki. Ufayim Ufayi adde yane xiyawah caddoyishnam laakin, Ufayi yuyduruse marih waanih kinni.

14Ufayi adde anniinnixeti Yallih Ufayeko kinam kayyalle duudiino kinamhi sabbatah mikabbaata. Amayim lel Ufayi araxah tammirmirem kinamhi sabbatah lel usuk yafhamo mirhiica. 15Ufayi adde yane xiyawti ummanim yamirmire, usuk laakin walaa inkettah miyammirmire. 16#Isayas 40:13“Maddara yaydaraso ciloh kaa xangaladde tanem yaarhige tiyah miyatti yane?” Nanu laakin Masiix xangal lino.

Currently Selected:

1 Korintos 2: SCC

Highlight

Copy

Compare